لكل وحده تعاني

[إآٌحسآس نمله]

السلام عليكم ورحمة الله وبركاته
هاي بنات شحالكم عساكم الا بخير ..

المهم موضوعي اليوم يتكلم عن الحياه الزوجيه يعني نصايح وغيره من هالامور ..

لكل وحده تتشكى من ريلها ( مايحبني ، يخوني ، جذاب ، مقصر في حقي ، مايقعد في البيت ، شاكه في ريلي ، مب موفر لي الشي الفلاني ………الخ من هالامور )
بكتب بعض الامور عن تجربتي الخاصه وكذا نصيحه وان شاء الله افيدكم ..

اول شي نصيحه مني وعن تجربه فري كل هالامور ورا ظهرج ولا تفكرين الا برضى رب العالمين يعني خلج صريحه مع نفسج ترا مب عيب المهم تشوفين نفسج مقصره في الصلاه حاولي تواضبين ع الفروض ومن تواضبين ع الفروض حاولي تواضبين ع السنن ومن تواضبين ع السنه عليج بحصن المسلم هالكتاب الصغير البرتقالي اقري الاذكار صبح ومسا وعقب حاولي تصومين كل اثنين وخميس وكل يوم كل يوم مابقول 40 يوم ولا غيره اقري كل يوم ( سورة البقره وسورة ياسين و سورة الشرح ) انا شخصيا اقرا سورة البقره الصبح عقب صلاة الفير تاخذ من وقتي ساعه ونص ولا ساعتين واقراها متواصله يعني مب مجزئه ( يعني كل وحده وعلى حسب ظروفها وجي ) وبعد صلاة المغرب اقرا سورة ياسين 3 مرات و الشرح 40 مره .. بس قبل لا اقرا انوي وادعي اللي بخاطري واصلي ع الرسول ( عليه الصلاة والسلام ) واثني على الله عز وجل وعقب ابدا اقرا على راحتي ،، وفي كل وقت استغفر وادعي في سري ان الله يهدي لي زوجي ويسخره ولا اي شي اتمناه يعني المختصر اتقربي من الله .. ها اول شي ..

.. اول شي الخيانه وطرق حلها باذن الله ..
خانج ريلج وانتي تشوفين نفسج مب مقصره ، نصيحه / لا تسيرين بيت اهلج >> لان راح تعطينه مجال يخون اكثر وتصفين له الجو ، لا تقولين لاي حد ريلي خاني وما يستاهلني وريلي وريلي << بعطيج حركه وسويها خانج اول مره طوفي بس باسلوبج حسسيه تراني عارفه بس ساكته بمزاجي وبجمله وحده بيحس من تعرفين بخيانته يومين بالكثير سوي جو رومنسي شوي وسويله عشى وحركات وقوليله حبيبي انا مقصره في شي ان قالج ليش تسألين قولي بس فضول حابه اعرف انا في شي مقصره فيه ولا انت حاب اني اسويلك شي ومستحي ولا شي ، ف اذا في شي تباني اسويه ومستحي قول تراني حلالك بس اهم شي مافتح لك مجال تروح للحرام انت ريلي وحبيبي وكل شي بالنسبالي يعني وصليه القمر بهالكلام /..
انزين تكررت الخيانه ، صح الشي صعب بس خلج فضوليه شوفي ليش ريلج خانج بس بطريقه يعني ، يعني شوفي هالبنت اللي خانج وياها شوفيها زود عنج ، على سبيل المثال ( انتي ميتنه وهايج ضعيفه عزمي انتي تضعفين والعكس ) مثلا ( هايييج ادلعه تتعدل له شخصيا محسستنه برجولته انتي فكري وابدعي في هالشي اكثر منها ) مثلا ( هايج تسمع كلامه وماتثني كلامه لو قاللها ما تقعدين مع اهلج تسمع كلامه خلج انتي احسن منها ) يعني هاي بعض الامثله بس الهدف شوفي السبب اللي خلاه يخون وانتي اسعي انج اتسيطرين ع الوضع انج تبادرين بالاحسن ،، لا تقولين خاني وانا خلاص ماباه واللي يخون مره يخون عشر ( حطي في بالج دامه ما خاف من ربه لا انتي بتخوفينه ولا اي شي ) ولا تقولين بتطلق وبشل عيالي الريال مهما تمسك في عياله بيقدر يعيش بلياهم اقل شي بيقول مثل ما خذت هاي ويبت عيال باخذ غيرها وبيب عيال يعني جنج ماسويتي شي ف فكري بعقلانيه اكثر كيف تردين ريلج لج ولعيالج ، واذا تعبتي بس انتي تحبين ريلج وتبينه سيري المحكمه وقولي ابا الطلاق ( مب كل حرمه بتنفع وياها الحركه ها يعتمد ع الريال وشخصيته ) بس اللي بقوله ينفع لريال اللي شوي يخاف من المحاكم وكلام الناس وجي المهم سيري المحكمه ومن اول جلسة صلح وهو قال لا انا اباها وحرمتي ومابخونها وغيره ( طبعا تروحين واثبتات خياناته معاج ) المهم بيتم يقول انا اباها وامي عيال والشيطان قص عليه ولا ربع السوء وغيره ، قولي اوكي برد له بس بشرط واحد اللي هو ( قولي ابا فحص طبي ان هو سليم ) ان قالولج ليش قولي لا علاقات الفون توصل للطلعات وللطلعات انتو عارفين شو يصير ف انا ابا شي يضمن لي صحة ريلي وصحتي انا بعد ، ابصم ان في وايد حريم مابيوافقوني الراي بس هالشي لي انتشر بين الرياييل ترا يخافون بالذات اللي تكون خياناتهم مع بنات من جنيسات ثانيه يعني اذا طلبتي هالفحص وطلع سليم هالشي يمكن يرده لوعيه ويخوفه من هالعلاقات ونهايتها ترا ماوراها الامراض ، ومنها انتي بعد تكونين مرتاحه وماتوسوسين ، لان الامراض الحين غربيه وعجيبه وتنتشر بسرعه ف مب عيب الوحده تحافظ على صحتها وصحة عايلتها ..

.. ثاني شي احس ريلي مايحبني ..
طبيعة اغلب الريايييل ما يبيون حبهم للحرمه ، واذا فعلا ريلج مايحبج اقل شي مابيوفرلج مسكن ولا ملبس ولا مشرب تعرفين ليش لانه مايحبج ويبا يطفشج وهاي بتكون احد الاسباب ، بس دامه وفر لج هالامور يعني يحبج وترا الحب مب كل شي في الموده والرحمه والاحترام فوقهم يعني دام هالامور متوفره عرفي ان ريلج يحبج ، ولاتقولين انا ماحس بحبه مابسويله شي مثلا ( مابتعدل له ، ما بلبس له ، ما بدلعه ، مابهتم فيه ) ترا ها ريال مب صخر مرده بيحس فيج ، والكل يعرف ان الريال مثل الياهل على ماتعودينه ( عودتيه على حبج واهتمامه صدقيني بيبادلج هالشعور لو عقب دهر بس الموضوع يباله صبر ) ..

.. ثالث شي ريلي مايقعد في البيت ..
نادر ماييج الريال بيتوتي ، ( وبعدين احنا الحريم لا يعيبنا العيب ولا الصيام في رجب ان يانا ريال بيتوتي ، افففف شو ها كله قاعد ف البيت ، وان ياج كله برع افففف شو ها كله برع ) يعني الخلل فينا احنا الحريم ، المهم اذا ريلج كله برع ، شوفي ليش يطلع مثلا يروح القهوه يشيش وانتي ماتحبين التدخين في وايد طرق لعلاج التدخين دوري ف النت وبتعرفين ، وان كان يروح حق لعب ورقه وبلستيشن انتي تعلمي وزقريه مره ومرتين يلعب معاج ومع عيالج وباذن الله بتقلل طلعاته ، يطلع عشان المباريات ، شوفي معاه مره ولا مرتين المباراه وزهبي له الحب والعصير وهالامور وان شاء الله بيقعد في البيت ، يعني شوفي السبب واوصلي لنتيجه ترضيج وترضيه وفيها راحه لطرفين ..

.. ثالث شي ريلي جذاب ..
انا شخصيا ماعندي تجربه عميقه في هالشي بس بقولكم اللي مريت فيه وشو سويت ، مرتين ريلي جذب عليه ، اول مره جذب عليه ( انا تراني زوجته الثانيه ) المهم اول مره كانت ، كان اليوم ها ان يكون عندي ويبات عندي بس مايا وبات عند الاولى ، طبعا انا صياح ونياح وبموووت فلم هندي من اخراجي ، بس يوم يا عندي كنت في قمه من الهدوء ، واستقبلته في الاحضان وينك حبيبي وحشتني ولهت عليك والخ يعني وعقب ما مرن 3 ساعات واحنا يالسين نسولف ونضحك قتله ليش ماييت امس قالي والله كنت ياي من الفجيره وتعبان ورقدت اصلن في السياره وغيره ، قتله اها وسكت ، وبعد يومين قتله ترا انت ما رقدت في السياره انت رقدت عند الاولى وعشان ماتباني ازعل جذبت عليه، هنيه هو استحى ، قتله اتمنى ثاني مره اذا صار وياك ظرف وماقدرت اتيني برايه ماعليه صح بضايج بس كلمه منك ولا اي شي منك بينسيني كل ها بس مب تقصر في حقي وكأن ولم يكن ، ثاني مره كان يايب عياله عندي واتصلت فيه وهو عند الاولى وكلمني على اساس اني ريال ويوم قتله ليش جي كلمتني قال عشان عيالي وياي وماباهم يعرفون وغيره قتله انزين لحظه ولدك بيكلمك وعياله كبار في الابتدائيه صف 3 و 2 وكان ناسي انهم عندي المهم بس سويت هالحركه وسكرت عنه يومين ما كلمته وعقب يومين يبالي هديه وتم يعتذر ، قتله يوم تجذب اكرهك بس خلك صريح والله لو صراحتك بتجرحني بخليك ع راسي بس بتجذب مابقول بدوسك بريلي بخليك في عداد الموتى في حياتي ومن بعدها الحمدلله مول مايجذب ويصارحني بكل شي ..

.. رابع شي شاكه في ريلي ..
ها اول باب يخلي الريال يتبعد عن بيته ، ويشوف برع ، ف يعني الحل الوحيد تقللين من هالشك وتعطينه الثقه ولو هو مب كفو ثقه ماعليه عيشيه الدور انج واثقه فيه وان مستحيل يخذلج وغيره ، لان معظم الريايييل لي حسو بالثقه يصونون حريمهم ، بتقولين ليش لان بيقول هي واثقه فيني وتحبني وتحترمني حرام انا اكسر قلبها وغيره ..

المهم الحين هاي بعض النصايح اللي يمكن تفيدكم شوي عشان تكسبون رياييلكم .. اول شي خفي من الشكاوي ، واول مثال للشكاوي عن اهله لا تطرينهم لا بخير ولا بشر لان مهما كان العيب في اهله مابيشوفه بيشوف عيبج ، ثاني شي خففي طلباتج ولا تبينين له ان الماديه تهمج وايد صح شي مهم بس لا تحسسينه في هالشي وراعي ضروفه و وقفي وياه وسانديه وقت الشده ، ثالث شي خلج جدامه كتاب مفتوح لا تتضايقين من اي شي يسويه مثلا / اذا خذ تلفونج تم ينبش لا تتضايجين / انا بتكلم عن وجهة نظري ( بعض اسباب الخيانه الزوجيه ان الحرمه تخلي في فونها صور ربيعاتها وصور خواتها ولا اي حد من عايلتهم ويكون تلفونها بليا قفل وطايح يمين ويسار ، مثل ما انتي فيج فضول تبين تنبشين فون ريلج هو بعد نفس الشي يعني يشوف مثلا ربيعاتج وخواتج يعني انا احس غلط اصلن تخلين هالصور عندج ، اوكي اهلج وربيعاتج ناس غاليين عليج ، حطي هالامور عند امج ولا ف بيت اهلج يعني لا تدخلين هالامور في بيتج ) خلي فونج جدا عادي لدرجة لي ضاع ولا انسرق ماتحاتين شي غير الارقام ، المهم رابع شي اهتمي فيه ودلعيه قد ماتقدرين وابد لا تتعايزين عن خدمته لو ياج الفير قومي سويلي شي اكله نشي وسووي ، ويوم بيطلع لا تقولين على وين ويا منو وغيره قالج بطلع قولي اوكي حبيبي هلله هلله بعمرك ولا تنسى تاكل ووصيه على نفسه و وصليه لين سيارته ، واذا ياج الفير لا تقولين توا الناس سكتي وسيري عنده ساعديه يبدل ثيابه وسأليه حبيبي تعشيت ان قال لا قوليله اسويلك شي تاكله اكيد بيقول لا وردي رقدي واليوم الثاني سولفي وياه عادي واكيد تبين تعرفين وين سار وشو سوا ومنو وياه وغيره قوليله ها ان شاء الله استانست البارحه ويا ربعك وشو كلت يعني سؤال اير سؤال وبتوصلين للي تبينه من غير لا يحس ، دخينه وعطريه خلي ريحته دوم خنينه ، اهتمي في ثيابه ونظافته ، ويوم بيرد ها في النهار مثلا كنتي في الصاله ولحمتيه داخل البيت سيري لي عنده واذا يايب وياه اكياس شلي الخفيف عنه وجي ، عاونيه وساعديه في المصاريف لا تقولين ريلي يستغلني لان عندي راتب وغيره حطي في بالج ان صرف من بيزاته ولا بيزاتج ترا انتي مسؤوله منه وملزوم يوفر لج اللي تبينه على حسب اللي يقدر عليه ، احترميه وصونيه في غيابه ، لا تسوين اي شي من غير علمه ، لادخلين حد بيتج من غير علمه ولا رضاه ، سمعي كلامه واحترمي راييه في كل المواضيع ، لو غلط في حقج و واجهتيه وانكر اسكتي يوم يومين لين تروق الامور بينكم ووضحي وجهة نظرج ، خلج قنوعه لو يابلج هديه ورقه فاضيه خليها حديث الموسم ، ولا تذكرين عيوبه جدام اي حد ، وصليه القمر بالمديح جدام الناس مهما كان شين وياج ، واحمدي الله على كل حال وفي كل شي وكل وقت ، اهتمي بنفسج وبنظافتج الشخصيه ، قللي من روحت الصالون حاولي تتعلمين تسوين هالامور بروحج لان بعد في من الريايييل يتضايجون من سيرة الصالون بس يسكتون ف نصيحه تجنبي هالشي ، وخلي لسانج ويا ريلج كله عسل في عسل لو يكفخج قوليله احبك انت ريلي ونظر عيني ، وبعد سيرة بيت اهل الزايده عن حدها مالها داعي في الاسبوع مره وبس ، وهيك يعني هاي بعض الامور واذا ذكرت شي بكتبه لكم

ادري طولت عليكم بس اباك تستفيدون ولو شوي السموحه حبيباتي ..


تحياتي احساس نمله

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[إآٌحسآس نمله]

سامحوني شوي ع بعض الكلمات حاولت اعدلها بس مايصير المنتدى بعده مخرف بس اهم شي المعلومه توصل

[أغلى من ذاتي]

تسلمين اختي عالنصايح الحلووة والاكثر من روعه

[ضياء الايمان]

موضوعج حلو عيبني

[بنت عقيد]

قريته كامل. مشكووورة.

[ورقة ناعمة]

مشكوره احساس نمله ربي يحفظج يارب


ثالث شي ريلي جذاب ..

جذب مره .... لا خيانة ولا انه يكرهني الحمدلله بس انا فيني طبع اذا واحد يجذب مره ما اصدقه مليون مره

حتى لو اختي او قريبتي او صديقتي اهم شي بالحياه واساسه الصدق ....

[طاغية الأنوثة]

مشككورة عالموضوع وان كنت أشوف ان الخيانه مالها دوا أبداً ومستحيل الوحده تنسى هالشي وتأكدي ان الحركات والرومانسيات وتتبع غراميات الزوج مستحيل تردلج ريلج الشي الوحيد اللي فعلاً ممكن يرده هو خوفه من رب العالمين فالحرمه اللي ما تقدر تستغني عن ريلها مع علمها بخيانته أنصحها تنمي فيه الوازع الديني هاي الطريقة الوحيده

[المغربية3]

جزاكي الله خيرا على النصايح صراحة تعبتي فيهم ومفيدين كثر

الله يبارك فيكي ويخلي لك زوجك اختي

[إآٌحسآس نمله]

مشكورات ع المرور عزيزاتي نورتوا موضوعي

[Ana Uniqe]

مكورة حبيبتي والله يرزقنا رضى الله والزوج

[بنت زاايد]

تشكرات افندم

بس مايجوز نحدد عدد معين من قراءه اي سوره 40 مره و 33 مره لانه لم يرد عن رسول الله صلى الله عليه وسلم

[الصدر الحنون2]

استفدت وااااااايد

[غرووب 22]

لا اله الا انت سبحانك اني كنت من الظالمين

[amna.als]

مشكوره عزيزتي ع الموضوع

[WATMOR]

لا اله الا انت سبحانك اني كنت من الظالمين