أول مرة أسافر....

**إمEارAاتU** · 2007-08-09, 15:43

السلام عليكم
أنا بسافر أمريكا مدة أربعة شهور
و بصراحة هاذي أول مرة في حياتي أسافر و أركب طيارة
المهم أريد أسأل عن الأشياء الممنوعة في المطار
و الأشياء اللي أحطها في الشنطةاللي بشلها معاي على الطيارة
لأن الشنط الكبيرة بنشحنها
نسيت أقول أنا مسافرة مع ريلي عنده بعثة و ما عندنا عيال
يا ليت اللي عندها خبرة في هالأمور تساعدني
و أي حد متغرب في أمريكا و موجود هنيه يا ليت يرد علي لأنه عندي وايد أسئلة
و مشكووووووورين

المزيد من آخر المواضيع من نفس القسم:

**أمووون** · 2007-08-09, 17:51

ياااااااااااااااااااااااااااا حبي لأمريكا والله

شمي هوا امريكا عدل لأنج بتتولهين عليها وايد يوم بتروحين....

انا عشت في امريكا أحلى اربع سنوات بصراحة دراسة طبعا بس والله ايام...

أول شي يعتمد على اي ولاية انتوا سايرين... اذا ولاية عوده... بيكون فيها بقالات عربية ... فما بتحتاجين تشلين وياج الا اشي بسيطة .. بس في حالة كنتي في ولاية صغيرة.. يبالج تشلين اغراض لين تندلين اجرب بقاله لمنطقتكم...

اذا تحبين تخبريني على الخاص وين.. يمكن اقدر اساعدج.. لأنه عندي شوية ربيعات في امريكا يمكن يساعدونكم...

انزين ... أول شي الاشيا الممنوعة في شنطة الايد هي:

المقص.. السوائل... بس شي الأدوية اذا تحتاجين.. عطر صغير بس.. كريم صغير... هالاشيا بتحطينها في كيس بيعطونج اياه في المطار...

الشنطة الكبيرة حطي فيها اللي تبين... يعني بهارات.. شوربات... جبن كرافت لأنه ماشي مووول في امريكا.. ما خليت ولاية ما دورت فيها...

لا تشلين وااايد ثياب.. لا تسوين مثلي... أولا بتسيرون وعقبها بشهر وشي بيدش عليكم الخريف.. والخريف شوي براد يعني مثل ربيع البلاد.. وعقبها شتا... وعقبها ربيع.. وكل هالشهور باردة.. بس مثل ما قلت لج يعتمد على اي ولاية انتوا سايرين بحفظ الله...

ادوية الصداع والدورة والكحة وهالاشيا ما يحتاي تشلينها لأنج بتحصلينها في الوول مارت Wal -Mart وهذا سوبرماركت كبيييييييييييير تحصلين فيه اللي تبين وزيادة .. حتى فيه ورا مال تبديل التواير والزيوت حق السيارة.. يعني سوبر ماركت متكامل...

اذا كنتي تستخدمين حبوب منع وهالسوالف الأفضل انج تاخذين وياج كمية لأنه اذا خلصت عنج بتضطرين تسيرين المستشفى عشان تنصرف لج لأنه ما تنصرف الا بوصفة طبية ... وطبعا بيعطونج دوار غير وبتتلعوزين... انا مب معرسة بس هاي نصيحة من كثر ما شفت ربيعات المعرسات واللعوزة..

يوم بتسيرون طلعولكم Social Security Number على طول... عشان تقدرون تطلعون لكم بطاقات الولاية.. وريلج اذا ناوي ان شاءالله يشتري سيارة خليه يطلع اللسين مالهم على طول لأنه لو يا بيأمن السيارة بيطلع عليه التأمين غالي لو لسينه دولي.. وخليه يتحمل يوم بيسير يمتحن لازم يذاكر للامتحان التحريري زين عشان ما يتم يعيده... وعقب ما ينجح في التحريري بيسووله امتحان سواقه... بصراحة انا امتحنت سهل بس مادري انتوا اي ولاية.. ويوم بيمتحن لا يعطيهم ليسنه مال البلاد.. خلهم يصورونه ويردونه ويقولهم ماقدر اعطيكم اياه.. مب يسكت ويقول برايه... لأنه شي منهم ما يعرفون...

همممممممممممممممم... هذا اللي يا على بالي الحينه...

انا الحينه في الدوام ... اذا تذكرت شي بكتبلج اياه خلاف...

بالتوفيق ان شاءالله وسفرة موفقة

**شوق المحب** · 2007-08-09, 18:53

السلااااااااااااام كليكم ورحمة الله وبركاته
وانا بعد بسااافر انشاء الله
بس مو امريكا انا بسافر النمسا وسويسر ااا
وبقعد هناااك شهر وهذي اول مرة اروح فيها بلاد اوروبية
ادعولي اني اوصل اهناااك بالسلامه
وبروح ان شاء الله تاريييخ 14/8 سلااااام

**%Om_Khalid%** · 2007-08-10, 16:48

ماشاء الله الاخت امووون عندها خبرة عن امريكا ,,, خلاص استلمووها لووول

**rooza** · 2007-08-12, 19:45

هلا مرحبا الغاليه أنا حاليا بزياره لأمريكا عند أخوى وحرمته
وأعتقد أمووون وفت بكل شي
الغاليه الصراحه أمريكا روووعه وإنشاء الله تستمتعين بوقتج فيها حاولى تسوين لج برانامج عسب ماتملين الغاليه شوفى بالنسبه للممنوعات بالطياره ممنوع تشلين معاج عطور ميكاب مقص أظافراى شي حديد أنا عادى كان معاى مبايلى فيتامينات لشعري ولبان عادى ماخذوه منى
وأى شي عندج حطيه بجيس بلاستيك شفاف حتى لو خذتى شي من سوق الحره أحتفظى بالفاتوره

الغاليه اى ولاية بتسكنين و أى أسأله ثانيه أنا حاضره
بالتوفيق

***nawari*** · 2007-08-13, 06:39

اتروحين و تردين بالسلامه

**queen rose** · 2007-08-17, 15:50

اتروحين و تردين بالسلامه

**small** · 2007-08-17, 23:59

بالسلامة الغالية

الموضوع: أول مرة أسافر....

أدوات الموضوع

عرض

العرض المتطور

أول مرة أسافر....

المزيد من آخر المواضيع من نفس القسم:

المواضيع المتشابهه

وين تنصحوني أسافر شهر 11 ؟؟؟

وين أسافر هالشهر

وين تنصحوني أسافر؟

أسافر ولا لا؟؟

وين أسافر ...؟؟؟؟