للمتزوجات - تشتغلين أو تقعدين في البيت أفضل؟؟

**قصة** · 2009-07-07, 10:56

السلام عليكم

عندي موضوع خاطري أفتحه من زمان

يصلح للنقاش وفي نفس الوقت أبغي النصيحة منكم

من العنوان

بالنسبة للزوجة العاملة، هل تفضلين تشتغلين أو تقعدين في البيت،،
أنا متزوجة وأشتغل، في أمور وايد اتخليني أفكر في الاستقالة
وأمور وايد تخليني لازم أستمر في الشغل

لازم أستقيل لأني إنسانة ما أقدر أوفق بين شيئين ونفسيتي تتعب وايد إذا أنا أشتغل وعندي مسؤولية بيت وعيال،، وخصوصا اني اشوف نفسي مقصرة واااااااايد في حق بنتي وريلي،،

ومابا أستقيل لأن مثل ما انتوا شايفين الغلا اللي صاير،، هذا أولا،، ثانيا راتبي زين،، ثالثا ريلي رجع من بره للحين ما يشتغل،، وهو ما يحبذ اني استقيل لا حاليا ولا حتى عقب إذا حصل شغل،،

شو رايكم في الموضوع؟؟ وشو تنصحوني؟؟

المزيد من آخر المواضيع من نفس القسم:

**hanayen** · 2009-07-07, 11:42

انا متزوجة وعندي بنت وولد توني اشتغلت من اسبوع ,,وبصراحة طول القترة اللى ماكنت اشتغل فيها كنت احس نفسى متضايجه وملانة ريلي يداوم ويرد يرقد ينش المغرب يا ايلس بروحي أو اطلع ,,احس نفسي ما صرت اعرف اتواصل مع الناس ماصرت اعرف اتكلم ماعندي حياة اجتماعية يابيت اهلي او المول حتى مالي خلق لليهال من كثر ما انا مجابلتهم مممم بصراحة مادري شو اقولج...ابا استقل ماديا اعتمد على نفسي ماتدرين شو يستوي مع الايام ؟؟؟

**قصة** · 2009-07-07, 12:03

الاستقلال المادي هذا أمر وايد مهم ،، بس بعد في نفس الوقت البيت والعيال مهمين ،، خصوصا إذا كان موضوع الشغل يأثر عليهم ،، على تربيتهم ،، على حتى سلوكياتهم ،،

والله مادري حيرة،،

إنتي بالنسبة لج يمكن لأنج توج تشتغلين فتحسين بتغيير خصوصا إنج مثل ما تقولين حسيتي بالضيج في البيت ،، وتوج في أول أيام في الشغل ،،

الله يوفقج ،،

**Um_Mahrah** · 2009-07-07, 12:55

طبعا الاستقلال المادي واايد مهم بالنسبه للمراة ... وشو ما كان راتب زوجها ... المفروض الحرمة تعتمد على نفسها ... لعدة اسباب ..

انا بالنسبه لي عندي 3 ينات ... وتوني موظفة يديدة والحمدالله قادرة اوفق بين بيتي وشغلي .. بالرغم من ساعات العمل الطويلة ... ارجع البيت ما افوت ثانية .. يا العب وياهم .. او اطلعهم المهم اني نا ارقد

وزوجي مستانس من الوضع .... الحمدالله . وما نقص من مصروف البيت وراتبي لي انا اتصرف فيه ... وانا السبب اللي خلاني اشتغل .. ابا اساعده ... ماشالله 3 بنات وايد وحدة ماتصفق مثل مايقولون ...

**الحلـ أم ـوين** · 2009-07-07, 13:02

والله موضووعج مهم الصراحة،،

وكلنا نبا نستفيد من تجارب بعض،،

انا عني عندي 3 الحمدلله،، الله يحفظهم ويخليهم لي..

وأشتغل من سنتين..

وأشووف الشغل احسن لي،، مااااااااا أفكر حاليا بالاستقاالة،، مب عسبة الفلووس،، لااا..
لأني سنة يلست في البيت بعد ما تخرجت من الجامعة،، وفهالسنة حسييت بضييقة وملل،، وكآآآبة،، حسيت عمري منقطعة عن العالم،،

ما اتعرف على حد ولا حد يتعرف علي،،

كنت كله اتضااارب ويا ريلي،، ومحاصرة عيااالي،،

لأنه ما عندي متنفس أفرغ فيه طاقتي،،

ويوم اشتغلت الوضع تغير،، والمشاكل قلت بيني وبين ريلي...

والحمدلله..

**رآحت أيامك ,** · 2009-07-07, 13:05

اشتغــــــــــــــــل

**نبع الإبداع** · 2009-07-07, 13:15

أنا أفضل الشغل .. أشتغل أكثر من سنتين ومتزوجه وعندي بنوته .. صح فالبداية ريلي ما عيبه شغلي ..

بسبب طبيعة شغله يومين إجازة و يوم دوام .. بس مع الوقت اتعود وإلي أجبره الإلتزامات إلي علينا

من بناء بيت و أثاث و ديكورات .. و في نفس الوقت إذا ريلي ظروفه ما تسمح أنه نصرف مثل قبل

فراتبي موجود .. وبنتي أدويها يوميا بيت أمي و أمي مب عيزانه عنها صح ماعندي بشكاره .. بس

امشيه أموري و أهم شي ريلي راضي عن الوضع إلي نحن فيه صح أني أسكن في بيت بروحي

بس متصله ببيت عمتي والغدا من عندهم و العشا طبعا خفيييييييف .. صح أنه الوضع مب عايبني

بس الحمدلله على كل حال فترة وبتعدي

**Hno0odah** · 2009-07-07, 13:25

انا صارلي من 4 سنوات اشتغل مرات اقول ابغي استقيل لكن بصراحه ما اقدر
من يوم اتخرجت من المدرسه وانا معتمده على روحي ما اقدر اعتمد على حد احس ان الموضوع صعب عليه
معن ريلي حاليا يقولي انت اشتغلي بس يوم بتييبين اعيال ما اتوقع اني اخليج اتكملين شغل
لأن راتب ريلي وااااايد اوكي وعشان جي هو ابدا هب عايبنه موضوع شغلي

وبصراحه حتى انا احس عمريه وااايد مقصره في حق ريلي بس شو اسوي
هذي ظروف الحياه ..

**كريمة المهيري** · 2009-07-07, 15:55

انا وريلي نشتغل في نفس الدوام

انا فقسم الحريم وهو في قسم من اقسام دوامنا

وموفقين الحمدلله بين البيت والدوام نطلع مع بعض ونرد من الدوام مع بعض

وافضل الشغل احسن

**محاسبه** · 2009-07-07, 17:28

نصيحه للمتزوجه تودر الشغل والله غير يوم تهتمين بريلج وتشوفين طلباته وغير يوم تكرفين شرات الحماره انا شهاتي تسمحلي اشتغل في جميع الدوائر الحكوميه والخاصه ولين الحين مب محصلين مواطنين في مجال تخصص وراتب فوق 40 الف بس عييالي وراحت ريلي بالدنيا ومافيها رغم اني اشتغلت وعلطول استغلت دام عندي ريل مب قصر علي في شئ اللي اطلبه عندي شو ابا بالشغل وريلي يقولي دوم انشاالله ما بينقصج شئ

**أم حمـد .** · 2009-07-07, 18:40

انا قبل لا اعرس بكم شهر .. قدمت استقآلتي ..
بس يوم قدمت استقالتي قدمتها لسبب
لاني كنت اداوم فـ بنك .. ف كنت اداوم يوم السبت وريلي يكون عندي يوم السبت ،، خاصة انه يداوم ف منطقة ثانية
وينزل بس الخميس والجمعه والسبت
فـ عشآن جي قبل العرس قدمت استقالتي ،، والحين يوم عزمت اني بقدم مكآن ثاني اكتشفت اني حآمل

يعني محد بيقبلني ..

**أم عليونة** · 2009-07-07, 20:49

للرفع

**قصة** · 2009-07-08, 07:29

السلام عليكم،،

شكرا على ردودكم،،

أشوف مشالله الأغلبية تأيد إن الوحدة تشتغل،،
أنا مب ضد الشغل دام الحرمة تقدر اوفق بين البيت والعيال والريل والشغل،،
بس ضد التقصير في حقهم بسبب الشغل،،
والمشكلة مثل ما ذكرن بعض الخوات متطلبات الحياة،،
والله لو ما أحاتي هالناحية جان بستقيل،،
بس ادعوا لريلي الله يوفقه ويحصل شغل عدل عشان أستقيل ونحن عدنا مصدر دخل ثابت

والله إني تعبت من هالموضوع،، ومأثر على حياتي وعلى بيتي وعلى كل شي،،

**سويسرا2008** · 2009-07-08, 07:42

انا بالنسبه لي اشتغل والحمد لله مرتاحه مع انه ريلي يحن ويزن ملوع لي جبدي كل يوم يباني استقيل لكن مستحيل وما اقدر اتخيل عمري في البيت لا شغل ولا مشغلة الحمدلله الوقت يطوف وما نحس فيه ومرتاحين لا مشاكل ولا غيره

**الحلـ أم ـوين** · 2009-07-08, 12:56

بصراحة الريل مب مضموون هالزمن...

سمعت زاااايد حرييم استقاالواا او ودرواا دراستهم،، عقب ما توفقواا فحياتهم الزوجية،، انفصلواا ...

ألحين يعضوون اصابع الندم...

الموضوع: للمتزوجات - تشتغلين أو تقعدين في البيت أفضل؟؟

أدوات الموضوع

عرض

للمتزوجات - تشتغلين أو تقعدين في البيت أفضل؟؟

المزيد من آخر المواضيع من نفس القسم:

المواضيع المتشابهه

بين البيت والوظيفة، أيهما أفضل؟

شلون تقعدين زوجج من النوم؟؟؟؟؟؟؟

ريلج وايد يظهر من البيت ؟ خاطرج تقعدين معـاه أكثر ؟ حيـاج

ربط عنق الرحم في اي شهر وكم تقعدين في المشفى

موضوع للنقاش ( تشتغلين وله ما تشتغلين )