الوظيفة والخطوبه ..

[شمالية وافتخر]

انا من راي لازم من بداية تخبرينه انج تبين تشتغلين عسب علاقة تكون مبنيه ع صراحة مب حلوة انج تشتغلين وما تخبرينه لازم من بداية تحطينه جدام امر الواقع

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[احلى بعفويتي]

هلا ما يخصه فيها فالخطبه .. لا هو ريل و هو بعل ليش يتفلسف
و اذا هي تبا الشغل و انا اقولها خلها اتم فشغلها احسن لها .. و تشترط عليه ان تكمل فالشغل ..

[روضه123]

حبيبتي المفروض من البدايع تكونين حاطه شرط انج تشتغلين عقب مب من حقه يعترض

اما لو مب شارطه احس عادي عقب يقولج اطلعي ف انتي توكلي علئ الله وقبل الملجه قوليله فلان تراني اشتغل وبكمل بشغلي خلي حد يقوله ان شرطج الشغل وان شاء الله ربي يوفقج

[nooraaaa]

اذا كان الرجل على خلق و دين و قادر يكفي حق بيته و طلب من زوجته عدم العمل خلاص مب لازم تشتغل . يعني هي الوظيفة طايرة

شو حصلنا من الوظايف غير التعب

[ابتسامتي غير]

الافضل يعرف عشان تعرفون موقفه بدال ما تردون تختلفون عقب الملجه

[بهلولة]

المفروض هو يحط شروطة انه ما يريدها تشتغل
وهي تحط شروطها انها تبريد تشتغل
وعقب كيفهم اذا بيتفاهمون
لكنه موضوع مهم وحساس

[مراسيل الوفاآ]

من رايي، مهم يخبرونه صح بعده مب زوجها لكنه بياخذها (ان شاء الله)
يعني لو هو ف باله انه ما يبا حرمته تشتغل وعرف هالشي ع الاقل يقدر
يقول رايه ف هالفتره وهي بعد تقرر تترك الوظيفه او لا ولا انها تشتغل وعقب
الملجه يقولها تستقيل وتستوي مشاكل بينهم، وشي ثاني اللي هو الشرط قبل
الزواج، يعني اشوف انه هناك شروط تستاهل اكثر من انه الوحده تحط شرطها
انها تشتغل، لانه مع الايام هالشرط يمكن يتم كمن سنه لكن عقب بمجرد انه الزوج
يقولها لا تشتغلين اكيد بتسمع كلامه وما بتشتغل خاصه لو بينهم عيال والمحكمه
ما بتغصب الريال يلتزم بالشرط لانه ما فيه ضرر ع الحرمه . .

ف اشوف انه هالشرط ماله داعي ينحط وتستوي حساسيات لو الريال ما ينعاب
ومع الايام كل وحده ادرى بريلها وتعرف كيف تخليه يقتنع ولو ما اقتنع تراها
خيره . . مجرد راي

[وجدان الفجر]

أختي لازم يعرف , لأنه مثل ما الوحدة لها الحق أنها تشترط أنها تشتغل بعد الزواج فللخطيب الحق أنه يشترط ويطلب زوجة لا تعمل لو أراد ذلك.
وبصراحة لي رأي شخصي في موضوع عمل المتزوجة: لو الزوج قادر أنه يصرف على زوجته , ليش تروح تشتغل وتتبهدل ؟ مهمة الزوجة الأهتمام ببيتها وزوجها وأولادها وتكون ملكة في مملكتها . ونصيحة يا أخواتي لا ترفضوا الزواج علشان الوظيفة . هذا رأيي الشخصي جداً وربي يوفق الجميع .

[حلو مالح]

اختي العزيزة بما انك وافقت على الارتباط بشخص بدك اتكملي حياتك معو لازم تحك الصراحة وما اتخبي علي اي شي وخصوصا موضوع مثل الشغل واذا انت حاب تشتغلي احكيلو واقنعي اذا كان شغلك مش مختلط وفي مكان كلو موظفات الله ايوفقك وايتمم زواجك على خير

[عيمانيه]

لو تبين تشتغلين عقب العرس

يفضل أنج تشترطين هالشرط

لأنه بما أنه هو ولي أمرج

لو مستقبلا لا قدر أختلفتو عالشي هذا

و ما كنتي شارطه أنج تشتغلين

الشي بيكون لصالحه

[ملاآك قلبكـ،،]

يعني اللي فهمته من الردود ان رأيه مهم

من رأيكم يفاتحون الريال بخصوص الوظيفة؟
ولا الاحسن عقب الملجه تخبره لو وافق خير وبركه بس لو فرضاً اعترض ومايباها تشتغل شو الحل؟

رايه مش مهم بقدر رايج انتي
انتي تبين الوظيفه
توظفي
يباج مايباج بكيفه
ماتوقف الدنيا على واحد
وتذكري ان بهالوقت الوظيفه مهمه
وناس وايد مب لاقيه وظايف
وماتدرين ريلج من اي نوعيه بيكون

زين مب زين
ماتدرين شو بيسوي فيج

فوظيفتج بتحميج

لانه لو شو ماسوا
يعرف انج مابتنكسرين

فانا انصحج لا تفضلين ريال على وظيفه

[AD Classic]

شكرا خواتي .. الموضوع يحير والله يقدم اللي فيه الخير ان شاء الله ..

[Pheno-m-enon]

بما انج ف الخطوبة.. ما أظن انج ترمسينه بس لو ترمسين خواته قوليلهم انج ناوية تتوظفين
او اهلج يقولون حق اهله بطريقة غير مباشرة
بعدكم على البر و حلوة الصراحة بين الطرفين

[AD Classic]

مشكووره اختي

[الأصالة]

اكيد لازم يعرف لانه هذا متقدم لج على سنة الله ورسوله وبيكون زوجج باذن الله
واذا حابه وظيفتج اشترطي عليه فالعقد ان ما له دخل في شغلج

والله يوفقج