إمنوه ولدت بعمليتين قيصريتين وولدت طبيعي بالثالث

**mono22** · 2012-05-10, 15:53

السلام عليكم ورحمة الله وبركاته
كيف حالكن خواتي
خواتي أنا إمربية بعمليتين قيصريتين والحين أنا حامل ( للعلم حملت بسرعة بعد العملية الثانية ب 6 شهور) وحابه أولد طبيعي مع إنه كل الدكاترة قالولي مستحيل أربي طبيعي ، فحابه أسأل إمنوه ولدت طبيعي بعد عمليتين وشو سوت يوم ياها الطلق هل إتأخرت عليهم وإلا راحت المستشفي على طول ، أو شربت شي علشان يسرع الولادة
بليييز خواتي إلي مرت بهذه التجربة يليت إتفيدني
ومشكورات خواتي

المزيد من آخر المواضيع من نفس القسم:

**mono22** · 2012-05-11, 15:16

معقولة ولا رد وينكن خواتي
إلي ما تحب تكتب في العام إطرشلي عالخاص

**هزووفه** · 2012-05-11, 15:28

هلا الغالية

انا اعرف جم من حرمة ربن طبيعي عقب العملية

اذا انت من دبي او تقدرين تسيرين دبي

سيري عند الدكتورة زينب واااايد زينة وتفيدج وااايد واذا الياهل معترض بتسويلج مساج عشان تنزل الراس وتربين طبيعي

هاي الدكتورة جديمة امهاتنا كانن يتعالجن ويربن عندها ما امدحها لج مني والدرب

امسات حرمة اخو ريلي سارت عندها وسوت الها مساج عدلت راس الياهل على تحت

والله ايسرلج الغالية

**mono22** · 2012-05-12, 15:08

مشكورة أختي أنت تقصدين زينب الشنار وإلا وحدة ثانية

**ليندااااا** · 2012-05-12, 17:37

الله يسهل عليج الغالية

**طيف الغربة** · 2012-05-12, 17:46

الي اعرفه فديتك انه صعب طبيعي بعد القيصريتين ., لكن الله كريم

ربي يسهلها عليك

**مونتاج** · 2012-05-12, 17:48

تقومين بالسلامه ان شاء الله

**شخصية هامة** · 2012-05-12, 17:51

انا بعد ابي اعرف اذا وحدة يابت طبيعي بعد عمليتين لان انا نفس الشي حامل بالثالث وقبل عمليتين ابا اجرب الطبيعي هالمرة ان شاء الله

**الدنيا فداك** · 2012-05-12, 23:01

خواتي جزاكم الله خير لاتجازفن امس خبروني عن وحده مربيه مرتين قيصري والثالث حبت انها تربي طبيعي والدكاتره قالولها مايصير خلاص بعد العمليتين لازم قيصري وسبحان الله ماسمعت الكلام وعندت الله يهديها وآخر شي مات البيبي قبل ماتولده أتقن الله في ماعطاكن والانسان مايعرف وين الله كاتبله الخير والله يسهل عالجميع

**هزووفه** · 2012-05-13, 09:22

هي هندية بس ما ادري اذا اسم عايلتها الشنار

**LoOveNisTa** · 2012-05-13, 11:00

السلام عليكم اختي ..

اللي انا اعرفة انه مستحيل اللي مربية قيصريتين تربــــي طبيعي ..
لاكن بعد القيصرية الاولى تربي طبيعي ...! ممكن وكذا وحدة اعرفها الله يسر لها وربت طبيعي ..

*وبعد اختي انتي حملتي بسرعه وهالشي خطر على صحتج على اغلب الدكاترة يقولولج ان العملية مابرت من الداخل يبالها على الاقل سنة ..وبعد كيف بيخلونج تربين طبيعي وعلى وضع القيصريتين لان لو ياج الطلق وانتي تبين تطلقين مابتقدرين لان ضغط الخياطة الداخلية وبالتالي لو تميتي تسوين هالشي بتتمزق الخياطة وبتعرضين حياتكم للخطر الشديد اللذي يؤدي للوفاة ( بعيد الشر عنكم يارب والقارئين ) ربي يحفظ الجميع ان شاء الله ..

اتوكــلي على الله .. وهو اللي بإيدة كل شي ..( كُــنّ فيَكـــونَ )

**مهرووووووه** · 2012-05-13, 14:23

اللي اعرفه انه بعد عمليتين قيصريتين صعب الطبيعي

**أنا بدر البدور** · 2012-05-13, 16:16

المشاركة الأصلية كتبت بواسطة هزووفه

هلا الغالية

انا اعرف جم من حرمة ربن طبيعي عقب العملية

اذا انت من دبي او تقدرين تسيرين دبي

سيري عند الدكتورة زينب واااايد زينة وتفيدج وااايد واذا الياهل معترض بتسويلج مساج عشان تنزل الراس وتربين طبيعي

هاي الدكتورة جديمة امهاتنا كانن يتعالجن ويربن عندها ما امدحها لج مني والدرب

امسات حرمة اخو ريلي سارت عندها وسوت الها مساج عدلت راس الياهل على تحت

والله ايسرلج الغالية

معرووف اصلن المسااج الي ينزل راس البيبي تحت يخلي البيبي غبي او مب طبيعي ..
انا اعرف حرمه كانت دوم تروح لامي وكانت حامل وراس البيبي فووق سوت مسااج وربت طبيعي بس الحين بنتهااا غبيه وما تفهم بسرعه..

وحرمة اخوي لما كانت حامل ف بنتهاا كان رااسها فووق والدكتووره حذرتهاا من انها تمسح وربت بقيصريه ..

هاي نصيحتي لكل وحده تفكر تمسح ..

والله اعلم ..

**درب الوله** · 2012-05-13, 17:31

هلا حبوبه ^__^

انا طبيبه عائله حبوبه وبجاوبج..

اختيه السبب انه ما يخلونج تربين طبيعي انه بعد ثاني عمليه قيصيريه خصوصا اذا حملتي بسرعه وخلوج تربين طبيعي بيستوي تمزق عندج في الرحم.. لانه الرحم والطبقات اللي عليه تحتاج ع الاقل 6 شهور الى سنه لتلتحم..

اختيه ما انصحج ابدا ترفضين القيصيريه وتتريين الطلق وتتاخرين عليهم.. لانه لو صار تمزق في الرحم لا سمح الله بتيصر لج مضاعفات كبيره..

وخواتي يزاكم الله خير.. ارجع واقول.. فيه اسئله ما فيه مجال تطلبين فيها اراء العضوات وكل وحده تقولج تجربه جارتها وتجربتها.. بارك الله فيكم هذه فيها حياه موت .. فيها صحتج وصحه طفلج.. كيف تجازفين و تخالفين اراء الاطباء وتطلبين اراء عضوات اغلبهن مالهن اي خلفيه طبيه؟؟ فرجاااء خواتي اذا انتي ما ارتحت من راي طبيبه تروحين لطبيبه ثانيه وثالثه.. ولكن ما تسالين جارتج او ربيعتج.. لانه الطبيب هو الاقدر على اتخاذ مثل هالقرارات.. واذا خذتي براي عضوه من العضوات وطلع رايها غلط و صارت لج مشاكل منو بتلومين؟؟ اول شي بتقولج هالعضوه" والله انتي طلبتي رايي وانا عطيتج ومب ملزومه تاخذين فيه".. فراعوا المواضيع اللي تطرحونها..

والسموحه من الجميع.

**درب الوله** · 2012-05-13, 17:37

السموحه توني اشوف الرد اللي قبلي..

حبوبه ما فيه دراسه تقول انه مسح راس الياهل عشان ينزل تحت يسبب الغباء.. فرجااااااء رجاااااااء تاكدوا من معلوماتكم قبل لا تحطون اي معلومه خواتي.. و" رحم الله امرئ عرف قدر نفسه".. مب متاكده من المعلومه؟ الاحسن ما نحطها عشان ما ننشر شي غلط ^__^

الموضوع: إمنوه ولدت بعمليتين قيصريتين وولدت طبيعي بالثالث

أدوات الموضوع

عرض

إمنوه ولدت بعمليتين قيصريتين وولدت طبيعي بالثالث

المزيد من آخر المواضيع من نفس القسم:

المواضيع المتشابهه

تجمع يديد و حصري للمسويين قيصريتين و يبون يولدن طبيعي

سمعتو عن وحدة ولدت طبيعي بعد قيصريتين أو صار لها إنفجار

منو قالولها عندها ضيق فالحوض وولدت طبيعي؟؟

مين تعرف وحدة ولدت قيصريتين و الثالث طبيعي