تجربتي مع ابرة الظهر

**امنشفة ريجه** · 2011-02-15, 03:13

السلام عليكم

بما ان الكل يسأل عن ابرة الظهر ومع تزايد الحوامل في طلب أخذها.. حبيت اكتب عن تجاربي مع الابره

طبعا هناك الكثير من المواقع اللي تشرح ماهي الابرة هذه ومحاسنها ومساوئها.. فقلت ادخل في الموضوع على طول

في ولادتي الاولى: أخذت الابرة وكان فاتح عندي 5 سنتي.. الوقت الانسب لأخذها.. وخزة بسيطة مثل اي ابرة عادية.. عطوني مخدة احظنها علشان احني ظهري وما اتحرك ابدا اثناء تدخيلها.. مهمة بسيطة وعدت....بعد ادخال الابره وانبوب القسطرة طبعا.. لزقوا المنطقة بلزق .. وانتهينا..خفت عني الآلام حوالي 80% .. كنت اسولف ويا زوجي و الدكتورة والممرضات.. ولما يت اللحظة الحاسمة قالت ليالدكتورة: "يالله ادفعي" قلت لها "انزين..بس بسألج انتي من وين في مصر؟؟" قالت لي: ركّزي يا حبيبتي دي الوقتي وبعدين حنبقى نتكلم" .. دفعتين وطلعت بنتي فديتها.. طبعا الابره خوّزت الالم بس ما منعت احساسي بالدفع لأن الجرعة كانت 7 مللي.. احساسي بالدفع كان بالضبط مثل احساس الاسهال (وانتو بكرامة) يعني مب مؤلم.

ولادتي الثانية: خذت الابره وكان فاتح عندي 6 أو 7 (كان طلقي حار وسرييييع) الكل نصحني ان مالها داعي لأن الطلق سريع وبتربين بسرعة.. بس ما رضيت لأن "اللي ايده في الماي غير عن اللي ايده في النار" .. وهذا قراري! كيفي!! المهم، عطوني جرعة ال 10 مللي مع اني طالبة 7 مللي بس.. قالوا اونه لان انقباضاتج قوية وما بيخف الالم الا اذا جرعة الابره 10 مللي... انقهرت عليهم وايد ..لأن راح عني الالم مول .. والله بنسبة 100% ولا كأن فيني ولادة!! كنت احس بالياهل يتحرك في بطني واسمع نبضاته من خلال الجهاز ..بس! ولا كأن ولادة... ما ارتحت للوضع .. قالت الدكتورة يالله ادفعي .. قلت لها ما احس بشي كيف ان شاء الله ادفع؟؟ طلبت تخفيف الجرعة ل 7مللي وفي خلال ثواني حسيت باحساس الاسهال وانتو بكرامة وولدت الحمد لله ..

الدكتورة الثانية (غير عن اللي ولدتني اول مرة) قالت لي: انتي ماشاء الله من وين عرفتي هالتفاصيل بخصوص الجرعات وجيه؟ قلت لها: معظم اهلي دكاترة

ولهذا السبب تشوفوني واااااااااااااايد اسأل وادقق واوسوس بعد.. اكثر عن الشخص اللي ما يعرف!

وبالنسبة للاعراض الجانبية.. شخصيا الحمدلله ما حصلت لي اي آثار جانبية.. مع ان في ولادتي الثانية كان وزني زايد بصراحة..وايد!

وللعلم .. انا ربيت في مستشفى الوصل في دبي.. وبعد حبيت اخبركم ان هيئة الصحة في دبي مشددين على اقسام التخدير بان كل طاقهم لازم يكون على درجة كبيرة من الكفاءة والخبرة.. حكومي وخاص..

وهذه تجربتي وان شاء الله الكل يستفيد .. واللي محتارة.. ترتاح ووتتوكل.. وفي النهاية الخيرة فيما اختاره الله... واللي مترددة، تستخير.. والله يسهل على الجميع

المزيد من آخر المواضيع من نفس القسم:

**امنشفة ريجه** · 2011-02-15, 03:18

معلومة: نسبة الجرعة لابرة الظهر تبدأ من 1 مللي لين 15 مللي (وهذه اعلى جرعة يعطونها للقيصرية فقط) فنسبة 7 وايد مناسبة لأنها تخفف الالم بس ما تمنع الاحساس بالدفع

ويفضل اخذ الابره لما يكون الرحم فاتح 5 سنتي.. مع ان في ولادتي الثانية خذيتها وانا 6 أو 7 سنتيمتر وايضا أدّت الغرض

*** جرعة ال 7 مللي لين اظني ال 10 مللي تخليكم ترومون تمشون عااااااادي وتنتقلون من سرير الولادة لين السرير النقال اللي بيوديكم الغرفة.. وبعد ما بتحسون بأي شي اثناء الخياطة

**اسرار الطبيعه** · 2011-02-15, 03:19

تشكرين الغلا ع عرض تجربتج

الله يسهل علينا

**USA Online** · 2011-02-15, 03:23

كل الشكر والتقدير

للمجهود الرائع والمتميز

موضوع اكثر من رائع

تقبل تحيتى وتقديرى

***أم فارس*** · 2011-02-15, 03:28

بصراحه عن نفسي

مابجربها

اخاف

اذا صارتلي اثار جانبيه ؟!!

اخااااف

**وردة الدار** · 2011-02-15, 03:37

عيل انا تجربتي مأساويه ويا ابرة الظهر .... اسمحيلي اقولج اياها باختصار ... انا اربي دوم في مستشفى الكورنيش في بوظبي
في ولادتي الاخيره طلبت ابرة الظهر لأن الطلق كان وايد حار وانا في البدايه وبصراحه انا ماعرف شي عن الجرعات ... وما كنت اعرف النفس كم سانتي فاتحه..
المهم عطوني اياها والالم كله خاز ولا جني بربي ,,, وعقب فتره من السوالف والوناسه خففو الجرعه عشان خلاص لازم اسوي بوش بس مادري لين كم خففو ... الي اعرفه انه الويع رد مثل قبل وأخس لاني خلاص كنت 10 سانتي ...ولا جني ما خذه ابره وهلكت ومت وحييت لين ربيت ....
والصراحه تندمت اني خذيتها لأني ما ستفدت منها موووووووووووووووول.

وبالنسبه للآثار الجانبيه ماستوالي ولا شي الحمدلله

**امنشفة ريجه** · 2011-02-15, 04:12

*أسرار الطبيعة*
العفو والله يسهل عليج يا ربي

usa online
العفو .. شكرا على ردج الرائع والمميز

*أأم فارس* : بكل بساااااطة، لا تأخدينها!

*وردة الدار*: علشان جييه أفضل أن الحامل تتثقف ويكون عندها معلومات طبية،، ما بيرومون عليج الدكاترة أبدا!! عطوج جرعة كبيرة في الوقت الغلط وخففوها أيضا في الوقت الغلط! بس الحمدلله ما يتلج أي أعراض جانبية ... لله الحمد (حرام عليج وصفتي التجربة مأساوية وهي مجرد غلط في تقدير الجرعات!!)

**عين الدماني** · 2011-02-15, 07:54

تسلمين غلايه لطرحج هالتجربه لأن أكيد وايد استفدنا وربي يسهل علينا

**ميمي ^^** · 2011-02-15, 08:28

للحين يالسه اتناقش ويا ريلي على سالفة الابرة

ومشكوورة على تجربتج اللي فتحت عيني على اشياء مهمة ^^

**تسونامي** · 2011-02-15, 09:01

يعطيج العافيه الكل يمدح في ابره الظهر وانا افكر اني اسويها لاكن مب للولاده لما بعد

للخياطه تجميليه ممم يعني كم يبيلها جرعه ؟؟

وخااايفه ومتردده الله يستر............ومشكوره ع المعلومات يعطيج العافيه

**جرح وحداوي** · 2011-02-15, 09:07

اممممممم,,,ملقووووووفة..

ربي يسسهل علييكم ..

**رآحت أيامك ,** · 2011-02-15, 09:36

ابا اخذها يا ناس والله ابى اخذها بصيح

ريلي يقول مابوقع لاي ورقه لو تبين ابره الظهر

وهقني

بصيــــح

مابى اربي

**ملكة الاحاسيس** · 2011-02-15, 09:50

بولادتي الاول. كانت الجرعه مخففة اظن لني كنت احس حزة البةش ...لكن الثانيه صراحه مارتحت للوضع الظاهر زودو الجرعه اختمال كانو خايفين يحولوني قيصري لن الحبل ملفوف عالرقبه بس واااايد تضايجت من شي واحد مول ماكنت احس بشي عقب ماكنت احس تفقدين الحماس

**امنشفة ريجه** · 2011-02-15, 18:09

*عين الدماني* و *ميمي ^^*
العفو.. والله ما سوينا شي

والله يسهل عليكم يا رب

*تسونامي*:
ما بيعطونج اياها للخياطة.. مب مستاهلة السالفة.. اذا تحاتين الخياطة بس، في ابرة بنج موضعي تاخذينها.. وما بتحسين بالغرز.. اما الابره هذا فتعطى لتخفيف ألم الولادة لأن مافي مثله ألم بصراحة.. وألم الخياطة هو "نقطة في بحر" ألم الولادة

*جرح وحداوي*:
الله يرزقج الزوج الصالح عاجلا غير آجل ويسخره لج يا رب

*راحت أيامك*:
ما تحتاج توقيع الزوج

وييييه أخاف أتسبب في مشكلة بينج وبينه... أنا طلبتها من يوم كنت في الشهر الثالث للحمل ووقعت على الورقة... طبعا ممكن الوحدة تغير رايها وقت الولادة اذا ما حبت.. المهم انها ضامنة توقيعها وطلبها للابرة قبل بمدة علشان وقت الولادة يكونون جاهزين لج.. مب يالله بسرعة بسرعة! والله يسهل عليج ان شاء الله

*ملكة الاحاسيس*:
الظاهر فعلا زودوا الجرعة لين 15 علشان كانوا بيهيئونج للقيصرية.. بس فاجئتيهم بالولادة الطبيعية

يعني صار شي غير متوقع! والحمدلله على سلامتج وسلامة البيبي

والله يسهل على الجميع يا رب

**امنشفة ريجه** · 2011-02-15, 19:47

واللي عندها أي استفسار أنا حاضرة

الموضوع: تجربتي مع ابرة الظهر

أدوات الموضوع

عرض

تجربتي مع ابرة الظهر

المزيد من آخر المواضيع من نفس القسم:

المواضيع المتشابهه

ابرة الظهر

تجربتي مع ابرة الظهر =(

ابرة الظهر

ابرة الظهر ,,

ابرة الظهر