والله كانها مسلسل محلي

[بنت الشوامس]

اليوم بنقل لكم قصة عشتها ... والله ثم والله لو نقلها لي حد ا وقريتها في النت بقول اكيد مزيدين فيها ... لان المواطن مايعيش جذه... المهم مابطول عليكم بقولكم القصة من بدايتها...
يوم السبت 18\8\2007 ... الساعة 8 المسا... كنت سايرة وياريلي الملا بلازا اخذ عباة حق امية ... وبحكم اني حرمة فلازم ادش كل المحلات ... المهم طلعنا من الملا بلازا الساعة 9:45 وعلى بعد 200 متر من الملا بلازا عى طريج دبي الشارجة الا حرمة يالسة على الشارع ... والله ثم والله جنها جنيه متلحفه بكبرها وشالة في ايدها جيس صغير وقف ريلي شوي بعيد عنها قالي بردلها قلتله لاترد "من الزيغة" ... ردينا ريوس حليلها نشت من مكانها ويتنا .... سلمنا عليها... الوالدة شحالج ... بخير امية ... شوة تسوين يالسة هنيه ... قالت اتريا ريال بيني بيعطيني شغل وبروح ... اتصله وتيلفونة مغلق... الوالده من وين انتي ... من راس الخيمة ... منوة بيردج ... بحصلي حد يردني ..."قصدها بتوقف حد في الشارع"طلع ريلي بيزات من بوكة وقالها امية هالبيزات حق التكسي ... قالتله لا ابوية انا مابغي بيزات انا يايه اهنيه اتريا الريال قايلتلة ايسلفني 2000 حق الكهربا قبل مايقطعونها وبردهن عليه من بيزات الزجي (بيزات الزكاة)والحين تيلفونة مغلق لاكني انا بترياه يمكن هوه انشغل في شي هوه قالي اترياه عند الملا بلازا ... (والحرمة رمستها عدله) نش ريلي وسالها الوالدة انتي مواطنة قالتله هيه ابوية نحن من قوم (.......) قسما بالله انصدمنا معقولة هذا حال المواطنين في البلاد ليش خيرنا كلة برع ليش سالها ريلي والشؤون مايعطونكم شي قالتله مايدخل علينا الا بيزات الشؤون و1100 شو يسوون ... صدقها شوة يسوون قسما بالله مايرضونها شيوخنا ... قالتلنا توكلوا على الله وسيروا بيتكم انا بتريا الريال .... تحرك ريلي شوي وقالي ظهري اللي في بوكج كلة وباجر بردهن عليج وانزلي عطيها المهم يوم نزلتلها كانت عاطية الشارع ظهرها وحاطه ايدها على راسها وتصيح حرمة كبر امية ذالتنها الحاية يالسة في الشارع نفسها غنية.... يبتلها البيزات وجبيت ركبي وقلتلها امية خذي البيزات وسدي حاجتج والريال مابييج .... قالتلي اميه انا مب طلابة ... وما ابغي صدقة ... قلتلها هالبيزات مب من عندنا هاي من عند رب العالمين خذيهن هدية من ولدي اللي في بطني ... جان تقولي امايه فديتج قومي وقفي مب زين تجبين ركب وانتي حامل وتمت تنفظلي عباتي جان اييها ريلي وحلف عليها الا نوصلها راس الخيمة ووصلنها وتمت حليلها تشكيلنا حالها ... عندها خمس شباب كل واحد طالع في بيت بروحة وعندها بينتين وياها في البيت ... يالسة تقول ما واحد من عيالي دخل على خواتة ب200 درهم ... شوفوا عن شوة تتكلم ونحن 2000 حق لعب وبعد بطرانات ...لاحول ولاقوة الا بالله ... شغل ريلي قران وتمت تقرا ويالمطوع لين وصلنا راس الخيمة يعني حرمة ذاكرة ربها ... والله ثم والله يوم وصلتنا البيت اني مت من الزيغة فلم رعب مب بيت ... صدقها يوم متعنية لين دبي عشان تتسلف بيزات للكهربا .. البيت والليتات تشتغل فيه يزيغ وين لو تنقطع عنه الكهربا ،،، هذا المواطن اللي عايش في ترف ومب ناقصنة شي ... هذا المواطن اللي كل صيف يقضية في سويسرا ولندن ... هذا المواطن اللي مايشتري الا من المولات ... هذا المواطن اللي كل سنة يطلعله سيارة اخر موديل حى لو اقساط ... جد حد منكم سال عمرة في مواطنين عايشين جيه..... انا والله في حياتي ماتصورت انه مواطنين عايشين بالف درهم اقولكم مواطنين ... وين هيئات الهلال الاحمر لو درا الشيخ خليفة مابيسوي شي او الشيخ محمد بالراشد ... لكن وين اللي ينقلون صورة المواطنين لشيوخنا ... نحن بننسال عنهم يوم القيامة والا لا .... يوم ني بنتصدق حطينا في الصناديق حق السودان والصومال ... اوكي ماعليه حطوا بس مب الاقربون اولى بالمعروف .. هذي حاله انا عايشتها .. ومستحيل مافي مثلها .... ليش الغرب عايشين احسن عيشة في بلادنا ليش قولولي ليش ... ليش الدولة عاطتنهم وموفرتلهم ... والمواطن وين مكانه... والله اني كل ماييت احط راسي على المخدة قلت في خاطري معقولة يكونون راقدين مثلنا ... ريوق ونتريق وغدا ونتغدا وعشا ونتعشا والمكيفات ولا احسن وكل شي موجود في البيت .... نحن مواطنين وهم مواطنين وكلنا عيال هالبلاد .... والله لوتوصل هالقصة لحد من شيوخنا قسما بالله مابيقصر ... لكـــــــــــــــــــــــــن ويــــــــــــــــــــن اللـــــــــــــي ينقـــــــــــل حـــــــــــــال المواطن اللـــــــــي مب لاقــــــــــــي ياكـــــــــــــل

المزيد من آخر المواضيع من نفس القسم:

• لأنّه جعل الفقير ييعش مع المؤمنين لا مع...
• الإكتئاب طاعون العصر الحديث بحث مرجعي...
• كيف تكون إيجابيا ؟
• كيف تتعامل مع ذاتك بطريقة صحيحة؟
• كيف تقوي ذاتك؟
• كيفية تطوير الذات بطرق بسيطة
• افضل طرق لتطوير الذات وزيادة الثقة بالنفس
• اهم المهارات التي تحتاجها لتطوير الذات
• طرق تطوير الذات في مجال العمل
• اقتباسات ~ مُهرة القَصر

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[judy abbott]

والله اني ..تاثرت ..مع اني مرات اشك بالقصص اللي اقراهن عالنت ..مسكينة والله ..الله لا يحوج انسان انه يطلب او انه يذل عمره..والله عورت قلبي هالحرمة

[zoomyat]

لا حول ولا قوة الا بالله ...

والله ياليت لو توصل السالفه للشيوخ
لان صدق حرام وايدين جي عيشتهم ..

[um_hind]

ياربي قلبي عوّرني.... لا حول ولا قوة الا بالله... الهوامير ماكلين الدنيا... والباقين عايشين في حاله الله العالم بها...

[خيالية]

شو نقول بس...الله المستعان....الله يغفرلك ويرحمك يالشيخ زايد فقدك خسارة إلنا كلنا...الكل قام يرفع الاسعار..وفي النهاية اطيح في راس هذيل الناس..الله ينظرلهم إن شاء الله ويكون في عونهم..

ويزاكم الله ألف خير اختي ..هاي شيمة عيال البلاد...زين يوم ماخليتوها بروحها...الله يحفظكم..

[المريه]

لاحول ولا قوة الا بالله .. صراحه قصه مؤثره

لكن وين اللي يحس ويسمع !!!!!!

مشكوره اختي

[مس3003uae]

راح زايد !

[العصفورة1]

لاحول ولاقوة الا بالله

الله المستعان..

شو بنسوي؟؟!!!

على كثر ماترمسون.. كثر مايطنشون..

الحين الناااس الـ(....) تبا مصلحتها .. ناادر تحصلون ناس فيها ضمير ..الكل يسعى ورى مصالحه ..

قاموا يتناسون الفقير على غناهم .. ويبدون مصالحهم..

الشيوخ ترى للعلم ماعندهم علم بكل هذا..

والسبب هي الفئة (...) من الناس..

مانقول غير الله يعين

وانا لله وانا اليه راجعون

[shamsih-212]

يزاكم الله خير
ولو سمحتي اختيه اتكملين جميلج اطرشيلي عنوان الحرمه واتمنى بعد من بنات رأس الخيمه يساعدونها

[omfaisal]

راح زايد !

راح زايد
بس البركه في عياله ان شاءالله
اذا وصلهم الخبر والله ثم والله ما راح يقصرون
المشكله ان ما يوصلهم شي

[مدلـله]

وايدين عايشين هالعيشه ومحدن يدري عنهم
لكن الله موجود والله الرزاق وشو بنقول غير جذه

شي يقطع القلب والصراحه بلادنا صايره خيرها حق اللي عنده خير الدنيا يعني اللي عنده تزيده واللي ما عنده ...الله كريم فوق حايته لا بعد الالتزامات تييه من كل صوب جنه ناقص

والله ثم والله كانت ويايه وحده ايام المدارس مواطنه بنت عرب وقبايل تيي بمريول مقطع ويوفرون حق لقمه العيش بدل ما تفصل مريول يديد

شي يقطع القلب

شيوخنا لو يدرون جان ما قصروا بس منو اللي عنده ذمه ويشوف حاجه الناس ويوصلها لشيوخنا...الا كل واحد اللهم نفسي نفسي

اذكر في سنه من السنين ابويه كان مسوي شغله طالبينها الشيوخ...يعني ابويه عنده تجاره وناس يووه (مب شيوخ مادري مطيرزيتم) المهم...ابويه خسر ملايين على هالشغل قال هيوولي شيوخنا ولازم اسوي الشي الزين عشانهم..مسكين خسر مليون وحالته حاله ...ويوم طرشوا الشيوخ الفلوس(حق ابويه بشغله) ويا مطيرزيتهم عطوه مبلغ يصدم يعني اي شي الصراحه وقالهم ابويه بس انا مخسر وايد وايد ابغي حق...تخيلو قالوا لابويه انت مسوي شي للشيخ زايد لشيوخك وتبى اليزا!!!!!!!! انزين ابويه ما يطر منكم ابويه يبغي حقه خسارته والله عالم غريب..مسكين ابويه سكت وشالها بقلبه وقاله صدقت ونحن عارفين انهم شالوا الفلوس حقهم عيال الفقر ولا الشيوخ ما يقصرون

كل ما اتذكر احس انه قلبي يحترق

[مزنه الكعبي]

لا حول ولا قوة الا بالله ...

والله ياليت لو توصل السالفه للشيوخ
لان صدق حرام وايدين جي عيشتهم

[أمينة]

والله الدمعة فرت من عيني
يزاج الله خير إختي إنت وزوجج والله يجعله في ميزان حسناتكم ويرزقكم الذرية الصالحة والحمدلله البلاد بخير مادام فيها أمثالكم

[catwoman]

لا حول ولا قوه الا بالله
والله ياليت لو نقدر ندور على بيت بيت ونشوف شو محتايين ونساعدهم

[ღ ღBentZayedღ ღ]

شو نقول بس...الله المستعان....الله يغفرلك ويرحمك يالشيخ زايد فقدك خسارة إلنا كلنا...الكل قام يرفع الاسعار..وفي النهاية اطيح في راس هذيل الناس..الله ينظرلهم إن شاء الله ويكون في عونهم..

ويزاكم الله ألف خير اختي ..هاي شيمة عيال البلاد...زين يوم ماخليتوها بروحها...الله يحفظكم..