مصيبه الله يخليكن ساعدني

**لعبة الايام** · 2010-01-13, 12:44

السلام عليكم ورحمة الله وبركاته

والله مب عاارفه وين احط هالمشكله او في اي قسم ؟؟؟

المهم السالفه نحن عائله مكونه من 10 اشخاص وبيت كبير وعندنا 3 خدامات اندونيسيات وحده منهن يايه من 6 شهور وصغيره عمرها 25 بس عليها حركات وانا شكيت فيها من زمان وفي نفس الوقت مارمت اخبر الوالده لانها بتعق السالفه عليه وبتقولي اني اتبلى على الخدامه خصوصا انه شغلها اوكي ونظيف امس وقت الظهر الوالده كانت تدور ساعتها مختفيه ويديده وسارت غرفة الخدامات وحصلت تلفون موبايل مع انه نحن اشترطنا في المكتب انه مايكون عندها موبايل متى مابغت تكلم اهلها نخليها تتصل من تلفون البيت المهم هيه قالت انه ماعندها مع انها كانت راده من عند نااس هييه كانت ماتباهم والسبب اونه انه بيتهم يديد وفي حوشه وايد رمل بعدهم مازرعوا فيه شي والعيال ينون مارامت لهم ومايلبسون نعول وصخين انا من هالرمسه اللي قالتها انا ماارتحت ومن حركاتها بعدين مارتحتلها المهم الوالد والوالده عجبتهم واختاروها لانها مرتبه ونظيفه هذا شكلا خارجيا وش دراهم عن اللي دااخل ؟؟؟ المهم نرجع لسالفة الموبايل طلع فيه ارقام من بلادها ورقمين من داخل الدوله واتصلنا الاولى طلعت حرمه والثاني يرن بس مايرد وبعدين صاار مغلق المهم يوم سألناها عن التلفون قالت هذا من زمان من يوم انا كنت عند الناس اللي قبلكم والتلفون شكله يديد قلت حق الوالده لاتصدقينها المهم انه رقم التلفون نفسه من الارقام اليديده اللي تبدأ 056 وتاريخ صناعته 1 ابريل 2009
وهي يت عندنا ع شهر 6 وتمت عند الناس اللي قبلنا اسبوع واحد مااعتقد انها لحقت تشتري التلفون خصوصا انها كانت يديده فتوقعاتي انها انها اشترته من هنيه يوم كانت عندنا والرقم بعد .
المهم نحن الحين بنطلع الرقم بنشوفه على اسم منو؟؟ المهم وبااختصار انا هالشي كله مالي خص فيه وين المصيبه العوده؟؟ بعد مافتشت في التلفون والصور لقيت مصايب فيه طلعت راعيت حركاات كييف؟؟ شفت صورها لابسه جنز وقميصي اليديد اللي مالبسته الا كم مره ومسويه حركاات الحقيره بغييت امووت من القهر وتضاربت مع الوالده والوالد لانهم مايبوني اكلمها لاني بشوتها من القهر وبعق عليها كلاام حااار مااروم اتحمل مسكوني وماخلوني خايفين لاتسويلي عمل لانه مرت علينا سالفه حد من الاهل وسوت الخدامه لها عمل بسبة الضرابه معاها المهم ساارت لها الوالده وسألتها تعرفون شو قالت؟؟؟ اونه هالقميص كااان مع الملابس القديمه اللي كنا حاطينهن في البيت عسب نوديهن الهلال الاحمر وهييه لبسته ماتعرفه حق منو هالقميص الله ياخذها هالصايعه انا بطبيعتي واسلوبي عاادي مع الخدم واكلمهم بااحترام بس لو عصبت لازم اصاارخ مااتحمل بس هااي بالذات ولامره تضاربت معاها بس اشك فيها واراقبها من بعيد لبعيد وسبحان الله طلع شكي في محله المصيبه انهم مايبون يسفرونها خصوصا انه عندنا وايد ضغط في البيت ومصاريف تكلف واايد لخدامه يديده والوالده عايبتنها اصلن تباها على طول اونه هزبتها وخلاص انتهى الموضوع؟؟؟ بس انا اللي قاهرني قميصي مب عارفه كيف اتصرف معاها والقهر بعد حاطه على صورها اطارات وكلمات عليهم مثل love ولا بعد مصوره صورتنا الجماعيه اللي في البيت ومصوره بيتا فيديو ومصوره الخدامه الثانيه ماسكه صورت الوالد ومصوره فيديو كليب وصخ من التلفزيون والله بموووت قهر كل هذا ويبونها عندهم في البيت ..

المهم خواتي انا بغيت اشاوركن واسمع آرائكن في سالفة قميصي ابى اي حركه او اي اسلوب اتخذه معاها بسالفة القميص انا مب هامني القميص اللي قاهرني انها ليش تلبسه وانا اكره شي عندي اشوف الخدم يلبسون ثيابي ابى اعق القميص في ويهها مستحييل البسه مره ثانيه؟؟؟
الله يخليكن ساعدني شو اسوي ؟؟

واللي ماتقدر ترفع لي الموضوع ؟؟

والسموحه اني طولت عليكن

المزيد من آخر المواضيع من نفس القسم:

**ماحد شراتي** · 2010-01-13, 12:55

ما اعرف شو اقولج.. غير الله يعينكم على هالنسره..
ان شاءالله البنات بفيدنج

**برق لمع** · 2010-01-13, 12:58

اضربيها ضرب وبردي خاطرج ملعونه هاي

**شيوخ الامارات** · 2010-01-13, 13:17

وامــــــــــــج ساكته

شو هذا انتو اتيبو الخدامات عسب ايمشنكم على كيفهم

الصراحه الله يعينكم

انتي اذا مظغوطه انا ارتفع ظغطي من سالفتكم وبرود اهلج

**أنسة_سارة** · 2010-01-13, 13:24

اختي هاي لازم على طول تتفنش كلمي امج وابوج وقوليلهم عن تصرفاتها الا خدامه هي فنشوها وهاتوا غيرها يعني مصوره صورتكم الجماعيه ومصوره بيتكم كيف تثقون فيها؟؟؟؟ بتيبلكم مصيبه باجر .....

**أم علي$العين$** · 2010-01-13, 13:29

خليها تاخذ القميص...........دفاعة بلى

وسلمي من شرها

تراهن ما يخافن الله

**قانونيه** · 2010-01-13, 13:29

من رأيي تيلسين معاها من غير ضرابه
اتشيلين الموبايل عنها و تمنعونها من الطلعه إلا للضروره
و بالنسبه للصور لا تهتمين لأنها مب وحده من أهلج يعني طنشي
ترى تربيتهم غير و هالشي عادي عندهم
بس إذا أمج مصره عليها خبروها بحدودها و قوليلها الملابس تنغسل
وعلى طول تنحظ بالكبت يعني الملابس ما أتم أبحجرتها
والله يعينكم انتي دوم حصني عمرج و أتقي شرها

سلام

**ميثانو** · 2010-01-13, 13:30

حبوبه في هالوقت ماتشرطين على الخدامه ماتاخذ موبايل
لانه لو ماخذتولهن حد ثاني بيطلعلهن .... يا الدريول يالزراع يا ايا كان

خلو الموبايل عندها ... ولاتبرون في خصوصياتها بدام هي كايمه بواجبها باكمل وجه

وعلى شان سالفة القيص خلااااص هي لبسته وصار اللي صار

قوليلها الثياب من تتغسل تكوى في نفس اليوم وتيب الثياب الغرفه وبهاي الطريقه مابتم الثياب يومين عندهم في الغرفه

وعلى فكره هذيلا ناس بعد واللهم خصوصياتهم الخاصه لاتتعدون عليها بدام هي قايمه بشغلها باكمل وجه

خلوهم تراه بشاكير هالزمن مو نفس قبل هذيلا امفتحات ويعرفن يداون ابليس الغاليه

خليها اتولي عنج ولاتشلين همية القميص ....

واحذري منهن ... بطريقه ممتعه وليست بحرق الاعصاب

**eyonan** · 2010-01-13, 13:36

أقولج اختي

انتي ليش باردين معها

اصلا الخدامه يباله عين حمره

لازم تادبينها

والله وعقب تسوي بلاوي اكثر عن جي

**fatentus** · 2010-01-13, 13:36

انا مكانهكم ما اخليها في بيت دقيقه
الله المستعاان

**مغروره بحسنها** · 2010-01-13, 13:48

طبعا اول شي بقولش الله يعينكم ...بس اهم شي تاخذين عنها الموبايل لانها تقدر اتسوي بلاوي فيه ..اما القميص فاحسن لج انج اتعقينه ولا تعطيها ويه يعني اعتبري وجودها من عدمو بس لازم اتاقبونها من بعيد لانهن ما يتامن عليهن

**اندوومي** · 2010-01-13, 13:56

عوذ بالله من الاندنوسيات

ملعونة الصير
تحملي منها وخذي الفون وامسحي كل شي بدون ماتعرف
ولا ترا بتسوي شي

**لعبة الايام** · 2010-01-13, 13:57

مشكورااات خواتي ع الردود

من ناحية الوالد عاادي اييب غيرها المشكله الوالده متمسكه فيها يالله القهر مااعرف شو اسوي معاها خصوصا انها الوالده عنيده وماتسمع كلام حد وسارت وهزبتها هزب بس ماينفع الهزب الحين يا عقااب او يردونها والقهر انه الخدامه ترد عليها وببرود تقولها اذا ماتبوني عاادي ردووني المكتب والقهر انها ماتعترف بغلطتها كلبة النار هذي وبالنسبه للقميص امي باارده قالتلي تراه مغسول شو فيها يعني البسيه مافيها شي يالله القهر

**Ms anime** · 2010-01-13, 13:58

up
up
up

**لعبة الايام** · 2010-01-13, 13:58

هييه خذنا الفون عندنا

الموضوع: مصيبه الله يخليكن ساعدني

أدوات الموضوع

عرض

مصيبه الله يخليكن ساعدني

المزيد من آخر المواضيع من نفس القسم:

المواضيع المتشابهه

الله يخليكن ساعدني

ساعدني الله يخليكن

ساعدني الله يخليكن...

ساعدني الله يخليكن