فيني غصة من تصرفاته

[فرحة جفن]

مرحبا خواتي..
كتبت هالموضوع الساعة 3 الفجر لأني ما قدرت أرقد من الغصة اللي فيني.. ودي أفضفض لكم اللي حاسة فيه وأتمنى أحصل الشيء اللي يريحني منكم..
والسالفة باختصار إني أمر بحالة نفسية فظيعة بسبب طريقة ريلي وتعامله معاي لأنه ما يقدر
إني الحين في فترة النفاس ولا يراعي نفسيتي أبد..
خواتي صار لي فترة من ربيت بس بعدي ما كملت الأربعين.. وجالسة في بيت أهلي هالفترة على أساس الأربعين وبعدين بروح البيت..المهم بعد ما كملت شهر قلت حق ريلي خلاص برد البيت ما في داعي أظل عند الأهل أكثر..لكنه قال لي ليش مستعجلة .. توج كملتي شهر.. ظلي عند أهلج لحد الأربعين وبعدين ردي البيت تراني موجود مابروح مكان.. بصراحة استغربت من رده.. هو ما يفهم إني اشتقت له وإني أبي أروح علشان ألبي طلباته.. ما أباه يقول ظلت عند أهلها وطنشتني .. وبعد أبي أرد البيت لأن الوالدة يحليلها تأذت من حشرة عيالي وما أبي أشغلها معاي أكثر. طبعا بعد ما قال لي هالكلمة ما عرفت شو أرد .. حسيته ما يبي يشوفني أو يشوف عياله..وكأنه ما صدق إن إحنا بعاد عنه..واللي ضايقني أكثر إني طوال وجودي في بيت الوالد ما فكر إنه يمر علي أو يمر على عياله... تخيلوا ريال ما يمر على زوجته وهي بعيدة عنه؟؟؟ اوكي مب شرط أنا على الأقل يقول أبي أشوف العيال شوي.. هذا الصغير ما شافه إلا يوم ربيت في المستشفى وبعدين ما أشوفه اهتم فيه!!! وما أدري إذا بتصدقون ولا لأ بس مرات ما يتصل فيني...و أنا ساكتة وما أبن ضيقي جدام أهلي..بالعكس أبين لهم إن أنا أبي أظل للأربعين عندهم مب لأن هو طلب هالشيء... وبعد أبين لهم إنه يتصل كل يوم ويسأل عن عياله..بس مهما جذبت عليهم الحقيقة تنبان لأنه ما يزورنا. ومرات أهلي يقولون كلام هم معاهم حق فيه بس أتضايق وايد يوم أسمعه ويذكرني إشقد إن ريلي مقصر فيني.. ومثال على كلامهم ( وينه ريلج ما نشوفه؟ كيف يقدر يصبر عن عياله؟ انتوا ليش مأجرين بيت مدام كل واحد صوب.. إنتي عندنا وهو في بيت أهله؟....الخ) طبعا هم يقولون هالكلام لمصلحتي ولحبهم فيني بس ما يدرون إن كلامهم سكاكين تقطعني لأن اللي فيني كافيني.
والله طفرت وحالتي حالة حتى إني كرهت الرضاعة وصرت أعطي الولد الحليب بالغصب.. عنبو ما يقدر على الأقل يطرش مسجات كل شوي؟ ما يقدر يمر جدام البيت حتى خمس دقايق؟والله ما أعرف شو أسوي معاه...
ذاك اليوم طلبت منه إنه يطلع ولده الكبير معاه شوي إذا راح مكان لأنه كله لاصق فيني وما أبيه يتعود على جلسة الحريم وايد.. تعرفون شو رد علي؟ قال أوكي خلي أخوج إذا طلع مكان يطلعه معاه؟ شفتوا أكثر عن جذي استهتار ولا مبالاة؟
والله أحسه مب مهتم أبدا وما أعرف ليش قرر يتزوج دامه ماراح يتحمل مسؤولية عائلة؟ المشكلة إنه يراعي الكل ويلبي طلبات الكل والكل يعتمد عليه بس أحس آخر اهتماماته أنا وعياله.
صدقوني صارت حالتي زفت.. وكله متضايقة.. خاطري أطلع وأغير جو شوي.. حتى يوم طلبت منه هالشيء ما لبالي إياه..ويقول أوكي وإن شاء الله خير بس ما شفت أي مبادرة..
شوأسوي معاه خبروني... والله أخاف أكرهه على الرمسة اللي أسمعها من أهلي كل يوم ومن خلال تصرفاته اللامبالية..والحين أنا يالسة أكتب والدمعة في عيني.. فخبروني كيف أتصرف معاه كيف؟[/SIZE]

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[الكوسيه]

ما ادرى ليش الحريم يوم يربن يسيرن بيت اهلهن اونه الاربعين وشو يعنى الاربعين ؟ الاربعين ما تستوى الا فى بيت اهلكن؟

شوفى اختى قومى الحين وزهبى اغراض عيالج واغراضج وخلى واحد من خوانج ايوديج بيتج ولا تتصلين لريلج وتقولين له انى برد او ابا ارد لالالالالالالالا خليها مفاجاه اذا كان يداوم ونظفى البيت وتعدلى واكشخى .


وهاى نصيحه لكل وحده حامل لا تفكرين انج تهدين ريلج يوم تربين وتسيرين بيت اهلج ولا تقولن انه لازم الاربعين فى بيت الاهل لا تخلن رياييلكن بروحم فى البيت وتسير تسلسن فتره فى بيت الاهل هاى نصيحه .

[أم ذيآب]

وهاى نصيحه لكل وحده حامل لا تفكرين انج تهدين ريلج يوم تربين وتسيرين بيت اهلج ولا تقولن انه لازم الاربعين فى بيت الاهل لا تخلن رياييلكن بروحم فى البيت وتسير تسلسن فتره فى بيت الاهل هاى نصيحه .

شرات كلام أمي

الله يهدي ريلج حبيبتي

ويصلح باله

وان شاء الله يحس اشوي ويتغير

بس هذا اللي اقدر اقوله وان شاء الله المعرسات مايقصرن

[فرحة جفن]

مشكورة حبيبتي الكوسية على المرور...
أ بس هل تظنين إن تصرفاته معاي طبيعية؟

[فرحة جفن]

مشكورة يا أم ذياب

[خسوووفه]

غناتي نفس ما قول لج البنات ردي البيت بدون ما تخبرينه وتعدلي وزقرتي .... اما عن تصرفاته طنشيها لا تحاولين تفكرين فيها لانه شيطان شاطر وممكن يزين لج الأفكار ويسبب بينكم مشاكل ...

[نااعمه]

الله يكون في عونج يختي صدق شي يقهر يعني يمر شهر وما اييكم وانتو في نفس البلاد
ما يبا يشوف ولده الصغير
شو هالريايل قلبهم قاسي والله

اختي اتصلي فيه وقولي له خلاص برد البيت لو ما تبا اتي برايك انا بروح بيتي اهلي يقولون وين ريلج ووين ريلج ومابيك تطيح من عينهم ويعرفون انك مب قد المسؤوليه حاب اتم عند هلك كيفك انا برد بيتي

شكله وله على ايام العزوبيه بس مهما كان المفروض يمر عليكم شوي

قولي له يوم انته مب في خاطرك ياهل ليش تخليني احمل به ولا بس تعرفون تعرسون وما تبون مسؤوليه العرس

قولي الي فخاطرج عشان ما تنفجرين وصحتج تتاثر

بس قولي له بهدوء وكسري خاطره مب بظرابه


بس احب اقولج شي اغلب الريايل يتغيرون يوم الحرمه تكون حامل وتربي وتمر فتره ويردون عادين
الله يوفقج يا اختي

[روزاليندا]

ربي يعينج والله،،

بس دخيلج لا تقعدين ساكته عنه،،

ردي لبيتج أحسن لج وأريح لعيالج،،

الريال ما يقعد بروحه بياخذ راحته وبيلعب لعوبه مهما كان إنسان محترم ولا غيره،،

أنا لي صديقة عزيزة على قلبي لما ربت بمولودها الأول راحت قعدت بيت أهلها وريلها يداوم بإمارة ثانية وطبعا الريال قعد بروحه،، وصار النت حياته مع إنه ما متخيل كيف زوجته بتبتعد عنه،، بس لما ابتعدت صار النت توأم روحة وتعرف على بنات ومسن وخرابيط،،

يعل ربي ياخذهم من بنات وينتقم منهم إلي ما يخافون ربهم،، يسحبون الرياييل من حريمهم،، والرياييل بسرعة ينجرفون مهما كانوا محترمين وملتزمين،،

والشيطان شاطر ويلعب لعوبه لما يجوف الريال بروحه وزوجته بعيد عنه...

[ذات العماد]

تصرفاته مش طبيعية ان مايتصل ولا يسأل عنج او عن عيال او عن حتى البيبي الجديد !!
على الاقل مسج عالطاير .....!!!
بس يمكن حب ياخذ فترة نقاهه هو بعد من الابوة و الحياة الزوجية خخخخ

بس لو تبغين الحل الافضل انج تصارحينه انه تغير وصار مايلبي طلباتج ولا يهتم بعياله ...وبيني له ان اهلج ملاحظين هالتغيرات ....وان هالشئ مب لصالح استقرار الاسرة ولا لصالح نفسيتج يمكن يكون عنده اسبابه او ظرف ومهما كان الحوار يفيد في اغلب الاحيان وان شاء الله تبشرينا بكل خير...


موفقة.

[ميمي 111]

الله يعينج حبوبه ويهديه ان شاء الله... قلبي وياج يالغاليه ..أنا ريلي لصقه قالي بتم 40 يوم بيت أهلج خخخخخخخخ

[KFK-GRL]

عادي ردي لبيتج حتى لو هو قال اقعدي زياده

انا افضل انه الحرمه الي عندها اكثر من طفلين تقعد في بيتها في فترة نفاسها

لانها خلاص بتكون خبيرة في تربية الطفل والعناية به

[فرحة جفن]

بس احب اقولج شي اغلب الريايل يتغيرون يوم الحرمه تكون حامل وتربي وتمر فتره ويردون عادين
الله يوفقج يا اختي[/QUOTE]

ما أعرف شو أقول لج غناتي
سمعت هالرمسة وايدبس ما أحسه بيرد عادي لأن هذا ثاني ياهل والموضوع شكله بيطول معاه

[مضيعة الحبيب]

الله يهدية آمين

يمكن حن للعزوبية !!!!

.. لان بعض الحريم الله يهديهن .. اذا رجع الزوج من الشغل تعبان ويريد ينام ويحس بهدوء .. ما يحصل الراحة .. يسمع صوت الاطفال وازعاجهم

.. وهذا السبب الرجال يحن للعزوبية ..


اختي ... اذا كنتي من هذا النوع من النساء .. فحاولي تعودي عيالش ينامون الظهر .. أو علميهم ما يساوا ازعاج .. وقت نوم الاب .. او خصصي لهم غرفة خاصة للالعاب

وحاولي تراجعي نفسش شوي .. ورجعي بيتش .. ونضمي وقتش بين الاولاد والبيت والزوج ..

أنا ما عندي عيال .. بس دايماً زوجي يقولي اذا جبتي عيال .. ما راح تهتمي فيني .. وراح تهتمي بالعيال وبتهمليني ..

لا ننسى ان الرجل طفل كبييييييييير ويحب الدلال والاهتمام


الله يسعدش دنيا واخرة .. آمين جميعـــــــــــــــــــــــــــــــــــــــــاً

[...(مريّة)...]

أنا أشوف إختي إنه ما كان له داعي تسيرين بيت أهلج
في الأربعين لأن عندج يهال من قبل يعني ما تحتاجين الوالدة
تكون وياج تعلمج كيف تتعاملين ويا الياهل اليديد فخلي
البشكارة تساعدج ويا اليهال والمهم تكونين في البيت ما
تخلين ريلج بروحه ! يحس بفراغ فيروح عند أهله وينساكم ،
الله يوفقج ويسخر لج ريلج يا رب

[جلنار13]

انا خواتي لما يربن يقعدن عشر ايام وبس، وطيران على بيوتهم ههه
مثل ما قالت وحده من الخوات، زهبي امورج وعيالج واطلبي من حد من اخوانج يردج البيت من غير ما تخبرين ريلج، وسوي ترتيب ودخني البيت وتعدلي واكشخي، وأول ما يدخل البيت، ما اوصيج، اطول واعرض ابتسامه حطيها على ويهج، وراويه من انواع الوله والشوق، ولا تفتحين سالفه انه ما زارج ولا طاف عليج ولا تعاتبينه ولا تبينين له، طبعا مب حزتها تفتحين باب العتب، خليه لبعدييييين . الموهم عاد هو بيقفط لما يشوفج، بس لما يشوفج متولهه عليه ومبتسمه في ويهه بيسكت ومن روحه بيقعد يتعذر لج...
في الحياة يبالج احيانا تدوسين على قلبج شوي، وتبادرين انتي الاول، لأنه حتى لو هو الغلطان مب سهله عليه يعتذر ، بس لما انتي تبدأين وتبادرين، وقتها بيحس بالراحه وبيكلمج من نفسه....

الله يخليكم لبعض