دموعي هي كلماتي

[عسـلي]

حابه افضفض بليز لاتهاجموني ابغي النصيحة
وراعية النك سامحيني المره هذي بكون صريحه بس لاتنصدمين مني ربيعتيه عسلي =ا
صارلي 5 سنين بطاليه ادور على شغل ومالقيت لان ابويه هب راضي اني اشتغل والليسن نفس الشي طبعا الحمدلله مش قاصرني شي اكل شرب غرفه ايباد بيبي لاب هالسوالف متوفره عندي ولي اعتقد انها كماليات مش اشيا اساسية في حياتي مثل مايقول ابوي كل مابغي شي يقولي مب قاصرنج شي ! ابويه كيف هب قاصرني شي انا تربيت في عايله كلها مشاكل عايله المهم بسبة المشاكل تعرفت على واحد عن طريق احدا مواقع الدردشه للعلم اني ماحدر هالمواقع صارلي موقف في البيت واتضايجت واييييييييييييييييييييييييييد ماعندي اخت شرات الناس اشكيلها عندي ربيعات مايقصرن لكن للاسف يحطموني بدال لايساعدوني وصارلي فتره وانا اعرفه وعرفت كل شي عنه بس هو مايعرف عني شي كل لي يعرفه اني انسانه ماتتكلم انا هذا طبعي ما اتكلم في اشيا تافه مثل انا سرت وشريت وكذا كذا كذا قوت علاقتنا ببعض وانا عارفه هالشي غلط بس انا ماكلمه فون ولا اطلع الحمدلله سوالف بيبي بس صارلي موقف قوي ثاني في البيت واتضايجت وعدت نفس الغلطه الاولى بس مش اني اتعرف لا هالمره طرشت له صورتي من دون مايطلب مني بس من الضيجه والغم لي فيني طرشت انا من نفسي وبعد فترة ندمت مش من حلاتي ندمت لاني رخصت عمري وهو غطى على الموضوع وقالي حذفت الصوره انزين وقوت العلاقه اكثر صارلي ك سند واي شي يصيرلي اخبره وهو نفس الشي بس طبعا صارله موقف في حياته وتغير علي بس يرمسني مرات ومرات يغلط علي ويعق عليه رمسه انا مالومه انا السبب في اني رخصت عمري له الناس كلهم يقولون فلانه بنت فلان والنعم فيها باخلاقها بس للاسف انا اشوف اخلاقي عاريه اكره عمري والله العظيم انا مش حلوه وطويله دايما في اعراسنا ايون الحريم ويرمسون خواتي منو هاي يردون خواتي مولازم تعرفين يحسسوني اني ولا شي مو كافي الهم لي انا فيه خواتي يزيدوني! انا مجهوله بين معارف اهلي يقولون مستحيل هاي من اهلكم لاني خسفه واطول عنهم ومن يتقدملي احد وقت النظره يقولوون طويله هاي والله العظيم تعقدت شو ذنبي انا ربي خلقني طويله لي مب عايبه ينطم في ناس عافانيه الله يجرحون من دون مايحسون هذا من غير رمست اهلي لي دوم يقولون عن بلمه لاني ما اتكلم! اشوف كلامهم بلا معنى والله العظيم كلام تافه اذكر وحده من ابلاتي كملنا شهر على بداية الدراسه كان الموضوع عن جحا او يمكن علاء الدين واحد منهم يلست تتكلم الابله وفجاه طرت اسمي انا خفت سالت ربيعتي شو السؤال؟ ضحكت طنشتها جان اسمع ابلتي تقول خلكم مثل فلانه فطينه وحكيمه ماعندها هذربان وحركات بنات انا شكلي جذا استوى ؟ استغربت كيف الابله عرفت ان ماعندي حركات بنات ودلع؟ احترق ويهي اول مره اسمع حد يرمس عني جي ! للحين اذكر الابله الله يذكرها بالخير ساعات الغريب يحس فينا اكثر من اهلنا والحين انا متضايجه اكثر عن قبل انا عارفه نفسي وعارفه وين غلطتي مابغي اعيد اغلاطي كل همي كيف اصلي صلاتي بوقتها ماقمت افكر لا في ام ولا في اب ولا في حبيب ولا في زواج بس ابغي اصلي صلاتي بوقتها مابي شي بديت قبل فتره اقرا سورة البقره وبعدها وقفت ويلست اسمع اغاني!! قمت اخاف من عمري ماحس اني من بني البشر اعرف الغلط واسويه وبعدها اندم ندم واصيح ماعرف اشكي لمنو وماعرف اعبر عن اللي بخاطري دايما اكتب في فوني وبعدها امسح الكلام ويتم الكلام بيني وبين نفسي وفي خاطري وتنعاد الحكايه من اول ويديد وابدا صياح ايامي كلها صياح اخطط بس ما انفذ لي يجرحني مايهمني ولا كاني سمعت الكلمه ربيعاتي كل وحده منهن عندها واحد ويقولن نحن نستحي ونحن ونحن بس وقت حزنهم يشتكون لي انا طلعت معا وانا وانا انصدم منهم ! ولمن انا اشتكي لهم يقولون انتي ماعندج سالفه ! انتي معقده ! انتي كبيره بس ياهله !انتي مينونه لاني ماطلعت ؟!!!!!!!!!!!! قاطعت كل ربيعاتي عايشه حياتي نوم اكل سهر اتضايج وايد حزت السهر واقول بسهر اليوم كله بنظم رقادي بس من ينشون اهلي تبدا المشاكل واتضايج وارد انام واقول دعاء (xxxxx) انش قبل الاذان بساعه ! اسمع صريخ اهلي ومشاكلي وارد ارقد حياتي فوق تحت اتقرب من ربي وبعدها ابتعدددددددددددددددددددددددددددددد بشكل فضيع اهلي مب وياهم مليت من مشاكلهم عايشه بينهم وكأني غريبه ربيعاتي قاطعتهن وفلان لايكلمني ولا اكلمه شغل وماعندي بديت في مشروع صغير وصابني ملل وماكملته مسلسلات 24 ساعه مبققه عيوني واطالع وسواد عيوني شكبره اللي بيشوفني بيقول عايشه مرتاحه لاهم ولاغم ولاشغل ولامشغله بس والله الوحده صعبه والمحيط لي انا فيه ابد مايساعدني اني اتشجع واتقدم خطوه للامام لا اهلي ولا ربيعاتي محد بينفعني ابغي اتقرب من ربي مابغي شي ثاني دوم اتشكى والقى هجمات وتجريح حالفه ماشكي لمخلوق بس في هاللحظه صابتني ضيقه مابغيت اغلط غلطة ثالثه خبرت ربيعتي اني ملانه قالت دخلي المنتدى الفلاني عطتني النك والباس مابجذب عليكم انا زايره للمنتدى ومرات اتضايج من مواضيع الزواج والاعراس خاصه مشاكل الزواج فه محابيت اني اسجل افكاري ضايعه ماعرف انا شوكاتبه بالضبط بس اعرف اني بنش باجر وبندم

المزيد من آخر المواضيع من نفس القسم:

• لأنّه جعل الفقير ييعش مع المؤمنين لا مع...
• الإكتئاب طاعون العصر الحديث بحث مرجعي...
• كيف تكون إيجابيا ؟
• كيف تتعامل مع ذاتك بطريقة صحيحة؟
• كيف تقوي ذاتك؟
• كيفية تطوير الذات بطرق بسيطة
• افضل طرق لتطوير الذات وزيادة الثقة بالنفس
• اهم المهارات التي تحتاجها لتطوير الذات
• طرق تطوير الذات في مجال العمل
• اقتباسات ~ مُهرة القَصر

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[أم راشد العين]

الله يهديج ويصلح أمورج

[USA Online]

بالتوفيق اختي بارك الله لكي

[ناديـن]

السلام عليكم

اختي ما بغيت اقرا موضوعج و اظهر بدون ماكتب شي

انزين ما قلتي لو عندج اخوان؟ اعمام او خوال؟

على الأقل لو يقنعون ابوج و يخليج تشتغلين، أغلبية البنات يشتغلن الحين تحسين انج مسوية شي

شالة عمرج بعمرج و اتحسين انج فرد منتج، الملل و المشاكل العائلية هي اللي مسوتلج هالأزمات، و اكبر غلط سويتيه في البداية إنج كنتي تسكتين و تكتمين بداخلج

و هذا الشي مب زين، و الا ليش عنا ربيعات و هل؟ مب قصدي نشكيلهم و يشكولنا بس بعد بني آدم له و عليه، جافوج دوم ساكته فـ يوم رمستي و اشتكيتي لهم مره وحده جافوا إنه مشكلتج تافهة، حاولي إنج تشغلين وقتج و بالعكس اتشجعي و لا تخلين الشيطان يلعب براسج المشروع اللي بديتي به ردي له حاولي تفتحينه مره ثانية و تستمرين فيه، على الاقل يكون عندج شي يشغلج و تستفيدين منه في نفس الوقت و عليج بالدعاء إن الله يهدّي الأوضاع في بيتكم و يسخر لج ابوج و يخليج تشتغلين إن شاء الله

[رومنسية 84]

السلام عليكم ورحمة الله وبركاته
اختي العزيزة
ليش تتضايجين و تحزني و ربج موجود ،، اذا كل الناس وقفوا ضدج اهم شي انج ما تسوين شي غلط مب عشانهم ، عشان ربج ، لو حطيتي في بالج في كل خطوة تخطينها او حركة تسوينها ان رب العالمين يشوفج صدقيني بتستحين من الله و تطلبين رضاه و اممم ومن طريقة كلامج حسيتج بعدج في سن المراهقة و بقولج شي عمره الجمال ما كان مقياس و انا من زيني كانت الوالده والخالات يتحرون بتزوج امير بس ما يخصه لا جمال ولا حسب ولا نسب ..في شي اسمه نصيب من الله عز و جل أنكتب من يوم ما كنتي في بطن امج واذا سالتي الله فاساليه البخت وادعي اللهم اجعل الدنيا اخر همي ...و حياتي ما في حد معصوم من الغلط و ما شا الله عليج زين منج تبتي الى الله والله يثبتج واذا ملانه شي مركز تحفيظ قران مجاني في دبي ورأ مركز مزايا ( مركز رياض الصالحين لتحفيظ القران ) سيري بتحصلين وايد خوات صدقيني بتستانسين و تنسين مشاكلج بس لازم العزيمة والتوكل عل الله وآخر شي حبيت أذكرج بشي سيدتنا خديجة رضي الله عنها تزوجت وهي في عمر الأربعون سنة من سيد القوم والناس اجمعين محمد صلى عليه وسلم وهو في سن 25 شفتي كرم الله فتقربي من الله وخلي الباقي عليه وبأذن الله الله بيسعدج ويستجيب لدعواتج
ان شا الله اكون فدتج ولو شويه

[Manar N]

الملل والوحدة مش مبرر للغلط..وإنتي فيج الخير عارفة إنج غلطانة لكن الأهم لا تردين للغلط..إذا مب قادرة تشتغلين اشتركي في نادي..خذي دورة..لغة ثانية..أشغال يدوية..رسم..خط..كمبيوتر..تحفيظ قرآن...عالأقل بتظهرين من البيت وتشوفين الناس..وبعدين..من متى يعيبون الطول!!! من علامات الجمال الطول..والبنات طايحات في الكعب العالي عشان يطولن شوية...وأحلى شي االبنت الطويلة..حتى اللبس عليها غير..أهم شي إنت كوني واثقة من نفسج..وحبي نفسج..إذا حبيتي نفسج الناس بتحبج...وإذا كنت واثقة من نفسج الناس تشعر بهذه الثقة وتنعكس عليهم...بالتوفيق

[ابتسامتي غير]

حاولي تشغلين وقتج بشي مفيد

كل الي فيج من الملل والفراغ

لو اشتغلتي او درستي بتحسين بفرق وايد

انتي ما تكلمتي عن الجامعه

اذا ما درستي ردي ادرسي الوقت ما راح

تستفيدين في حياتج وتخالطين الناس وتملين وقتج


ربي يوفقج حبيبتي

[شعاع امل]

اختي بس الي فيكي انك بنية حساسة واااايد وانا تقريبا نفسك

بالنسبة لموضوع الطول في بنات واااايد طويلات والطول يعتبر من الجمال يعني شي عادي اذا هم مايحبونه بكيفهم هذا مثل ماقلتي خلقت الله

وبعدك عن الناس وكثر انتقادهم لج احسن اختي

عشان تتقربين من ربك اكثر

والناس اختي لا تعتمدي عليهم في شي حتى اهلك

كل الناس اللهم نفسي

بس اذا حد ساعدك بشي لا تحقرنا من المعروف شي

قول له شكراً وخلاص بس ماترتبطين به

المهم اشغلي وقتك باي شي سجلي بنادي رياضي بمركز قران كريم والخ

وبس وهاي افكار هدامه اختي لو ضلت في راسك مصيبة

ونصيب اختي مب بالشكل والله

والشغل مب ضروري خذي دورات وتعرفي على بنات خلال الدوره وجي

[ورقة ناعمة]

انتي اللي محتكره عمرج بدائرة مغلقة وحد بيفتها غيرج اطلعي من بوابة الشر وضياق وقت بالفون مع الشباب

وليش هذا يعتبر علاج لقضاء الوقت اختي بالعكس هذا تدمير لج ولسمعت انسانه شريفة مثلج انسانه قدوة لكل بنات جيلها

لاتسمعين لوحده تقولج انتي معقدة بالعكس هم كلهم بيتحاسبون عند رب العالمين وبتنلف عليهم عقد وقيود بنار جهنم

لاتسمعين للبنات يوم يقولولج نحن نظهر ويا الشباب وانتي معقدة الشاب يوم يطلع مع البنت مب علاج ولادوا بيعطيها

الشاب يبغي يوصل لهدفه الخاص اشباع غريزته حتى لوكنتي ملكة جمال هم متعةدين على التغير اليومي وقائمة من لسته

الارقام وانتي وحده منهم ليش مشاكل الاهل تلصقينها فيج كل بيت فيه مشاكل وكل الناس ببيوتهم مشاكل حتى الاطفال يوم

في مشاكل يلتجؤؤن للالعاب او اي شي يلهيهم خليج مثلهم وعيشي كل مراحل عمرج مثل الاطفال قلبج نظييف وبعيد

عن الاوساخ والمكالمات الهاتفية المحرمة ...وربي يحفظج

[مهرة القصر]

،

بسم الله .. السلام عليكم ورحمة الله وبركاته
اولا ببدا بالدعاء لج وكل مهمومه ..

اللهم يا رحمن يا رحيم يا سميع يا عليم يا غفور يا كريم إني أسألك بعدد من سجدلك في
حرمك المقدس من يوم خلقت الدنيا إلى يوم القيامة أن تطيل عمر قاريءهذا الدعاء على العمل الصالح وان تحفظ أسرته وأحبته وان تبارك عمله وتسعد قلبه وأن تفرج كربه وتيسر أمره وأن تغفر ذنبه وتطهر نفسه وان تبارك سائرايامه وتوفقه لما تحبه وترضاه
اللهم أمــين يا رب العالمين
ooo
لا إله إلا الله العظيم الحليم ، لا إله إلا الله رب العرش العظيم
لا إله إلا الله رب السموات ورب الارض و رب العرش الكريم
اللهم يا مؤنس كلّ غريب ويا صاحب كلّ وحيد ويا ملجأ كل خائف ويا كاشف
كلّ كربة أسألك لأن تقذف رجاءك في قلبها حتى لا يكون لها همُ ولا شغلُ غيرك وأسألك أن تجعل لها من أمرها فرجاً ومخرجاً إنك على كل شيء قدير
هبها اللّهم الصبر والقدرة لترضى بما ليس منه بد، وهبها اللّهم الشجاعة
والقوة لتغير ما تقوى على تغييره يد، وهبها اللهم السداد والحكمة لتميز بين هذا وذاك
اللهم فكن لنا وليا ونصيرا، وكن لنا معيناً ومجيرا، إنك كنت بنا بصيرا آآمين ..
ooo
اختي كل ماحسيتي انج متضايقه كرري دعاء الحزن اكثر من مره وبيقين ان الله يبدله فرحا

قَالَ عَبْدُ اللَّهِ بْنُ مَسْعُودٍ : قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : " مَا أَصَابَ مُسْلِمًا قَطُّ هَمٌّ ، وَلا حَزَنٌ , فَقَالَ : اللَّهُمَّ إِنِّي عَبْدُكَ ، ابْنُ عَبْدِكَ ، ابْنُ أُمَّتِكَ ، نَاصِيَتِي فِي يَدِكَ ، مَاضٍ فِيَّ حُكْمُكَ ، عَدْلٌ فِيَّ قَضَاؤُكَ ، أَسْأَلُكَ بِكُلِّ اسْمٍ هُوَ لَكَ ، سَمَّيْتَ بِهِ نَفْسَكَ ، أَوْ أَنْزَلْتَهُ فِي كِتَابِكَ ، أَوْ عَلَّمْتَهُ أَحَدًا مِنْ خَلْقِكَ ، أَوِ اسْتَأْثَرْتَ بِهِ فِي عِلْمِ الْغَيْبِ عِنْدَكَ أَنْ تَجْعَلَ الْقُرْآنَ رَبِيعَ قَلْبِي ، وَنُورَ بَصَرِي ، وَجِلاءَ حُزْنِي ، وَذَهَابَ هَمِّي ، إِلا أَذْهَبَ اللَّهُ هَمَّهُ وَأَبْدَلَ لَهُ مَكَانَ حُزْنِهِ فَرَجًا " ، قَالُوا : يَا رَسُولَ اللَّهِ ، أَفَلا نَتَعَلَّمُ هَذِهِ الْكَلِمَاتِ ؟ قَالَ : " بَلَى ، يَنْبَغِي لِمَنْ سَمِعَهُنَّ أَنْ يَتَعَلَّمَهُنَّ " .

وماحبيت انج توصفين نفسج بـ خسفه..!! اذا الله سبحانه يقول (لقد خلقنا الانسان في احسن تقويم ) ليه توصفين نفسج بها الوصف ؟!
والجمال نسبي فيه ناس تشوفج جميله مثل معلمتج اما اللي يعيبون فهذا من سوء اخلاقهم مو من سوء خَلقك
اما الطول دايما يقولون الطول عِزّ << وهذا مب استحقار للي مب طويله بس الكل يحب يبرز جماله وينظرلنفسه بنظره ايجابيه
والرياييل بعضهم شرطهم لازم زوجته تكون طويله ونصيبج بيي جريب ان شاء الله ^^
اماالمسلسلات والاغاني والله انها ذنووووب وتضييع وقت تركيهم بارك الله فيج
وكذلك مكالمة الشباب والعلاقات ذنووب وتشويه لسمعتج وسمعة اهلج وهاذا من العقوق .
وعيبتيني يوم قلتي مابي اغلط غلطه ثالثه .. وسجلي بالمنتدى شو نااطره ؟! كلنا خواتج
واوصيج بوالديج وبرهم حتى لوهم الغلطانين
وتكسبين رضاهم دعوه حلوه منهم يمكن تغير مجرى حياتج والعكس ..!! والمشاكل حاولي تكونين طرف في حلها

وشوفي الموضوع << عن العبارات التفائليه
http://forum.uaewomen.net/showthread...=947437&page=9

واكرر الدعاء ثم الدعاء بكل شي خاطرج فيه وخاصه في الثلث الاخير من الليل وبالسجود
الله يوفقج ويستر عليج دنيا وآخره وجميع بنات المسلمين آآآمين

استغفر الله الذي لا إله إلا هو الحي القيوم وأتوب إليه

[نونة الدلوعة]

تقولين إنج وحييدة ؟؟
ونحن وين رحنآ عنج ^^

عندج ........... اخت في هالمنتدى << عآد احسبي عدد العضوآت
كلنآ على قلب وآحد

الحيآة مب شرط شغل أو زوآج أو ليسن
لو مآ كملتي درآستج كملي
ولو مآ تقدرين تكملين الدرآسة خذيلج دورآت في المعآهد
لآ تقولين شو بستفيد من هالشهآيد
هذآ يسمووونه عللللللم وثقآفة لعمرج ولبيتج في المستقبل القريب
دشي لج تجآرة في المنتدى
مآشآءالله على الخوآت اللي عندنآ ، مبدعآت
وانتي أكييد عندج شي مبدعة فيه ، اششتغلي عليييه ، ومنهآ بتتعرفين على النآس

اتقولين انج طويييلة
وأنآ أقووولج يآ بختج يآ بختج يآ بختج
هذي نعمة من الله

طآعي حوولج البنآت ، الأغلبية طآيحآت بهالكعووب يبون يوصلون للطوول
وحتى لوو طوولج أووفر على قولتج بعد بقولج يآ بختج
الطووول عزز ، عندج ملكآت الجمآل وعآرضآت الأزيآء أول مقيآس لجمآلهم هو الطووول
مآبآ أقآرنج فيهم الله يعزج عنهم
بس كمثآل إن الطوول في الدول الأجنبية من علآمآت الجمآل

ثآنيآ تقولين إن جمآلج أقل من العآدي
حبيبتي مآفي بنت مب حلوووة

أنآ مآقولج هالكلآم عسب أرفع معنويآتج
بخبرج سآلفة وحدة من ربيعآتي في المدرسة جمآلهآ كآن أققققل بوآيد من العآدي وخلصنآ ألدرآسة وتفرقنآ
ومن عقب سنين طويلة صآدفتهآ
تعرفين انهآ مستوية ملللللكة جمآآآآآل
اللي تغير فيهآ إن زآد اهتمآمهآ بعمرهآ

يعني انتي لو طويلة وآيد
رتبي وزنج يعني يآ تضعفين أو تمتنين وسوي ريآضة عسب يتنآسق جسمج

بعدج انتي في عز شبآآآبج لآ اتضيعين عمرج بالرقآد والسههر والحزززن
لو خوآتج عآملوووج بهالطريقة بسبتج
انتي من كلآمج اللي فهمته انج عآزلة رووحج عن النآس وعن البيت
فكيف تبين يكونون ويآج وانتي اللي مبتعده عنهم

المشآكل اللي تصير في البيت حلهآ وآآحد ومآفي غيره وعن تجرررربة
البآرحة صآرتلنآ مشكلة كيرة وكنت طوول اليوم متضآيجة وحلهآ بيكون اليوم الثآني الصبح
مع إن مآ علي صلآة بس رفعت إييدي لربي و دعيت باللي بخآآطري وربببج كريييييم
اليوم الثآني ولآ جنه هالمشششكلة موجودة وردت الميآه لمجآريهآ ^____^

ثآلثآ انيي عند أهم نققطة
كيف تبين السعآدة وانتي مقصصرة بصلآتج ؟؟
لآ تقولين صليت ودعيت ومن عقب ملييت
حبيبتي اللي نحن محتآيينه هذآ رب العبآد اللي خآلقنآ

تخيلي مثلآ وحدة من ربيعآتج كآنت تبآ منج شي ومن عقب مآ خذت هالشي ودرتج
نحن للأسف هذآ حآلنآ مع الله سبحآنه
وقت المصآيب ندعي ونصلي وغيره ومن عقب مآ أخذنآ حآيتنآ قصرنآ بصلآتنآ

نصيحة من إختج تبين حل لكل مشآكلج
أي شي بخآطرج لآ تشكين لحد أبدآآ أبدآآآ
توضي وافرشي السيآدة وادعي
خلج مستتتمرة على هالشي
صلوآتج الخمس مع قيآم الليل
حتى لوو المشآكل زآآآدت خلج على هالشي

وصدددقيني ربج مآ بيعطيج وبسس بيدهششج بعطآئه
وإذآ رب العآلمين تأخر بعطيته لج فهذآ لأن يحبببج ويحب يسمع صوتج وانتي تدعينه

أنآ قبل كنت على أي مشششكلة أتشكى وأبطل المنتدى وأقول كل شي
ألحينه لآ
كل مششكلة أعرف إن حلهآ بيكون عند الخآلق سبحآنه

وفعلآ وسبحآن الله كل شي تيييسسسسر

استغرب منكم يوم تقولون هنآك مشششكلة ومآلهآ حل
أستغرب يوم تقولون دمووع وحزن ورب العبآد موجود ويقول هل من دآع استجب له

أدري ردي طووويل عريض هههه
وربي يفرج همج ان شآءالله ^^