يومياتي success is an option

[بنت الهنوف]

مرحبا .. شخباركم حبيباتي

اليوم قررت ابدا يومياتي في خسارة الوزن

أنا بدأن الدايت من سبوعين , هذا 2 سبوع لي

قريت وايد من تجارب الخوات ف القسم و تحمست و قلت خلني

اطرح يومياتي منها اتشجع و اشجع الخوات اللي يبن يدخلن ويايه

أنا وزني ف البداية كان 89 و وزني الحالي 87 و الهدف الأول 79 ان شاء الله

و ما بوقف لين اوصل الهدف النهائي و هو 58 يارب يارب أوصل له

بخصوص النظام اللي اتبعه ، احاول اتخذ نظام التخفيف ، يكون 3 وجبات و 2 سناك

التمارين اللي اسويها هي بديت امس تمارين جيليان jillian michaels 30 day shred

بالإضافة أمشي ساعه كاملة

مثل ما قلت بنات أي وحده تبا تدخل وياي ما عندي اي مانع واي وزن عادي عشان نتشجع و نفيد بعض

عنوان الموضوع هو جزء من عبارة سمعت جيليان تقولها ف حلقة losing it with jillian

كانت تقول لوحدة من البنات Why are you gonna choose failure when success is an option

و فعلا , ليش نوقف و نرضا بالوزن اللي نحن فيه اذا كنا قادرين نحصل على شي احسن

أنا صار لي جم سنة أعاني و يا الرجيمات و الدايتات و كل وحده اوقف و ما اكمل حتى قبل لا اوصل حق اول هدف

بس خلاص لين هني و ستوب ، من سبوعين كنت ارمس ربيعتيه وكانت تقولي تبا تشترك ف جم عشان يترتب جسمها
و هالشي كان بمثابة الصفعة اللي خلتني اوقف على حيلي و انهي هالمعاناة مع هالوزن و شكل جسمي

اللي مب راضيه فيه ابدا قلت ف خاطرية انا اقدر و قاعده اشجع نفسي اول بأول ووقت ما حسيت اني بديت امل

دشيت القسم وقعدت اقرا يوميات البنات و فعلا حسيت بحماس ما حسيت به من فترة وايد طويلة و كنت احاول اني ارجعه و ما قدرت

فحبيت اشكركم خواتي على هالشي و ان شاء الله بحاول بأحسن ما عندي اني انقص وزني

المزيد من آخر المواضيع من نفس القسم:

• اهم أسباب تراكم الدهون في الظهر وطرق التخلص...
• بغيت خلطة تسمين
• حيل ذكية لخسارة الوزن بفعالية وفي وقت قصير
• اسرع طريقة للحصول على بطن مسطح
• اهم أسباب ثبات الوزن أثناء الرجيم وطرق...
• احذري هذه الانظمة فهي تخسس لكن تدمر
• رجيم قاس جدًا سريع المفعول لنسف الدهون بالجسم
• تعرفي على رجيم الكورن فليكس
• تعرفي على جدول في السعرات الحرارية للخضروات
• افضل حمية غذائيّة لإنقاص الوزن بسرعة

[روح_الإمارات]

معاج وزني 82 هدفي الأول ٧٠ والثاني ٦٠

[بنت الهنوف]

مرحبا فيج أختيه روح نورتي

يلا شدي الهمه و ان شاء الله توصلين لهدفج

[بنت الهنوف]

تقريري لليوم

نشيت الساعه 8 و أول ما نشيت حسيت بجسمي و الألم

بسبب تمارين جيليان مال أمس و حسيت براحة و رضا

المهم نشيت و تريقت 2 توست اسمر + شرايح جبن قليل الدسم + بيض و كوب جاي كرك

حبيت أوضح بنات اني دايما أكل على راحتي ف الريوق لنه ينحرق طول اليوم

بعد الريوق ب 3 ساعات سويت تمارين جيليان لفل 1 ، و حسيت بسعاده لنه في حركات امس ما قدرت

اكملها بس اليوم ضبطتها و عقبها ريحت ربع ساعه بعدين مشيت ساعة

بعد ما خلصت حسيت باليوع فكلت لي تفاحة - سناك 1

و الغدا كلت لي حبة صدر دياي + سلطة ، و كثرت ف السلطة

قبل شوي خذت لي حبتين بسكويت دايجستف - سناك 2

و العشا ان شاء الله بيكون روب مع خيار لني ابا اركز ع البطن و اخسر الكرشة اكثر شي

و صح نسيت اقول اني للحين شاربة لترين و نص ماي

و باجر بيكون يوم الميزان + يوم مفتوح واخيرررا

اليوم كنت اطالع جدر العيش اللي من زمان ما كلت منه و كنت اقول ف خاطريه الوعد باجر

[ميمي الشقية]

موووووووووفقة

[نانا الحيرانة]

ما شاء الله عزيزتي تابعي وبنشجعج دوم
حلو نظامج وفعلا هذا احسن شي

[رعْشة ورِيد !]

ماشاءالله حبيبتي ..
الله يوفقج ان شاءالله يارب ..
انا حابه انضم وياج اذا ممكن ..
طولي :163
وزني :81.5
و ببدا ان شاءالله من يوم الاحد .. و بحط جدنظامي اللي بتبعه ..
مع بعض القوانين اللي لازم ما يخلى منها كل دايت .،

[بنت الهنوف]

موووووووووفقة

تسلمين فديتج

ما شاء الله عزيزتي تابعي وبنشجعج دوم
حلو نظامج وفعلا هذا احسن شي

تسلمين و الله , شكرا , ها اللي انا اباه تشجيعكم

ماشاءالله حبيبتي ..
الله يوفقج ان شاءالله يارب ..
انا حابه انضم وياج اذا ممكن ..
طولي :163
وزني :81.5
و ببدا ان شاءالله من يوم الاحد .. و بحط جدنظامي اللي بتبعه ..
مع بعض القوانين اللي لازم ما يخلى منها كل دايت .،

هلا و الله رعشة وريد ، اكيد ممكن حبيبتي حياج
بانتظارج فديتج

بالتوفيق يارب

شكرا فديتج

[akka]

بالتوفيق يارب

[بنت الهنوف]

بنات

نشيت من ساعة , و قلت يلا وقت الوزن

و انا متحمسه و اترقب النتيجه اللي بتظهر لي و واثقة كل الثقة

و جاااااان انصصصصصصدم

ما تغير وزني , لا و شكلي زايدة جرامات

حاولت اواسي نفسي , و صار لي ويع الدورة من جم يوم فقلت يمكن عشانها

احتبسن السوائل ف الجسم و جي غير اني بديت تمارين جيليان و اكيد انه جسمي

قاعد يبني عضلات , بس مع ها منحبطة , و الله اني ملاحظة التغيرات ف ثيابي و جي

بس ما ادري بشد حيلي انا و بستمر على الرياضة اليوم بس مثل ما قلت مخلتنه يوم مفتوح

و الحين بطالع الدراما الكورية rooftop prince عشان ترتفع معنوياتي شوي T.T

[بنت الهنوف]

مرحبتيييين بنوتات و حريمات

تقريري اليوم 22 - 11 - 2012

ممم طببعا رحت اتريق و انا منحبطه ومضيجة

تريقت كوب جاي كرك + فطيرتين سبانخ + فطيرتين جبن و عسل

عقب الريوق للأسف يتني الدورة حتى ما امداني اسوي تمارين

بس تطمنت ان الوزن زاد شوي بسبب الدورة و بوزن السبوع الياي مرة وحده ان شاء الله

الغدا تغديت مجبوس دياي + سلطة + روب مع خيار بس بقولكم شي

انا حطيت لي في صحن اصغر من اللي كنت اكل فيه قبل الرجيم

و مع هذا ما قدرت اكل كل اللي فيه , حتى ما وصلت مرحلة الشبع

و الحمدلله بجي ما خبصت وايد , احس اللايف ستايل عندي نفسه قاعد يتغير

كنت وايد مكتئبة ويتني فكرة اني استسلم بس شو سويت , قعدت افرفر ف النت

واجوف انواع التمارين جيليان + انسينتي \ الجنون , و طالعت صور قبل و بعد

للناس اللي طبقوها و بالعكس واااااااااااايد تحمست و قعدت انزل تمارين

وانا عندي همه للدايت اكثر من قبل و ان شاء الله بزيد تمارين على يومياتي

ابا جسمي ينشد و يتغير عن جي , ابا اطالع عمريه ف المراية و احس بالرضا

و بجي لقيت حل للاكتئاب و الاستسلام و تخربيط الدايت

و عقب طلعت ويا اهلي و رحت المول و تعشينا ف بيتزا هت

كلت بيتزا بس قاومت البيبسي حبيبي شربت شوووي عن خاطري

بس كنت كل ما اطالعه اقول فبالي الكرشة الكرشة الكرشة

تعرفون ان البيبسي و المشروبات الغازية هي السبب الرئيسي للكرشة

بخصوص الماي , اليوم للأسف شربت لتر و نص بس

الرياضة بحاول اخفف و ما اسوي شي خلال الدورة و عقب بكمل ان شاء الله

حطيت خلفية فوني صورة مغنية كورية وايد يعجبني جسمها عشان اتشجع

و بجي انتهن يومياتي لليوم


"Nothing tastes as good as being slim feels"

[نانا الحيرانة]

ماعليه حبيبتي معروف وقت الدوره يصير احتباس سوايل الاسبوع الاي بتشوفي نزول حلو
المهم تكملي

[روح_الإمارات]

هييه صح معليج بتنقصين
الاسبوع اللي طاف كانت عندي الأخت و توقعت
أزيد. بس الحمدلله نقصت. ثلاثمائة. غرام

[بنت الهنوف]

ماعليه حبيبتي معروف وقت الدوره يصير احتباس سوايل الاسبوع الاي بتشوفي نزول حلو
المهم تكملي

تسلمين و الله ، انتي اللي تتابعين وتشجعيني
يلا ان شاء الله احصل عمري نازلة

هييه صح معليج بتنقصين
الاسبوع اللي طاف كانت عندي الأخت و توقعت
أزيد. بس الحمدلله نقصت. ثلاثمائة. غرام

الحمدلله , الله يسمع منج و انقص

[بنت الهنوف]

تقريري حق أمس 23-11-2012

السموحة نزلته متأخر بس ما كان عندي وقت

المهم

الريوق كان كرواسون جبن و جاي كرك

سناك 1 - تفاحة خضرا

الغدا 5 خواشيق عيش + سلطة + سمج مشوي

أحاول قد ما اقدر اذا يا ف خاطري شي اكله , أخاف احرم عمري طول الاسبوع

و يوم اليوم المفتوح انفجر مره وحده و تعرفون الواحد إذا خبص صعب يرجع

للنظام اللي قبل ف أجبر نفسي اني التزم

سناك 2 - برتقالتين

العشا - حبتين بسكوت دايجستف + روب قليل الدسم

بخصوص الرياضة حاولت اخفف قد ما اقدر و مشيت نص ساعه مشي خفيف

الماي - شربت لتر و نص بس مع اني احاول اكثر

تصدقون بنات اشتقت للتمارين صار لي يومين يالسه و مرتاحه و مب مسوية شي

و احس بالذنب اتمنى تخلص الدورة بسرعة بس عشان ارجع اسوي رياضة

فعلا السالفة كلها على بعض سالفة اسلوب حياة \ لايف ستايل . يعني الواحد من يتعود على شي

خلاص ما يقدر يتركه

و حبيت اقول شي للبنات اللي دايما يأجلون و يقولون باجر و باجر و ما عندهم ارادة للمتابعة

او ينحبطون بسرعه , بس فجي قوقل , اختاري تمرين من تمارين جيليان او انسينتي على حسب القدرة

و شوفي صور الناس قبل و بعد , صدقوني بتتحمسون و الوحدة بيصير عندها دافع انها تصير جي

اذا هم يقدرون نحن ليش ما نقدر اذا في ناس اوزانهم فوق ال 300 باوندات او 400 باوندات

قدرو ينقصون ، عيل نحن بعد نقدر ننقص هالجم كيلو ، شدن حيلكن بنات و ما في شي صعب ان شاء الله