هل حد مر بهالشي؟

**وله العيون** · 2012-04-17, 01:36

السلام عليكم ورحمة الله وبركاته

بقولكم موقف ربيعتي هي متضايجه من شغلة ..\

هي مالجة وملجتها مطولة ..تقولي اول فترة ثلاث شهور احلى من ريلها ما شي ..متعوده انها تسمع منه كلااام عسسسل وكلام غزل في غزل ويهتم فيها ويرااااااعيييييها ودووم طايح عندهم، وهي معودتنه على شغلات مثلا ما تنش الا بصووته وما ترقد الا وهو يمسي عليها ..

البنية متخبلة في ريلها واايد لدرجة انها قبل 24 سااعة ترمسه .الصبح المسا والظهر والعصر ..واذا ما رمسته تطرشله مسجات عالبي بي ..وجي يعني .؟.

بعد فترة حست انها هو مل .. هي عرفت كل شي عنهااا وهو عرف كل شي عنهاااا وما في شي يديد ..الحينه تقول هو ما يرمسها شرات قبل وما يتغزل فيها وكله يقولها مشغوول ..هي متعودة تسمع صووته الصبح بس هو ما قام يتصل فيها شرات قبل ..من ينش على طول يروح الدوام وهي تزعل تقول كيف يروح بدون ما يصبح علي ..ويوم يرد الظهر سيدة يرقد ساعات يقولها ساعات لا ..وهي مسكينة تتريااا مثل الهباايل متى يتصل فيها ..

وحتى يوم يتصل فيها ما يرمسها شرات قبل بس يطمن عليها وعقب يقولها خلاص بخليج بيلس عند الاهل ..وهي كل شوي تتصل فيه وتبا تطمن عليه ...تطرشله عالبي بي ...تعبت البنت تقولي انه هو وايد قام يطنشها وهي زعلاانة وايد .. وهي كله تركض وراه ..والحينه اكثر شي ضرابه من بينهم ..هي تتضارب وياه ليش ما اتصلت وليش ما خبرتني اهون عليك جي تخليني اتريا و هو يقولها مشغول وما عندي وقت وو و الخ ...

حتى يوم هو قام يتصل فيها ما ترمسه لانه متضايجه منه ..فتقوله انا متضايجه انا زعلانة منك انا وانا وانا ...فهو يتضايج ويقولها انا اباج تكونين مرتاحه وانتي كله تقولين متضااايجة !

الحينه هي حيل متضاايجه تبا ريلها يرد مثل قبل لانها موول مب متعوده على هالاسلوب ..تبا 24 ساعة ريلها ييرمسها وييها البيت شرات قبل ..المشكلة تقول دام الحينه في الملجه جي ما يرمسني شو بسوي في العرس بتحس عمرها وحيده ..

بليز ساعدوهااا ..

المزيد من آخر المواضيع من نفس القسم:

**صغنونه متزوجه** · 2012-04-17, 01:48

حبيبتي هاي بتخلي الريال يطفر منها ويكرهها هذا ابد مو اسلوب والاصل البنت ايام الملجه تكون ثقيله والاهل وظيفتهم هالشي يعني اذكر اهلي كانو يشرطون عليه المكالمات لا تكثر ايام الدراسه الشوفه يوم الجمعه بس وقريب العرس جمعه يشوفني وجمعه لا وقبل العرس بشهر لا ششوفه ولا مكالمات الا مكالمه مرا وحده في الاسبوع

حسيته متلهف بيموووووت علي وكنت وايد فرحانه بثقلي حتى يوم اكلمه كل يوم ما كنت راميه عمري عليه كنت عادي اذا اتصل اولا وهو الي كان يتجنن ويترجاني اطرش صوري واذا طرشتله مسج لووول ينبسط كثيررر اما هي صار الوضع عاادي وما صار في شوق ولهفه عالبنيه اسمحيلي وايد رخصت عمرها نصيحتي بما انها بايام الملجه خليها تبعد عنه كم يوم وتمسك على عمرها ويوم يتصل هو ويسألها وينج غايبه تقوله والله انشغلت بدراستي او اي شي وتخلي عنها العتاب وتدلعه وتقوله اشتقتلك وتكون هاديه ورومنسيه وثقيله بالكلام وكلامها كله دلع وكلامها قليل خليها بس تحسسه ان كلامها وياه كله غزل ودلع وتخلي عنها سوالف اليوم والكليه واهلها وربيعاتها بس تختصركلامها عنه وعنها حتى هو بيتجنن شو الي غيرها

**اسيرت شوق** · 2012-04-17, 02:03

ابصراحة غصب عن الي خلف والدينه بيطفر حشى مب حاله جي حرام عليها تسوي في عمرها وفي الريال جي يعني ملك عليها خلاص لازم تلزق فيه ويلزق فيها

حبيبتي فهمي ربيعتج ان هذا الي تسويه اكبر غلط حتى لو تحبه مب لهدرجة ما يقدر يتنفس الريال واهي اصلا قاعده تسيء لنفسها ترى الزواج مب جي تستهدى بالله وتخف عليه
وتلتفت لحياتها وتعيشها مع اهلها وربعها والناس المحيطه فيها

ترى بيملها ويمكن حتى يودرها لانه هذا الي تسويه مب دليل على الحب ابدا
الله يهديها خلها تعقل وتخف على عمرها عسى الله يصلح الحال

**ظبيــــــانيه** · 2012-04-17, 02:35

اسيرة الشوق ..صغنونه

كلامهم 1000% صح كفن ووفن ماشاء الله والا الريال بيطير من يدهاا

الله يصلح حالنا اجمعين

**USA Online** · 2012-04-17, 02:46

موفقة بإدن الله
«حسبنا الله ونعم الوكيل» كلمة عظيمة، تعني الاكتفاء بالله وحده، والاستغناء عن الخلق، فالمسلم يكفيه الله في أخذ حقه، ويكفيه الله
في رزقه، ويكفيه الله في صحته، ويكفيه الله في شأنه كله، وهو من يقوم بالدفاع عنه،
قال تعالى:
{إِنَّ اللَّهَ يُدَافِعُ عَنِ الَّذِينَ آمَنُوا إِنَّ اللَّهَ لاَ يُحِبُّ كُلَّ خَوَّانٍ كَفُورٍ} [الحج:٣٨

**R3sha** · 2012-04-17, 03:29

كلام الخوات صح مليون ف الميه
لازم تكون ثقيله ماترمي عمرها عليه
عشان جي طفر منها
حلاة التغلي واللهفة والشوق

الله يهديها بطير الريال منها
خلها تلتهي ف اي شي ماتم لازقه فيه 24 ساعه

والله يتمملها ع خير ويوفقهم

**الأحلام الملونة** · 2012-04-17, 03:39

اللي صاير مع صديقتك أمر طبيعي ما فى شيء بدنيا يبقي ثابت صديقتك هي اللي موا فاهمة الدنيا صح

وكما يقولون خير الأمور الوسط بكل شيء لأن لو بتم تنظر للأمور بهذة الرمنسية بتتحطم لآن بعد الزواج سوف تهفت المشاعر آكثر

وهذا ليس معناة أنتهي الحب والشوق بس يحل مكانه المودة والرحمة والأحترام المتبادل

أتمني تريض حالها من الحين على التوازن ولا تقضي حياتها وهي تحاتيه والنصف الأخر بعتاب وكدر وزعل

**R3sha** · 2012-04-17, 04:09

إن المراة التي تحب زوجها بلا ضوابط ولا قيود ولا حدود تخسره دائما، بينما تلك التي تحب بعقل وثقل تكسبه مدى الحياة.

نسختها من قصة كنت اقراها قصة منتشره خلها تقراها بتستفيد منها وايد خلها تكتب في قوقل قصة ام بسمة

والله يكتبلها الي فيه الخير

**zezenya** · 2012-04-17, 04:28

طفرت الريال الله يهديها

خل تثقل الريال يحب المراه الثقيله

**Miss.Feminine** · 2012-04-17, 08:16

انا ارتفع ضغطي كيف ريلها !!

مب حلو جيه ابدا ابدا

عسكري مستويتله !!

**مهرووووووه** · 2012-04-17, 08:28

بإسلوبها هذا بطفش الريال منها!!!!

خليها تثقل شووووووي... بالعكس هو حزتها بيركض وراها

**قرموشة** · 2012-04-17, 09:31

اعرف وحده طلقها ريلها بسبب هل التصرف
لنه مب حلو بالمره خليها تنتبه لنفسها وخليها ثقيله شوي

**لا تسافر** · 2012-04-17, 10:40

بالعكس هذا شي طبيعي
هو يهتم فيها لا تحاتين
انا اقول خلها تهتم بنفسها و تعطيه مجال يتنفس شووية مللت الريال
و تحاول تنوع ف المسجات يعني يوم مسج صباح يوم مسج مساء يوم شوق يوم وله يوم عتاب
يعني تنوووووووووويع وما تكثر عسب لا يمل

والله انا كنت جي لززززززقة ما اخليه يروح مكان الا وياي و تعودنا يوميا نجوف بعض ف الملجة
عقب فترة انشغلت كانت عندي امتحانات و يالسة اتزهب ما فضيت له يالله يالله ارمسه ف الفون بالدقايق بس
اشووفه صار لزقة ما يخليني اذاكر عقب حسيت اني لزقة و حسيت اني لوعت جبد الريال ههههههههه

**احاسيس مدفونه** · 2012-04-17, 10:53

البنات ماقصرن

**ورقة ناعمة** · 2012-04-17, 11:01

لزققققققققققققققققققققققة وين عايشة .........

الموضوع: هل حد مر بهالشي؟

أدوات الموضوع

عرض

هل حد مر بهالشي؟

المزيد من آخر المواضيع من نفس القسم:

المواضيع المتشابهه

شو رايكم بهالشي؟

حد حس بهالشي !!

هل حد فيكن مر بهالشي؟!

اول مره اسمع بهالشي

حد سمع بهالشي؟