انخطبت .. لكـــن ...

[ذبحتهم عيوني]

السلام عليكم ورحمة الله وبركاته

شحالكن ؟؟

ماعرف اذا حطيت هالموضوع ف المكان الصح والا لا؟

انا عندي استفسار ف موضوع يخص الزواج

وكتبت الموضوع ف المنتدى لاني ابا مساعدتكن

واعرف انكن ما بتقصرن ان شاءالله


انا تخرجت من الكليه شهر 6 يعني تقريبا من 6 اشهر

وطبعا بابا كان رافض فكرة اني انخطب ف فترة الدراسه

بس من اخر اسبوع لي ف الكليه ورد موضوع الزواج

خطبوني من عقب ما خلصت 8 اشخاص

وانا كنت رافضه الفكره والموضوع

انا للاسف حاطه ف بالي شخص معين واحبه <<<<< اعرف اني غلطانه بس ها اللي استوى وكنت اتمنى لو يرد الزمن وما اعرف هالشخص

بس ف نفس الوقت اعرف انه صعب ارتبط بهالانسان

اخر واحد خطبني كان واحد من معارفنا وانا اعرف انه هو يباني من ايام ثاني ثنوي يعني من 7 سنوات

بس انا عمري ما فكرت فيه

يوم خطبني فكرت ف الموضوع لاني الانسان اللي احبه محير بنت عمه و لاني كنت تحت ضغط الموضوعيين

استعيلت و وافقت عليه

المهم اللي خطبني بعده ما اشتغل بس هو خطبني لاني عرف اني تخرجت وخاف انه يخطبني واحد ثاني و وافق

قال انه يبا يتواصل وياي وتواصلنا فتره بس حسيت اني مب مرتاحه لاني دوم اقارنه بالثاني ولانه هو ما كان يهتم فيني

وانا كنت اتمنى انه هو يهتم فيني عسب اقدر انسى الشخص الثاني

يعني حتى ف يوم تخرجي ما حسسني انه مستانس والا اهتم بهالشي

انا عقب فتره قلتلهم خلاص ماباه ورمست اهلي وخواته واتفقنا انكنسل الموضوع

وف هالفتره شفت بنت عم اللي احبه وكنت احاول اسحب منها الكلام وفهمت منها انها هي تحس انه ما يحبها

وانه اذا حد خطبها غيره بتوافق

انا استانست وقلت خلاص ما بفكر ف هالموضوع وبترياه وانا اعرف انه هو يحبني

بس ف نفس الوقت انا ماعرف كيف ردت فعل اهلهم من هالموضوع

وهو دوم يحاول يوصلي اني اشوف حياتي لانه يعرف انه انخطبت اكثر من مره

واستوى شي خلاني ارد اختبص مره ثانيه

الشخص اللي خطبني و وافقت عليه اول مره

رد يطرشلي وقالي يباني افكر ف الموضوع مره ثانيه

وانه هو يباني من خاطره وهو اختارني مب اهله

ماعرف كيف اتصرف وشو اسوي؟؟

اتمنى تساعدني لاني وايد تعبت من هالموضوع

الشخص الاول مشكلته كبيره وموضوعه بيطول وايد لانه بعده مب جاهز

والشخص الثاني يحبني واهلي يموتون فيه بس انا مب قادره احس فيه

وكل ما اشاور حد يقولولي ما يخصنا هاي حياتج وما نبا نأثر فيج

وكل اللي بيردن والا بيمرن ع الموضوع مشكورات وايد

وربي يسعدكن ويوفقكن

ودعواتكن لي

كتبت وايد
السموحه منكن

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية