الغيره الزايدة عن حدها..

[حرمة عبدالله]

انا وحده وايد هاديه .. ونادر اني افضفض وما احب ارمس عند ربيعاتي او حد قريب مني لاني ما احب اكون محور مواضيعهن او سالفه من سوالفهن لاني اعرف سوالف الحريم ..

الحلو فهالمنتدى محد يعرفج ولا تعرفين حد يعني تقدرين ترمسين وانتي مرتاحة ..

اول مره ف حياتي ارمس عن نفسي ههههههه بس تصدقون والله حلو جي جنج تخوزين يبل هم من على صدرج

انا من عايلة بدوية بحته.. متمسكة بعدها بالبداوة ومخوخ اهليه محجرة .. فيهم صفات حلوه كرم وطيبه وسنع .. بس الموقف اللي ما احبه فهالعايله : الحرمه تصبر الحرمة مالها غير ريلها الحرمة عيب تتطلق الحرمه تضحي وتتنازل .. اهم شي البش مهندس يكون مبسوط

كنت ابا اطلع من هالعايله ابا اشوف الدنيا ابا احس اني شي ينتمي للعالم الخارجي .. حياتنا كانت كلها فالبيت .. ما كان يقصرنا شي نلبس اغلى الثياب وناكل احسن اكل اصلا حتى طباخنا والله ما كنت اعرف شكله !!
البنت عندنا من تبلغ خلاص تعرس !! وصل عمري 17 وانا كل ما انخطب امرض او اتميرض بمعنى اصح .. لين ما خطبني ريلي .. كنت وايد اسمع عن الخيانه الزوجيه وانه الرياييل يخوفون !! ف كان كل همي اخذ واحد ما يحب الحريم ويكرهن عشان ما يشوف غيري

ريلي كان حضري ف قلت اكيد متفتح .. وسمعت انه ما عنده علاقات وانه من صغره ما يحب يسولف ويا الحريم فتحمسسسست ووافقت ولانه بعد مصلي والحمدلله .. ملجت وثاني يوم ملجة يا ويايب لي فون .. فرحت بس انصدمت انه مسوي فالفون حظر !!! يعني ما اقدر اتصل الا حقه!! ليش؟؟ كلمته قلت له ليش؟؟ قالي شفيج مابا حد يشغلج عني عيبتني الكلمة وسكت !!
طبعا رحت اشاور خواتي لانه مالي ربيعات اصلا !! وخواتي طبعا يمشن على نظام : لو ريلج داسج اصبري !! قالن لي عادي بيتغير عقب العرس وهالجمله اللي دايما يقولونها الاهل وخرطي ما منها فايدة!!! قلت يوم بعرس وبيعرفني اكثر اكيد بيثق فيني .. مره رمسني وقالي كيف تتجحلين واخوانج فالبيت!!!! انزين اخواني لا غلط عيب .. طبعا عمري 17 سنه وهو 27 سنه؟؟ يعني كان يبا يربيني من اول ويديد ههههههههه وانا كنت ياهل وكله اقول ان شا الله لانه في بيتنا الحرمه عشان تكسب ريلها كله تقولل ان شا الله ..

عرست تونا بنطلع قالي : لا تلبسين نقاب عيونج تطلع اممم قلت زين يبت غشوه بحطها ع راسي مع العلم اني البس عباة راس قالي لا تحطين غشوه ع راسج اخاف الناس ما تعرف انج لابسه عباة راس ويفكرونها عباة جتف؟؟ انزين شو البس تغشيت ب الغشوه تحت عباه الراس و3 طبقات والله ما كنت اشوف شي .. الحظر ما خوزه من فوني وتميت عالحاله .. ممنوع المكياج وانا اصلا احب احط خفيف يعني ما اكثر غير بودرة جحال قلوس .. ومن كثر انه مكياجي سمبل وما ينعرف كان يشم ويهي يتاكد في مكياج ولا لا؟؟؟
ممنوع اوقف جدام المنظره ممنوع اقول انا حلوة .. الحمدلله انا في بيتنا ويوم اطلع خاري الحريم يمدحوني واحب مدحهن افرح.. بس هو يقولي لا تغترين بشكلج اصلا حتى كلمه حلوه يقولي اياها بالغلط؟؟ يعني مرات يرقيني قبل لا انزل او يقولي انتبهي من عيونهن طبعا من هالكلام احس اني حلوه في عيونه هههه !! ممنوع اكلم راعي الدكان ممنوع اكلم الخياييط ممنوع اشوف مذيع ولازم اذا طلع مذيع بالتلفزيون انزل راسي ولو مذيعه عادي هو يطالعها وان رمسته قال : انا ريال !! ..
حملت ويبت 2 فدديتهم .. وما تغير بالعكس غيرته تزيد كل يوم .. ممنوع بلاكبيري ممنوع واتس اب .. خوز الحظر وحط خواتي واخواني .. وكل يجيك الفون منو كلمت؟؟ واذا قلت له ابا اسير بيتنا قالي : بيتج اولى .. ممنوع البس نعال فيها لون لازم تكون سودة!! ممنوع البس شيله فيها لون حتى لو اتغشى فوقها .. ممنوع البس فستان حق عرس؟؟ وممنوع اروح صالون اسوي تسريحه او ميك اب .. قمت ما اروح أي عرس ..

تعبت نفسيا .. ما قدرت اتم على هالحاله .. خذت رقم استشاري نفسي ومتدين عمره فوق 40 وله وايد محاضرات .. رمسته وكان محترم وايد وقالي في محاضره في دبي تعالي ويا ريلج اليوم الفلاني .. طبعا شاف رقمه في تلفوني .. ما كلف نفسه يتصل ويقوله انته منو؟؟ شلني بيت اهلي وقالهم بنتكم تكلم ريال !! اهلي حرقتهم الكلمه وقلت لهم دقوله الريال معروف مستشار.. قالولي نعرفج عدل نحن بس بعد غلط تكلمينه بدون علم ريلج .. ادري غلط انزين شو اسوي؟ اكلم منو؟؟ ريلي ما يتفاهم؟؟ انتو كله تقولون اصبري؟؟ انتو عايشين حياتكم وريلي عايش حياته وانا !!!!
ما قدرت اتم فبيت اهلي .. هناك لا دراسه ولا شغل ولو تطلقت بنحرم من كل شي ؟؟ يعني بين نارين !!
قلت خلاص خل يطلق؟؟ ياني واعرفه يحبني ويباني وقالي اباج بس اباج تحلفين ع مصحف انه مستشار؟؟ وحلفت له وبعد تم يلومني !!

رديت البيت عنده شل فوني وومنع كل شي عني جني صدق سويت شي غلط؟؟؟ رديت بيت اهلي وما بغيته رد يشلني وقالي خلاص برد فونج ..

رديت الحين عنده البيت مستوي طيب وياي وطلباتي اوامر .. بس يبا يحكرني يمنعني من خواتي ربيعات .. وهو اصلا واحد هادي ما يحب يسولف وايد .. وتدرون الحرمة تحب تسولف وترمس؟؟

احين استويت اطول لساني ؟؟ وادافع عن حقوقي .. بس مليت لين متى عمري وصل 27 وتوه يالله يتغير؟؟

اهلي ما يبون مطلقه ولو تطلقت بيعاملوني مثله .. وعنده احس اني مسجونه

نصيحه : مب كل شي يتغير عقب العرس ؟؟ هالجمله يقولونها الاهل بس والله مب دايما تكون صح .. ان شا الله ما تنقال لكل موقف !! لها مواقف معينه بس .. الغيره اللي توصل للشكوك واللله انها تنكد العيشه

سمحولي طولت عليكم .. بس صدق ارتحت نفسيا يوم كتبت

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[الشاعريه]

كيف نغير انسان في داخله مب راضي يتغير
كيف نغير شخص من ٢٠ او ٣٠ سنه على نمط واسلوب معين
كلام ما يدش العقل

اللي عنده علاقات قبل الزواج وما تاب واقتنع ان اللي يسويه غلط اكيد بيرد لعلاقاته بعد الزواج
هذا اللي حاصل

صح انج بديتي تتصرفين متاخره
بس اقولج انه بيخف عليج اذا حسستيه انج قويه وقادره تدافعين عن نفسج
الغلط انج كنتي تطاوعينه في كل شي وراضيه بحالج وهاللي خلاه يتمادى ويزيد غروره وحبه للتملك
هاللي في ريلج مرض الشك وغيره مب طبيعيه .. حاب يملكج بكل الطرق
لازم تبينين له انج واثقه من نفسج وجمالج وشخصيتج وكل شي فيج
لازم يعرف انج ممكن تتخلين عنه في اي لحظه وممكن يخسرج

[افناان]

ما بقول شي غير الله يعينج و يهديه
١٠ سنوات و ما قدرتي تغيرينه عيل انسي تغيرينه ع جدام
ما بايدج غير الدعاء

[تاجرة خلطات]

الله يعينج حبوبه ويعطيج الصبر فديتج حاولي تغيرينه.......

[شمالية وافتخر]

ربي يهديه ويصلح علاقتكم ما اقدر اقول اصبري وتحملي لاني ادري كل انسان ما يقدر يتحمل فوق طاقته ..

[بنت خورفكان 3]

بصراحه حياتج صعبه واللي اشوفه ان ريلج شخص مطوع
الله يعينج ويهدي ريلج

[صنوبر]

هو خايف عليك لو مايباك كان خلاك فبيت اهلك
عيشي حياتك واهتمي فابناءك خليه على راحته

[صنوبر]

هو خايف عليك لو مايباك كان خلاك فبيت اهلك
عيشي حياتك واهتمي فابناءك خليه على راحته

[Marmoosh]

و الله صراحة انا زعلت عالقصة كثير
و قهرتيني عليكي
بس ضحكتيني لانو انا بعرف ناس كثير بيغارو بس مو ب هالطريقة !!!

رح قلك شغلة بس لا تزعلي مني
انا بعرف انو الأشخاص اللي بيكونو بيغارو بهاي الطريقة بيكونو مسووين شي بحياتهن قبل !!!!! يعني ما تقوليلي انو ل هالدرجة بيكره البنات غير ليكون مجرب يا اما هو عامل شي
يا اما حدا عندهن بالبيت صايرعندو شي
و هو خايف يصير معو نفس الشي
الله يعين قلبك و يصبرك

[بسمة فجر]

الله يعينج اختي و يحنن قلبه عليج
باين من كلامج انه يحبج وايد و ما يقدر يخسرج
استغلي هاي النقطة لصالحج و دافعي عن حقوقج بأسلوب حلو و راقي يخليه يستحي من نفسه
الله يوفقج

[شمه الشطوره]

غيره زايده+شك= انفجااار
الله يعينج اختي انا احب الريال الي يغار بس ما توصل للشك بس انا اشوف دام ريلج ماله خص ف البنات ف انتي بخير و اعتقد انه يحبج ما شاءالله وبجي انتي تقدري تغيرينه حتى لو مرن العشر سنوات
ريلج زين بس الي فيه مب بايده هذا مرض او وسواس ادعيله بالهدايه والصلاح وانه الله يلين قلبه ويحننه عليج

[اناناسة]

الله يسعدج حرمة عبدالله و ان شاءالله دووووووم تكونين مرتاحة هب يوم

الغيرة الزايدة عن حدها مالها دخل بان الريال حضري او بدوي

استمري باللي بادية و تاكدي بامكانج تغيرين حياتج صح مار 10 سنين و لكن بعد مب متاخر

طبعا لي عودة ان شاءالله

[اناناسة]

اللي يخرب حياة الزوجين مب بس البنات و علاقات مرات الغيرة القاتلة هي الادمر

لان بحالة وجود بنات و لعب و العلاقات المحرمة الحرمة بامكانها و لها حجة قوية تتركه

بس بحالة الغيرة و الحرمان من الحياة

بالذااااااااااااااات ان الريال يعشق و يحب حرمته هني اللي هي تتبهدل



لان بهالحالة الحرمة لا تقدر تتم و لا تنفصل و تتم حيرانة و الكل يقول يحبج و يموت فيج

اوكي يغار يحب و يموت فيها ( الحرمة و ما اقصد اختنا حرمة عبدالله ) و بعدين ؟؟؟

هل الحياة الزوجية سجن او مشاركة ؟؟

ترى في حريم بعد بنفس الحالة و احيد احدي الاخوات الغاليات راسلتني بهالخصوص

و لكن ناسية نيك نيمها و دورت دوااااااااااااااارة بين رسائلي ما لقيت رسالتها لانني حبيت

اتطمن عليها و امورها


الله يبعد الغيرة المزعجة القاتلة عن الزوجين

كل شئ حلو يكون وسطي


الغيرة ان كانت غير طبيعية و مرضية

تقتل الحب بقلب المراة او الزوج ان الزوجة كانت غيورة اكثر عن اللزوم


هله هله برياييلكن اخواتي ابتعدوا عن الغيرة الزائدة بالذات ان ازواجكن قد

المسؤولية و ما عندهم سوالف ما يرضى رب العالمين


مب اي ريال طلع و تاخر معناته كان مع بنت

اعرف طلعت خارج الموضوع بس عاد احب اتجول بكل الجهات هههههههههه

[مراسيل الوفاآ]

هههههه انوسه، اظن لو ف هالموضوع قلت لحرمة عبدالله
اصبري وان شاء الله بيتغير ما بتجلبين ضدي صح ؟


اختي حرمة عبدالله، بتعيشين وياه طول عمرج ان شاء الله
والحمدلله ريلج ما عليه حركات ما ترضي ربنا سوى انه
راص عليج زياده عن اللزوم، لكن بعد دام ف هال10 سنوات
شفتي تغيير بسيط يعني بتقدرين تغيرينه اكثر مع الايام . .
الاسلوب يلعب دور مهم خاصه ف حالتكم وهالشي عرفته
لانج يوم تردين عند اهلج يي ياخذج وسمع كلامج بأنه رد
فونج، لكن بالتدريج ان شاء الله بيتغير بس بالسياسه

[حرمة عبدالله]

شكرا لكل وحده عطتني من وقتها و شاركت ..

كلامج 100% صح اناناسه .. الكلام اللي كتبتكم اياه كان قبل لا استقوى وابرز عضلاتي ههههههههههه بالعكس احس اني وايد متفائلة ويوم استقويت لقيت اللي صبرت سنين اترياه ..
هذي انا حرمة وما تحملت ريلي وسيدة فكرت فالطلاق مع اني احبه وادري يموت فيني = نصيحه لكل متزوجه غاري ع ريلج بس ابتعدي عن هالطريقه لانها والله تنفر وتجتل الحب ..
بس يوم رمست ودافعت عن عمري تغير الحمدلله ..