مشكله مع مديري

**bint.aljasmi** · 2011-11-27, 19:00

السلام عليكم*
هاي اول مره اطرح في المنتدى مشكله تخصني ،، صارلي متوظفه في هالمكان من شهر وشوي وعندي مشكله مع المدير وهو من جنسيه عربيه،، وفي وحده معاي تعاني من نفس المشكله بس موظفه قديمه،،، المدير هذا شايف عمره ما يحترم الموظفين في اليوم اكثر عن عشر مرات يذكرنا ان هو مدير بطريقه مباشره وغير مباشره،،، ما عنده اسلوب في التعامل معانا ،، اذا صار موقف ما يسال عن السبب يعق كلام ويروح،، من كم يوم عق رمسه وراح وعقب استوعبت باللي قاله،، وانا رايحه لقسم ثاني شفته وسالته جدام موظفين القسم يعيد كلامه وعاده وبكل ثقه قلت له ماصار هالشي انا سويت شي ثاني وهل هالشي ممنوع قال لي لا ،،، فقلت له لا تعق قنابلك ( يعني كلام يرفع الظغط هههه ) قبل لا تتاكد. الريال اعتفس ويهه لاني واجهته جدام موظفين قسم ثاني،،،
وطبعا يا بنات هذا مب اول موقف ،،، كذا موقف وانا اسكت عنه،،،
مدير القسم واحد مواطن وهذا تحته وراح يعينون واحد اعلى عنه بس مواطن ان شالله
اللي مضايقني اكثر اني كنت اشتغل في مؤسسه معروفه لمدة اربع سنين بس استقلت لان في اماره ثانيه وكانوا مدارءنا مواطنين وفي مناصب عاليه وكنا نحترمهم مب بس عشان المنصب ،،، باسلوبهم وتعاملهم كانوا يفرضون احترامهم علينا*

بغيت حلول عشان اتفادى المشاكل،،، مابغي حلين اللي هم اني ما اتعامل معاه لان هو المدير علي الين ما يعينون واحد يديد ولا تقولون لي اكلم المدير اللي اعلى عنه،،، لاني توني متعينه وماحب ادخله وهو اكبر من هالسوالف،،، وتعودنا في دوامي القديم ان نحل مشاكلنا بينا بين بعض من دون ما اندخل المدير

ومااقدر اطنش لاني مااسكت عن الغلط

انا مفكره ادخل المكتب واقول له اعتبرني مثل اختك واتقبل نصيحتي واذا ما اتقبلتها انسى اني نصحتك،، ابغي اقول له انا نصحتك عشان مصلحتك وعشان الموظفين يحترمونك ومانبغي حد من برع القسم يقول عنا هاذيل مب متقبلين بعض،،، وعمره المنصب ما يفترض احترامه على الناس ( يحسسنا ان هو المدير ولازم نحترمه ) وان حسن التعامل والاخلاق بيفرضون احترامك علينا

فديتكم ياليت تنصحوني ،،،

المزيد من آخر المواضيع من نفس القسم:

**أنسة_سارة** · 2011-11-27, 19:40

اشتكي عليه دامه مأذي الكل اذا اكثر من موظف متضايق منه اشتكوا عليه علشان يتأدب

**شعاع امل** · 2011-11-27, 20:24

اختي انا مااعرف شو اقول بصراحة

بس نصيحة لا تركزي على موضوع اسلوب التعامل

بس ردي عليه وخلاص

انتي حتى لو نصحتيه ماراح يتغير اصلا

يوم يوقع في يوم من الايام بمشكله بيعرف قيمة الاخلاق

بس ردك كافي يخليه يفكر باسلوبه اذا فيه خير

وانا اعرف انك اشتغلتي من قبل في مكان محترم والناس تعاملهم حلو وهذا من حظك

بس بشكل عام في الاشغال مايركزون على هذا الشي

يهمهم سير العمل

وباقي الامور يعتبرونها شخصية

ويعتبرونك تركزي بشئ مب مهم

حتى مرات يحطون الحق على الموظف مب على المدير

الا اذا كان في شي علني مثل لا سمح الله مسبه او شي

فاحسن حل ردي عليه وبس

صح هو رافع ضغطك بس تاخذين اجر ان شاء الله

**bint.aljasmi** · 2011-11-27, 20:31

انسه ساره مشكوره عالرد حبيبتي انا الوحيده راح اشتكي اللي وياي مش مواطنين فماراح يشتكون لانهم ما يردون عليه اذا غلط عليهم ،، والموظفه اللي وياي هي الوحيده اللي ترد عليه

شعاع الامل مشكوره حبيبتي ... ردي خلاه يتفاداني يوم ،، واليوم رجع شرات ما كان ،، وانا مابغي اتمادا معاه لان ردي ممكن يخليني اطيح في مشاكل ،،بس بحاول كثر ما اقدر اني ما ارادده دوم،، واوقفه عند حده باسلوب حلو،، واذا ما نفع بكلم الاداره دايركت ،، ولو اني ماحب اشتكي
*

**umsa3ed** · 2011-11-27, 20:35

لا تنصحينه ولا شي خليه اصلا هو شايف نفسه وموضفينه امسويله سالفه الحين هو عرف شو شخصيتج وانتي ما تسكتين عن الحق فاحسن شي فرضي احترامج لا تتناقشين معاه وايد ولا تعطينه فرصه يطاول في الكلام

**سماويه** · 2011-11-27, 20:42

وعليكم السلام و رحمه الله وبركاته

الله يعينج حبيبتي

انتي عشان تشترين راحة بالج من البدايه ... اتبعي اسلوب البرود + الرد بالمنطق

صدقيني احسن الحلول

والموقف اللي سويتيه حلو .. بيخليه يفكر مرتين قبل لا يتهمج المرة الياية

اذا صار لا سمح الله و قال لج شي انتي مب مقتنعه فيه ... لا تسكتين .. بس ردي بطريقه منطقيه و دبلوماسيه

هذا في حدود الشغل

لكن اذا تمادى و قام يسب او يعق رمسة مالها داعي .. و ما يخصها في الشغل بشكل مباشر

لا تسكتين ... لا اتخلين حد يدوس لج على طرف (بس بطريقه حضاريه) لا تصارخين او تردين عليه بمثل اسلوبه

خليج ارقى عنه .. بس في نفس الوقت لا تسمحين له ان يغلط على شخصج

تحملي ست شهور .. اذا الموضوع زاد عن حده ... وقتها ممكن اتكلمين المدير اللي فوقه

بس ما انصحج اتدخلينه في الموضوع حاليا لانج توج يديدة .. هو بروحه بيقولج اصبري (ماشي غير هالرد)

و موفقه فديتج و ربي يفرج عنج

**شعاع امل** · 2011-11-27, 20:42

المشاركة الأصلية كتبت بواسطة bint.aljasmi

انسه ساره مشكوره عالرد حبيبتي انا الوحيده راح اشتكي اللي وياي مش مواطنين فماراح يشتكون لانهم ما يردون عليه اذا غلط عليهم ،، والموظفه اللي وياي هي الوحيده اللي ترد عليه

شعاع الامل مشكوره حبيبتي ... ردي خلاه يتفاداني يوم ،، واليوم رجع شرات ما كان ،، وانا مابغي اتمادا معاه لان ردي ممكن يخليني اطيح في مشاكل ،،بس بحاول كثر ما اقدر اني ما ارادده دوم،، واوقفه عند حده باسلوب حلو،، واذا ما نفع بكلم الاداره دايركت ،، ولو اني ماحب اشتكي
*

مشكورة اختي

ذكرتيني يوم كنت اشتغل كان الموظفين يتمسخرون علي عشان اسلوب تعاملي كان حلو

اخرها يوم ماتحملت صرخت على المدير راح اتهمني بقلة الذوق

فصرت مافرق الحين بين التعامل الطيب وغيره

مادري صار كله واحد عندي

**bint.aljasmi** · 2011-11-27, 22:52

Umsa3ed مشكوره عالنصيحه حبيبتي وبحاول اسوي اللي قلتي لي عليه ولو ان صعبه لاني اذا عصبت ماقدر امسك عمري ،،، ارادد وعقب اصيح
سماويه كلامج حلو وصدقج توني يديده ومايصير ويمكن هو متعمد يستفزني لان يكره المواطنين يخاف على منصبه ولاحظت عليه كذا اجتماع
المشكله يعطيني شغل باسلوب جنه يتامر عليه وانا ما تعودت على جذيه
شعاع امل ،، الواحد يتعلم من خبرته في الشغل وانا اتعلمت وااايد لاني كنت طيبه وتميت جذه سنتين

والله اني ارتحت من ردودكم الطيبه كنت مقهوره وضايجه وااايد لان صار موقف بينه وبين الموظفه اللي وياي لو انا كنت في مكانها جان قلت له انت قليل ادب ،، لان قال لها حتى لو سرتي الحمام ( وانتوا بكرامه ) استاذني

**عجب !!!** · 2011-11-27, 23:47

يا ختي شكله مديرج .. مصدق عمره
ذكرتيني بمديري سابقا الله لا عاده بس مديري كان خبييييييييييييث على فكره مواطن
لما ارتفع ضغطي اشتكيت عليه عند الإدارة وقلتلهم لا تتحرون لأنه مدير ومحد يقدر يحاسبه تراه موظف حاله من حالنا ويستلم راتب ولكل رئيس مرؤوس ؟؟؟؟؟؟
وفهم المدير العام بأني ما بسكت وببلغ عليه الشيخ
قالي بنقلج إدارة ثانيه بس لا تعترضين قلتله تمااااااااااام خخخخخخخخخخخ
وفتكيت منه ،، ووصلتني أخبار عنه بأن إدارته انعفست بعد ما طلعت لأني كنت ماسكه منصب رئيس قسم الشؤون المالية والإدارية ....
تعاملي وياه على أساس أنه موظف حاله من حالج وبيمشي الموضوع وياج صدقيني ...
بالتوفيق...

**فتاة ليبيا** · 2011-11-28, 06:59

فعلا ربي ايعينك... سبحان الله فكرتيني بمواقف صارتلي قبل...

عموما انقولك على حل ياغالية لكن يبيلها صبر.... بما انه مديرك عرف رايك فيه وانك مش حتسكتي على اي تمادي يصدر منه... خلاص الرسالة وصلت واكيد حيفكر مية مرة قبل ما ايحاول يتصرف معاك اي تصرف مهين... الان انسي وتناسي اراء الموظفين ورايه هو ...الغي وجودهم ... بس الفترة هادي خليهم محتاريين فيك اشتغلي واشتغلي واثبتي جدارتك وقدراتك وقللي النقد والشكوى والتذمر من اي شئ ... ومن المدير ذاته حتى لو هم فتحوا الموضوع... طبقي الحكمة (ان أردت ان تكون عظيما فأعمل في صمت)... اقهري المدير بصمتك وواعصابك وشخصيتك الفولاذية ... واكيد بهتز "ولو مايبين" .. وبس اغرقي في العمل وبيني انك في ااااااااااااااخر انسجام مع نفسك...
صديقيني الموظفة مهما كانت مظلومة وكانت تستخدم اسلوب الشكوى والمواجهة والتحديات تعتبر انسانة ضعيفة ومغلوب على امرها.. حربها دايما خااااااسرة.. وهى الطرف اللي بحملوها النقد واللوم... وانتي مش ناقصة تسمعي مثاليات وفلسفات زملائك... وبعدين المدراء من هالنوع دايما ايوزع في "داسوس" ينقله في كلام وتصرفات الموظفات والموظفات... فنبيك اتكوني طرف غامض لا يفهمك شنو تفكري ولا شنو تبي ولا على شن ناوية.... اشتغلي وانجحي وابدعي واقهررررررررريهم...

واستمري على اسلوب "المرأة القوية بصمتها والناجحة بعطائها" مدة شهور... وشوفي هل اتغير مديرك... هو المفروض يتغير.... واذا حسيتي انه قاعد يتطاول عليك.... فبكل هدوء انسحبي وقدمي فيه شكوى رسمية.... ومن غير ما تقومي بشوشرة او تهددي او تتكلمي مع الزملاء.... وبيني للمدير اللي اكبر منه انك مواطنة وتصرفات هذا المدير تجاهك تعتبر تجاوز كبير.. وانك مش حتسكتي وحتكبري الموضوع وهذا مش في صالحهم ولا صالح المؤسسة... ووبينيلها ان تصرفاته المستفزة .... ممكن تعرضه لانهاء الاقامة والخروج النهائي" من الامارات...

**بنت زاايد** · 2011-11-28, 07:42

اذا قال شي ردي عليه ووقفيه عند حده هذا هو الحل...قولي له الاحترام اول واخر شي...اعاملك مثل ماتعاملني...
اذا بترفع صوت نقدر نرفع اصواتنا...ولكن من باب الادب نسكت ولكن اذا استمر الوضع ماراح نسكت...

**ماحد شراتي** · 2011-11-28, 08:03

روحيله المكتب وكلميه باسلوبج يمكن على ايدج يتغير

ربي يحفظج الغلااا

**غياهيب81** · 2011-11-28, 08:08

المشاركة الأصلية كتبت بواسطة سماويه

وعليكم السلام و رحمه الله وبركاته

الله يعينج حبيبتي

انتي عشان تشترين راحة بالج من البدايه ... اتبعي اسلوب البرود + الرد بالمنطق

صدقيني احسن الحلول

والموقف اللي سويتيه حلو .. بيخليه يفكر مرتين قبل لا يتهمج المرة الياية

اذا صار لا سمح الله و قال لج شي انتي مب مقتنعه فيه ... لا تسكتين .. بس ردي بطريقه منطقيه و دبلوماسيه

هذا في حدود الشغل

لكن اذا تمادى و قام يسب او يعق رمسة مالها داعي .. و ما يخصها في الشغل بشكل مباشر

لا تسكتين ... لا اتخلين حد يدوس لج على طرف (بس بطريقه حضاريه) لا تصارخين او تردين عليه بمثل اسلوبه

خليج ارقى عنه .. بس في نفس الوقت لا تسمحين له ان يغلط على شخصج

تحملي ست شهور .. اذا الموضوع زاد عن حده ... وقتها ممكن اتكلمين المدير اللي فوقه

بس ما انصحج اتدخلينه في الموضوع حاليا لانج توج يديدة .. هو بروحه بيقولج اصبري (ماشي غير هالرد)

و موفقه فديتج و ربي يفرج عنج

وبالتوفيق حبيبتي ..

**اليامي مريامي** · 2011-11-28, 08:16

سزي له طافوسوي يالشغل الي عليج و اذا زادها راويه خوش و الله الي مايحترمنا مانباه جم واحد لعوزونا و سكتنا بس بالاخير انااواجهم مواطن و لاوافد اشتكي عند اكير راس اقدر اوصله بالشغل و لايهموني

**bint.aljasmi** · 2011-11-28, 08:49

عجب!!! هيه والله مصدق عمره .. الله يصبرني بس ...

فتاة ليبيا كلامج صحيح 100% بحاول اثبت عمري ولو اني ما اقدر اسكت بس بحاول لاني موظفه يديده

بنت زايد .. المشكله اللي فيني ان من اصعب انسى اللي حوالي واعق كلام واندم عليه عقب

ماحد شراتي .. بتريه عليه فتره شهر اذا اتمادى وياي يا اني بروح له المكتب او اني بشتكي عليه

غياهيب 81 .. جميعا ان شالله

اليامي مريامي .. مشكوره يالغاليه

كلكم مشكورين عالردود والنصايح الحلوه ريحتوني الله يريحكم دنيا واخره

الموضوع: مشكله مع مديري

أدوات الموضوع

عرض

مشكله مع مديري

المزيد من آخر المواضيع من نفس القسم:

المواضيع المتشابهه

كيف اتعامل مع مديري ؟

مشكلتي مديري !

مديري الهندي