ريلي والحمل

[الأصالة]

السلام عليكم خواتي

ابصراحه مضايقه وايد وحبيت افضفض لكم اشوي واسمع نصايحكم في هالموضوع

انا امعرسه من 4 شهور تقريبا والله ما كتب لي احمل لين الحين
انا الحمدلله راضيه واحس انها خيره من رب العالمين
بس ...

ريلي امس رد من عند ولد خالته وهو زعلان ومضايق وايد سألته شوفيك قالي بنت خالتي الي عرست عقبنا بشهرين حامل
يقولي انا فرحتلها وايد واتمنا ان الله يتمم لها على خير
بس خاطري في ياهل ابا اكون ابو

طبعا تميت اقوله ان هذا قضاء الله وقدره واحنا تونا امعرسين وهالشي طبيعي
واذا تبا ترتاح خلينا انسوي فحوصات عشان ترتاح ونتأكد

بس الموضوع شاغل باله وايد
ابصراحه ما كنت متوقعه ان يتأثر بخبر حمل بنت خالته الي عرست عقبنا بشهرين


انصحوني شو اقول والا شو اسوي

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[اسيرت شوق]

اربع شهور وهذا كلامه الله يرحمنا

على شو العجلة الخير بالدرب ان شاء الله يمكن تكونين هالشهر حامل ولا عقب كم شهر تحملين توكم معاريس يعني عادي جدا
واذا هالقد مستعجلين روحوا سوى فحوصات واطمنوا اكثر

[شهد123]

حبيبتي توكم معرسين والخيره فيما اختارها الله قوليله لعله خير انه الين الحين ما صار حمل ومثل ما قالت اختية اسيرت الشوق يمكن ع هالشهر والا الي عقبه تحملين وربي يرزقكم الذريه الصالحه يارب ويفرح قلوبكم وبالنسبه لفرحته عشان بنت خالته دايمن جذا الرياييل ان صار وحد من الاهل حملت وهي معرسه عقبهم يغارون وفيه حد عادي بس الريال بطبعه يخاف حد يعايره او يعاير حرمته وهو ما يحب انه حد يزعله والا يزعلها..
اذا لهاي الدرجه متضايقين سيروا سووا فحوصات ..
موفقين عزيزتي..

[راعية الغنم]

كثري من الاستغفار

[Ch3nel]

الله يسعدكم ..

[غروري جاذبية]

ياللـه ما وحالكم أنزين تستأنسون بالعرس وعقب كل شيء أيي منن اللـه حياه اللـه

أنا حملت عقب العرس بـ 6 شهور واحس أني أستعيلت وإيد ..

[الامل88]

سوو فحوصات حبيبتي احسن لج وله مش انتي وحدج
والله يرزقكم الذريه الصالحه

[lailee]

ليش الاستعيال ما عليج فديتج لا اتضايقين بعمرج وخبري ريلج لا يضغط عليج نفسيا لانه النفسيه الها دور بالحمل وان شاء الله خير والله بيرزقكم ان شاء الله سوي فحوصات لو تبين تتأكدين وطمنينا عليج

[ضحيه زماني]

ويه ريلج وايد مستعيل توكم 4 شهور روحي اطلعو استانسووو اتعرفو ع بعض اكثر
انا بعد سنتين زواج الحين حامل قوليله عيل شو تقول عن الحريم الي يحملون ب 10 ولا 15 سنه ؟؟. قوليله طول بالك المشوار جدامنا
والله يرزقج يارب

[3yoon 3lya]

هالشي عادي أختي لانج توج عروس انا حميتي بعد 7 شهور احملت كل حرمه غير عن الثانيه وبعدين انتي بعدج عروس ليش يعني يضايج احس ماله دااعي فيه حريم بعد سنه وفيه اللي بعد 4 سنوات انتي سنه ما كلمتي اخذوا الامور ببساطه

[ريحه المسك]

الله يرزقكم حبيبتي عاجلا غير اجل ياا رب ...

[فتاه صابره]

وعليكم السلام والرحمه

احس الموووضووع عادي ومب مستاهل للضيج اربع اشهر تعتبر من ضمن الاشهر الاكثر سعاده لزوجين ويستانسو فيها مايفكرو بحمل ولاغيره سبحان الله

ربي يعين

[زم_قمر_ان]

اهم شى انتى لا تبينى له انج زعلانه ولا تحاتين الموضوع ابد

عيشو حياتكم وخبريه ان هالايام ما راح تتكرر

لان يهال مو لعب وبوس بس

سهر وصياح وحشره

[letter_S]

اذا تحسين انه وايد يحاتي سووا الفحوصات انتي وهو
بس شخصيا اشوف موول ماله داعي توكم معاريس 4 شهور شوي!

[نونة الدلوعة]

4 شهوور شوية
هو ليش مستعيل
قوليله سبحان الله إن ربج ما كتب لج هالحمل ألحينه عسب تستانسون بحياتكم
سافروا واستانسوا ومتى ما ربكم راد لج الحمل بيكتب لكم بإذن الله

لازم الصبر
لا تستعيلون على الشي قبل أوانه

وربي يرزقج بالذرية الصالحة وتفرحين ريلج بالحمل في القريب العاجل ^^