محتاجه دعم نفسي ضروري

[أمون القمر]

سلام عليكن حريم

شحالكن عساكن طيبات

الصراحه حسيت بضيقه ولا شي فايده من السكوت أنا حامل في شهريه التاسع المهم الحمدلله ماشي
مشكله صحيه ولله الحمد بس هذيلا الحريم هن المشكله طفربيه وعقدنيه حشى !

السالفه إني توني داخله ثالث أسبوع من التاسع أنا عاطتني الدكتوره الولاده تاريخ 2 /7 اول الشهر الياي
كل وحده تشوفني في بيتي والا بيت هليه حتى خواتيه وربيعات إمايه وكل حد ناقص بس البشكار يقولي
إنتي بعدج ما ربيتي؟!!!

يعني أنا بكيفي متى ما أبا بربي!

وأنا أوريدي نفسيتيه تعبانه من الحمل يعني ما أحس ببوادر ولاده قريبه أخاف أعوشر

لان معظم اللي يشوفنيه يقولن جان ما تعوشرين مع إني ما كملت شهريه بعدني واللي تقولي شكلج تعبان
يعني حامل وتعبانه ومن يومين مخلصه دراسه وامتحانات كيف بيكون شكلي

مادري أنا محسسه لان هاي هرمونات الحمل مأثره فيني ومكبره الموضوع والا كيف

أنتظر ردودكم

المزيد من آخر المواضيع من نفس القسم:

• أسباب آلام الركبة بعد الولادة وكيفية علاجه
• ماهو الطلق البارد والطلق الحقيقي والفرق...
• اهم أسباب التهاب الجيوب الأنفية أثناء الحمل...
• افضل طرق الاستعداد لفترة النفاس
• اهم فوائد الحليب للمرأة الحامل
• افضل عشرة طرق طبيبعه لتسريع الولاده خاص...
• اهم نصائح للحامل البكر في الشهور الأولى
• اهم أسباب الجوع المستمر عند الحامل وطرق...
• افضل مسكنات طبيعية تخلصك من الألم أثناء الحمل
• طرق للتخفيف من آلام الظهر بعد الحمل حصري

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[wr000d]

طنشيهم هاييلا بس جيه يرمسون ما عندهم سالفة

[الخياله2008]

كلنااا نمر بنفس هالمشكله .. انتي دخلتي شهرج و3 اسابيع .. انا بعدني مادشيت وحااشريني .. عسب جي الواحد يعطي الاهل تاريخ متاخر احسن . .

انا اقولج خلي امرج عالله .. والتساهيل من رب العالمين .. والحمدلله مافيج اي االاام او تقلصات او بوادر تسبق الولاده وتعذبج وتخليج تتالمين عالفاضي .. يمكن ييج الويع مرره وحده وتربين ..
صح كثرت الاسئله تضايق بس طنشي واستغفري ..

[fdeet-roo7h]

عادي اختي يمكن الويع ايج مره وحده وتربين
انا عن نفسي كملت التاسع خخخخخ ما عليج
ارتاحي انتي و اهم شي تغذي عدل

[أمورة]

ههههههههههه حبيبتي والله سمحيلي غصبن عني ضحكت

اتذكرت عمري اول بيبي كنت شراتج

طبيعي كل الحوامل مرن بهالشي خاضه اول بيبي كل حد يزن عالراس متى بتربين جنهن بيولدنج و خايفات يفوتهن الموعد

الغاليه ادري انج طفرتي بس كل ما حد ايي يسالج قوليلهم ان شاء الله خير ولا قولي ادعولي بالسهاله

انا تميت جيه اسوي عقب ما طفرت من كل حد و لا بعد يحليلي ربيت ثاني اسبوع في التاسع و يوم يا البيبي صغير (اكيد لاني ما كملت شهري) كلوني اكل جنه بايدي مع العلم انه ولدي وزنه وايد كان مناسب مع الاسبوع اللي ربيت فيه حسب الجداول الطبية (ولدت الاسبوع 37 و كم يوم وولدي وزنه 3 كيلو و غرامات) بس شو بتقولين الناس فيهم جهل استغفر الله و ما بتيلسين تشرحين لكل حد

مهما رحتي مهما سويتي بيرمسون بيرمسون

فلا تعورين راسج معاهم خلاص اعتبريها سنه من سنن الحياه التدخلات من البيئه المحيطه

ولا تراج وايد بتتعبين اذا ما هيأتي نفسج لهالشي

و يا رب يا رب تربين بصحه و سلامه و تيبين احلى بيبي ما عليج من حد

[ام حرور]

عادي ما في وحده ما قالولها هالكلام وكل ما يقولون لي بتعوشرين اتذكر الناقة ههههههه عادي بتربين على خير يوم ربه بيأذن له
الله يسهل عليج ويعطيج ساعة سهلة

[شذى راك]

مب بس انتي حتى نحن من بداية الحمل والا الحريم يرمسن اذا قلتي تعبانة قالو بعدج انتي الا في اول الحمال واذا وصلتي لنص الحمل قالو بعدج انتي وين عن الولادة ويوم جريب بتربين قالو بعدج ما ربيتي بطنج نازلة لا بطنج مرتفعة يسون عمرهم دكاترة غير الي يطنزون على الشكل اوية منتفخة اوية شكلج متغير وتعبان يعني بدل ما يوقفون مع الوحدة ويدعون لها ويساندونها يطيحون فيها زيادة غير التعب الي تتعبة خخخخخخ وفعلا الحامل تتاثر نفسيتها بسبت تغير الهرمونات انا عن نفسي واااايد صحت وضقت وايد بس الحمدللة على كل حال
وهانت اليوم او باجر مصيرج اتربين والله العالم بساعة ولادتج ادعي ربج يسهل لج ويسهل لي وياج

[عاشقة الموضه]

بخبرج يالغاليه انتي اهون مني صدقيني انا بعدني بالسابع وكل من شافني يقولي شكلج بتربي بالسابع والله ماخذة الموضوع عادي واضحك اقول كل شي كاتبه ربي بيصير وهاذي اللي تقولي انتي مشيتج ثقيله والثانيه ام البنت لازم تكون اخف والثالثه بطنج مو بكبير وووووو
فحبيبتي طنشي واتوكلي ع الله الناس بس يبون شغله او سالفه يتسلون فيها ان حملت الوحدة مابتخلص وان ماحملت مابتخلص الزينه والشينه بيتكلمو بيتكلمو ناس فاضيه

[@شمعة الجلاس@]

ههههه عادي فديتج طنشي انتي نفسي معطيني تاريخ 5-7 وانا الحين اسبوع 37 و4 ايام تقريبا وحاشريني بعدج وبعدج ارد عليهم برايه مرتاحه ابا ولدي يطلع ع الرواتب ههه عشان احصل هدايا عدله.. المهم اني مول ما اتضايج مع ان هاي 3 ولاده لي بس الناس مثل ما هي من تدخلين التاسع يبونج اتربين جنهم بيجابلونج في الا40

لا اتفكرين وايد اهم شي الحين امشي وكلي تمر واايد وزعتر وتمي ادعي ليل ونهار و صدقيني ويع الولاده فجاه ايج انا ولدي البجر يوم اللي قبله بالليل كنت عاادي كوول يالسه مع ريلي نطالع مستر بين ههههه ونضحك وموول ما كان فيني بوادر ولاده حتى ماما قالت لي بطنج فوق بعدج مطوله المهم نفسس الليله رقدت نشيت الساعه10 على مغص خفيف وعادي قلت يمكن تقلصات عاديه الساعه2 الظهر تقريبا اتبطل الماي و بدا ويع الطلق يعني مب شرط اتكون فيج بوادر الولاده من كمن اسبوع, الطلق بيج فجاه هذا و انا كنت في اسبوع 38 يعني الحمدالله ما طولت وايد

عكس ولدي الثاني من دخلت التاسع من اول يوم كانت اتيني تقلصات ولاده كل يوم كنت اجهر الشنطه ههههه باليل و اردا فتحها الصبح يوم اشوف ماشي ولاده يعني كنت متوقعه ولادتي بتكون بداية التاسع اتخيلي متى ربيت خخ كمت 40 اسبوع بالضبط كانو معطيني 6-5 وانا ربيت 5-5 يعني شفتي مول ما يخصه فيج بوادر و لا ما فيج
كل ياهل ينزل بيومه حبيبتي وطنشي الكل واستمتعي باخر ايامج طلعي لانج عقب بتنحبسين. انا لين امس كنت سايره السينما هههه مع ان فيني ويع الظهر بس ما فكرت وايد قلت اذا ولاده بيزيد الويع بس كان عادي وكملت حواطه في المول ههههه

وايد رمست بس ابا اهون عليج و الله يسهل عليج حبيبي

[قلب الكندي]

اختي لا تتعبين نفسيتج والا شي
في الدقيقه اللي ربج كاتبنها بتربين
وطنشي، سمعي من هالاذن وطلعي من الثانيه
ترى هذا طبع الحريم مثل ما يقولون:
" الفاضي يعمل قاضي "


ربي يسهل عليج ان شاء الله
الله يقومج بالسلامه وتشوفين ضناج يا رب

[أمون القمر]

مشكورات وايد يالغاليات والله كلكن ما بفند حد منكن بردتن على قلبي

ما كنت أدري إن حد مر بهالشي مثلي

هيه والله كلامكم صح أنا بطنش وصح بعد محد بيسد عني الياهل مادري شو ذابحنهن

الله يطول عماركن ويرزقكن راحة البال

[Salwa80]

حبيبتي خذي الموضوع بروح رياضية وردي عليهم رد دبلوماسي مثل:
شفتي ولدي عايبتنا القعدة في البطن
والا خليه احسن في بطني عن الصدعة
ولا انا مو مستعيلة
ولا الله يسهل علي
والا الله واكبر لا تحسدوني خليه يكمل التاسع
يعني ردود ضحك وعلى العموم المرة الياية زيدي اسبوعين على موعدج الحقيقي عشان محد يحشرج
والله يقومج بالسلامة إن شاء الله

[أمون القمر]

مادري جيه بيحشرونيه بس هب مشكله المره اليايه بزيد شهر على الربى

ان كنت فالثامن بقولهم فالسابع

أنا مستويه أحسس بس خلاص البارحه تقوليه ختيه متى بتربين

قلتلها جان بتعقرين الجعدان اليوم بربي هههههه

[(خيماويه)]

لازم اللقافه من بعيد وقريب طنشي كل ما سالوج قولي يوم الله بيريد

[شوشو_24]

طنشيهم هاييلا بس جيه يرمسون ما عندهم سالفة