ما رأيك في سكن الزوج عند...

**مرحة** · 2010-01-16, 07:41

السلام عليكم و رجمة الله و بركاته ..

اشحالكم خواتي ؟
عساكم طيبين؟

خواتي حبيت اناقش وياكم هالموضوع ...

الحين الريال يوم بيي يخطب بنت من البنات و اتكون هالبنت مب من نفس الاماره الي هو فيها يسيرون أهل البنت يشرطون ع الريال انه البنت ما تبعد عن الاماره إلي هم فيها ...

مثلا الريال من بوظبي و البنت من الفجيره لازم الريال يسكنها فالفجيره عشان ما تبعد أن أهلها و أنا إلي أعرفه و أحيده من يدودنا و ساير انه الحرمه هي الي تتبع الريال مب الريال الي يتبع الحرمه يعني من المثال لازم البنت تسكن فبوظبي مب فالفجيرة صح ...

و مادام اهلها يبونها اتم عندهم ليش يزوجونها في الأساس يخلونها عندهم أحسن...

يعني كل وحده فينا اتسير وين مكتوبلها نصيبها مب هي الي تختار نصيبها وين يكون ...

أنا عن نفسي أشوف هالشي مب حلو ..

و بغيتكم اتشاركوني برايكم في هالنقاش ...

و السموحة

..

المزيد من آخر المواضيع من نفس القسم:

**ريكاز** · 2010-01-16, 07:46

حبوبه كلامج صح انا بعد هذا الي أحيده إنه الزوجه تتبع زوجها بس ما اعرف شو راي البنات

**مشاعر صامته** · 2010-01-16, 07:48

اختي كلامج صح

و الحين الموضه الجديده عيش عند اهلي العمر كله بالله وين الرجوله بصراحه زمن غريب وعجيب

بعض الرجال والله يرضون لانهم يحبون حريمهم بس واحسهم ما يفكرون

عندي وحده من ربعي تقول من كثر ما هو يحبني يخدمني انا واهلي واهله ما يسأل عنهم

وخليته يسكن في بيت اهلي

**super girl** · 2010-01-16, 07:51

كلامج عين العقل

و ضحكت يوم شفت موضوعج لانه دار في بالي هالسؤال قبل لا اشوف موضوعج

**مرحة** · 2010-01-16, 07:54

اشكركم على تفاعلكم ويا الموضوع..

الصراحه احس فيها هزه فرجوله الريال تجاه اهله و غيرهم ...

**BabY_Sol3eiah** · 2010-01-16, 07:56

اذا الريال يقدر يوفر لها سكن في نفس اامارات اللي يشتغل فيهااا لييييييش بعد البنت اتم عند اهلها ؟؟

اعتقد ان احرمه لا زم تتبع ريلها عشان يكونون قراب من بعض و يحسون بالمسؤوليه و بالزواج ,, مب حلووو تكون الزوجه في اماره و الزوج في اماره ثانيه ..

الا اذا كان عندهم ظروووف خاصه

يعني مثلا

- الزوج ما يقدر يوفر سكن للزوجه في امارة ثانيه

- ام او اب الزوجه ما عندهم حد غيرها ,, فأحسن اتم في نفس الاماره ,, لاقدر الله الام تتعب او تكون مريضه فبنتها تكون قريبه منها

- اذا كان شغل الزوج يوم او يومين فقط في الاسبوع و يرجع الاماره الثانيه

- اذا كان شغله يعني امم يتم اسبوع كامل او شهر في دوامه او اذا كان دوامه في الجزر ليييش الحرمه تروح فقيره و تقعد بروحها في البيت في مكان ما تعرف عنه شي ,,

جييييه يعني

**زعابية غاوية** · 2010-01-16, 07:56

واللع أنا أشوف في بعض لرياييل جيه..
شو ها عيل ليش الحرمه معرسه مب عشان تحس أنها دخلت حياة يديده وتحس بالأستقلاليه شحقا عيل أتم لاصقه فاهلها..

**مدمن غلاك** · 2010-01-16, 08:01

انا احس ان هل شئ عادي لان الريال يقدر يتنقل بسهوله

يوم في بوظبي والثاني فشارجه والثالث فراك شئ عادي

وسهل بس الحرمه لها حرمتها ماتقدر تروح وتي على راحتها

ولا بتصير علج في حلوج الناس ..

ومهما يكون ترى العمه مو مثل الام .. هاي وجهة نظر انسانه مو متزوجه

يمكن اتكون غلط بس من الي اجوفه حوليني احس ان هل شئ احسن

**زهور الخزامى** · 2010-01-16, 09:04

طبعا لا زم تقبل انها تنتقل معاه للإمارو اللي فيها شغله و رزقه يا ما اتوافق من البداية عليه

**غاليه الحمادي** · 2010-01-16, 09:11

بالنسبه لي .. الحرمه تتبع زوجهآ ..

لكن حصل و شفت بنآت تزوجوآ و سكنوآ عند آهآليهم بآلآيجآر ( طبعا ً في الملحق )

مآدري حسيتهآ مب حلوه للزوج ما بيآخذ رآحته
و البنت مآ بتتعود على حيآه مآ بعد الزوآج ..

**ام عمر1** · 2010-01-16, 09:40

طبعا الحرمه تتبع ريلها وتكمل معاه المشوار وين ماراح،،مب تشرط تقعد عند اهلها؟؟؟!!!!!!!!!!!

**حدي دلوعه** · 2010-01-16, 09:47

اكيد الحرمه تتبع زوجها..

سبحان الله كيف تفكير هالناس.. سوا اهل البنت او الريال

في وايد ناس يشرطون ان البنت تزوج بس ماتطلع من البيت.. يعني الريال هو اللي يسكن فبيت اهل حرمته.. بصراحه انا اشوفه عيييييب

**::ملاك::** · 2010-01-16, 09:53

الحمدلله لازم تتبع ريلها بس كل حد و ظروفه..
بس الأفضل الحرمة ما تخلي ريلها و تحاول تقضي كل وقتها معاه ،،
بس لو كانت بعيدة عنه بيشوفهم بس مرتين في الأسبوع أشوفه شوية..

**الحور الساكن** · 2010-01-16, 23:51

اذا البنت ظروفها اتحتم عليها انها اتم فامارتها لين اتخلص شوه المانع!!!!!!!!!!

يعني مثلا تدرس ...ريلها يتم معاها لين تتخرج..وبعدين ينتقلون لامارة الريال..واذا اتفاهمو انهم يتمون فامارة الزوجه وين المشكله!!!!!!!
أهم شي رضى الطرفين والتفاهم

**cute ^_^** · 2010-01-16, 23:54

صح كلاامج
اذا الاهل مآيبون بنتهم تبعد عنهم خل ايلسونهآ عندهم او يزوجنهآ وأحد من اللي حولهم
والريأل اللي يسكن بيت اهل حرمته تسمونه ريآل؟

الموضوع: ما رأيك في سكن الزوج عند...

أدوات الموضوع

عرض

ما رأيك في سكن الزوج عند...

المزيد من آخر المواضيع من نفس القسم:

المواضيع المتشابهه

ما رأيك في هذا الحب؟؟

اذا تبين جمال حقيقي وطبيعي تعالي........ الزوج وما ادراك ما الزوج خخخ!