فزعتكم بنات احسن دكتورة في مستشفى توام

**درة مكنونة** · 2011-05-22, 23:02

هلا وغلا فيكم يا بنات المنتدى الغالي

مثل ما شفتوا من العنوان
انا احين ابي انقل للمستشفى توام
وبالتحديد ابي اسوي عندهم اطفال انابيب

تكفون بنات ابي خبرتكم منو ..احسن دكتورة فالمستشفى؟؟
علشان اراجع عندها...

ومنو يسوي عملية اطفال الانابيب دكتور ولا دكتورة؟؟؟
ومنو اسمها ريحوني الله يريحكم من الحيرة اللي انا فيها
ويزاكم الله الف خير

المزيد من آخر المواضيع من نفس القسم:

**@مبدعه@** · 2011-05-22, 23:03

الله اييسر امورج

**مون فاشن** · 2011-05-22, 23:07

ان شا الله البنات بيفيدونج ^^

**درة مكنونة** · 2011-05-22, 23:17

امين يارررب
اشكر مروركم...الطيب
في انتظر الردود

**درة مكنونة** · 2011-05-23, 08:00

بنات وينكم؟؟؟
محد يراجع فمستشفى تواااام
ردوا علي بليز

**@أم عمر@** · 2011-05-23, 08:09

الله يرزقج الذرية الصالحة

**bnooota** · 2011-05-23, 08:23

و الله مااعرف بس حبيت ارفعلج الموضووع
إن شااء الله البنات يفيدونج

**درة مكنونة** · 2011-05-23, 11:07

اشكر مروركم الطيب
في انتظر ردوكم
بليييز يلي تعرف لا تتطنشني

**amal2011** · 2011-05-23, 18:12

اللي تسوي العمليه دكتوره في الدكتوره فتحيه مواطنه والدكتوره نيسا اعتقد باكستانيه بس في الغالب اللي تسوي العمليه الدكتوره فتحيه اما عن الاحسن فامااعرف والله وكلي امرج لله انا حاليا في خطوات العلاج بس اهم شئ اتصلي احجزي موعد الحين اهم واصلين لشهر 10 زحمه انا انتظرت موعدي 6شهور وصدقيني الايام تمر بسرعه لاتزعلين دعواتج واي شي انا حاضره

**ღcute girlღ** · 2011-05-23, 18:21

**درة مكنونة** · 2011-05-30, 08:15

المشاركة الأصلية كتبت بواسطة amal2011

اللي تسوي العمليه دكتوره في الدكتوره فتحيه مواطنه والدكتوره نيسا اعتقد باكستانيه بس في الغالب اللي تسوي العمليه الدكتوره فتحيه اما عن الاحسن فامااعرف والله وكلي امرج لله انا حاليا في خطوات العلاج بس اهم شئ اتصلي احجزي موعد الحين اهم واصلين لشهر 10 زحمه انا انتظرت موعدي 6شهور وصدقيني الايام تمر بسرعه لاتزعلين دعواتج واي شي انا حاضره

الله يعطيج الف عافية اختي امل ويرزجج بالذرية الصالحة المعافاة
ويوفقج بالعلاج
انا اخذت مووعد الحمدلله اعطوني 6/1 بشوف الدكتورة شو راح تجولي
ومتى راح تعطيني موعد حج العملية..والصبر زين..والله كريم
ومثل ما قلتي اهم شي التوكل على الله في كل امر
والله يرزج كل محروم ومحرمة بالذرية الصالحة
بالتوفيج فديتج

**saragh15** · 2011-05-30, 15:47

الله يكتب لك الخير أختي بس يا ريت تخبريني اذا يقبلون بطاقه ضمان العاديه للمراجعه العاديه و كم تكلف العمليه بس تسيرين و راسليني ع الخاص ارجوكي

**فديت حمد** · 2011-05-30, 16:15

صراحه مستشفى توام كان قبل زين ايام يوم كان عندهم دكتور وليد اما الحين دمر لانه وليد طلع عنهم و أنا تعالجت عنده والله رزقني على ايده الحمدلله مرتين واللي عندها ضمان تروح وتعالج عند دكتور وليد حتى هو يسوي انابيب واللي تبا اسم العياده اسمها هيلث بلس في ابوظبي والله يرزق كل محروم ان شاء الله *

**درة مكنونة** · 2011-06-14, 16:20

الف شكر اختي فديت حمد... على الرد
بس انا استحي انه ريال يسويلي العملية
وريلي بعد يرفض هالشي...
وعشان جية ادووور دكتورررة شاطرة
بس الا غلبية فهالمجال ريايل يالله بالستر
الله يرزجنا بالحمل العاجل....
احس اني هونت من مستشفى توااام من كثر ما ذموه
وسرت الموعد بس ما دخلت عند الدكتورة استشرت عن العمليه
وكيف انه ما يضمنولج الحمل ..ويطلبون وايد ..
بس ابي دكتورة ما ابي ريال .......ياررررب الطف بحالي

**أم جمول** · 2011-06-14, 16:57

حبيبتي أنا صار لي أكثر من سنتين أتعالج في توام وسويت عندهم مرة تلقيح صناعي وفشل و3 مرات أطفال أنابيب وفشلت المحاولات الثلاث ومحاولة حقن مجهري الشهر الماضي وفشلت
بالنسبة للدكتورات ما في دكتورة أو دكتور ثابت يعالج ويتابع حالتج في كل موعد يدخلونج على دكتور أو دكتورة حاليا عندهم دكتورة فتحية المواطنة وهي سوت لي معظم المحاولات السابقة لي، وعندهم دكتورة نسا الباكستانية وإللي عرفته إن نسبة النجاح عندهم صارت ضعيفة مو مثل قبل، واهتمامهم بالمريضة أقل من قبل ،والدكاترة الممتازين عندهم تركوا المستشفى مثل دكتور وليد ودكتور ديفيد رئيس القسم ،وحاليا يطورون القسم ويبنون لهم مبنى جديد لكن مو مهم المبنى إذا الدكاترة مو كفاءة وأجهزتهم مو مطورة مثل باقي مراكز الإخصاب، حتى إنهم يرجعون جنينين فقط ويرجعونهم في ثاني يوم بعد السحب مع إن معظم مراكز الإخصاب ترجعهم رابع أو خامس يوم ،ويرجعون أقل شي 3 أجنة .
وتدرين بعد السحب ما تجي الدكتورة تتطمئن على المريضة بس الممرضة إللي تشوفها وتعطيها الأدوية وحتى ما يخلون المريضة ترتاح بعد الترجيع على طول يقولون لج مع السلامة، وإذا كنتي موظفة ما يعطونج إجازة يقولون لج مارسي حياتج طبيعي من ثاني يوم ، وحتى الجماع عندهم مسموح بعد الترجيع هذا إللي مكتوب في ورقة التعليمات، وفي فترة أخذ إبر التنشيط صاروا يقولون ممنوع تاخذين الإبر عندهم قوانين جديدة وعلىيج تدورين مستشفى خاص يعطيج الإبر أو تروحين عيادة الجاهلي، وممكن يعطونج الإبرة بعد مذلة وبعد ما تسمعج موظفة الاستقبال فاطمة للبنانية كم كلمة في العظم على إنه صار ممنوع.
ضعفهم وإهمالهم يمكن لأن علاجهم مجاني أنا عن نفسي محاولاتي الجاية ما بسويها عندهم وإن شاء الله يرزقنا طبيعي بدون مستشفيات وعلاج يا رب يا رحمن يا رحيم
إحبـــــاط صح

الموضوع: فزعتكم بنات احسن دكتورة في مستشفى توام

أدوات الموضوع

عرض

فزعتكم بنات احسن دكتورة في مستشفى توام

المزيد من آخر المواضيع من نفس القسم:

المواضيع المتشابهه

بغيت اسوي توام منو احسن دكتورة في دبي

اي مستشفى احسن بالعين لمتابعة الحمل والولادة؟ مستشفى توام ولا مستشفى العين

احسن دكتورة في مستشفى دبي للولادة

احسن دكتورة في مستشفى النور

بنات العين شو احسن مستشفى توام او الواحة؟