مشكلتي مع خطيبي الإماراتي

[R.j.S]

السلام عليكم ورحمة الله

عزيزاتي تحيه طيبه

انا سعوديه مخطوبه لاماراتي واحب الإمارات وأهل الإمارات برغم اني مااحتكيت كثير فيهم لكن طريقة تفكير خطيبي وأسلوبه مسببتلي ازمه واتعبتني نفسيا

انا صراحه من المعجبات بهذا المنتدى الجميل وماشاء الله الأخوات نصايحهم في محلها وبسبب اني ماعندي حد اعرفه شخصيا من نفس البلد حبيت اطرح مشكلتي هنا وانا متأكده اني راح الاقي حل عندكم بحكم انكم ابخص بطريقه تفكير الرجال عندكم وهل تصرف خطيبي صح وانا شايفتها غير صحيحه بسبب اختلاف العادات نوعا ما

مشكلتي في نقاط..

أول شي لاحظته انه خطيبي يحب يتكلم عن نفسه كثير وأنه احسن واحد في الدنيا وأنه لما يروح مكان الحريم الكبار يخطبون لبناتهم

خطيبي هذا اي حركه اتحركها حتى لو بدخل التواليت ألله يكرمكم يبيبني أخبره ولو ماخبرته والله ياجماعة الخير يلعني ويقلي حقيره اتخيلوا هذي الكلمه احنا عندنا كبيره ماتنقال وهو عنده مثل شربت الماي

محددلي وقت النوم ويقول انه كل حريم عندكم يناموا 10 الليل ولازم اكون مثلهم

مايحترمني وقت الغضب

لو اتصل ومارديت بسرعه اكون مشغوله وقتها القيامه تقوم بدون مايفكر يسأل انا ليش مارديت من اول مارن التيلفون

لو رحت عرس يحددلي موعد ارجع فيه الساعه 12 واحنا اعراسنا تبدأ 11 وتخلص 3
وانا ياجماعة الخير مرتبطه باهلي مااقدر أقلهم يلا رجعوني وإحنا تونا واصلين العرس واضطر اتاخر مع اهلي وهو طبعا يجيك الصبح يلعن ويجلس اسبوع مايكلمني ويقول انه أعراسهم تخلص 12 ومو عاجبه طريقة الأعراس عندنا

المول يحدد لي ساعتين
الصالون لو رحت يحسسني كني رايحه ديسكو ولا مدري وين
كله يصارخ ويصارخ احسه من العصر الحجري

التمشيات ممنوع وانا مستغربة من هالشي وهو يقول انه عندهم في الامارات عيب الحريم يطلعون يتمشون

وكل مره اطلع ازور اخواني ولا عزيمه يباني أرسله صورتي شو لابسه محتشم ولا مو محتشم ولازم ارجع الساعه 10
ياجماعة الخير انا عمري ماقابلت حد بالشخصية
يقول انه بكيفه وهو حر وانا علي اسمع كلامه والزوجه السنعه لازم اتطيع زوجها بدون نقاش
اوكي انا اعرف ومتعلمه ومتربيه وكلنا نطيع ازواجنا بس ماتوصل لدرجة يحدد لي وقت ضيق عشان اقضي حاجتي ولو حصل وتاخرت ربع ساعه لظرفها خارج عن ارادتي عن الوقت قام يسب ويلعن

وكل شي ممنوع حارمني من البرامج الحلوه من الانستقرام والسناب والبي بي وكل شي خلاني احذفه وقلتله تامر أمر وحذفته وكل شي يأمر وانا اقول اوكي بس مافي تقدير ابدا

انا طبعا لما يسب ويلعن لسبب تافه ازعل واقاطعه وكم مره أقله ياولد الناس ترى انا مو وحده مضطره اتزوجك وهذا أسلوب غلط تعاملني فيه. .يعني شو اصورلك لبسي قبل لااطلع انا ترى اهلي موجودين وشايفني شو لابسه وهم احرص منك عليه

كم مره أقله خلاص ماابيك يرجع اليوم الثاني يعتذر ويقول اسف وماعليك وأنه كدا اسلوبه وطبعه ولازم اتحمله عشان السفينه تمشي واني لو مااتحملته معناه اني مااحبه ومن هالكلام

حاولت اتأقلم واعطيه على جوه وانفذ أوامره بس حسيت نفسي اطيعه طاعة خدم تعبت صرت اخاف منه ومن صراخه وشتمه وصرت احسب حساب للطلعات وافكر اقول ماادري هو بيتم كذا طبعه على طول ولا هذا بس لاني في بلد وهو في بلد؟

انا صراحه مااقدر اعيش مع إنسان بهذا الأسلوب والطبع ونفس الوقت مراعيه مشاعره احسه يبيني ومايبا يتركني ودايم يراويني صور البيت واخترت معاه الديكورات ويقول هنا بنجلس انا وانتي وهنا بنحط لعيالنا العاب احسه بنى أحلامه عليه كل شي يقوله يتخيلني معاه عشان كذا انا أحزن عليه قلبي مايطاوعني شاب يبني أحلامه مع زوجه معينه وتتركه

عندنا في السعوديه غالبا مش الكل بس اغلب الرجال أحسهم يقدسوا الزوجه ويحترمونها ومايضيقون عليها طبعا مو كلهم بس الاغلبيه وانا مصدومه من هالشخص وخايفه منه كثير

اخواتي هل انا ماشيه في الطريق الصحيح اني اتحمله واساسيه وانفذ أوامره واتحمل سبه؟؟؟؟

هل انا صح اني اقول قلبي مايطاوعني واحد يبني أحلامه معاي واتركه لأنه مايحترمني؟؟؟؟

هل اعتذاره وكلمة اسف الي كل مره تشفع له الي يسويه فيني على اتفه سبب؟؟؟
هل صحيح عندكم الحريم مايسهرون لين بعد 12

وصحيح عيب عندكم يطلعون يتمشون مع صديقاتهم؟

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[غلآ نفسي]

ما يخصه سعودي اماراتي قطري عماني ..... والخ

شي رياييل يحبون يتحكمون بحريمهم .. كل حركه كل نفس كل طلعه لازم هو يعرف تحركاتها

وهالرياييل بتحصلينهم في كل مجتمع

بس اللي اشوفه من حولي ما في اماراتي جي صوبنا

يمكن بيكون شي عند عضوات غيري

بالتوفيق

[المعآني]

لا عادي حبيبتي نحن نتأخر في الاعراس وعندنا بي بي وانستقرام وغيره
وأسير الممشى امشي فيه أو الحديقة المخصصة للسيدات أحس العادات هاي يمكن خاصة بأهله أو خاصة فيه هو واللى أعرفه الإمارات الانفتاح فيها أكثر عن السعودية يمكن يغار أو خايف عليج ريلي بداية زواجنا ضيق علي نوعا ما كان دوم يقول انتي أمانة عقب تفهم الوضع وصار مرن ..
استخيري حبيبتي ماندم من استخار وربنا يدلج ع الصواب

[Fa.R]

نحن متحضرين في الإمارات
لكن خطيبج شكله من عايلة منغلقة وايد وكل شيء عنده
عيب ومنقود ،، هالنوعية لازم تكونين حازمة معاه و وقفيه عند حده

حشى الله يعينج عيل لو خذج شو بيسوي ><"

عز الله بتقولين ردني السعودية

لا تعطينه وايد ويه

قوليله أسمع أنا بروح الحمام ولا بروح عند أهلية ع راحتي
بس توصل أنك تسب وتقل أدبك

إذا أنت من الحينة جي عيل عقب شو بتسوي ؟؟


يقهر

[Oyster]

لا عزيزتي بلعكس شبابنا متحضرين ومتفهمين اكثر عن غيرهم بس انتي على حظج طحتي على هالشخص

وممكن تصرفه هذا بسبب انج بعيده عنه ومهتم وخايف بس باسلوب غلط في ناس جيه والله اعلم

الحل انج توقفينه عند حده لان بعد يتطاول بالكلام هالشي ماينفع تسكتين عنه لانه راح يستمر لبعد الزواج ، مادري اذا مجرد خطوبه بس او مالجين ، اذا مالجين مانصح بالانفصال لكن هالنوع لا يطاق ف اذا مجرد خطوبه فكري بالموضوع عدل واستخيري بكل الاحوال

[نور الاوطان]

لابد يوقف عند حده و يحترم ألفاظه ... ترا هذا زواج مو استعباد ... لا حبيبتي نحن نطلع و نتونس و نحط برامج وواثقين من تربيتنا و تربية اهلنا...انا اقترح عليج انج تقولين له يا فلان .. انا دامني ما اسوي شي غلط ف ما يحق لك هالتعامل الزفت كاني من الشارع..
اولا ما يدخله ف حمامج او ف غيره ثانيا لج حق ترتاحين و تقضين امورج بس بدون مبالغه.. ثالثا الاحترام خط احمررررر.. ممنوع انه يسبج منعا باتا.. رابعا الثقه لازم تكون موجوده ..، و الا كل حد ف دربه شدي حيلج و لا تتنازلين عن حقوقج قبل لا تندمين و تيبين عيال
فكري مليون مره ... موفقة

[Ward-uae]

ما يخصه مواطن وسعودي الريال اذا حب زوجته يحبها من قلبه وهذا نادر
كل اللي قلتيه صح في عيلتي العرس ما يتعدى 12
الزيارات وخاصه لو اخت ومعرسه اخواني ما يطولون وايد يعرفون عيالي بينامون او ريلي قايم من الفير يبي يقعد وياهم لكن مب حلوه يخليهم ويسير ينام
وانا بعد لو سرت بيت اخوي اسوي نفس الشي وريلي ما يحب انام عندهم عادي عنده يحجز في فندق لكن ما بيخلينا ننام عندهم عنده البيت خصوصية مع انه عندهم غرفة ضيوف
فأشوف كل اللي قلتيه عادي ما عدا السب هنا قوليله او عوديه على الألفاظ الحلوه بيتعود
واذا انتي محتارة استخيري والله بيسر لج

[sa7el]

لا حبيبتي ما شي جي

ماله خص انتي سعودية وهو اماراتي

الادب ادب،، في كل الجنسيات
اللي من بدايته جي ها انتي ما تبين نحن ننصحج

دامج مش حرمته مجرد خطيبته انا اقول لج حاولي لا تكبرين العلاقة قبل لا يتغير

انصحي، خلي اهلج يكلمونه وينصحونه واذا ماطاع صدقيني اريح لج الابتعاد

الاحترام والتفاهم هو اساس العلاقة الزوجية الناجحة
مش الفرعنة وقلة الادب والسب والاهانات

ليش حبيبتي ها زواج واعتقد زواج تقليدي،، مب ميود عليج شي ويبا يتزوجج ويهينج بهالطريقة

استخيري،،، والله يعينج

[احلى بعفويتي]

على حسب مزاجه محد محدد وقت في الامارات
كل واحد على كيفه

بس شكله واحد عسر
الله يعينج عليه

[هنايف35]

ابداااااا ماينفعج عقي بحر حبيبتي اولها جي اخرتها تنعاف ما ينعفع الريال جي لازم ف بداية الخطوبة دلع في دلع هذا مجرد انسان مش واثق من نفسه شكله هو يسوي هالحركات وخايف الله يبتليه بزوجته صدقيني ما ينفعج هالريال واذا خذتيه بتندمي طول عمرج ولا تخلي يتحكم فيج بكل صغيره وكبيرة من موضوعج احسج انسانه فاهمه ودارسه استخيييري وهو مش اول ولا اخر ريال في هالدنيا اكبر طاف سويله

[mouzan7mod]

حبيبتي نحن ك مجتمع محافظ هي نعم نحن مجتمع محافظ و نهتم بالعادات و التقاليد ، لكن إلي يقوله خطيبج هذا ما يصير ولا يستوي . .. نحن نطلع و نسافر و نروح و نرجع عاااادي و الله الحافظ ، لكن مسألة أنه يبا يتحكم فيج من خلال بنات بلادي يسوون جذي انتي بعد سوي مثلهم لا و ألف لا ، محد يرضى ينسجن في بيته على أساس قيم و عادات .. حبيبتي كلميه و أذا ما طاع قوليله خلني ببلادي و آخذ ولد بلادي أحسن من الغربة و العذا ب.. فكري في مستقبلج و مستقبل عيالج لآن العيشه مع هالمتحجر صعبة ..

[R.j.S]

السلام عليكم

اشكر كل من رد عليه ماشاءالله عليكم عين العقل

بما ان آرائكم متشابهة قلت ارد رد واحد

احنا مالكين الآن لنا سنه والزواج انا طلبت مايحددونه لين نتعرف واعرف طبيعته ويعرف طبيعتي عقب نحدد الزواج وبسبب اسلوبه هذا انا إلا الآن رافضه الزواج يتحدد وأهله عارفين السالفه كلها ومقدرين ويقولون يحمد ربه انك بتعطيه فرص

بالنسبه للانفتاح زين قلتولي انا الي اعرفه انو ماشاءالله متفتحين وكل شي عندكم موجود وبحدود طبعا وأخواته عندهم كل برامج بس 8 و ماله سلطه عليهم لأن أبوهم موجود الله يحفظه عشان كذا انا مستغربه من هالشخص الغريب احسه من العصر الحجري على قولتكم حظي طايح وزين قلتولي

الألفاظ السيئه نصحته وعاقبته وسويت كل شي المشكلة على قو شخصيته يقول انا اسف

الفاظي معاه جدا راقيه وحلوه وماتعلم مني يقول كل واحد بطبعه وشخصيته

ماعنده تبرير للكبت والتشدد الي مسويه عليه لا البعد عذره ولاشي بس طبيعه فيه وهالشي مخوفني

بعض المأكولات ماياكلها لسبب انه يحسها حقت بنات ماتصلح للرجال مثل المكرونات...انا هنا ماعلقت لاني فعلا مستغربة من هالتفكير

انا حاليا افكر في الانفصال وقلتله لواتكرر الفاظه السيئه ليه بيكون آخر المطاف ماله داعي لاي علاقه اتدوم اذا طاح الاحترام ..وانا متأكده انه بيكررها

ماعندي مشكله بالقوانين الي يحطها والممنوعات طالما هو شخص يحترمني والفاظه حلوه معاي ويحطني في مكانه عنده وماينزلني منهآ يوم فوق ويوم تحت هذا كان كلامي معه أمس
والله يكتب لي ولكم الي فيه الخير

[أم محمد1988]

أنا بصراحه أشوف طلباته عاديه والمفروض كل حرمه تسوي جيييه حتى بدون ما يقول لها زوجها ..

والحرمه أساسا مكانها البيت احنا في مجتمع محافظ وأهلي بعد محافظين وعيب عندنا بناتنا يطلعون مع صديقاتهم يدورون ويتمشون بلا سبب وعيب بعد عندنا نقعد فالعروس للساعه 3 الفجر ونرقد من وقت ونقوم من الصبح ..

وشو تبين ف وسائل التواصل الاجتماعي ما وراهم الا التعب وعوار الرأس .. أحسن لج

والسب طبعا هذي مشكلة ولازم توقفينه عن حده .. مب على اي شي يسب شو وين قاعدين فالغابه !!!
فهميه ان الزواج لازم يكون فيه موده ورحمه ولازم يبتعد عن هالألفاظ السوقيه ..

[ميميه88]

عزيزتي حرصا عل الخصوصيه يوجد قسم خاص لحل المشاكل
http://forum.uaewomen.net/showthread...84%D8%AA%D9%8A

يغلق