فيني احباط :(

[شفوع]

مرحبا خواتي

ماعرف من وين ابدا بس الله يشهد اني تعبت واحس اني خلاص انتهيت .. قصتي طوووويله بس بحاول اختصرها عليكم انا تزوجت شهر 1 والحمدلله عقب زواجي بشهر حملت الف الحمدلله والشكر على هالنعمه بس من بداية زواجي كانت حياتنا مشاكل انا وريلي والله يشهد اني كنت عروس بس ماكنت حاسه بالاحساس مغازلجي \ جذاب \مب قد الزواج والمسؤوليه \ اي شي يصير من بينا على ظول عند امه وامه غيوره وحقوده والله لدرجه فظيعه .. ومن البداية زواجنا كان يطلع لين انصاف الليالي والويكند يسير الفنادق ويا ربعه طبعا انا يالسه روحي او يعقني اي مكان عسب يفتك مني ويطلع على راحته مثلا بيت يدي او بيت اهلي اي مكان المهم هو يطلع على راحته .. ماعلينا من هذا كله لانه لو رمست من اليوم لين باجر مابتخلص سلبياته

المهم انا من شهرين ف بيت اهلي كالعاده يطلع من الصبح لين انصاف الليالي ويخليني و واجهنا بعض وصارخ علي وقال باجر اتسيرين بيت اهلج ومابا اشوفج ومادري شو وثاني يوم اتصلت ف اهلي عسب يمرون علي و قبل لا ايوون اهلي قال اتشلين كللللل اغراضج ومابا اشوف شي هني و ورقة طلاقج بتوصل يوم الاحد ( بروحي مستغربه من اللي يصير ) طبعا صارت وايد اشيا قبلها سحب مني التلفون وكنت تعبانه من الحمل بس لا هو ولا اهله فكرو ايوون يشوفون شو فيني المهم وصل ابوي وركبت السياره طبعا تمو يألفون على ابوي واتهموني بشرفي والله يشهد انا كيف .. وكلنا كنا متوقعين انهم بيطلعون اي شي لصالح ولدهم لانه ماعنددهم شي يقولونه حق الناس وثاني يوم سرت عسب اشل كل اغراضي ابوه قال حق ابوي اذا تبون انطلق بنتكم بدون فضايح عطونا 100 الف درهم ... والله يا بنات وانا ف بيت اهلي يتهموني بشرفي وشكثر اسمع رمسه اتقولها عني امه وتتصل ف ربيعاتها وتتهمني بشرفي والله والله كذا مره اهلي شافوه ف الكاسر يغازل يوم كنت عنده وحتى وانا هني ف بيت اهلي ومره ولد خالوه شافه طالع من ديسكو كاشخ وحالته لله .. حسبي الله عليه هو واهله خربو حياتي ومستقبلي ولا فكرو باللي ف بطني .. حتى قبل شهر رافع دعوة بيت طاعه واصلا هو مايباني بس رافع الدعوه عسب انا اخلعه يعني الطلاق يطلع مني وعسب البيزات والله يابنات ونحن ف التوجيه الاسري شو ألف وشو كذب وشو حط بهارات من عنده يعني ولا جني زوجته ولا فكر باللي ف بطني حتى كان مستعيل على الطلاق بس ماسك عمره عسب البيزات واكيد اهله وراه .. الحين صارلي شهرين انا ف بيت اهلي لا فكر يرجعني (اصلا انا عفته هو واهله عقب اللي سووه فيني وقالوه عني) ولا يصرف علي وانا مابا ابوي يصرف علي يحليله مب ملزوم فيني ولا ف اللي ف بطني وهو روحه دخله محدود

قبل لا اتزوج كنت ادرس ف التقنيه درست سنه و وقفت بسبة العرس لانه يوم عرسي صادف امتحان الفاينل وماقدرت اكمل يعني الحينه صارلي سنه موقفه الدراسه خاطري اكمل السنه اليايه بس بيكون عندي ياهل وان شاء الله بربي حزة الدراسه واخاف مايعطوني اجازه و ف نفس الوقت ناسيه الانجلش واحس اني مابروم امشي و ف نفس الوقت خاطري اتوظف اي مكان واعتمد على نفسي والله ماعرف شسوي احس الدنيا دايره فيني وكل هالمشاكل صارت وانا عمري 19 سنه

مب عارفه شسوي و مابا احط ايدي على خدي واللي ظلموني يتهنون ومستانسين ف حياتهم
حياتي الحينه معلقه ف بيت اهلي وحامل ولا وظيفه ولا شي
ابا ارفع عليه قضيه نفقه بس اخاف مايكون لصالحي

السموحه خواتي طولت عليكن وخربطت ف الرمسه

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[مجنونة و تجنن]

لا حول ولا قوة الا بالله العلي العظيم
حبيبتي و الله ..
الله يعيينج و تتحسن أوضاعج للأحسن

[شفوع]

لا حول ولا قوة الا بالله العلي العظيم
حبيبتي و الله ..
الله يعيينج و تتحسن أوضاعج للأحسن

امين يارب
تسلمين حبيبتي على الرد

[مها الكعبي]

حبيبتي صج كسرتي خاطري ع يلي سوووه فيج
حسبي الله ونعم الوكيل عليهم
بعدج عروس ما كملت سنة وجيه صار لج
واتهموج ف عرضج
صدقيني الله يمهل ولا يهمل
راح يأخذ جزاته هو واهلة لو مب ف الدنيا اكيد ف الاخرة
ورفعي عليه دعوة الحضانة هالشيء لازم هو ابوه
ولا تحاتين ربج معاج ما راح يستوي الا يلي ربج كاتبه
اصبري واحتسبي لله
وبعد ما تربين كملي دراسة وان شاء الله تتخرجين وتلاقين الوظيفة السنعه
اخاف اقولج ترجعين له عقب يرد يعاملج مثل قبل واخس
نصيحة مني حبيبتي دامه سوى فيج جيه لا تفكرين ولا لحظة تردين له بس من بينكم طفل
مودري يمكن الاحوال تتغير بعد ما تربين بالسلامة
ربي يوفقج ويسعدج
بعدج صغيرة جدامج الدرب لا تتاكلين ع شخص ثاني
والسموحة ع الاطالة
اختج ف الله

[ابداااع للتصميم]

الله يوفقج

[كيوت توت]

الله يعينج حبوبه استغفري دوم واتحسبي عليه والله بياخذ حقج منهم
وحاولي اتكملي دراستج بتنفعج الشهاده لما تبين تتوظفي والله يوفقج واتربي بالسلامه

[MDM]

حآولي تكلميين محآمي و شوفي إذا الوضع بكون لصآلحج أو لآأ ^^
بصرآحه اللي سواه حرآم و بياخذ جزاتهه إذا مب فآلدنيآ فـ الأخرة ...~

[هزووفه]

يارب تفرج همج ..

[جمر بارد]

خذي دورات انجليزي في الايلس كبدايه عشان بيطلبونها منج

ولا تطلبين الطلاق خل هو يطلق لين عشان النفقه ما تروح علييج

[شفوع]

يزاكن الله خير خواتي رديتو علي وازرتوني

لا هو فيه خير ولا اهله الاثنين نفس الطينه وايد وايد ظلموني والله حسبي الله ونعم الوكيل الله فوق وبيظهر الحق ان شاء الله هم اوصخ الناس وتتهم الناس بشرفها .. والله يشهد اني ماقصرت وياه بشي بس ما كان يملي عينه شي من اول شهر زواجنا كشفته انه عنده سوالف بنات وكل يوم طالع لين انصاف الليالي والويكند يسير فنادق دبي .. كذا مره اهلي شافوه يغازل ف الكاسر والجي بي ار ماقول غير حسبي الله ونعم الوكيل حتى مافكر يرجعني والياهل المسكين شو ذنبه جان ابوه جي .. الاخ عايش ف عسل هو و وصاخته ولا فكر فيني ولا ف الياهل واهله بس فالحين يشوهون سمعة الناس .. 4 شهور صبرت عليه وعلى سواياه والاهل ماكانو ينصحونه ولا شي وياه ف كل شي .. مستقبلي وشبابي راح بسبتهم وانا 19 سنه .. حتى ماتهنيت وانا عروس عقب 4 شهور من زواجي بيت اهلي والحين اتريا الطلاق .. لانه لا هو يباني ولا انا اباه وسلبياتهم وايد اخاف لو رجعت اعيش نفس الحياه التعيسه وياه هو واهله مع انه ف بيت الطاعه قلت ابا بيت منفصل وبرجع اتخيلو شو قال! قال مب موافق! لو كان يباني كان بيدبر عمره خاصة انه ظروفه تسمح و زووود وهو الشروط اللي قالها والله ماتنقال .. ظالم

ومابا اوقف دراستي مره ثانيه لانه ف التقنيه مايخلوني اوقف كورس واحد لازم سنه كامله واذا وقفت هالسنه بيصيرون سنتين وانا موقفه يعني لا دراسه ولا وظيفه مابا ايلس بدون هدف ابا ارجع ثقتي بنفسي وابني شخصيتي من اول يديد مب معناته اذا طلع من حياتي خلاص كل شي راح وهو يتهني ف البيزات وخرابيطه .. وباقيلي 4 سنوات ان شاء الله ف الكليه .. يارب اتوظف وادرس ف نفس الوقت بس احس انها وايد صعبه
الله يخلي لي اهلي ماقصرو وياي بشي بس بعد مابا اعتمد عليهم

السموحه خواتي طولت عليكن

[انفاسک تذوبني]

اول ما يأذن قولـي :: حسبي الله ونعــم الوكيـــل

خلج متاكدة و واثقة ان رب العالمين بيردلج حقج

قوليها من قلب وقت الأذان و ف صلاتج

حقج ما بيضيــــع فديتج

خلج قويـــة أسألي محامـــي و حاولي تتدربين عالأنجلش قوي من نفسج هالفتـــــــرة

لا تخلين أي كلمة من أي شخص تأثر فيج

الله يسهل دربج

[Unkonwn]

اهلج مايعرفون يتصرفون بإختصار.
وبصراحة, وايد ضعيفين. بدال مايوقفون ويابنتهم وياخذون بحقها الامور بارده جداً.
وحده اعرفها مرت بنفس ظرووووفج بالضبط, في النهاية ريلها ياها يصيح و يترجاها عقب ماسمع كمن هزبة من اخوانها واهلها مع انه كان يضاربها ويصارخ عليهاا دوم. مع ان الى صارلج اكثر من الى صارلها.

[lamo]

الله يفرج همك وغمك يارب وينصرك عليهم يارب ولله ناس ماتخاف الله
الله ينتقم منهم اسالي منيح عن حالك استخيري ربك حبيبتي الله ينصرك عليهم يارب بدعيلك من كل قلبي

[شفوع]

اختي اهلي ساكتين عنهم عسب باجر اذا طلبنا شهادة الميلاد والجواز حق الياهل و وايد اشيا لانه هم ما همهم هالياهل ف لين الحين ساكتين عشان هالاشيا ومايذلونا بعدين .. قلت ان شاء الله ارفع عليه طلب نفقه وان شاء الله خير واهلي مايبون ياخذون الموضوع بالضرابه مع انه القهر اللي ف قلبهم مب شويه بس ساكتين هالفتره عشاني وعشان الياهل وبيني وبينج هذا مب ريال وانا ما باهم ينزلون مستواهم ويرمسونه درب اللي يودي ما اييب

[سكر محترق]

لا تفكرين في الطلاق و اذا طلقج لا تزعلين
حتى لو اهلج تدخلوا في الموضوع زوجج ما بيتغير 100 %
عيشي حياتج فكري في البيبي زواجج اثمر بطفل يسوى الملايين الملايين
سخري حياتج للبيبي ابدئي من الحين و اقرئي اشياء عن الاطفال و العناية بهم و كل شي عن الاطفال
حاليا لا تفكرين بشغل او اي شي يلهيج عن الاهتمام بالبيبي لما يولد و لاحقة على الدراسة

اختي مطلقة من اول سنة بس انا دوم اقول لو كان عندها طفل كنا وااايد بنفرح فيه و ما نحتاج لنفقة من طليقها بس نبي اطفال في البيت