مغامرات حملي الثالث

**المديه** · 2011-01-24, 13:22

السلام عليكم ورحمة الله وبركاته
شخباركم الغاليات

اليوم بخبركم عن مغامرات ولادتي ببنتي وهي الثالثة وقبلها ولدين الحمد لله
هذا الحمل بالنسبة لي من اوله لاخره مفاجآت وكوارث

يعني مع اني كنت اخذ احتياطاتي بالحمل وموانع وغيره الا اني حملت واول ثلاثة شهور ماكنت اعرف بالحمل واسبوعيا ناقزة الصالون حمام مغربي وتشقير وصبغ ووايد اشياء وانا ولا على بالي لاني الحمد لله الوحام عندي بسيط وكله الا اني دومي احس اني شبعانه ومالي نفس بالاكل وعادي يومين يمروا على انا مااشرب ماي
المهم بيوم من ايام الله كنت مداومة وحسيت بالم فضيع بخاصرتي كل شوي يزيد علي وانا خلاص انتهيت لين مالاحظ على مسؤولي وقالي شكلج تعبانه روحي البيت وانا مادريت بعمري كيف وصلت البيت وقعت اصيح من الالم قلت الدودة الزايدة بس الالم كان فوق وعلى اليمين يعني مايخصه
المهم اتصلت بالمنقذة الاولى امي الله يحفظها وانا اصيح ولحقت على هي واخوي وودوني المستشفى وريلي احيده مسافر ذيج الايام دخلت على الدكتور وامر لي بتحليل دم واشعة بعد مااكدت له اني مب حامل لانه قبلها باسبوع كان يطيح لي دم وسويت تحليل منزلي ومابين شي
بعد ماخلصت الاشعة وبنفس الوقت طلعت نتيجة تحليل الدم النيرس يايه تبشرني اني حامل وانا عيوني @_@ لا كيف وليش ومايستوي مني مناك راوتني النتيجة وقالت ها طالعي بققي عينج عدل
قلت لها عن الدم والتحليل قالت الدم لانه الرحم يتوسع والتحليل مب شرط يكون صح تميت متغايضة وامي مستانسة كانه اول حمل لي والالم هو عبارة عن الامساك اللي مستوي لي وانا ماحاسة.
ومرت الايام على خير والحلو اني كنت اضعف على الرايح ووناسة وبعد الشهر السابع بديت المشي ويا خواتي اللي يبونها من الله هم يخفون وزنهم وانا الاثنين للحمل والوزن خخخخخخخخ
وكان موعد ولادتي تاريخ 28 /5/2009 وانا كنت ابيه 2010 لانه اول بيبي لي 2004 والثاني 2006 وانا احب الاعداد الزوجة بس الحمد لله على النعمة
تاريخ 22كنت امشي مع اختي واحس بطني يعورني من تحت كانه راس الجنين يضغط على تحت وكل عشر دقايق اوقف وايود بطني ماكان الم قد ماهو ضغط بس استمريت بالمشي وخلصت وروحت البيت وهاي حالتي لليوم الثاني
تاريخ23قررت اني اسوي حمام وتشقير وحف وكله عسب بتم 40 يوم مابتعدل ورحت شريت الحلاوة وجهزت وقلت برجع من المشي وبخلص شغلي بروحي بالبيت بيوم وحدة

، خلصت مشي وخذت اليهال وروحت ولما وصلت البيت الساعة 11 بالليل ابي انزل من السيارة هوووب عورني ظهري شو السالفة ها الم مب طبيعي مااحس فيه الا لما اولد لما الظهر يتمدد , دخلت البيت ورقدت اليهال والالم يزيد كل عشر دقايق وانا اقول وابوي شكلي بولد اليوم وانا ماحفيت على الاقل وحشائش السافانا حدث ولا حرج وماشي وقت ها الالام من الاخير وركيض على الحمام اسبح ومالي غير الموس وامري لله بس الحق على المنطقة الحساسة اهم شي سويتها شطرنج رقعتها من كل صوب ماقادرة من الالم وحشرت ريلي على التلفون وحميتي اللي ريلي ماكل فوادها وهو كان بالدوام وقلت له كانه الم ولادة واذا زاد بتصل عليك وبروح اشيك بالمستشفى لانه الموعد بعده والريال ياي درب النص ساعة سواها عشر دقايق
وقبل لا اسبح لاحظت نزول الماي بس سكت مابي اولد اليوم ماخلصت حف

<<<< على كيفها والله
شوي اجوف ريلي يدق الباب على وانا قافلة باب الحجرة ودخل من حمام خوااته بينا جامة المروحة ويكلمني متفيج وانا همي اخلص شغلي

وطلعت ولبست وقال لي بزقر امي قلت له لا لاتوعيها انا بروح افحص وبرجع لانه بعده موعدي قال لي انزين بنروح لامج قلت لا مب لازم اخواني عندهم امتحانات
ومني ومناك مر على امي وخذناها ولما وصلت ودخلت المستشقى الساعة1 ونص وفحصت قالت لي الدكتورة فاتح 8 سانتي يلا على الولادة

وانا ماشي مسيرة مب مخيرة وقلت هاي البنية بعدها مايات ومطلعة روحي ماراضية تخليني اخلص اشغالي

كنت اقري على روحي سورة الزلزلة بس ها اليوم نسيتها وماقادرة اتذكرها والنيرس تقولي ادعي واقري اقولها مااقدر نسيت كل شي وتمت تقرى على مسكينه وانا بموت اقول لامي مابي اولد الحين ماوقته<<<<<< والله متفيجة خخخخخخ
وشوي حسيت بالزفرة وربيت الساعة 3 و20 دقيقة الحمد لله وطلعت بطلعان روحي بس حسيت بالم فضيع بعد الولادة قعدت اصيح وهي مبتسمة ريلي يقول لي انتي تصيحي وبنتج تضحك عليج قلت بخاطري هاي ناوية على حرب اجوفها من وهي نطفة تعاند فيني
وليومكم مغامرات وياها بس الحمد لله اختي وامي ساعدوني بتربيتها ومدلعه من يدها كانه بنته من كثر مااتعود عليها واتوديه سوق السمج كل يومين حضرتها تحب السمج ولازم تشتريه بروحها <<< طالعة على ابوها هسيسية

وتوتة توتة وكبرت البنوتة

واتمنى اني كنت خفيفة عليكم مع انه في مواقف وايد استوت بس حبيت اختصر
وادعولي انا الحين بحملي الرابع وها روحه قصة
والله يسهل على كل حامل

المزيد من آخر المواضيع من نفس القسم:

**صمت الغلا** · 2011-01-24, 13:30

الله يسهل عليج اختى

**دمووووع** · 2011-01-24, 13:38

ههههههههههههه اسميج فايجه
الحينه تربين والا تحفين !!! والله انج تحفه

الحمدلله على سلامتج وسلامه البنوته
ومبروك عليج الحمل اليديد والله يسهل عليج وتطلع لج بنوته مطيعه شرات ما تبين >>>وهذا سابع المستحيلات

ياحب البنات للمعاند ويا الام والدلع على كيفج ويا ابوهم !!

الله يحفظكم لبعض يارب

**أم غزلان** · 2011-01-24, 13:49

ماشا الله

تتربى في عزكم ان شا الله عاد انتي اسميج فايجه لوول تبين تحفين وحالتج لله وماشا الله يوم وصلتي 8 سانتي انجاز ها

**نم نم مي** · 2011-01-24, 14:03

مـــــــــــــاشاء الله عليج ..

الله يبارج فيهــا ويجعلها من الصالحات القانتات الباراات بوالديهــا ..

**المديه** · 2011-01-24, 14:22

مشكورات حبيباتي على المرور
وبعدين لازم احف كيف عيل اسير اربي جي وعقب مابقدر شهر بطوله صعبة والله
وعن اني رحت جاهزة للولادة والله جي زين ولا عذاب المستشفيات وبعدين ماشي احسن عن المشي هو اللي يساعد صج والتوكل على الله
الله يعين كل حامل يارب

**FoOo** · 2011-01-24, 14:32

الحمد لله على السلامة

**Mall.08** · 2011-01-24, 14:53

ربي يسهل عليج .. ويقومج بالسلامه
ضحكتيني .. باسلوب رمستج

نتريا منج سوالف يديده
ربي يحفظج

**ام سعيد 2001** · 2011-01-24, 15:26

ماشاء الله عليج
الله يحفظها و يبارك لج فيها و في اخوانها ان شاء الله
الله يتمم لج حملج على خير و يسهل عليج ان شاء الله

**شوشو_24** · 2011-01-24, 15:38

الحمدلله على سلامتج وسلامه البنوته
ومبروك عليج الحمل اليديد والله يسهل عليج

**نونه دلوعه** · 2011-01-24, 15:41

ههههههههههه

**شاعرة شجن** · 2011-01-24, 16:00

ههههههههههه
ضحكتيني والله سوالف انتي
الله يسهل حملج يارب ويرزقج ببنوتة وتسوين تعادل هههه

**عين الدماني** · 2011-01-24, 16:52

صدق اكشن المهم الحمدلله على سلامتكن وربي يخليكم لبعض

**‏ƺọỐġ❤Ğăζβh** · 2011-01-24, 16:53

ههههههههههههه والله انج سوالف .. حبيييتج

الله يتمم حملج ع خير ياارب وتربين وتيبيلنا كتكووت حلووو شراتج

**عروس مدوخه** · 2011-01-24, 17:05

الله يبارج فيهــا ويجعلها من الصالحات القانتات الباراات بوالديهــا

الموضوع: مغامرات حملي الثالث

أدوات الموضوع

عرض

مغامرات حملي الثالث

المزيد من آخر المواضيع من نفس القسم:

المواضيع المتشابهه

حملي الثالث طاح ياربي شة الحل

(مغامرات مريوم) >> قصة اماراتية

حملي وما ادراكم ما قصة حملي

بنات هذا حملي الثالث ونا في التاسع وشورو علي وين اربي في مستشفى الزهره ولا مستشفى دبي

مغامرات ابوسريع!!!