اختي فهمتني غلط واستوت مشكله فبيتها2

**Al3'wya** · 2012-04-21, 23:25

السلام عليكم

شحالكن خواتي ؟

هذا راابط موضوعي الاول للي ماقروه

http://forum.uaewomen.net/showthread.php?t=1044424

بس حبيت اقولكم انا بس خبرت ولدها وخبرتها هي ان بنتها رايحه المول بس ماخبرت ريلها لانه هو بالاساس كان رايح المول وشافها يعني انا ماقلتله وكل الموضوع صار صدفه لا غير

طبعا الوالد عصب عليها لان تصرفااتها بدت تتغير واستوت لا مباليه لا لبيتها ولا لعيالها حتى مستواهم الدراسي نزل وقامت تهتم بمظهرها اكثر من عيالها المهم الوالد حلف عليها ترد لريلها وتبعد عنها الوساوس لانها هي مربتني من يوم ما توفت الوالده وتميت معاها فالبيت لين كملت ال11 سنه وطبعا هي رجعت وانا طول الفتره اللي هي فبيتنا كنت قاعده فبيت اخوي عشان ما احتك فيها او في بنتها واول مارجعت بيتها رجعت بيتنا وكان كل شي اوك المهم من اسبوع خطيبي يقول لابوي انه تصرفاتي مب طبيعيه وكله اجذب عليه طبعا الوالد عصب وهزبه وقاله بنتي ما تسوي هالسوايا وهو عصب وكل ما ادقله يسكر فويهي واسكت ماقول لحد
واستغربت اسلوب اختي قامت وايد ادقلي وتسال عني وعن خطيبي وشو اسوي وما اسوي ودراستي وغيره وانا ارد عليها عبالي الموضوع عادي اخت تسال عن اختها الين ما انصدمت بعد يومين ان اهل خطيبي قالو لبوي ان خلاص بيفجون الخطبه وكل واحد فطريجه طبعا انا زعلت وصحت بس قلت الحمدلله ع كل حاال بس لما سالهم ابوي عن السبب قالو ان امه ما تباني لسبب خاص وسكتنا قلنا ماعليه بس انصدم فاخر الاسبوع ان ريل اختي يقولنا ان اللي كان خاطبني دق ابوه عشان يخطب بنته وهو شال الفكره من راسه بس اختي تباه يوافق باي طريقه طبعا الوالد سكت عنه قاله بنتك وانت ادرى بمصلحتها بصراحه انا كنت مضايجه يعني ليش جي صار بس قلت خيره من الله المهم باصرار من اختي حددو موعد الملجه يوم الخميس اللي فات وكان في حفله بالليل طبعا انا رحت لانها بنت اختي ولازم افرح لفرحتها بس اختي كانت تقول لا تيين وبتتحسسين ومن هالكلام بس الوالد واخواني كانو مصرين احظر المهم رحت من العصر بيت اختي عشان ارتب معاها البيت واالاغرااض والوالد يالس فالصاله يتقهوى ودشت علينا ام خطيب بنت اختي ييت بسلم عليها درزتني قالت لا تقربين صوبي قلتلها ليش انا شو سويت قالت انتي راعيه سوالف وتطلعين من ورا اهلج وتقصين عليهم وفونج متروس شباب وانا منصدمه من اللي تقوله قلتلها اسمحيلي كل اللي قلتيه عني غلط واللي وصلج اياه غلط انا بنت ناس ومربيني احسن تربيه قالت هي مبين حتى اختج تتشكى منج طبعا الوالد عصب وقرر يرد عليها قالها شو قالت اختها قالت ان اختي قالتلها اني دوم اطلع من ورا اهلي وارمس شباب من وراهم وما احترم حد والله الكلام شل لساني ماقدرت ارد العبره خانقتني ماعرف اصيح عالكلام اللي تقوله لي او اصيح على ظلم اختي لي طبعا الوالد قعد يرد عليها عقب دش ولد اختي واخوي وخطيب بنت اخوي عقب كبرت المشكله وتيمعو الرياييل من العايلتين واختي مع بنتها فالصالون ماتدري شو اللي يصير يت حرمه اخوي وودتني الصاله الثانيه وانا احس بخنقه والله كنت احس ان روحي تطلع اختي وتغدر فيني وعشان بنتها والله مب مستوعبه اللي صار ليومي هذا تخيلو يت هي وبنتها وقعدت تقولهم انا ما قلت هالكلام ام خطيب بنتها الفت هالرمسه واستوت ضرابه بينهن وبنتها تصيح عقب عمي قالهم خلاص لاشي حفله ولا هم يحزنون كل واحد يروح بيته وبنحل الموضوع بينا طبعا الوالد كان تعبان ومتلوم فيني يت اختي وسوت عمرها هي المظلومه وقعدت تصيح وقالت انا حديتها اسوي هالشي لان ريلها عرف بسوايا بنتها وهي كانت بتادبها بس مب الحين عقب بس عقب ماتدري متى وبعدين هي غارت لما شافتني ويا ريلها عبالها اني بخليه يطلقها وانا باخذه فعشان جي بدت تقول عني كلام غلط وتخلي خطيبي حق بنتها والله حسيت سجاجيين بصدري مب جنها اختي اللي ربتني حسيتها انسانه ثانيه ماعندها مشاعر غدرت فيني عشان بنتها ما تتعاقب على غلطتها اخوي كان بيضربها بس اخواني مسكوه قاللها كيف سويتي فيها جي وهاي يتيمه وانتي اللي ربيتيها حساافه خليناها عندج لين كبرت ياريتني ربيتها بايدي ولا خليتها بايدج طبعا استوت مشادات مابين اختي واخواني وحريمهم وريل اختي وفالاخير الوالد صارخ وقال كل واحد على بيته وقال انا متبري من بنتي وبنتها بس باقي عيالها هم عيالي وريلها مثل ولدي اختي طاحت ع ريله تبوسها بس قام عنها وطلع ورجعنا البيت محد منا ياه رقاد والوالد كل شوي يقولي سمحيلي يابنتي خليتهم يجرحونج وانا امسك عمري بالغصب جدامه مر امس على خير بس اليوم يا اخوي من بوظبي معصب علي ويبا يضربني على فكره هذا اخوي بعيد عنا ومانشوفه الا مره فالشهر وماحضر الملجه طبعا اخواني مسكوه والوالد عصب عليه قال شو بلاك عليها رد وقال ان بنت اختي دقتله وقالتله اني خربت ملجتها والخ من السوالف اللي نسجتها من خيالها واخواني مسكوه وفهموه الموضوع والله احس من الصياح عيوني بتطلع والله حرام يجرحوني كل شوي اخوي يا يعتذر لي بس ما اقدر اشوفه وماابي اشوفه احس بخنقه وصرت اخاف يضربني والله من ساعه ماهجم علي لين الحين ما طلعت من الغرفه احس برعب احس كل ما افكر اني افتح باب الغرفه بتيني مصيبه ع رااسي وارجع اقول خلاص بقعد ما بطلع لو شو ما يكون

خواتي بليز قولولي شو اسوي والله انا مجروحه ومقهووره وتعبانه نفسيتي ومااعرف شوو اسوي

ابا نصيحتكن الله يخليكن

المزيد من آخر المواضيع من نفس القسم:

**جمالي دلع** · 2012-04-21, 23:51

الله يعينج و يعاونج يارب

باقولج شي حبيبتي عن موضوع بنت اختج مفروض انج على طول تكلمين اخوها يمسكها

و تقوليله ان لا ادخلني ف الموضوع بس من خوفي عليها

ثانيا عن موضوع خطيبج قولي الحمدلله الله فكج منه هذا مب كفو اللي كلام اهله يودونه يمين و يسار

و هم ناس مو مال زواج اللي كلام اختج قدر يغيرهم عليج

ثالثا اختج الله يسامحها دنيا و اخره على ظنها فيج

و على انها خربت حياتج الزوجية

تبين انصحج نصيحة !!

اقسم بالله انها بتثلج على صدرج اكثر من ردي و ردود البنات

صلي قيام الليل و كل الكلام اللي ف قلبج من ظلم و قهر قوليه

كانج تشكين لاحد اشكي لربج و فضفضي

و ادعي الله يهون عليج و يعوضج

والله العظيم لا بتحتاجين تكتبين موضوع ولا تطلبين حلول من احد

و عن اختج و عايلتها خليهم برايهم لا تدخلين فيهم كلش كلش

عيشي حياتج و وكلي امرج لربج

استغفري وايد

و قولي اذا امسي ضيقة باجر فرحة باذن الله

و صدقيني الله بيعوضج ان شاء الله

و نصيحة خلو كل هذا بينكم وحاولو ما تقولون لفلان و علان عشان الكلام كل ما انتشر كل ما الاشاعات كانت اكبر خخخ

الله يسعدج و يفرج همج و ينولج كل خير

**مون 55** · 2012-04-22, 00:02

اكثري من الاستغفار ربنا يفرجها عليج .............

**الأحلام الملونة** · 2012-04-22, 01:00

اللهم أسألك العفوا والعافية

اللي سار سار انظر للأمام كون الوالد الله يطول بعمرة معك وأخوانك الله يحفظهم لا تهتمي بآحد آخر

وبنسبة لأختك وبنتها وكلي أمرها لله والأيام تداوي الجراح

أهم شيء بنسبة لك بات مظلوم ولا تبات ظالم تقربي لله أكثر لا يفرج الهم غيرة وهو خير معوض

ونصيحة لا تفكري كثيرا بما حدث يمكن كل اللي صار خير لك بل أكيد خير لك عسا تكرهوا شيء ويجعل الله فيه الخير الكثير

ما أدري هل أنت طالبة أو تشتغلي المهم أهتمي بمستقبلك والله يعوض عليك بزوج صالح

والصراحة ما كان فى داعي تذهبي لملكة بنت أختك !!!!!!!!!!!!!!!

الحين أختصري أختك وبيتها وخلي علاقتك فيها من بعيد أفضل لعل يصلح حالها وحال بيتها وأدعي لها أفضل

**طيف الغربة** · 2012-04-22, 01:15

حببتي يمكن الي صار فيه خير لك انظري له من زاويه اخرى

واهم شيء الوالد متفهم لامرك نصيحتي اكثري من الاستغفار والدعاء ووكلي امرك لله وانسي كل الي صار صفحة واطويها

والله بيأخد لك حقك من كل من ظلمك

**x.maitha.x** · 2012-04-22, 01:41

صلي قيام الليل وادعي ربج الله يفرجها عليج وياخذ حقج
ويعوضج بالاحسن وبأذن الله بتنفرج

**مشاعر مبعثره** · 2012-04-22, 02:33

انا انصدمت من الموضوع

ربي يسر لج امرج ويحفظج

ويصبرج ويعوضج باحسن عنه وعن اختج

الله يسامحها

**قارورة العسل** · 2012-04-22, 02:52

ربي يوفقك ان شاء الله ويرزقك خيرا منه يارب

**&شموخ انسانه&** · 2012-04-22, 03:06

حسبي الله ونعم الوكيل على كل ظالم

**Ms anime** · 2012-04-22, 04:28

و الله حطيت نفسي مكانج و حسيت فيج , ما علي فديتج اللي بغت اختج انقلب عليها هي وبنتها و الف الحمدالله ان الله كشفهم وبين حقيقتهم لو ما رحتي الملجة كانت الناس ما راح تعرف ان الكلام اللي طلعته اختج عليج كله جذب بجذب ,ما عليه اختي الله يبعد عنج الشر ويرزقج بواحد احسن يصونج هب شرات اللي راح , وربج راح يجازي البنت و امها

**ام مـ2003ـايد** · 2012-04-22, 04:31

معقوله في عالم جيه

فديتج حمدلله انتي مظلومه ودعوتج انتي المجابه مب اختج

**LéNoura** · 2012-04-22, 05:57

على الاقل انج مظلومه و حسبي الله ونعم الوكيل تكفي ..
صلي ركعتين وقري قرآن وسالفه خطيبج خيره لج ..
والخيره في ما اختاره الله .. وعن اختج وبنتها ماعرف شو اقول
غير الله يهديهن ويندمن بس ..

**مهرووووووه** · 2012-04-22, 07:42

معقوووله في اخت بهالطريقه!!!!

الله يعييينج ويعوضج خير

**كرزه صفرا** · 2012-04-22, 10:06

حسبي الله علييييييييهاا هاي مب اخت

حشى بالله ادعى ان الله يطول بعمر ابووج وبعطيييه الصحه والعااافييييه لين ما الله يرزقج ريل

يكون لج سند

**حصوووه** · 2012-04-22, 11:35

ماعليج خلاص عيشي حياتج والله وانسي الريال اللي ودرج عشر غيره ومايستاهل واختج وبنتها الله يهديهم وياخذحقج منهم ومع الايام بتنسين

الموضوع: اختي فهمتني غلط واستوت مشكله فبيتها2

أدوات الموضوع

عرض

اختي فهمتني غلط واستوت مشكله فبيتها2

المزيد من آخر المواضيع من نفس القسم:

المواضيع المتشابهه

اختي فهمتني غلط واستوت مشكله فبيتها

مشكله اختي والروايح

مشكله اختي بس ابا النصيحه

مشكله اختي مع بخل زوجها