اللي تبي تجهض جنينها ...

**االمزيونة** · 2012-03-05, 09:27

--------------------------------------------------------------------------------

(وَلَا تَقْتُلُوا أَوْلَادَكُمْ خَشْيَةَ إِمْلَاقٍ نَحْنُ نَرْزُقُهُمْ وَإِيَّاكُمْ )

( وَلَا تَقْتُلُوا النَّفْسَ الَّتِي حَرَّمَ اللَّهُ إِلَّا بِالْحَقِّ )

بقول لكم قصه عذابي للاتعاض
حملي الأخير
يوم دريت أنصدمت وبكيت ثم حمدت ربي وشكرته بس اهلي كلهم وامي وابوي معترضين اعتراض كلي ودعوا علي لان ضروفي ماتنوصف مو الماديه لا ألعن من كذا زوجي بعيد لاسباب خاصه ماابي اتعمق .كثير شافوا معاناتي ويعرفوني..
امي قالت سقطيه سوي اي شي اشربي سم بس ينزل وطاوعتها من ورى قلبي ومابقى شي ماسويته ماابي اوضح يمكن يفيد مع غيري وآخر شي خذيت حبوب الدوره حبه وحده بس ويوم قريت الورقه المرفقه انجلطت يسبب تشوه الاجنه ويسبب اختلاج القلب ويسبب ويسبب وخليته وتبت ودعيت ربي بس وين راحت دعوه الوالدين؟؟ واعتراضهم ؟؟تحققت فيني دعوه امي قالت الله يشق بطنك وبطنه ماحددت منهو يمكن تقصد زوجي بس تحققت الدعوه علي و على اللي في بطني ولدت بالسابع الآم مفاجاه والرحم مفتوح والقلب ضعف فجأه وكنت انازع ومافي مستشفى قبلني سبحان الله..
كلهم قالوا الحاله حرجه ومافيه حاضنه والاسعاف لف فيني الشرقيه وآخر شي قدر الله ان يتوقف قلب جنيني بعد ما بدى قلبي يضعف لدرجه وقف عندي التنفس وقرروا عمليه قيصريه بدون توقيع ولاعلم اي احد من أهلي ويومها عرفوا أهلي وأنواع البكا كانو كل العايله في بيت جدي مسوين مناحه يوم عرفوا ان الله حق..
ليه تبكون قلتوا ماتبونه ؟؟
وأنا ياعزي لحالي صحيت بانعاش أصارخ سبحان الله الروح غاليه وبدت معاناتي ثاني يوم يوم ماشفت وش جبت ولاعرفت شي ولا أحد علمني بأي شي واللي زادني جلطه بساقي سجنتني بالسرير وابر نخرت لحمي من قوتها صوتي بآخر المستشفى..
طيب دكتوره وين ابني وش صار عليه قالت بكل حقاره . انتي الحقي تصحين بعدين فكري فيها قلت بنت قالت بنت بس انسي موضوعها يمكن تموت!!
نزل علي الخبر مثل الصاعقه حتى ماسألتها ليه وشفيها..
جلست ابكي وادعي ربي يطمن قلبي عليها ومع البكا المني الجرح وانا ماعندي خبره فيه ولاعلموني وش لازم اسوي أنواع الاهمال ومعي ربو وتعبت بغيت اموت ثانيه من الازمه اللي جاتني من الحزن حسيت ان الدنيا صغيره وان ابن آدم مايسوى شي بدون رحمه رب العالمين تمنيت اني اقدر اصلي ودي اسجد وابكي لين ينغسل قلبي ..
اليوم الثاني من ولادتي كان أول أيام عيد الفطر الناس فرحانه وأهلي يبكون علي ولى بنتي زارتني جدتي وأمي وأبوي..طول وقت الزياره هدوووووء الكل ساكت والحيره والحزن على وجيههم قلت ترى دريت عرفت كل شي بس الله على كل شي قدير وكلهم بكوا وقالوا لي ايمانك قوي يارب يعطيك على قد نياتك...
كابرت ومانزلت مني دمعه انتظرتهم يمشون ماكنت ابي احد عندي..
في نفس اليوم بالليل الساعه 2 مافي ولاصوت بالمستشفى لاممرضه ولامرضى لقيت بوجهي القبله ورفعت يديني ودعيت ان الله يصبرني ويقويني اروح اشوف بنتي بالعنايه ..
خلصت وحاولت انزل رجلي من السرير عيت تنزل احسها ثقل الجبل مسكت الشراب ورفعتها وكني رافعه ميت ورميتها على الارض ونزلت رجلي الثانيه وابكي ماني عارفه ليه ماني قادره امشي حاولت اوقف طحت على الارض وانادي الممرضات وابد محد يمي يارب احس اني بحلم بوقت الضعف الواحد مايبي الا أمه يمه وينك سامحيني آآآه زوجي ليه بس تسوي فيني كذا ارحم ضعفي دقت المره اللي جنبي على الممرضات ماحد جا قامت الله يجزاها الجنه ونادت عليهم وجاو يشيلوني وانواع التزمر علي مدم انتي ليه في قوم انتي مجنون رجل انتي في جلطه مافي حركه ..ولاكأني اسمعهم انا في عالم ثاني افكر ببنتي
اليوم الثالث الساعه 2 بالليل زي اللي قبله دعيت ثم حاولت بكل قواي ومافي فايده..تكررت نفس القصه
اليوم الرابع عشت فقت من الصدمه وجلست ابكي وابكي باعلى صوتي جاو الحريم يهدوني ويصبروني
اليوم الخامس حسيت بعافيتي شوي وحسيت برجلي بس كانت ثقيله وتنمل نزلت آخر الليل من السرير
بلبس المستشفى وحاولت اسحب نفسي قدرت امشي ربي لك الحمد والشكر بس رجلي ماارفعها ثقيله بس اسحبها سحب طلعت لاعبايه ولاطرحه والله ماصدق وش كان فيني مشيت طول الاسياب اقرى اللافتات وامشي بنص الطريق عرق جسمي وجاتني دوخه شديده وكنت بطيح بس تماسكت وقفت شوي وكملت
لين وصلت عنايه الاطفال هنا خلاص حسيت بضعف شديد وصرت ارجف شافتني ممرضه وقالت انتي مين وريتها البطاقه على يدي عطتني اللبس وقالت تعالي ومشت قلت لها لحظه بيبي انا ايش فيه قالت هذا بيبي مافي عيش اليوم بكره خلاص موت آآآآآآه حرام عليك الدنيا تدور فيني مسكت يدها قلت وينها هذي اشرت على واحد بالحاظنه وجهه مغطى بشاش قالت لا قلت وينها هذي اقصد واحد صغييير كله اجهزه وانابيب من كل مكان قالت هذا بيبي أنتي سكت وماتحركت من مكاني قلت متأكده قالت ايوه شوفي بطاقه
قربت من الحاظنه ماصدقت اللي شفته ورب البيت ماصدقت سبحان الله هذي اللي تقولون بتموت ملاااااااك
وربي ملاااك جمال موطبيعي وبياض سبحان من سواها ماعمري جبت كذا وربي حسيت بقدره الله وعظمته
دفيت يدي ودخلتها ومسكت كفها الصغير ورب البيت العتيق البنت لفت وجهها وناضرتني بعيني وابتسمت وطولت وهي مبتسمه انا هنا خلاص بكيت بكيت ومسكت بطني الم موطبيعي جاتني الممرضه قلت لها مافيها شي قالت لا هذا مافي طبيعي بيبي قلت لها ماعليها اجهزه بس ليه ساكته واتلفت كانها واحد كبير
قالت كل اجهزه دكتور شيل مافي فايده بيبي مافي يبكي لان مافي رضاعه مره لفيت اشوفها ولا طرشت شي اخضر كثير وثقيل زي الملوخيه قلت وش هذا قالوا بيبي مشوه من داخل معده لحال امعاء لحال امعاء مسدود مافي رضاعه مافي براز اذا مافي عمليه اليوم في موت ..
طلعت وقلبي يتقطع ودموعي خنقتني احاتي بنيتي واحاتي طريق رجعتي وشلون بوصل الممرضات مهملات تسيب ومن الساعه12 مافي احد بالمستشفى اغلبهم يروحون السكن ويخلون كم وحده تبلغهم عند الطوارئ..
طبعاً أهلي وش صار عليهم لانوم ولاراحه من مستشفى لمستشفى ومن مسؤل لمسؤل يبون مستشفى يقبل حالتها انا سادس يوم طلعت على مسؤليتي وبنتي بقت وماخلينا نت ولا اي وسيله نبي واسطه تطلعها قبل لا أخسرها ..
شاء الله ان يحصل ابوي ولد حلال له معارف كبار كلمهم وخلال ساعه تم نقل بنتي لمستشفى التعليمي مع طاقم طبي كامل باسعاف ودخلت العنايه وسوو لها مناضير استكشاف وبنفس الساعه سوو لها عمليه وصلوا المعده بالامعاء وقصوا الاجزاء الملحومه من الامعاء وصلوها الشرج ودخلت العنايه 19 يوم وباليوم العشرين طلبوني اكون عندها بالقسم الحمد لله مرت العاصفه بسلام فقت من الكابوس بنتي بين يديني
بس ماترضع الى الحين تقطع القلب الين بكت كانت صغييييره قد علبه الكلينكس بعد العمليات وقل التغذيه
بعد 10 ايام خف الترجيع اللي معها وطلبوني انقط لها حليب من صدري لمده 3ايام وبعده ارضعها كل يوم ملي خمس ايام وبالتدريج صارت ترضع وطلعت معها بعد 19 يوم كانت حياه جديده بالنسبه لي الارض مو شايلتني من فرحتي ..
طبعاً الدعاء يرد القضاء بكل ايامي كنت ادعي ان الله يخليها لي ومايحرمني منها بالرغم عندي قبلها بنتين وولد بس الضنى غاااااااااااااالي .
وأمي وأبوي تحملوا تبعات اعتراضهم بانهم تكفلوا فيها وفيني لان زوجي كنت متزاعله معه ومع اهله ولافكر يشوفني ولايدري وش صار على بنتي يوم جى عيد الاضحى دق يقول ولدتي ولا باقي ؟؟هذا موضوعه ثاني
بس شفتوا كيف قدره رب العالمين وكيف يجازي من اعترض على حكمته الحين بنتي 3 سنين ذكيه بشكل مزعج وتهبل كل من يحبها وش فاد اهلي دعواهم علي غير التعب والشقى..؟؟؟
الطريف ان بنتي كل فتره تطالع مكان الشق اللي في بطنها وتقول لهلي انا وماما كلنا مشقوق هههههههه
تقصد مكان العمليه..
طولت عليكم كثير بس حبيت اعيشكم جو القصه اللي صارت لي عشان لاوحده تفكر يوم تسقط جنيها لاي سبب مااتوقع فيه اقسى من ضروفي شي يفك الراس طبعاً بفعل فاعل بس الى هنا ومااقدر اكمل انا تحفظت شوي على بعض المواقف بقصتي عشان المشاكل ...
جدتي الى اليوم كل ماشافت بنتي تقول سبحاااااان من يحيي العظام وهي رميم

منقووووول

حبيت انقله لكم للعبره

لان فيً حريم تبا تنزل جنينها ع أتفهه الاسبابً يانهاً حملتً وولدهاً صغيرً ولاسوتً اشعهً وهيً ماتدريً ولاخذتً دواااً وهيً ماتدريً انهاً حااملً..

واللهً يهديً كلً وحدهً تفكرً بهالشيء

الموضوع: اللي تبي تجهض جنينها ...

أدوات الموضوع

عرض