مــاعرف مشكلتـ:(ـــي .. !! ماعرف شو أسوي .. ساعدوني ..

**قلب العطار** · 2009-12-13, 17:16

بسم الله الرحمن الرحيم ..

بصراحه ماعرف كيف ابداااا .. كنت متردده وايد قبل ما اكتب هالموضوع بس توكلت على الله وبديت فيه .. بصراحه كل يوم ادخل المنتدى اقرااا المواضيع واطلع كل يوم على نفس الحااال خاصة المواضيع اللي تبعث الامل في النفس .. انا متزوجه من 8 شهوور وماحملت .. مريت في مشاكل واييد وبصراحه ماعرف اذا هي صدق مشاكل ولالا .. نفسيتي صارت في الحضيض .. ادخل المنتدى واشوف اللي ما حملت من سنه وسنتين واخفف على نفسي شوي بس من تمر ساعات انسى وارجع اتضايق واااايد .. حياتي صارت بس التفكير في هالموضووع صدق احس اني بدون هدف بعد ما كنت انسانه اجتماعيه شغوله وعمليه واييد ودرت كل شي وبس اتريا الحمل .. (كل شي بإييد رب العالمين ) .. نقول هاي الكلمه بس ما نطبقها لما اشوف القراب اللي حولي وعرسوا عقبي وحملوااا اقول شمعنى انا .. صار داخلي صراع نفسي مب طبيعي والله .. احس اني اكتب عشان اطلع اللي ف خاطري .. صح انهم 8 شهور بس الله احس اني كملت 8 سنين .. الكل حولي يسأل ماحملتي وماحملتي اللي يقولي اشربي هذا واللي قولي خذي هذاك .. وانا انسانه حياويه شوي بس احس اللي حولي احيانا يكلموني في اشياء استحي اني اتجاوب فيها بس شو اسوي والله تعبت ..

بدت قصتي في شهر العسل ..

عقب مامر ثاني اسبوع تعبت وايييد صابني خموول وقمت ارجع وحمى وماعرف شووو وطبعا الكل كان قايللي انتي بتحملين من اول شهر لانه اللي في العايله كلهم جي .. وانا كنت راضية ماعندي مشكله لاني اتخبل على اليهال .. ورحت عند الدكتورة قالتلي عندج التهاب حاد وماعرف شوو وعطتني مضاد 12 يوم واستمريت عليه واول ماودرت المضاد ردتلي الحالة مرة ثانيه وبعد رحت عند دكتورة ثانيه وعطتني مضاد 10 ايام وبهاي الطريقة مر الشهر الاول كل يوم مضاد وطبعا تأخرت علي الدورة اسبوع وتوقعت اني حامل بس طلع تأخر الدورة ناتج عن المضادات ..

المهم الشهر الثاني راجعت دكتورة في البلاد هني قالتلي مافيج التهاب الحمدلله بس لما كشفت علي قالتلي عندج قرحه في الرحم وعطتني دواء لمدة شهر كامل وقالتلي لو ما نفع بنسوي كوي .. خذت الدواء ومافي شي تغير وطبعا توقعت ما يكون في حمل في الشهر الثاني لاني كنت آخذ ادويه
وفي الشهر الثالث خليت كل شي طبيعي ومارحت مكان وبعد ماصار حمل وطبعا ماسيت الكوي لانه الكل قالي لا انتي بعدج صغيره وبتتلعوزين لكني رديت تعبت في الشهر الرابع من زواجي فسرت عند دكتورة ثانيه في مستشفى الزهراء في الشارجه قالتلي ماعندج قرحه ولا شي هاي التهابات الزواج وطبيعيه وعاديه وعطتني ادويه وتحاميل وقالتلي اكيد بتيني الشهر الياي حامل وايد تفاءلت بكلامها .. بس في نفس الوقت رحت للدكتورة حسنيه قرقاش في دبي سوتلي فحص كامل وقاتلي كل شي اوكي الرحم والمبايض وكل شي يعني الدكتورتين طمنوني فقلت في خاطري الشهر الياي ان شاء الله بكون حامل .. ومرت الايام ويا الشهر الخامس بس مافي شي !!! هني قلت حق ريلي لازم انته تسوي تحليل وسوا التحليل وطلع الخلل منه والله ماعرف كيف اوصف مشاعري كنت متشتته كل يوم اصيح وحالتي حاله دخلت في دوامه يديده بس دكتورة حسنيه قالت لازم تحاليل يديده ولما سوا التحاليل اليديده طلع مافي شي !!!!!!!!!!!!!!!!! حسيت بالفرحه وفي نفس الوقت زعلت لانه مافي شي ومافي مانع عيل ليش ما حملت ؟؟؟ صح ارادة رب العالمين وربي يعرف وين الخير حقي .. وقالت دكتورة حسنيه خلوو كل شي طبيعي بس سبحان الله الانسان ما يصبر رديت اراجع دكتورة الزهراء على طول اول ما خلصت دورة الشهر السادس وعلى طول عطتني ابرتين ماعرف ابر شووو بس قالتلي تكبير البويضه .. ويا الشهر السابع ونزلت الدورة ... !؟؟

المشكله انا على كثر الادويه اللي كنت آخذها كنت احس انه بعدني تعبانه ومافي شي يتحسن حالتي تتحسن يوم وتنتكس يوم ثاني .. والالتهابات تفارقني شهر وتردلي شهر ثانيه وكل دكتورة تقول كلاااام
وريلي بعد يقووول كلااام احسه متضايق لانه كبير ويبغي عيال وانا بعد مب وايد صغيره صار محور حياتنا الحمل وبس اليهال وبس وكل ما يشوف ياهل حوليه يحسسني كأنه شايف ملااااك ويحسس الكل انه محروووم وانا اموووووووووت من الضيق ..

طبعا اول ما يتني الدورة في الشهر السابع الوالده نصحتني امسح عند وحده اسمها ام محمد من دبي .. كنت خلاص يائسه ومابا ادويه وقلت هالشي مابياخذ من وقتي وايد .. وطبعا المسح 3 ايام متتاليه .. في اول يوم ماحسيت بشي بس كانت تقولي في حبوب وماعرف شووو مافهمت وفي ثاني يوم واااااااااااااااااااااااااااايد تألمت بطريقة مب طبيعيه وحتى سمعت صوت غريب في بطني بس هالصوت كان يزعجني وانا بنت المهم قالتلي انه عندج هـــواء في الرحم انا استغربت بس في نفس الوقت حسيت انه هي اول حده قالتلي عن مشكلتي وكل الدكاتره ماعرفووااا هذا الشي .. وفي اليوم الثالث سمعت الصوت اكثر فقالتلي اني وايد تعبانه وماظن بتحملين عقب المسحه الاولى طبعا إذا الله راد كانت تقولي في نزول وماعرف شوو يعني قالتلي سوالف .. حسيت اني ارتحت نفسيا حسيت انها فعلاا حست بمشكلتي يعني انا لا ضعيفه وايد لا متينه جسمي زين بس دايمااا احس بكروشه صغيروونه وقالتلي هاي من الهواء لاني حتى لو سويت رجيم ماتخف .. المهم خلصت عني الدورة وكعادتي كنت اتصفح المنتدى وقريت موضوع الاخت دانه المزيونه اللي تمسح وتستخدم كاسات الهواء وقريت انه هذا الشي علاج الهواء اللي في الرحم وهي مكانها في البريمي ومع اني بعيد تواصلت وياها ورحتلها 3 جلسات قبل العيد ارتحت بالسوالف وياها وطريقتها بعد كانت مب متعبه .. حسيت اني ارتحت لها وحسيت انها عرفت مشكلتي نصحتني بوايد اشياء شي طبقته وشي لااااا وايد شربت مراميه مثل ما قالتلي بس ماقدرت آكل سمك لاني ماحبه .. هي وايد طيبه وحبوبة .. كنت متفاءله وايد انا الحين ما احاتي الحمل احاتي اني كيف بتخلص من مشكلة الهواء اللي في الرحم لاني احس اني مازلت اعاني منه في حد منكم خواتي يعرف حل لهاي المشكله .. ؟؟ اعشاب او حتى دواء معين .. ؟؟؟ وانا ناويه اروح عند الاخت مرة ثانيه عشان تمسحني اول ما تنزل الدورة .. طبعا موعد دورتي باجر وللاسف انا احس بآلامها من يومين واحس بالصوت وواييد واحس بنغزات اللي كل شهر احسبها .. مع انه كان عندي امل يصير حمل هالشهر ..كنت ابا اليوم اسوي تحليل مافيني صبر وانا كل شهر على هالحال قبل موعد الدورة اتم متأمله انها ما تنزل بس للاسف كل شهر تشرف وبعد احيانا تتأخر لين تاريخ 17وبعدييين بعد ما تفرحني شوي ترد تنزل احس انه الايام ما تطووف والله كأنها سنين علي اللهم لا اعتراض على اللي ربي كاتبلي ياااااه .. بس صدق انا محتايه حـــل وماعرف شو اسوي ..

الله يرزقني ويرزق كل محرومه ان شاء الله ويفرح قلوب الكل وخواتي دعواتكم واللي عندها حل او تقدر تفيدني بشي تقولي .. انا ناويه ان شاء الله اشرب الخلطه اللي مكتوبة في المنتدى اللي هي الحلبة والكمون والجرفه والحبه السودا واتبخر بالشاي بس لو حد عنده معلووومات اكثر ياريت يفيدني ويفيد الخوات اللي مثلي ..

اسمحولي طولت عليكم وايييد ..

المزيد من آخر المواضيع من نفس القسم:

**حرمة خالد** · 2009-12-13, 17:22

الله يرزقج حبيبتي

وخلي أملج بالله كبير

وان شاء الله بي اليوم وبتبشرينا بحملج

**لوليانو** · 2009-12-13, 17:27

الله يعطييج ويرزقج إن شاء الله ..

إصبري ،،

وسيري عند دكتوره شاطره وتابعي وياها ..

إن شاء الله خير .. لا تيأسين .. حاسه فيج ..

**صمتي_قرار** · 2009-12-13, 17:31

لا حول ولا قوة الا بالله
اختيه نصيحه وعن تجربه
لا تفكرين بالموضوع حاولي تشغلين نفسج بأي شي
الحمدالله انتو ما فيكم شي يعني لا تضايقين بعمرج
انا كملت سنه وشهرين ما خليت شي ما سويته
وفي شهر سبحان الله ألتهيت ما فكرت بالحمل ولا تبويض ولا شي وطلعت حامل
خلج على الاشياء الطبيعيه لا تخلين الدكتورات يلعبن فيج وكل وحده تعطيج دوا شكل
الله يرزقج ويرزق كل محرومه بالذريه الصالحه ان شاء الله

**كاشونة2009** · 2009-12-13, 17:34

الله يرزقج انشالله كثري من البردقوش والمرامية وانسي سالفة الحمل شوي اتراه التفكير يلعب دور سلبي

**ام ماا2009يد** · 2009-12-13, 17:44

الله يرزقج الذريه الصالحه
بعد العسر يسر الغاليه
لا تهتمين بكلام الناس و خلج متفائله لان النفسيه تلعب دور

**دمعة غـلا** · 2009-12-13, 18:08

الله يرزقج ان شاء الله اصبري الصبر زين لاتقولين تعبت ولا شي

هذا بايد رب العالمين

يقولج يداتنا وامهاتنا لا يعرفون التبويض ولا اي شي بس صار معاهم حمل لانهم ما كانو يفكرون ترا الحاله النفسه تاثر واااايد خلج كووول وطنشي كل شي وخل كل شي يمشي طبيعي وان شاء الله بيصير الحمل

**ابدا2008ع** · 2009-12-13, 18:19

نصيحة من اخت... عزيزتي لا تهتمين وااايد بالموضوع واشغلي نفسج باي شي ثاني مثل الدراسة أو الشغل لانج صدق بتتعبين .. اعرف وحدة من الاهل لمدة 7 سنوات كانت تعالج عشان تحمل من دكتورة لدكتورة وما شي فايدة وبعدين قررت انها ما تاخذ اي دوا ابدااااااااااااااااا!!! وما شاء الله حملت على طوول ويابت بنت مثل القمر والحين هي حامل مر ثانية من دون ما تاخذ اي شي..( ماشاء الله تبارك الرحمن).. انا اعرف انه الموضوع وااايد صعب خصوصا اذا كان اول حمل بس حبيبتي تاكدي انه غيرج اخس عنج ومصيبته اكبر .. وانتي ما فيج شي يمنع هالحمل... الله يرزقج يارب ويرزق كل محرومة... تقبلي مروري
(ابدا2008)

**خواطر الانثى** · 2009-12-13, 18:23

الله يرزقج حبيبتي

وخلي أملج بالله كبير

وان شاء الله بي اليوم وبتبشرينا بحملج

مثل ما قالت اخت حرمة خالد

**قلب العطار** · 2009-12-13, 18:45

والله .. الواحد في هالجووو بس يوقف ويطالع المطــر ويدعي رب العالمين بالتيسير والتوفيق .. سبحان الله احيانا افكر واقول يمكن هذي حكمه من ربي يمكن لو حملت البيبي يطلع في شي ربي ما يباني ازعل او اتضايق بس سبحان الله الشيطان يدخل لنا من مداخل واسعه ويقول شمعنى انتي .. اعوذ بالله من الشيطان والله ..

بتضحكون علي المفروض لو مايت الدورة باجر اسوي تحليل بس انا اول ما كتبت الموضوع اتصلت بريلي وقتله ابا تحليل بسوي اليوم والله مافيني صبر لين باجر اذا مافي شي بيطلع اليوم انه مافي مابتم جي على اعصابي

..

انا بعد اعرف وحده ماعندها غير مبيض واحد ومن دكتورة لدكتوره بس ماصار حمل والشهر اللي ودرت فيه كل شي حملت هي معرسه من سنتين وهذا حملها الاول .. سبحان الله الواحد يوم يشوف مصيبة غيره تهون مصيبته ..

ربي يصبرني ويصبر كل محرومه ويرزقنا يارب ..

مشكورين خواتي والله ردودكم ترد الروح الواحد يحس انه الناس حوليه .. وربي يسهل على كل الحوامل ويرزقهم بيبي حلووو مثلهم بصحه وعافيه ويرزقنا يارب .. مشكورين على التواصل مرة ثانيه ..

**A+k** · 2009-12-13, 18:53

انتي مافيج شي حبيبتي والهوا فالرحم ماظن انه له خص بتأخر الحمل

السبب انه النفسية تلعب دوووووور كبير وايد في تأخر الحمل

حاولي انج تنسين شويه هالسالفة وصدقيني الله بيرزقج ان شاءالله..

**@شمعة الجلاس@** · 2009-12-13, 19:08

فديتج والله
الله يرزقج الحمل السليم و يرزق كل محرومه الذريه الصالحه يا رب
توه الناس حبيبتي بعدج عرووس انشغلي في حياتج و بتحملين و انتي مب حاسه بعمرج صدقيني
وانا كنت مثلج دوم اوسوس كنت اقول دام اني من اول شهر ما حملت اكيد فيني شي لا سمح الله
بس مر الشهر الاول و الثاني و الثالث و الرابع وكنت متفائله والحمدالله الشهر الخامس حملت و هالشهر بالذات كنت ناويه اسير افحص خفت ان فيني شي خصوصا اللي عرسو وياي نفس الشهر حملو و ماشاءالله داخلين ع الشهر الخامس و انا لا وسبحانه الله قبل موعد الدوره باسبوع اكتشفت اني حااامل يعني قبل لا احاتي اذا الدوره بتنزل علي و لالا.. ربج يوم يبا الشي بيصير دوم اقول سواء فحصت و لا ما فحصت مب مكتوب اني احمل قلت لو سرت افحص بيطلعون فيني الف عله و ها كله بيأثر على نفسيتي وبياخر الحمل
والحمدالله ما كنت اخذ شي بس حبوب فولك اسيد و ربي كتب لي الحمل و انا الحين في الاسبوع السادس
يعني حبيبتي مب شرط الحمل من اول شهر في ناس يوم كملو سنه حملو من دون علاج على حسب طبيعة الجسم فديتج
وفي ناس ماشاءالله عليه في شهر العسل حملو مب يعني انتي فيج عوق و هم لا
اتوكلي على الله و لا توسوسين وايد و اتوكلي على الله وحاولي تاكلين الخضراوات و الفواكه و اشربي عصير اناناس ينشط المبايض وحاولي في الاسبوع مرتين تلعبين رياضه المشي منها تلهيه و منها اتهيئين جسمج للحمل و حاولي تعطين ريلج الاكل اللي ينشط فيه الحيوانات المنويه يمكن غذائه مب صحي وصدقيني باذن الله تعالى بتحملين في شهر انتي مب مسويه حسابج فيه. وعن ايام التبويض حاول اني ما اطوفينهن يعني من بعد الدوره يوم هيه و يوم لا لين اليوم 15 والله يكتب لج الحمل في هالشهر وتوه اذن و ان شاءالله بدعيلج في صلاتي.

**ام ميودي3** · 2009-12-13, 19:10

الله يرزقج حبيبتي

وخلي أملج بالله كبير

وان شاء الله بي اليوم وبتبشرينا بحملج

**Bint Al Ali** · 2009-12-13, 19:17

ان شاء الله ما تخلص هالسنه الا و انجوفج حامل باذن الله

الله يحقق اللي فبالج و يعطيج كل اللي تبينه

فعلا كلام الناس ابد ما يرحم و انا مريت بتجربتج ...

و الله يوفقج لما فيه الخير لج و لزوجج

**fashions** · 2009-12-13, 19:36

اتكلي على الله ... من توكل على الله فهو حسبه .. تصدقي واستغفري ..
ليييييييييييييش ماتستخدمين دواء فايتكس اللي قالت عنه الاخت ليمونه الامارات وحملت ماشاء الله وكثير اخوات جربوه وحملو بنفس الشهر .. كانو يستخدمون باليوم 1000 جرام تقريبا
الله يرزقك الحمل السليم المعافى عاجلا غير آجل يارب ..

الموضوع: مــاعرف مشكلتـ:(ـــي .. !! ماعرف شو أسوي .. ساعدوني ..

أدوات الموضوع

عرض

مــاعرف مشكلتـ:(ـــي .. !! ماعرف شو أسوي .. ساعدوني ..

المزيد من آخر المواضيع من نفس القسم:

المواضيع المتشابهه

ابـــــــــــى اســــــــــــوي تــــان بس مــاعرف

والله ماعرف شو أسوي؟؟؟؟؟

محتارة .. مترددة .. ماعرف شو أسوي..وكيف اتخذ قراري!!