شو نظامكم مع الخدم في رمضان

[ملكة الاحاسيس]

خدامتي اتنش الصبح وتنظف داخل البيت وترد تكمل رقادها عقب اتنش الساعه3 وادش اسوي الفطور
وان عندها كوي تكمل كوي
واحط لها اكلهت لنها مسيحية ونخلص لين نفطر وعقب تغسل وتنظف وتنتم عالساعه8 ومرات اتنش 1 تساعدني ومرات لا

ماتنظف خارج البيت وعيزت افهمها لازم تخمين الحوش وهي تتشرد مرة تقول مهب قوي ومرة تقول نظفت وانا اعرف انه مانظفت
وكل مانقولها خمي تقول بكرة وعالحال هذا كملت اسبوع ماتنظف
والحمدلله معاملينها زين مازين

عطوني فكرة ولا حل لني عيزت وهي مب ياهل اجبرها عالشي
وفهمتها اكثر من مرة انتي لشغل بيت مو لعيال
والحمدلله طبخ وعيال مشؤوليتي كامله .
ممكن تمسك لي بنتي لمن اسوق برع فقط

اعطونب نظامكم متى تنش ومتى ترقد
شغلها تراكم وصايرة وايد اتفكر بالمعاش
ويتني قبل فتره تقول بحول كامل فلوسي الفلبين قلت لها ليش طيب
قالت لنه برمضانص محد يداوم ويشتغل!طبعا خليتها مع نفسها لنه ما اضمن انها ماتشرد

و سبق واشتريت لها فون وسحبته عنها لنه تعرفت على حريم من جنسيتها وانكرت ارقامهن
واحسها كن عقب هالسالفه اقصد لمن انسحب الفون صارت تاخر وتتكاسل بشغلها


هل انا غلطت؟وشو اتصرف معاها بحاله تنظيف الحمامات وخارج البيت لنه ماتسوي الي اقولها اساه

المزيد من آخر المواضيع من نفس القسم:

• نصائح لتعليم الاطفال كيفية التعامل مع الخدم
• للي محتاجة خدامة
• إتيكيت وفن التعامل مع خادمة المنزل ‏
• خادمة اثيوبية ممتازة جدا للتنازل
• نصائح للتعامل مع الخادمة
• دريول الموظفات وسيدات الأعمال مميز
• افضل طرق التعامل مع غضب الخادمات
• شورايكم بمركز تدبير
• خادمة فلبينية للتنازل
• نصائح هامة ومفيدة عند استقدام الخادمة

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[منية2005]

الله يعينك على هالشغالة واحسن شئ تسفريها بعد رمضان قبل لاتسويلج مصيبه اوتشرد

[كلي عنجهيه]

موفقه

[ملكة الاحاسيس]

من ناحية مصيبه ماعتقد تسوي شي لنه هي تقول انتو احسن ناس تعاملوني هي مشتغله قبل
فماعرف شو الحل الشهر الي طاف كملت نص شهر ماتخم وانا وراها وراها ولما رمسها ريلي زاغت وكنست
احسها ماتبي تشتغل واجد

[ام ريوما77]

انا خدامتي اخليها تنش ٧ الصبح تنظف وتغسل وعيالي على الساعه٨ يقومون تسبحهم

وتنظفهم عقب تعلمهم وإذا فيه غسيل تغسل الملابس والكوي اخليهاااا تكوي إذا رقدو عيالي

ماحب الكاوية تكون شغاله والعيال صاحيين وعقب تجهز لي الأغراض في المطبخ وأنا أبدا طبخ

ماحب اخليهاااا تطبخ ولا هي ودهاااا بس انا قلت لها لا اكلي انا بسويه واكثر شئ تهتم بالعيال

طبعا وأنا وراهاا بس لأني حامل وفي شهري السابع ما اقدر اركض ورآهم واخليهااا ترقد ١٠

[دنيا أحلى]

اختي الغالية اذا البشكارة ماعلمتيها على نظام معين في البيت الشغل ما راح يمشي مظبوط وكل يوم بتخربط حسب مزاجها وخصوصا الفلبينيات
ظروري جدا تسوي لها جدول فيه وقت اللاستيقاض الصبح وفترة الراحة ولمدة كم (ظروري تحددين عشان ما تخمد لها 4 ساعات اونه راحة!! بالكثير ساعتين ) ووقت الرقاد على 10 مب قبل !خلي هالاشياء ثابتة حتى لو في البيت سهرتو او شي عشان ما يخترب الجدول
رمضان بيكون مختلف شوي
البشكارة احسن شي تنش من وقت على الساعة 6 تخم الحوي وتخلص البيت ترتاح شوي وتكوي
واذا دخلتي المطبخ تسوي فطور تكون موجودة تساعدج لين تخلصين والرقاد الساعة 11 بيكون احسن فترة رمضان
((طبعا في الايام العادية يوم تدشين تطبخين بتكون خلصت البيت وتساعدج في المطبخ وعقب الغذا تنظف المطبخ وفترة راحة لين عقب العصر تخم الحوي احسن فترة بتكون لتظيف الحوي)) عقبها تتسبح وتسير غرفتها تكوي واذا خلصت تشوف المطبخ تنظف عقب العشا وخلاص ترقد عالساعة 10 ))
وعموما اي ربة بيت تسوي جدول على حسب حاجتها للبشكارة
بالنسبة لمعاملة البشكارة كوني طيبة معها مومتساهلة لدرجة انها ما تخم الحوي عيل منو بيخم الحوي اذا مب هي؟؟؟ خليها تعرف انه الشغل شغل ما فيه طيبة وتساهل شرات ما هي تاخذ معاشها على اول الشهر دون تاخيراو نقصان فلازم هي بعد تادي واجبها كامل دون نقص!
انا شخصيا كرهت البشاكير وافضل اشتغل روحي في البيت بدل اني احرق اعصابي كل يوم مستقبلا ان شاء الله من تروح العلة اللي عندي

[ملكة الاحاسيس]

مشكورات عالنصايح الطيبة
انا ياخت دنيا هالي غاعص قلبي كل شهر معاشها تستلمه وفوقه اغراض من والى ولبس مني
بس هالي ابغي اعرفه
قلت لها نظامج برمضان كيت وكيت ماتسوي الي نقوله خصوصا سالفه الحوش ماتكنس خير شر
تتهرب منه

[بطوط]

بصراحه انا عندي بشكارتين وقلت الهم فرمضان نشن الساعه 8 وشغل غسيل الملابس والحوش قلت الهم بعد الفطور عشان الحر وشغل البيت يخلصونه ولكن بشكارتي الاولى ما عيبها وقالت انا من انش الساعه 6 وما اقدر ارقد وتنش وتنظفر الدور الي تحت وتسقي الزرع وانا رايحه الدوام مخلصه تقريبا وتنش الثانيه سندريلا ثمان نفس ما حددت وتنظف الدور الي فوق وعيالي ينشون ع التسع يريقونهم ويسبحونهم وشغل البيت الاكثر ع الاولى والثانيه مب وايد تحب الشغل غسيل الملابس الاوتي عليها اكثر شي وتكون جليسه الاطفال لوقت الثانيه ما تخلص الطبيخ وشغلها ومن ارد انا من الدوام امسك عيالي بس معاناه الحياه مع البشاكير لازم تصغير مخج وتتهاونين فامور عشان العيال

[ملكة الاحاسيس]

مشكورة بطوط ماقصرتي
انا عيالي صغار وانا مسؤوليتهم علي والطبخ من والى علي .
فاستغرب ليش يتراكم شغلها وكانت تسال وااااايد متى رمضان
ومتى رمضان كانها متخوفة او ماتبي تشتغل خلال هالشهر
هي تخلص تنظيف ومسح الساعه 10
اتفقت وساها تنش الصبح بدري تنظف الحوش وللاسف ماسوت الي قلته فقط لقطت ورق الشير من صوب الحدايق
ابغي اعرف كيف هي بتلتزم بجدول ان كان الكلام ماتطبقه ؟
انا فهمتعا شغلها من والى
فشو الي ناقص او شو الغلط مني اني اعطيها بريكات طويلة
لني ما اختاجها لعيالي مول

[‏ƺọỐġ❤Ğăζβh]

الغلط منج مب منها لانج مب حازمه وياها .. الحين لو كنتي موظفه وقالج المدير سوي الشغلله الفلانيه بتسوين ولا بتتهربين ؟! بتسوين لانه المدير .. هي الحين مثل الموظفه عندج وانتي المديره ،، ازم تكونين حازمه وصارمه وياها او خبري ريلج عليها

[ملكة الاحاسيس]

اي خليت ريلها يامرها يشكل مباشر صارت تطبق ... الظاهر تستغل طيبتي وتزحلقني بس قمت شوي شوي ابرمجها
انه لو ماسوت هالشي تتوقع باي وقت راحتها اقومها اتسويه خلاص جي النظام

[أم ميثا]

الله يسخرها لج
تعلمت درس ما أدقق عليها تسوي اللي تقدر عليه واللي ما تقدر عليه يزووووول عمرها ما سوته شو أبا فيها أجبرها وتحقد عليه من الجرايم اللي أسمعها قسم بالله قمت أخاف وصارلي سبع شهور الحين بدون شغالة
بس عندي طباخ يطبخ الاكل ويغسل ويكوي ثياب ريلي والأطفال
والدريول يخم الحوي ويسقي الزراعة
وتنظيف البيت كله علي
ومرتاحة نفسيا بس مالنا مفر مقدمة طلبين لخادمتين من ٤ شهور وليومج ما شرفن
ويوم بيشرفن بغض النظر يسون اللي يسونه برايهن أصلا استسلمت صعب تقيدينهم بجدول ولا تلزمينهم بتعليمات
وهن ما عادن نفس قبل استقون والبركة في الهيومن رايتس

[ملكة الاحاسيس]

ام ميثا كتبت لج رد وطاااار
اصلا محد مكبر راسهن الا هالجمعية
ياختي لين متى بنكرف انا عايلتي صغيرة بس البيت عود
فمي محتاج الا بشكارة وهي رايحه ؤاده تقول ابي وحده ثانيه تعاونني
طيب البيت مب محتاج!!حق شو الله يخليج

الله يكفينا شرهن صارت الخدامه يبالها خدامه
الله حق هي تبي تشتغل لكن بكيفها والشي الي ماتباه مابتسويه طيب منو بيسويه
تحمد ربها شغلها تنظيف فقط وكوس
لن الغسيل بمكاين يعني تحط صابون وكمفورن وترد تربح
والبيت امبونه نظيف لن عيالي طووول الوقت عندي بغرفتي ماحب اخليهم روحهم
وتتضيق لو حد خيس البيت وتستاااانس لو نروح يومين برع لنه تيلس من غير شغل
لكن لو نقولها مابنحولج فلوس بتجلب ويهها
عيل نحن منو يسوي بنا الي نباه ان كلنو الخدم مدلعين

[ملكة الاحاسيس]

والشي الثاني ام ميثا
فرضا انتي عازمه ناس وصارت معاي وقلتي لها اباج تشرفين عاليهال
بعد شوي تلاقين عيال الناس دشو حجرتج ولاعبين باغراضج
والخدامه راحت ترقد

قهرتني لما لقيتها نايمة ياناس حد من خداماتهك يرقدون سبع وثمان
ترا جد احس اني مفلته

[Cobon]

انا عن نفسي ما اتحكم فيها متى تنش ف رمضان لانها مسلمة و تعور قلبي مرات تنش 6 او 7 او 10 الصبح ما تفرق وياي
ولا اقول لها شي
يوم تنش اتنظف و تخم البيت بكبره و المطبخ
مرات اتم فاضضضضضية اخليها ع راحتها ما اقولها شي ولو كان عندها كوي اخليها تكوي و تخلص قبل الساعه 3 الظهر
و عقب من الساعه 4 العصر ابدأ اسوي الفطور معاها
و عقب الفطور اخليها ع راحتها لفترة و عقب ما تخلص من الصلاة
تغسل الصحون و تنظف المطبخ عدل و عقبها ترتاح شوي اخليها و اقولها سيري غرفتج ارتاحي تبغي تصلي تقرىء قران تنسدح
ع راحتها و بعدين تخم الحوش او تنظف برى البيت او تمسح الزجاج برى البيت
هي مرات بروحها ما ترتاح بعد الفطور تصلي و عقب تنظف برى البيت عسب تخلص شغلها بسرعه
هذا روتينها اليومي بشكل عام في رمضان

وانا طبعي دوم ف الويك اند انش متأخرة لاني ابغي ارققققد و اقول مثل ما انا ابغي ارقد هي اكيد تبغي ترتاح و هي صايمة يعني مب زين ارص عليها