ابغي اعرس ادعولي بليز

[مريم الريم 89]

مرحبا بنات,,,,
بدخل في الموضوع على طول بدون اي مقدمات,,

يا بنات انا مهموومة ومضاايقة واايد,, ابا اعرس,, خلاص وصلت حدي,,, الحمدلله انا مب ناقصني شي وما ايعيبني شي.. بس نصيبي ما ياني الين الحينه,,,
انا بنت عمري في العشرين وحلوة ونسبي وااايد ايشرف والحمدلله متعلمة وجامعية بس ما ياني نصيبي,,
انا ما ابا الا الحلال والستر من رب العالميين,,,
درب الحرام سهل بس خوفي من ربي يمنعني,,,

صدقوني يا بنات ما تم حد من معارفنا واهلنا الا وعرس.. حتى الي اصغر عني,, وانا تامة في بيت اهلي ,,

الحمدلله انا انسانه متدينة ومحافظة على الفروض وما ارضى بالحراام ابدا..

انا تعبت والله تعبت,,,
ودي اتكون لي حياتي الخاصة,,, وبيتي الخاص,, وعيالي اللي ناوية اربيهم على الدين والاخلاق,,,

الحمدلله انا مستانسة ويا اهلي,, ومرتااحة وياهم وموول ما قصرو فيي بس بعد حاجة البنت للزواج ذبحتني,

بليييز يا بنات ادعولي,, انا محتاجة الزواج وااااايد وااااايد

المزيد من آخر المواضيع من نفس القسم:

• اهم النصائح التى تساعد المطلقة على إعادة...
• نصائح هامه للفتيات المتاخرات عن الزواج
• نصائح للمرأة المطلقة لتبدأ حياتها من جديد
• رسالة هامة إلى حاملة لقب مطلقة
• اهم نصائح لحل مشكلة المتأخرات عن الزواج
• نصائح هامة لكل مطلقة كوني منطلقة لا مقيدة
• الزواج الثاني للمطلقة وطرق التعامل معه
• اجمل دعاء لتيسير الزواج
• نصائح ذهبية لكل متأخرة فى الزواج
• هل يمكن البدء من جديد بعد الطلاق

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[نور زوجها]

أسأل الله العظيم يا من بيده ملكوت السموات والأرض انه يرزقج بولد الحلال اللي يسعدج وتبشرينا

نصيحة أختي استغفري وايد وتصدقي وأبدا لا تهملين قراءة البقرة... والله بيسر لج كل اللي تتمنينه اذا فيه خير لج

ودايما ادعي وقولي: يا محب الحلال يسر لي الحلال ... من قلبج...

دعواتج

[بنت الشوامخ]

عسى الله يرزقج الزوج الصالح اللي تقر عينج فيه بالقريب يارب
كل بنت بهالدنيا بحاجة للزوج
وانا مابقول لج لا تو الناس وبعدج صغيره ، عادي هذه فطرة بالانسان وانتي يمكن لج رغبة اكثر عن غيرج بهالسن بالارتباط والاستقرار وفتن الدنيا كثيره ، حلو انه البنت تطلب العفاف والستر


بس انتي تقدرين تساعدين نفسج بهالموضوع والطريقه
بالدعاء كل وقت وكل ساعات اجابه شدي حيلج ولازم يكون عندج يقييين وتفائل انه الله بيجيب دعائج ولا تنحبطين

احس الدعاء هو اقوى سلاح والحمدلله انتي انسانه تخافين الله وملتزمه ومانسيتي رب العالمين فكيف تبينه ينساج ومايرزقج وهو يرزق حتى العاصيين اللي يغضبونه

الله رحيم وقريب مجيب الدعاء

ترى مب مهم متى تعرسين
المهم منو تاخذين

ياما بنات عرسو وهم صغار بس تطلقو او عايشات بعذاب


وعسى الله يرزقج الريال اللي يصونج ويراعيج

[ميانه بوظبي]

الله يرزقج بالزوج الصالح وبما انج متدينه اكيد تعرفين انه كل شي قسمة ونصيب وادعي ربج والله مابيخيبج ان شاء الله

[sarah161]

الله يوفقج بالزوج الصالح الي تستاهلينه. بعدج صغيره حبيبتي لا تفكرين في الموضوع ورزقج بيجيج. اصبري وبيكون حظج أحسن من غيرج. لا تقارنين نفسج بأحد صدقيني انتي ماتدرين الناس ايش شايله من هموم ومشاكل , تفائلي وان شالله حظج بيكون حلو!

[الاميرة11]

عسى الله يرزقج الزوج الصالح اللي تقر عينج فيه بالقريب يارب
كل بنت بهالدنيا بحاجة للزوج
وانا مابقول لج لا تو الناس وبعدج صغيره ، عادي هذه فطرة بالانسان وانتي يمكن لج رغبة اكثر عن غيرج بهالسن بالارتباط والاستقرار وفتن الدنيا كثيره ، حلو انه البنت تطلب العفاف والستر


بس انتي تقدرين تساعدين نفسج بهالموضوع والطريقه
بالدعاء كل وقت وكل ساعات اجابه شدي حيلج ولازم يكون عندج يقييين وتفائل انه الله بيجيب دعائج ولا تنحبطين

احس الدعاء هو اقوى سلاح والحمدلله انتي انسانه تخافين الله وملتزمه ومانسيتي رب العالمين فكيف تبينه ينساج ومايرزقج وهو يرزق حتى العاصيين اللي يغضبونه

الله رحيم وقريب مجيب الدعاء

ترى مب مهم متى تعرسين
المهم منو تاخذين

ياما بنات عرسو وهم صغار بس تطلقو او عايشات بعذاب


وعسى الله يرزقج الريال اللي يصونج ويراعيج

[ملاآك قلبكـ،،]

يا حبيبتي
الستر مش مرتبط بالريال
وانتي بعدج صغيره بالعشرينات

توها الحياه جدامج

حبي الحياه هي بتحبج
لا تيلسين تتذمرين عشان الزواج

يمكن يكون خير لج
في غيرج يقولون ليتنا ماتزوجنا

[احلى بعفويتي]

الله يعطيج ع قد نيتج حبيتي .. ويرزقج الزوج الصالح ..

[الاميرة11]

الله يعطيج ع قد نيتج حبيتي .. ويرزقج الزوج الصالح ..

[Black eye.s]

الله يرزقج ويرزق جميع امة محمد ويستر علينا

[مثلي قليل]

يامن أمره بين الكاف والنون واذا قال كن فيكون يارب أن يجمعج مع ولد الحلال عاجلا ييارب العالمين

[هجير الشمس]

نصيحه لا تخلين هم الزواج هو كل شغلج بالحياه
وعشي بقناعه روحيه ان التاخير هو خيره
وثقي ان الله يكتبلنا الافضل دوم
واكيد بيي اليوم اللي بتاخذين فيه اخير الشباب
بس لا توترين روحج كل ما مر فيج عمر يديد
وكلي الامر كله بيد الله وعيشي حياة العزوبيه بكل حلوها
والله يكتبلج اللي تحلمين فيه يااارب
بس خلج قريبه من الله بالدعاء
موفقه يالغلا

[future dreams]

حاسين فيج لكن الي انتي فيــه من تفكيــر وهم وضيق مؤشر سلبي لمرحلة ممكن تتطور لإكتئاب بسبب هل الموضوع ..
الزواج قسمه ونصيب لا الشهادة ولا الحسب ولا النسب ولا اي شي بيجدم هل النصيب او بيأخره ...
السعادة مب بإيد ريال ...
انا معاج انا بعد اتمنى اعيش حياة مستقره وبيت وريل وعيال ودي بظفر طفل واحد بس بتكون اجمل هديه ربي لي في هل الدنيا ...
لكـــن مع ذالك صابرين ...تزوجو بنات الاهل ...ونحن قعدنا ..بس صابريـــن ...تزوجو ربيعاتي وما شاء الله الي عندها طفلين وثلاث وبعدنا صابرين ...3 الى 4 سنوات بوصل 30 سنه ...بعدنا صابريــن ...وثقتنا بالله بأنه كل شي مكتوب لنا فيه خير ...مثل ما ربج اختارج تكونين بنت فلان الفلاني اكيد كاتب لج تكونين زوجة فلان الفلاني ..صبري عمرج بالتفائل انه ربج اختاار لج الاحسن والافضل وهل الشي ما اي بسرعه ...ياما تمنيت اشياء في حياتي وتحققت بعد فتره طويله كل ما اقارن عمري بغيري استغفر ربي لانه ربنا رحيـــم كريــــــــــــم يمكن زواج ربيعتي او بنات العايله الصغار بالنسبه لهم ابتلاء صح ؟
ما بكتب لج النصايح المعتادة الي نسمعها دايما انتي تعرفينها اكــيد من استغفار ودعاء ...
لكـــن اتمنى تقارنين نفسج بالي اهم اقل عنج ...من ناحية النعم الي عندج ...وتقولين الحمدلله على كل حال وتعيشين حياتج وتشغلين عمرج بأشياء تفيدج ..

[أنيقة الذوق]

الله يرزقج بالزوج الصالحه الغاليه والله يعطيج على قد نيتج ... عليج بالدعاء الغاليه وصدقيني رب العالمين عمره ما يرد انسان يبا الحلال والستر بس اصبري .. خلج دايما على وضوء وكثري من الصدقه لو كل يوم درهم واحد بس وكل ما تذكرتي الزواج تمي قولي سبحان الله والحمدلله ولا إله إلا الله والله أكبر وكثري من الثناء على الله والحمدلله وان شاء الله بتشوفين الخير ..

[مريم الريم 89]

ثانكس لكل اللي يردون و شجعوني و يدعولي الله يرزقكم كلكم يارب كل خير