زوجي !

[Al3'wya]

بنات انا عندي مشكله واباكن تساعدني بس بدون تجريح الله يخليكن
بس فالبدايه اشكر ربيعتي فالكلاس لانها عطتني اكاونتها ادش منه

سالفتي ويا ريلي بدت قبل اكثر من 5 سنوات انا يتيمه وعندي اخت متزوجه وساكنه فاماره ثانيه واخوين متزوجين
وانا ساكنه عند واحد منهم بس كان يداوم فاماره ثانيه وماكان يعرف عني شي بس كان همه ان ما تنقصني فلوس
وحرمته ماكانت اطيقني واصلا ماتهتم اذا كنت موجوده او لا
كنت اروح للثنويه بس كانت بعيده عن بيتنا والباص ينزلني مع ربيعتي اول الحاره ونكمل الباقي مشي يعني 20 دقيقه او ربع ساعه
ومره فرمضان ما انتبهت عالشارع وكان ريال بيدعمني المهم تم يعاتبني ،فالاخير قال بيوصلني لاهلي قلتله اخاف اخوي يشوفك وتستوي مشاكل بعدين قال خلاص خذي رقمي ومستعد لاي تعويض قلتله مالا داعي ورحت وبعد يومين مارحت المدرسه وهو شاف ربيعتي وخذ رقمي منها وقعد يدقلي لين رديت وقال انه قصده شريف وانا مثل اخته ومن هالكلام وقال ان اخته فنفس مدرستي وتعرفت عليها وصرنا مثل الخوات واكثر وهو مثل اخوي العود اللي انحرمت من هالاحساس من وعمري 10 سنين كان يعاملني مثل خواته بالضبط وكنت دايما اقعد فبيتهم خصوصا امهم اعتبرتني بنتهم وانا لقيت ام ثانيه تعطيني حنان المهم رحت الجامعه وقله زياراتي لهم وهو اعتبرني اني اختربت وصرت ارابع بنات مب زينات وانا احلفله ان علاقي مع اخته فالجامعه احسن من باقي البنات بس لان عندي واجبات ودراسه ماقمت اييهم بس السبب الفعلي لاني بديت احس اني احبه قلت بختفي فتره لاني اعتبره مثل اخوي والمفروض ما احبه وهو قطع علاقته نهائيا فيني وكلم خواته عشان يقطعون تواصلهم معاي وبعد 3 شهور بالصدفه امهم شافتني فالمول وحلفت علي اني ايي بيتهم وطبعا مارديتلها طلب وييت بيتهم وشفته وقلت لازم اكلمه وافهمه اني نفس ما انا ماتغيرت بس هو كان يتحجج ان ربيعه بيي بس قلتله انا ابتعدت عنكم لاني مابا اكون الا اختك وبس قالي انتي تحبيني قلتله اجذب لو بقولك لا قالي لحظه ربيعي بيدش روحي داخل رحت وبعد فتره رجعت انا واخته عبالنا ان ربيعه راح وانصدمت ان ربيعه هو اخوي

طبعا صارت مشاكل قريب ال5 شهور ،فالاخير تقدم الريال لي ووافقو مابقول فرحت او زعلت شعوري كان غامض خصوصا قال انه بيعتبرني اخته وزواجنا محدد بمده وبعدها كل واحد فطريجه تزوجنا وكنا نمثل ان نحن اسعد زوجين كنت اسافر معاه واطلع معاه بس كل واحد شايل همومه وساكت اطول نقاش بينا يمكن 7 دقايق كملنا سنه على هالحال والكل يسال ليش ما حملت وانا اقولهم الله ما كتب نفسيتي تعبت وسحبت اوراقي من الجامعه لان مستواي نزل وقررت اقعد فتره وعقب ارجع اكمل دراسه ورجعت سجلت فجامعه ثانيه اغلبها بنات كبار ومعرسات وحسيت اني انا مش الوحيده اللي عندي مشاكل ولقيت حد اسولف معاه وانسى همومي فخلال هالسنه اكتشفت انه يكلم بنات ويعتبرهن خواته ماعدا وحده يحبها ويبا يتزوجها وكنت ادعي ان الله اييسر اموره واموري وعدت السنه الثانيه وماتغير شي الا لما عمتي اصرت انها توديني وتتاكد من سبب التاخر فالحمل ومن اسلوبي فهمت ان في مشكله بيني وبين زوجي وباسلوبها عرفت الموضوع وقررت تكلم ولدها واللي هو فسره اني انا اللي ابا هالشي واصر ان يسويه غصبا عني اكثر من مره وانا ندمت اني قلت هالشي لعمتي وتمنيت لو اني كنت ساكته

بعد كذا شهر كنا مسافرين لان زوجي يحتاج فتره نقاهه المفروض تكون بعيد عني بس خذاني معاه عشان محد يشك بس من وصلنا وهو يدخن بشكل فضيع وحسيت عمري بختنق وكالعاده عطاني كل شي احتاجه خلال الفتره اللي بيغيبها وطلع وانا كان ناغزني قلبي ان في شي بيصير اليوم الثاني حسيت بويع فبطني ورحت لاقرب مستشفى وانصدمت اني حامل والجنين مات فبطني وانا ماعرف لحظتها حسيت ان الدنيا تسكرت فويهي وقلت الحمدلله الذي لا يحمد على مكروه سواه وتوكلت على الله وقعدت 3 ايام فالمستشفى وحالتي النفسيه من سيء لاسوء ولما رجعت الفندق لقيت زوجي فالغرفه وكان بيستلمني تحقيقات بس انصدم لما شاف ويهي ومكان ابره المغذي وسالني شو فيج قلتله ولدك وولدي مات قبل لا اعرف انه موجود رجعنا البلاد والكل عرف بالخبر وحياتنا ماتنطاق خصوصا لما قال لعمتي تخطبله اللي تحبه وانا رحت بيت اهلي واخوي قعد يهددني بس انا ماسمعت له وقعدت قريب الشهر وعقب يت عمتي ،قالتلي رجعي لان اللي خطبوها اهلها رفضو والله فرحت بس بعد خايفه من اللي بيصير عقب تحسنت علاقتي مع زوجي وحياتنا صارت احسن واحسن وهو اعترفلي انه يحبني بس من اسبوعين حبيبته طلعتلنا مره ثانيه تخيلو تبلت علي وقالت اني اعرف شباب ومن هالكلام وهو بالاساس كان يخبرها بكل شي يصير بينا فكان سهل عليها تالف قصص علي وفالاخير ماعرف كيف خذت رقمي ودقتلي وقالتلي والله لخلي حبيبي يرجعلي وسكرت وقعدت ادق وادق ومحد يرد والخبيثه قالتله ان هذا رقم اخوها وانا ادقله وهو صدق ورجع البيت وقعد يضربني ضرب والله حسيت روحي بتطلع لولا اخوانه وابوه كان مت من الضرب وكان للاسف بيطلقني بس عمي عصب عليه وتم يستغفر اخوي عرف بالموضوع وحلف انه ما يرجعني له واعتذرلي لانه ضلمني واهملني عشان جي وصلت لهالمرحله بس يابنات امس رحت وفحصت وطلعت اني حامل والله فرحت بس قعدت اصيح ماعرف ارجعله والا لا خصوصا اني امس طرشتله بوكس فيه نتيجه التحليل ولبس بيبي وهو شافه بس ما رد علي لين الحين صدق احس اني انجرحت لما مارد علي وشو اسوي دخيلكن شورن علي

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

[Eleena]

ااااه والله عورتيلي قلبي انربط لساني عن الحكي ما اقول غير الله يعينك ويهدي زوجك وربي يتمم حملك ع خير وتردي بيت زوجك وان شاء الله ربنا بحنن قلبه عليج وبيسعدك وبريحك بدل العذاب والتعب الي تعبتيه وآسفه حبيبتي اذا ضايقتك بشيء

[طيف الغربة]

الله يعينك اختي ويفرج همك لا تردي اللحين ارتاحي انتي حامل وتحتاجين للراحه

وهو عرف بأنك حامل لو فيه الخير المفروض يرجع لك ويراجع عمره

وتردين معززة لانك ببساطه ماغلطتي بشيء معه هو الغلطان

اسمحلي اختي علاقتكم ابتدت بغلط عشان كده كل هالمشاكل الرجل الي فيه الخير من اوله ينعرف

ما بزيد عليك الي انتي فيه واسأل الله ان يكتب لك مافيه الخير

[مراسيل الوفاآ]

اسمحيلي، ماقدر اقولج غير انه ريلج مب ريال
والسموحه منج مره ثانيه، بس ريال رضى ع
عمره يرمس فلانه وعلانه ع اساس انهن خواته
وحب له وحده غير عن حرمته ويوم وحده منهن
بس قالت حرمتك فيها وفيها، قام يضربج !!
لو كل اللي استوى حقيقه ف ها مب كفو الوحده
تعيش وياه . . ماضيج وياه لا تربطينه بالحاضر
لانكم تزوجتوا ع سنه الله ورسوله ومحد يقدر ينكر
علاقتج به يعني ما في مجال حد يجرحج ب شي
الا اذا كان لج يد ف اللي يحصل سواء لج ولا لريلج


ماعرف شو بتعتبرين ردي نصيحه
ولا تهجم ع ريلج، بس بنشوف رد الخوات . .


الله يتمم حملج ع خير وييسر امورج

[دلعي غيـر]

اسمحيلي، ماقدر اقولج غير انه ريلج مب ريال
والسموحه منج مره ثانيه، بس ريال رضى ع
عمره يرمس فلانه وعلانه ع اساس انهن خواته
وحب له وحده غير عن حرمته ويوم وحده منهن
بس قالت حرمتك فيها وفيها، قام يضربج !!
لو كل اللي استوى حقيقه ف ها مب كفو الوحده
تعيش وياه . . ماضيج وياه لا تربطينه بالحاضر
لانكم تزوجتوا ع سنه الله ورسوله ومحد يقدر ينكر
علاقتج به يعني ما في مجال حد يجرحج ب شي
الا اذا كان لج يد ف اللي يحصل سواء لج ولا لريلج


ماعرف شو بتعتبرين ردي نصيحه
ولا تهجم ع ريلج، بس بنشوف رد الخوات . .


الله يتمم حملج ع خير وييسر امورج

يعل تنكسرر ايد كل ريال يمد ايده على حرمته يــارب

[ام براق]

يا ربي الله يعييينج قصتي كانها من قصص الافلام صراااحه. بدعييلج. والله. ماعرف انصحج ف هالحاله الله يسخر لج زووجج

[امراه]

الله يعينج الغلا ويفرج همج صراحه قصصكم اتحير خلاص انتو الا بعض مااقتنع بعده بهالشي

[أم راشد العين]

الله يعينج

[شرين علي]

الله يعينج بس الطفل مش معناه انه هو راح يكون زين معاج لو رجعتي له انتبهى لنقاط وايد الحياة الزوجية ابدا ما تقوم على الاهانة ودوس الكرامة

[فراشة فوشية]

حبيبتي راجعي نفسج عدل، ولازم وايد أشيا تتغير ف حياتج

قبل لاترجعين له فكري عدل، فكري ف أسلوبج وتصرفاتج

غلط اتكونين شخصية ضعيفة وماعندج أي كرامة، سكتي عن أشيا وايد كبيرة

فكري عدل واستخيري، ولاترجعين له إلا وانتي مغيرة نفسج كليا، وبعد ماتشترطين عليه انه يترك خرابيطه ويحترمج ويقدرج عشان اتعيشون مثل الناس

والا ربي ولدج في بيت أخوج أبرك لج من أبو بهالشكل

الله يهديه ويصلحه واييسر أمورج حبوبة

[ss91]

الله يصلح بينكم و يسخركم لبعض

[قلوب حلا]

الله يعينج

[^GalaXy^]

الله يعينج ويسخر لج ريلج
قصتج جنها فلم!

[ضيقة القلب]

الله يسخركم لبعض

[بكور علي]

دقي عليه وقوليله أنا برجع لبيتي وبقعد عند زوجي ولو رحتي لبيتك فجأة بيكون أحسن ومهما يكون هو زوجك وأبو اللي ببطنك ولا تقولين لأهلك أنك بترجعين لزوجك تمسكي فيه وعيشي حياتك معه بسعادة إن شاء الله
والله يسخركم لبعض وربي يفرجها عليك ويجعل هالمولود وجه خير عليكم يارب