اقرؤا قصتي الغريبة .. و ساعدوني .. و شوروا علي !!

[uae rose]

السلام عليكم و رحمة الله و بركاته

اشحالكن خواتي

حبيت انكم تساعدوني في ايجاد وظيفة لي بامارة ابوظبي

ما حطيت المشاركة بقسم نادي سيدات الاعمال.. لأني حسيت اني هني في مشاركات اكثر .. و ردود اكثر و اكثر .. و كله بفضل البنات الطيبات اللي يساعدون البنية اللي تحتاج

بخبركن عن عمري ... انا خريجة جامعة الامارات 2005... تخصص اللغة الانجليزية و ادابها ... و الين الحين ما حصلت شغل .. .. و ما ارريد اكون معلمة او اشتغل بوزارة التربية و التعليم .. اعرف كمبيوتر و انترنت و ايميل .. اعرف اترجم (الترجمة) و مهارات التواصل و الاتصال و التنظيم .. و بس ما عندي غير شهادتي الجامعية و شهادة تدريب من البلدية لمدة شهرين و بس ... سيرتي الذاتية فقيرة و ما عندي خبرات عملية .. و بعض الجهات تدور على الخبرات

انا عادي لو اشتغلت بمكان مختلط ... بس ما اعرف يا بنات وين اقدم في ابوظبي ... استحي اسير لمكان و بعدين يقولون ما شي شواغر !!! فوق هذا .. انا اصلا ما اعرف كيف يقدمون للوظائف ... يعني وين اسير .. عند اي قسم ... يعني انا فاهمة اني اسير لقسم الموارد البشرية .. بس ما ادري عند منو ؟؟ و في بعض الجهات .. تكون السكرتيرة او المسؤولة بنية .. اول ما تشوفني تقول ما شييء شواغر .. انا بس سرت للماء و الكهرباء اللي بالعين ..و تعقدت بعدها .. تميت قترة باعدة فكرة الشغل عن راسي


انا ما عندي واااايد ربيعات ... و الكل هاليومين يدور مصلحة نفسه ... و ما يحب يخبر وين الشواغر بالضبط .. يخافون انج تخطفين الفرصة منهم ا و تكون الاولوية التوظيف لج .... مع ان هذاما فيها شيء ..

بما ان تخصصي انجليزي.. ما اعرف وين اقدم .. و وين اشتغل ... احس ان تخصصي غير مرغوب به ... اصلا انا كنت ساكنة بمدينة العين ... بس انتقلت للسكن بابوظبي( احد ضواحي ابوظبي الجديدة) و بالايجار .. بس لأن خاطري احصل شغل هناك ...

حد قاللي قدمي اوراقج في ( الهوية- شرطة ابوظبي- هيئة ابوظبي للسياحة-غرفة التجارة - البلدية -الامانة العامة للبلديات-وزارة الداخلية-وزارة الخارجية-الديوان-مركز زايد للدراسات-هيئة البيئة ) و بس

اونه هذييلا " يمكن" يبون طالبات انجليزي.. تحت كلمة يمكن مليوون خط

خوفي اسير هالاماكن و اتوهق و يقولون ما في شواغر .. او مثل ما اسمع من زملاتي و اقرا من الجرايد انهم ياخذون اوراقج و يحطونها عندهم بعدين يفرونها بالزبالة

الحين انا بنت يديدة في ابوظبي ... اذا بنات تشوفون هالاماكن اللي ذكرتها مب اوكي او ما فيها شواغر او ما تنفعني خبروني ... و اذا تعرفون اماكن مب من ضمن اللي قالوها ربيعاتي .. يا ريت انكم تخبروني و تنبهوني لها .. و اذا تعرفون جهات عمل محتاجة لتخصصي .. بليز خبروني..


و الله اني بحاجة ماسة للوظيفة ... لدرجة اني بس استاجرت مجلسين مع حمام و مطبخ من عائلة مواطنة و صغيرة جدا مكونة من اختين و طفلين مع خادمة فقط... و الحمد الله انهم تفهموا ظروفي و اجروا المجلسين بثمن بسيط ... و حتى انهم ساعدوني ببعض الافكار للجهات اللي اتقدم لها للحصول على وظيفة .. و هم بعد حالتهم مب الين هناك (الله يعينهم و يعين الجميع) .. يمكن علشان جذي حسوا فيني .. و اجروا لي المجلسين ... حتى اني افكر اؤجر المجلس الثاني لبنية ثانية تكون تشتغل بابوظبي .. يمكن تقدر تسد وياي اجار البيت و تكون رفيقة لي

ادري ان سالفتي كبيرة و معقدة شوي ... و يمكن غريبة بعد ... بس شو اسوي الحال .. يمكن تلاحظون ان افكاري غير مترابطة .. بس اسمحوللي .. ما صرت افكر عدل .. ودي اساعد اهلي و اساعد عمري.. صدقوني غيرت مكاني من العين لأبوظبي .. بس ليسهل علي الحصول على وظيفة .. حتى ما يقولون لي انتي من العين و صعب تداومين ابوظبي.. و حطيت عنواني اليديد على السي في .. ادعوا يا رب يتحقق اللي في بالي .. و اهلي ما قصروا .. ساعدوني باللي قدروا عليه .. و الباقي على الله .. بس خاطرنا كعائلة احصل وظيفة و باسرع وقت ممكن

ان شاء الله على يوم السبت .. بسير اقدم للوظائف ... بعد ما تساعدوني و تشيرون علي و تشاوروني .. لأني محتاجة لكم .. و محتاجة لخبرتكن يا بنات

اترياكم .. و اتريا ردودكم !!!

المزيد من آخر المواضيع من نفس القسم:

• حساااب لبيع الانتيك الاشيا الاثريه القديمه
• ساعدوني .. محتاجة لدكتور قلب اطفال في دبي
• السلام عليكم
• المانيكير الاسلامي
• ترتيب ادوات المنزل
• أبا هالبرقر
• عجبني هالفستان من موقع فلوري داي
• عجبني هالفستان من موقع فلوري داي
• علاج ادمان المخدرات
• ديجي فاضل في أبوظبي

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[أم أحمدومحمد]

الله يعينج ويوفقج وتحصلين الوظيفة المناسبة

وصح كلامج سالفة الحصول على الوظيفة صعبة هالأيام

بس لازم ما تملين ...وتتحركين من مكان لمكان و اتابعين أوراقج تتصلين وتشوفين وين وصلوا في الموضوع؟ متى بيردون عليج..؟..

وقدمي في تنمية هم يدورولج الوظيفة..وممكن تحصلين وظيفة سكرتارية لأنهم مشتغلين في توطين هاي الوظيفة

وهذا رابطهم

http://www.tanmia.ae/tanmia/general/GeneralIndex.aspx

[yaryora 1]

بالتوفيق الغاليه ..ماأقدر أفيدج .

[saasmo]

شوفي الشرطه في ابوظبي ممكن تكوني مترجمه او تعطي دورات لان مره انعرض علي اعطي دورات لغه انجليزيه ولكن ماعندي فكره الصراحه غير

[uae rose]

ام احمد و محمد

تسلمون حببتي على الرد ... و انا مسجلة بتنمية من اول ما تخرجت و ما شفت اي شي منهم .. اتصل بهم ... و يقولون لي ما شيء مناسب لج

[uae rose]

yaryora 1

شكرا حبيبتي على الرد ... و يكفيني قراءاتج لسطوري

[uae rose]

saasmo


ان شاء الله بسير الشرطة و بشوف يوم السبت ... بس انتي ادعيلي

[روح بوظبي]

فديتج قدمي في هيئة الهويات هم طالبين بنات مواطنات

وقدمي بعد في التنميه مثل ما قالت الاخت ام احمد ومحمد هم بيدورولج على وظيفه

وتمي عليهم دوم تراجعين
لو حسو انج مهتمه بيمشونج انشا الله

بالتوفيق يالغلا


سلامي

[خليدة]

انا بقولك ادخلى على مواقع التوظيف عبر الانترنت وقدمى وانشاء الله ربنا اوفقك وهى كثيرة ابحثى فى جوجل

[uae rose]

و لا يهمج يا روح بوظبي ... بسوي شرات اللي تقولينه ... و بروح للهوية

[uae rose]

ان شاء الله يا اخت خليدة

[رعبوبة العين]

اممممممم >>هلا والله حبوبه انا ف خاطري اساعدج لكن مااعرف حد وماهان علي ادخل وماارد على موضوعج والله السموحه وان شاء الله البنات يساعدنج

[uae rose]

الله يسلمج يا رعبوبة العين ... و تسلمين على شعورج الطيب .. و يكفيني تواجدج معي

[قايده الغزلان]

ماشاء الله انتي انجليزي نفس تخصصي وانا بعد في جامعه الامارات وتخصصي تيسول انجليزي ان شاء الله تحصلين شغل الغاليه
لاتيأسين انا وحده اعرفها بعد خريجه آدب انجليزي مثلج سنه 2005 وفي النهايه حصلت في التربيه في مكتب الاحتياط بس لعوزه ماانصحج بس اختي تخصصنا مطلوب في الشركات ودام مب مشكله عندج الاختلاط قدمي في مكاتب السياحه ولاالشركات او البنوك ..
ويارب تحصلين شغل الغلا ..
ولاتنسين تبشرينا يوم بتحصلين الشغل ان شاء الله
وبالتوفيق حبيبتي..

[uae rose]

قايدة الغزلان

فديتج و الله .. ردج عطاني بعض التفاؤل .. و حسيت كان حد موجود وياي ... يالله الحمد الله على كل حال ..

و ان شاء البنوك بتكون ضمن خطتي للتقديم

و ان شاء الله ابشر كل بنات المنتدى يوم احصل على وظيفة