اختي من البداية لازم يكون الاختيار صح
اول شي الدعاء
ثاني شي اختاري صح: وحدة مسلمة تعليم ابتدائي عمرها صغير تحت العشرين او فوقه بشوي
او وحدة كبيرة مسيحية بس تكون متعلمة وتدفعين لها عدل ( عشان ماتدور مكان ثاني محلات وغيره)،، تكون وحدة متحجبة اذا مسلمة او لافة شعرها على ورا اذا مسيحية حتى في الجواز وماتنمص حواجبها ولاحاطة مكياج او لابسة لبس مشخلع بس يكون بعد شكلها زين عشان ماتيج وحدة معقدة وانتي ترتاحين لشكلها انها تكون وحدة من البيت ( مو وحدة تطالعينها حق الكراف) ضرووووري انج وقت تطالعينها تحسينها ممكن تكون وحدة من اهل البيت
بعد ماتختارينها صلي استخارة
توصل عندج عامليها بطيب وعلميها ( وفري لها الاساسيات لباسين للشغل على الاقل وملابس داخلية قطنية وشبشب حلو وصابون للجسم وشامبو وديدورانت وفرشاة ومعجون اسنان ومشط وقباضات صغيرة مناسبة وحجاب وقطن للدورة وقفازات للشغل وموبايل صغير من دون كاميرا وبطاقة دو ارخص من اتصالات) علميها كل شغلة حق شو والموبايل قولي لها ماتشل وقت تشتغل تخليه داخل غرفتها والمكالمات عليها واي شي ثاني زيادة عليها ولا تتجسسين على مكالماتها ورسايلها
من البداية علميها متى تقوم وشو تسوي ومتى تدخل غرفتها
اذا عاملتيها باحترام وبرسمية بتعاملج بالمثل
ان رخيتي لها ركبت راسج وان شديتي طنقرت عليج
عامليها برسمية واحترام مع ابتسامة :) بتنظف وتطبخ وتشل اليهال خخخخ
انا اشوفهن احسن من غيرهن
وقت كلكم تطلعون من البيت خذيها معاكم تراها انسانة وماحد يتحمل الحبسة خص لو رحتوا كشتة
وكل شهر خليها توقع وقت استلام الراتب
(( ورقة وحدة فيها من فوق اسمها ورقم جوازها وجنسيتها ومن تحت جدول فيه خانات: قيمة الراتب،، التاريخ،، الملاحضات،، التوقيع)) الملاحضات مرات ممكن تزيدينها ( ايام رمضان ندبل الراتب عشان الشغل يزيد وااايد) او مكافئة)
وخبريها من البداية انج بتزيدين راتبها اذا كملت سنة او سنتين وهذي الزيادة بتكون مستمرة كل ماطولت معاج ( كل سنة زيادة خمسين درهم مثلاً) اما المكافئات لاتخبرينها خليها مفاجئة بس لاتكثرين فتتعود وعقب بنفسها تقولج عطيني وعطيني
الله يوفقج بوحدة صالحة وامينة متقنة لعملها مخلصة فيه