19 سنه و ياليتني أرد بنت وحتى لو فوق الــ35 سنه بس أرد بنت ..

[صدى المشاعر]

السلام عليكم و رحمة الله و بركاته ..

أول مره أكتب موضوع ماعرف شلون أكتبه بصراحه ..

بس أنا عمري 19 سنه .. و مطلقه ,, الحمدلله يارب ع كل حال .. بس المشاكل إلي مريت فيها من طليقي و أمه حسبي الله عليهم و نعم الوكيل والله ي خواتي ما تتخيلونها .. إتهمو والدتي بالسرقه .. و إتهموني بالخبث و الحقد و إني طمعانه بفلوس ريلي مع إنه كان بخيل وياي .. و مايطلع فلوس غير بالقطاره ,, و يبوني أتنازل عن حقوقي .. و يبوني أرد لهم الذهب .. و مشاكل ف الشرطه و المحاكم لين يومكم .. حسبي الله عليهم وحده وين ما راحو .. كل ما ذكرتهم ماغير إني أتحسب عليهم .. و الظلم إلي صارلي و بعمري ,, ربي بيجازيهم عليه ..

أبي كل وحده بنوته بعدها مب متزوجه لاتقولين إنج عانس .. بالعكس إنتي ورده محد شافج و تسلى بمشاعرج و رماج عقبها
صدقيني بنت كبيره و عانس على قولة بعض الجهلاء ولا بنت صغيره و مطلقه و الكل يستنى منج الزلة .. و و إلي يطالعج بنظرات طمعانة ..

صدقيني نصيبج بيصيبج .. إشغلي وقتج قد ماتقدرين .. دشي دورات طبخ .. خياطه .. قرءان كريم .. معاهد ...
صدقيني إنتي أغلا من إنج تصتصغرين من عمرج و تحبطين ممن روحج ..

لو أرد كل شي خذيته من ريلي و أرد بنت مابقصر .. بس حلاة الشي إنه مره وحده ..

أبداً لا تقولين هاذي متزوجه يعني مرتاحه و مادري شو ,, مافي متزوجه ماتمر بمنغصات .. و مافي متزوجه ماودها ترجع بنت .. إلي تقولج حياتي كاملة و بيرفكت .. و زوجي و زوجي .. يابوي لاتصدقين .. الحياه مب زوج .. الحياه إستقرار و متى ماكنتي مستقره نفسياً و متوازنة عاطفياً بتعيشين حياه سعيده ومرتاحه ..

و أهممممم شي القرررررررب من رب العالميييييييييييييييييين ..



عيييييييييييييييييييييشي حيييييييييييييييييييياتج و خلي الزواج على ربج و أهلج و النصيب ..

ربي يحفظكم و يوفقكم يارب ..

صدى ..

المزيد من آخر المواضيع من نفس القسم:

• تأثير الطلاق على الاطفال
• اشهر العلامات التي تسبق الطلاق بين الزوجين
• ابرز التغيرات في نفسية المرأة بعد الطلاق
• نصائح للتغلب على الحزن والألم بعد الطلاق
• نصائح للمرأة للتغلب على الم الطلاق
• اسباب غير مباشرة قد تؤدي للطلاق
• دعاء تيسير الزواج
• اسباب تؤدي لحدوث الطلاق السريع بين المتزوجين...
• تقرير عن تأثير الطلاق على الابناء في سن...
• اشهر اسباب الطلاق المبكر بين الازواج

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[دلوعه حمودي]

ربي يسعدج

[زم_قمر_ان]

الحمدلله رب العالمين

الزمن ما يرجع والانسان يتعلم من التجارب الى مر فيهاا

لا نزعلى هالتجربه زادتج قوة وقرب من الله

وادعى ربي دايم ربي اجرنى في مصيبتى

وخلف لى خيرا منهاا

[om mousaab]

حبيبتي والله الله يكون في عونج .الله يجعلها مغفرة للذنوب ان شاء الله.وربي يعوضك بزوج صالح يقدرك و يصونك. ذكرتيني باختي عمرها 20 سنة تزوجت 20 يوم ورجعها البيت والحين بعدها في المحاكم وياه.كان معقد و مريض وكان يحب وحدة وفيه بلاوي الله يستر.....ونحن ما كنا نعلم بهالشي.مسكينة تعبت نفسيا.مااقول الا حسبي الله على كل من يظلم بنات الناس

[أنيقة الذوق]

سبحان الله من دقايق بس كنت ارمس بيعتيه عن العرس وشعوري ومرات الوحده تحس بضيق بس ترد تستغفر وتتوكل على الله وبالصدفه الحينه قريت موضوعج اللي عطاني أمل وتفاؤل من يديد .. عسى ان تكرهوا شيئا وهو خير لكم الحمدلله على كل. حال والله يكتب لنا الخير وين ما كان

[دلع طفله]

حبيبتي الله يعينج انا من سنج بس العرس حلو مب كل زوجه تتمنى ترد بنت في منهم هيه وفي منهم لا وانتي استفيدي من تجربتج والضربه اللي تعورج تعلمج مب كل الرياييييل نفس بعض كل حد غير والحمد لله لاتضايقي وكل شي مكتوب

[قلب الذيب]

الله يسعد قلبج ويفرج همج وينصرج على من ظلمج ومن عاداج

ختيه ما تدرين هالشر اللي مريتي فيه شو من خيير فيه

امر المومن كله خير

اصبري واحتسبي الاجر على الله

وكرري دوم اللهم عوضني عوض الصابرين الصالحين ( اللهم اجرني في مصيبتي واخلفني خيرا منها )

وعسى الله يفتح عليج فتح مبين ويشرح صدرج

ونصيحه للبنات اللي ما عرسن ( مب مهم متى بتعرسين ، الاهم منو هو شريك حياتج )...؟
لان فساتين الزفاف كثيرة ولكن الحياه واحدة

عسى الله يوفق الجميع

[ميانه بوظبي]

بعدج صغيره والحياه جدامج والله يرزقج بالريل الصالح اللي يعوضج عن كل شي يارب

[آلـ غ ـنـــج]

UUUUUUUUUUUUUUUP

[شمه الشطوره]

الله يسعد قلبج ويفرج همج وينصرج على من ظلمج ومن عاداج

ختيه ما تدرين هالشر اللي مريتي فيه شو من خيير فيه

امر المومن كله خير

اصبري واحتسبي الاجر على الله

وكرري دوم اللهم عوضني عوض الصابرين الصالحين ( اللهم اجرني في مصيبتي واخلفني خيرا منها )

وعسى الله يفتح عليج فتح مبين ويشرح صدرج

ونصيحه للبنات اللي ما عرسن ( مب مهم متى بتعرسين ، الاهم منو هو شريك حياتج )...؟
لان فساتين الزفاف كثيرة ولكن الحياه واحدة

عسى الله يوفق الجميع

[الياسيه20]

ربي بيعوضج ان شاء الله باللي احسن منه..

حمدي ربج ما حملتي منه.. والا بتتبهدلين انتي وعيالج..

طلقج وانتي صغيره .. ولا انه يطلقج وانتي كبيره.. هذا دليل على ان الله يحبج ويبالج الخير بأبتعادج عنه وانتي بهالعمر..

[أنسه زيتونه]

يا قلبي ما عليج الحياه تجارب فديتج .... والعمر كله جدامج يارب ... مش من حقهم يطالبونج باي شي

طنشي وريحي بالج ... وعيشي يومج ... مطلقه ارمله او غيره الحياه عمرها ما توقف عند حد...

والدنيا مليانه باشخاص مميزين ... وان شاء الله الله بيعوضج باللي يفرش لج حياتج ورد وعطور وهنا ...


دايما الالم والمشاكل تكون بدايه لشغلات مميزه في حياه الانسان بس علينا حمد ربنا وشكره ... ع الابتلاء وتكفير الذنوب

والياي احلى باذنه ... بس الواحد يبتسم ويضحك لهالدنيا .... ولابد ف النهايه بتضحك له

والتجربه ف الصغر تصقلج وتقوي خبراتج بتكونين بعمر صغير وعقليه وخبره وحكمه عيوز

صدق الخبره والتجارب شغلات ما تقدر بثمن ... الحياه تعطينا دروس عسب نستفيد وتكون عندنا الحكمه لمواجهة الظروف


الله يوفقج يارب حبيبتي وينصرج ع اللي ظلموج ان شاء الله ... والدنيا دوراه ولا شك بهالشي بيشوفون وبيتجرعون من نفس الكاس

[candy box]

للرفع

[مس UAE]

في البدايـة اختي الله يعوضج بالي احســن عنه هذا اختبار من رب العالمــين و انتي صغيرة ادري صعبه مب شي سهل الي مريتي فيه ..
لكــن تأكدي منه انه هذا مكتوب لج في نصيبج وما تعرفين الايام اليايه اكيد احلا واجمـــل ...
وعزيزتــي اعرف وايد بنات تزوجو بعمرج وحتى ينحبسون في البيت وينضربون واهانات وتجريح وبعد الطلاق تتيسر امور ربج يعوضهن وانتي بتكونين منهم ..
الزواج عزيزتي قبل لا يكون قضاء وقدر ونصيب ترى هو اختيار ..والتسرع الي اشوفه في بنات هل الوقت هو المخيف ..لدرجة وايد بنات بعمرج تتزوج حيا الله اي خاطب ياها بدون تفكير ...الانسان ما يدخل حياة يديدة وهو اصلا مب مهيئ نفسه لتغيرات كثيره ..مثل ما انا قررت ادرس ..لازم اهيئ نفسي قبل بفتره ومثل ما انا قررت اوافق على الخاطب لازم اهيئ نفسي اني داخله حياة يديدة مجهولة ...البنت تتسلح بشهادتها وبدراستها وشغلها ...هل الزمن يخوف ..انتي مافاتج شي بالعكس ..كملي دراستج وشدي حيلج وتميزي وصدقيني الله بيعوضج في حياتج ...

[فديت ماماتي..]

ربّ ضارة نافعة

كل شي له حكمة من رب العالمين

الله يفرج عنج حبيبتي وييسر أمورج