~::~ مــذكــرات شــعــري (موضوع متجدد) ~::~

[sh27]

شان ترد علي أنثى غيور:

شين ما ادري ليش المسمار انا وحده مغربية عطتني الخلطه .. بس ما يأثر على الريحة .. يعني يوم احطه ريحة الحلبه تكون طالعه ^_^

شان اقوللها:

هلا الغالية.. تدرين.. ما ادري بس احس يوم نعقص شعرنا نعطيه حنان

متخيلين كيف؟؟ أمسك خصلات شعري و اعقصها برقه و حنان و انا اطالعها في المنظرة!!

أحس لو الشعر يتكلم شان قال : "أحب دايما تعقصيني ^_^"





النرجسية.. ما تحسين وايد على شعرج تغسلين يوم هيه و يوم لأ؟؟ يعني بيطلع تقريبا 4 مرات في الاسبوع؟؟؟

أحس وايد.. و لا انتي مرتاحة جذا؟؟؟

انا عن نفسي اغسله كل 3 ايام.. و ما يبين انه دهني لأن الحنا عاطيه مفعولها مع اني من اسبوعين محنيتنه




بنات ما خبرتكم عن امس.. تراني قلت إني بحطي خلطة روب + زيت زيتون

حطيتها على الفروة مع التدليك.. و شو كانت باااااااردة على الراس و وااااايد منعشه

خليتها ساعة تقريبا عقب غسلت شعري بالشامبو عادي.. و شو طلع ناااااعم

عقب نشفت شعري نص نص و دهنت اطرافه بزيت الزيتون

و ان شاء الله بسوي هالخلطة كل اسبوع لين العيد (مع انه ما باقي شي.. تقريبا اسبوعين و شوي)

و بخبركم بكل جديد

في نفس اليوم الاخت الشوق شاركتنا في التجمع و قالت:

السلام عليكم ورحمة الله وبركاته
ما شاء الله عليكم
حلو هالتجمع الرائع
^^

شعري من النوع الجاف

طريقتي الحاليه هي المره الثانيه وان شاء الله اكمل واستمر دام شفتها حلووة وزينه لشعري

وشفتها حلوه وعجبتني
اول شي ادهن شعري باي زيت اخليه ساعه تقريبا
ثم اغسله بالشامبوو

وبعدهاا احط روب مع اي زيت مثلا سمسم او جرجير او حبه سوداء او اي زيت تبينه

وحطها في شعري مده اقل عن ساعه (كا حمام زيت)

وبعدين اغسلها بالماي بس

هذي طريقه لي بعد الشامبوو اسويها لانها من عقب ماغسله بالشامبو ما يكون فيه الشعر حيويه ولا لمعان

وهالطريقه تعطيه حياه ^^

وان شاء الله استمر عليهاا يالله يارب تسهل علينا ^^

شان اقوللها:

هلا اختي الشوق.. معروف الروب بفوايده و طريقتج حلوة
الله يوفقج



* يوم الثلاثاء 2/11/2010 كتبت مذكرات شعري في تجمع الاهتمام بالشعر:

بناااات بخبركم عن أمس

أمس في الليل سويت خلطة روب + زيت زيتون

دلكت فروة الراس فيها زين.. و خليتها ساعة

عقب غسلتها بشامبو مخفف (شامبو و ماي ) اصلا ألحين كله اغسل شعري بشامبو مخفف .. جذا احسن

حبيت هالخلطة و قد ما اقدر بسويها كل ما ابي اغسل شعري... و الاهل يشتكون الروب بسرعة يخلص هالايام ^_^

بنات.. و انا احوط في يوتيوب و اشوف الاجانب و طرق عنايتهم بشعرهم.. لاحظت كمن وحدة يتكلمون عن "زيت جوز هند بس مب زيت"وااااااايد يمدحونه...هو قوامه يكون مثل الفازلين.. و اول ما تفركينه بين صبوعج يتحول لزيت

حبيته.. حتى وحده تقول: انا استخدمه كزيت للشعر.. كونديشنر.. مرطب للبشرة.. و حتى مرطب للشفايف !!

حبيته واااايد .. و تم في خاطري.. حد منكم شافه مني و لا مناك؟؟؟

هو جوز هند طبيعي 100% بدون شي.. يكون لونه أبيض و قوامه مثل الفازلين.. و ممكن يذوب في الحرارة المرتفعة

أتريا الجواب

عقب الاخت عيوز الفريج من هالتجمع قالت:

تعرفين يا شين 27 .. رمستج اثرت فيه .. يوم قلتي اعقص شعريه برقه وحنان
والحينه بحاول اهتم فيه اكثر وبعامله بدلع
وعلى طاري جوز الهند ... يمكن هو زيت ويمد تعرفين جو اوروبا بارد ..

و كان ردي:

حي الله عيوز الفريج

اخجلتيني الصراحة.. و الحمدلله انه كلامي يأثر ^_^

مع إني ساعات والله تيني حالة الله لا يبلاكم.. اكره شعري موووووليه و اعامله بعنف

و يوم امشطه و يكون متشربك أمشطه بالقو لين ما يتقطع

و اليوم الثاني يوم أشوف "آثار المعركة".. اقول يالله.. لهالدرجة انا قاسية؟؟ و اتندم و جذا و ارجع اعتني به و احبه و اشوف فيديوات الاجانب في الاعتناء بشعرهم عشان اتعلم كيف احبه

و عن جوز الهند.. اممم.. ما اظن.. لأنه يكون في Jar.. يعني مثل غرشة الجام بس صغيره و غطايته معدنية.. فلو كان زيت ما اظني بيعبونه في هالنوع من الغراش.. و لا شرايج؟؟



* يوم الاثنين 8/11/2010 شاركت بهالرد في تجمعنا تجمع الاهتمام بالشعر ^^:

اليوم (الاثنين) في الليل ان شاء الله بسوي روب + زيت زيتون

و باجر (الثلاثاء) بحني شعري ان شاء الله بخلطة حنا + شاهي حار + عصير ليمون + يمكن زيت زيتون شويه

امممممم... هذي خطتي لهاليومين ان شاء الله

و بستمر كل يومين على زيت الزيتون

الاسبوع الياي ما بدخل .. تدرون عيد و زيارات و ربشة ويا الاهل .. و مباركن عيدكم مقدما ^_^



* يوم الاربعا 10/11/2010 شاركت في كذا موضوع عن الشعر:

-في موضوع الاخت Dalooa7 بعنوان الحلبة
هاي كانت مشاركتي:

و انا بعد من كمن سنه سويت نفس طريقة اختنا اناناسة.. بس بزيت عافية مال الطبخ... و فعلا يابت نتيجة وياي و استانست فيها

بس يوم تركتها و رجعت لها بعد شهوووووور .. ما عطتني نتيجة

انتي جربيها كمن اسبوع.. إذا فادتج استمري عليها و الله يوفقج

-و في موضوع الاخت جورية2002 بعنوان تبين شعرج يطول بكمن شهر ادخلي وادعيلي (مجرب)
هاي كانت مشاركتي:

انا ويا كلام اختي طير الاحزان

إلي اعرفه انه مب زين نمشط الشعر و هو خرسان

لأنه يكون في اضعف حالاته

-وفي تجمع الاهتمام بالشعر كتبت:

السلام عليكم بنات

توني خلطت حنا + عصير ليمونه + ماي حار

الساعة 11 و نص ان شاء الله بحطها على شعري.. و بركز عالفروة اكثر شي و الجذور

و بغسلها ان شاء الله الساعة 5 و ربع الفير.. عقب بدهن راسي بزيت الزيتون

^_^



* يوم السبت 20/11/2010 كتبت في تجمع الاهتمام بالشعر:

مباركن عيدكم ملاك الروح و النرجسية و عيوز الفريج و كل الحريم و البنات

انا بصراحة بصراحة في فترة العيد موليه ما تصدقت ع شعري بزيت و لا دهان و لا شي

و صابتني حمى من يومين .. و الحين واااايد يتساقط شعري غامضني

ادري التساقط من الحمى .. و ان شاء الله يخف جريب

و عن العناية.. و مع بداية الدوامات باجر و استقرار الامور:

برجع ان شاء الله لزيت الزيتون

و لخلطة الروب + زيت زيتون كل ما تفيجت

و للتدليك و المساج للفروة

و القص في كل ليلة قمارية ^_^ (اليوم السبت 20/11 في الليل بقص اطرافه ان شاء الله )

شان ترد علي (النرجسية) بقولها:

سلامات شين 27 و ما تشوفين شر غلايه و عيدج مبارك و لو انها متأخره ><
و ان شاءالله تعوضين التساقط حبيبتي

انا ان شاءالله افكر اخلط زيت زيتون مع صفار البيض و احطه على شعري و بغسله خلاف


و عقب بقص شوي من اطراف شعري عسب يطول

شان أرد (بعد 8 أيام ^^):

السلام عليكم بنيات

شحالكم؟؟ و شحال شعوركم؟؟ ان شاء الله مريحنكم؟؟

هلا النرجسية .. امممممم .. قلتي بتحطين صفار بيض و زيت زيتون؟؟
امممم .. على حد علمي انه صفار البيض زين للشعر الجاف.. فهل شعرج جاف؟؟

انا مرة وحدة جربت احط بيضه كاملة على شعري.. كسرت بيضة في صحن.. خفقتها شوي عشان تختلط .. حطيت شوية منها على ويهي .. و الباقي على شعري.. تميت نص ساعة عقب تسبحت

بصراحة ما اذكر شو النتيجة كانت .. بس أذكر الريحة .. و قلت توووووووبة احطي بيض على شعري

بس رجعت و حطيت بعد بيضة كاملة في خلطة حنا بعد كمن شهر .. بس هالمرة قلت صدق صدق تووووووبة استخدم البيض في الخلطات

و بالنسبة لشعري ألحين.. اممممم احسه عادي هالايام .. من ناحية التساقط و الحيوية و جذا

من اسبوعين موليه ما احط عليه شي غير الشامبو .. و مرة سويت روب + زيت زيتون

مشكلتي للحين ما عندي زيت لشعري.. عشان ابدا برنامج العناية للشتا

من فترة شفت هالزيت و افكر آخذه ان شاء الله .. شفت في النت وااايد يمدحونه ... لأني ابي شي يديد ما جربته من قبل .. عشان يعطي مفعوله ان شاء الله .. و لو شفت انه زين ما بهده ان شاء الله



انتوا شرايكم؟؟؟ و شو من الزيوت تنصحوني؟؟ ابيها تنباع في كارفور أو سفير و مب غالية

شان تسألني عيوز الفريج:

شين 27 ...... كيف اتسوين خلطة الروب .. الصراحه اتحمست استخدم الروب لشعريه

وبغيت انشدج كيف جدولج ف الشتا ..

انا لين الحينه استخدم زيت دابر املا وحمام كريم

شان اقوللها:

هلا و غلا عيوز الفريج

عن خلطة الروب... بسيييييطة

خاشوقتين روب + صبة زيت زيتون

و الكمية على حسب شعرج .. تخلطينها و تحطينها على شعرج و خصوصا الفروة .. و تحطينها على كامل الشعر كأنها كريم .. و اتمين نص ساعة .. انا مرة تميت ساعة .. عاااااااادي جدا

و عقب تغسلينها بالشامبو

الروب وااااايد مفيد .. ينظف الفروة و ينعشها (لأنه بااااارد ^_^) .. و يرطب الشعر
و زيت الزيتون طبعا معروفه فوايده من زماااااان


و عن جدولي .. ماشي .. بس احدد يعني كل كم يوم اسوي زيت و تدليك و خلطة الروب و خلطة الحنا قص اطراف الشعر و جذا

إلي يسمع جدول يقول كورس علاج .. لالالالالا .. بس جذا يعني امممممم اهتمام زيادة

و بيني و بينج .. عادة يوم اسوي جدول .. أول الايام بس اطبقه .. و بعدين اتكاسل و اتعايز

الجداول اسويها عادة قبل الاعياد بشهر .. و في الصيف .. و في الشتا

قبل كنت اسوي خلاطات و مايونيز و حلبة و حمام بخار و سوااااالف .. يوم اشوف دفتري مال الجداول القبلية اتحمس و اقول بسوي جدول يديد ^_^

و على طاري حمام البخار ... فناااااااااااااااااان في الشتا .. خاصة الحين الماي حار على طول حتى في الليل

كيف يسوونه؟؟؟

ببساطة .. زيتي شعرج بالزيت الي تحبينه .. و البسي كاب مال الشور .. انا ما عندي فكنت احطي جيس كارفور ^_^
عقب ييبي فوطة .. مب لازم تكون كبيرة .. انا إلي عندي قد الذراع .. خرسيها بالماي الحار .. و اعصريها بايدج عادي .. و اذا كنتي ما تتحملين الحرارة البسي قفازات

انزين اعصريها و حطيها على طول على راسج .. بحيث يتم البخار دااااخل و تحسين بحرارته
تكرر العمليه عند الحاجة و التفيج ^_^

انا مرات اسويها مرة وحدة .. مرات اكررها كمن مره .. عكيفج

و عن دابر املا .. كان حبيب قلبي هالزيت .. و كنت مقررة عأساس اخلص الدبة إلي عندي قبل نهاية 2010 .. بس ما ادري .. قمت ما احبه و ادور على غيره

و عن الزيت .. طالعه الصورة؟؟؟ انا ما اشوفها ..؟؟!؟!؟؟!!

هو اسمه C.B.C. اييج في قوطي حديد لونه اخضر .. هو زيت جوز الهند

امممم بغيت اسألج شو حمام كريم؟؟ و كيف تستخدمينه و شو فوايده؟؟

^
^
^
موضوع تعبير .. مب رد ^_^

[sh27]

عقب يحليلها عيوز الفريج ردت مرتين على مشاركتي:

ههههههههههههههه .. فديتج والله
احسج تردين من خاطرج ماشاء الله عليج
خلاص عرفت الخلطه .. انا بحطه ف الثلاجه .. وعقب بحطه على راسي .. احس شعور حلو
يا اختي اختكي مثلكي .. يومين انتظم على الجدول وعقب ارد ... بس الحمدالله وايد اهتم فيه اكثرعن قبل ....وانا عندي مكينه البخار ..استخدمها يوم احط حمام كريم ..اللي هو الكريم اللي نشتريه من الجمعيات والصوالين ... اكيد عرفتيه صح ..!!

وانا الصراحه ادور ادور وارد على دبووووووور .. ما اصبر عنه
طبعا استخدم الذهبي ... عشان جي مستمره عليه ولا لو الجديم ما بروم استحمل

و الرد الثاني:

اهي اهي اهي اهي

كتبت رد شو طوووووووووووووووووووووووووووووووووووووووووله واخر شي انمسح
برد اعيده عشان خاطر عيونج الحلوة

فديتج ماشاء الله عليج يوم تردين تردين من خاطرج .. ويزاج الله خير الصراحه وايد استفيد من ردودج
وان شاء الله بعتمد خلطة الروب .. بس بستخدم زيت السمسم بدل الزيت زيتون .. لانه ما والمني
وانا عندي مكينه البخار .. استخدمها يوم احط حمام كرين اللي هو كريم الشعر اللي ينباع ف الجمعيات والصوالين ... انا استخدمه ف الاسبوع مره وايلس تحت الاستيم عشرين دقيقه
وعلى طاري الجدول .. اختكي مثلكي .. انا اول يومين ارص على عمري وعقب اتكاسل
بس الحمدالله اهتم في شعريه اكثر عن قبل .. والحمدالله النتيجه طالعه
وعلى طاري دبووووووووووور .. انا الصراحه ما اصبر عنه .. ادور ادور واجرب واخر شي ارد عليه
طبعا الذهبي لانه الجديم ما بقهره ... والزيت اللي حاطه عينج عليه .. وايد يمدحونه .. بس عمري ما جربته ... قبل كان ف موضوع ف هالقسم عنه .. كانن البنات يخلطون وياه ثوم .. واحسن كانن مرتاحات عليه

شان ارد عليها:

^_^

تسلمين الغالية عيوز الفريج

حلوة مكينة البخار .. مع اني ما قط جربتها و ما جربت اي علاج في الصالونات

اصلا ما اتعامل ويا الصالونات في مسائل الشعر إلا نادرا .. اول مرة كنت صغيرة امي ودتني اقص شعري .. و قصتلي قصة الأسد ^_^ .. قام الكل يتمصخر علي .. قصة الأسد و لا قصة النمر ^_^ .. مع انها كانت حلوة علي

ثاني و ثالث مرة عشان اسوي تسريحة .. و هذا كان في 2004 .. و من يومها ما طبيت صالون

و عن دبووور.. ما ادري .. خاطري احبه مره ثانية بس ما ادري .. عافه الخاطر ^_^ أبي غيره

و عن خلطة الروب ... لالا ما يحتاي تحطينها في الثلاجة .. انتي هذيك الساعة يوم تبين الخلطة تسوينها على طول .. روب و زيت .. اخلطي و حطي عالراس .. بتم باردة .. جربيها في الصيف .. وااااااو .. انتعاش ما بعده انتعاش

انزين عيل عيوز الفريج .. خبرينا عن جدولج يوم الاربعا ان شاء الله
انا ان شاء الله عقب إجازة عيد الاتحاد ناويه ابدا .. بس اتريا الزيت



نسيت اقول عن التقصف.. الحمدلله هالايام مرتااااااحة منه و قليله الشعرات المتقصفة

ليش؟؟؟؟؟؟؟

اولا عشان القص كل نص شهر هجري

ثانيا عشان كل ما اكون فاضية او ابي افكر في سالفة او بس جذا قاعدة في الحجرة (و يا كثرها قعداتي في الحجرة بروحي )

أفل الشعر و آخذ المقص .. و آخذ خصل من الشعر و اركز على الاطراف (يعني ابحلق فيها عشان اطالع التقصف)

و من اشوف شعرة منقسمة نصين .. اقصها بالمقص من بداية التقصف (هالطريقة تعلمتها من يوتيوب)

و جذا خصله خصله و انتي و وقتج .. انا عادي اتم نص ساعة او ساعة .. اقعد اتأمل او افكر او اسمع الرادو (ما عندي رادو .. بس جذا يقولون في يوتيوب ^_^)

و النتيجة آخر شي .. شعر اطرافه سيده .. و تفاتيف شعر تحتج ^_^ طولها اقل عن سانتي

أنا و المقص قصتنا قصه
أول كنت أخاف من المقص .. و اخشه في السده عشان انساه و ما اقص شعري... و يتم شعري بالشهور و ممكن بالسنين ما اقصه .. صح كان طويل .. لين تحت ظهري شوي .. بس تعالوا شوفوا اطرافه .. متقصفة و جافة شنها ليفه .. مع اني كنت احطيلها كريم صانصيلك .. بس عرفت بعدين انه مب زين

حتى اذكر مرة كنت امشط شعري .. و اخوي عدالي .. اقوله شوف هالشعرة كيف .. يقول الله لعبة حلوة .. و ياخذ الطرفين و يفتحهم لين ما يوصل التقصف لي نص الشعرة

قمت بعد فترة و خربته زيادة إني قصيته مدرج .. كنت مستانسة فيه في البداية انه مدرج .. بس عقب وااايد غمضني التقصف

بس ألحين الحمدلله .. بعد ما داومت على القص كل نص شهر هجري .. و إني كل ما اشوف شعره متقصفه اقصها .. الحمدلله الحمدلله .. ينشاف كأنه توه مقصوص .. أطرافه صحية و سيده الحمدلله

يا كثر سوالفي يوم يكون فيها طاري الشعر ...إلي يسمع يقول شعر زينب العسكري و لا زرقاء اليمامة (اشخصها في السالفة ^_^)

مع اني اضمن لكم انه شعري اسوأ شعر في المنتدى (فيه شي انا ما قلته .. و ما بقوله عن شعري .. بس تراه كل إلي قلته من قبل صحيح 100% عن شعري)

امممممم ... شو كنت بقول بعد؟؟؟؟

هيه .. في الايام الياية ان شاء الله بحظر لخلطة حنا .. حنا + ماي حار + عصير ليمونه

ان شاء الله عقب اجازة عيد الاتحاد

و سلامتكم

شان تقول عيوز الفريج:

حيا لله شين 27 ..

ماشاء الله تبارك الرحمن .. افتكيتي من التقصف
انا الشهر اللي طاف قصيته .. وان شاء الله بحاول انتظم ف قصه
واليوم يا طويله العمر .. استخدمت الروب وزيت السمسم .. خليته تقريبا ساعه ونص
وعقب غسلته .. وحطيت حمام كريم .. ويلست تحت البخار ربع ساعه وغسلته
وهذا كان يومي مع شعريه ..

شان ارد عليها:

هيه عيوز الفريج الحمدلله تخلصت منه مع القص المنتظم طبعا

و شرايج بخلطة الروب؟؟ و شو حسيتي ؟؟

امممم بقولج شي... انتي سويتي خلطة الروب و عقب سويتي حمام كريم .. أحس ماكان له لزوم (أقصد حمام كريم طبعا)

و بجذا انتي غسلتي شعرج مرتين في يوم واحد ؟؟؟!!؟!؟!؟!؟!!!



* يوم الاحد 28/11/2010 شاركت بهالمشاركة في موضوع الاخت دانة الخليج بعنوان وصفات البيض للشعر !!!

صدق؟؟

انزين واااايد منتجات فيها بيض .. مثل كريمات الشعر و الشامبوات

و احنا انقول على اساس انه طبيعي و ما منه ضرر

الله يعين



* و بعد شاركت في موضوع الاخت احلى حوريه بعنوان تجاربكم بصبغة الشعر السودا الهنديه بلاك جولد

انا شخصيا ما جربتها على شعري

بس اذكر حنيت ظفوري مرة بها .. و طلع اسووووووووود عجيب



* و شاركت في موضوع الاخت صلاتي حياتي بعنوان ابى شورتكم خواتى دشو الله يسعدكم

ما اظني الصبغة او الهايلايت بتبين الشعر كثيف و غليظ

و كلامي من كلام اختي ام نظارات .. عالجيه و اهتمي فيه احسن

و عن تجربة .. حنيه .. انا يوم احني شعري ينفش و ينشاف غليظ

الله يوفقج



* و في موضوع الاخت بنــUAEـت بعنوان عالجــي مشـــاكل شـــعرك بالــــحناء

كتبت فيها:

أحب الحنا

انا خلطتي حنا + عصير ليمونه + ماي حار (و ممكن استبدله بشاهي حار)
أحيانا اضيف زيت زيتون

و الحمدلله مرتاحة وياها



* و شاركت بعد في موضوع الاخت نعيمية دلع بعنوان إلي مجربه الحلبة

و هاي كانت مشاركتي:

انا استخدمت من زمان حلبة حب + زيت عافيه مال الطبخ

اخليه اسبوع في الشمس و استعمله بعدين عادي مثل أي زيت .. قبل السبوع بليلة او بساعات .. عراحتج

و حسيت واااايد تحسن شعري .... بس يوم تركتها فترة و رجعت لها بعد شهووووور (طبعا سويت خلطة ثانيه) ما عطتني نفس النتيجة

انتي جربي شهر و شوفي .. الله يوفقج



* يوم السبت 11/12/2010 سألت في موضوع الاخت Reem dxb بعنوان اللي حابة ترتاج من الخشونة و الكشة تدش /للأطفال بعد (بالصور)

ليش الموز شو يسوي للشعر؟؟؟

أول مرة اسمع انه زين للشعر

شان ترد علي راعية الموضوع و قالت:

الموز أختي ينعم و يخفف التقصف

[sh27]

* في نفس اليوم الاخت فارسة الورد كتبت في تجمع الاهتمام بالشعر:

السلام عليكن
دشيت الموضوع صدفة وانبهرت بالشغلات إلي حطاتهن
بجد أكتشتف إني كنت مزعله شعري سنين ><
الموهيم
لو ما عليكن امر ممكن تتكتبن لي التواريخ إلي تقصن فيهن شعوركن لاني
من زمآآآآآآآآآآآآآآآآآآآآآآآآآآآآآآآآآآآآآآآآآآآآآآآآ آآآآآآآآن الازمنة ما قصيت شعري

وهيه وشو نوع الشامبو إلي تستخدمونه
انا قريت إن بعض العضوات يستخدمن شامبو صبار يعني من هالشامبوهات الطبيعية
وين ممكن ألقاة (انا من العين)......؟

هممممممم وشو بعد ...........ممكن اتقولون لي اسم الفيتامين إلي تستخدمنه
لانه شعري مرة قصير (طولة للكتف بسسسسسسسسسسسسسسس) ودي اشوفة يملي ظهري

شان أرد عليها:

و عليكم السلام اختي فارسة الورد

حياج الله بينا و في تجمعنا .. و ان شاء الله تستفيدين و تفيدينا بتجاربج بالعناية بالشعر

بالنسبة لسؤالج الأول .. متى أقص شعري.. او بالاحرى متى "أشذبه" .. لأني ما اقص منه وايد .. يمكن سانتي او اقل

انا اعتمدت انه في الايام البيض من كل شهر هجري... يعني أيام 13 و 14 و 15 من كل شهر هجري.. في واحد من هالايام اشذب او أقلم شعري.. بطريقة تعلمتها من يوتيوب

عندج هذي: شعرها حلو و صحي و تقول اشياء وااايد مفيدة و انا بصراحة استفدت منها.. قصت شعرها سيده:
http://www.youtube.com/watch?v=e0KyV...er_profilepage

و هذي: شعرها خبااااااااال.. يلمع و صحي و بعد استفدت من موقعها واايد.. قصت شعرها على شكل حرف U:
http://www.youtube.com/watch?v=L9Erf...layer_embedded

و هذي: بس عرفت منها طريقة قص الشعر سيده:
http://www.youtube.com/watch?v=FM2TTqsbJhU

هذا بالنسبة للقص و طريقته .. بالنسبة للشامبو انا استعمل الشامبوات العادية و كل ما يخلص واحد اغيره

خذت برت بلاس.. و عقبه خذت صانسيلك الاحمر .. و عقبه خذت فاتيكا بالزيتون .. و الحين بانتين

امممم .. انا ما آخذ فيتامينات.. فيتاميناتي آخذها من الأكل .. الحمدلله آكل السمج و احبه .. و الخضروات و الفواكه .. كل يوم برتقاله او موزة .. و المكسرات بعد زينه للشعر و البشرة .. أشرب حليب كل يوم في الليل .. حليب بالزنجبيل و القرفة .. وااااايد حلو و صحي و يدفي في هالبرد

اممممم ... الحمدلله ما احطي كيماويات على شعري.. لا جل و لا سبراي و لا أي شي.. معتمده على زيت الزيتون .. و أتريا الحين زيت جوز الهند

ما اقول انه شعري صحي .. بس الحمدلله على كل حال.. و احاول قدر الامكان إني اعتني به

و بس



* يوم الاثنين 27/12/2010 شاركت في موضوع الاخت rorey إلي عنوانه حبيت هالمنتدى

حياج الله اختي

و عن الغرة .. ادخلي يوتيوب و اكتبي bangs cut

بتطلع لج قصات اشكال و ألوان... تقدرين انتي بروحج تقصينها في البيت
تشوفين الفيديو و تطبقين بنفسج

بدال الصالونات و الخساير

شان ترد راعية الموضوع:

انا أقصها بروحي بس يوم الأعياد فالصالون عشان أغير اللوك وأنا عندي عرس فعشان جي أبغي أغير الوك



* و شاركت في موضوع الاخت&ام عبد الله& بعنوان انتبهو اخواتى زيوت يمنع خلطها مع بعضها

يزاج الله خير على هالمعلومات

انا ناوية أبدا عناية بشعري .. بس ما اخلط الزيوت مع بعض.. لأ .. استخدمها كل واحد بروحه

زيت الزيتون أدهن به شعري كامل قبل السبوح.. و أطراف شعري بشكل خفييييف بعد السبوح

زيت الخروع أدهن به فراغات الفروة بعد السبوح

بستمر عليهم ان شاء الله 6 شهور و بشوف شو النتيجة

كنت حابة آخذ زيت جوز الهند باراشوت مال الاكل بس ما حصلت



* و بعد كتبت مذكراتي في تجمع الاهتمام بالشعر في نفس اليوم:

السلام عليكم بنيات

شحالكم؟؟؟

مثل ما قلتلكم قبل إني في الاجازة ما بسوي شي في شعري

بس ان شاء الله بداية 2011 ببدا برنامجي بالزيوت

و محطية مدة 6 شهور على هالعناية و بشوف عقب كيف يستوي ان شاءالله

اليوم اشتريت قوطي صغير زيت زيتون RS .. زيت زيتون عادي مال الاكل

و اشتريت زيت خروع إلي علامته حرف B بالاحمر

دورت زيت باراشوت "جوز الهند" مال الاكل .. بس ما حصلت
و دورت بعد زيت جوز الهند C.B.C إلي قوطيه أخضر.. بس بعد ما حصلت

(بغيت زيت جوز الهند لأنه يرطب الشعر)

بس ما عليه.. المهم برنامجي ان شاء الله بيكون:

*زيت زيتون على الشعر كامل قبل السبوح ب4 ساعات

*بعد السبوح قطرة زيت خروع عالفراغات (عندي فراغات و ان شاء الله تمتلي لين شهر 6 من 2011)
+
مسحة زيت زيتون خفييييفه على أطراف الشعر

*حمام بخار بزيت الزيتون مرة كل اسبوع (يعني ادهن راسي كامل بزيت الزيتون و احطي عليه فوطة ساخنه)

*خلطة روب + زيت زيتون مرة كل اسبوعين (أو كل ما اتفيج)

*حنا .. مره كل شهر

و أي جديد بخبركم عنه ان شاء الله



* يوم الخميس 30/12/2010 شاركت في موضوع الاخت الغزال2009 بعنوان جدول العناية بالشعر

انا بقولج ليش يختلف

كل وحدة و ظروفها.. إلي عندها دوام و إلي عندها عيال و جذا يعني

فتختلف المرات من وحده لوحده

تدرين شو؟؟ انتي جربي في اسبوع.. و إذا ما عيبج جربي طريقة ثانية و هكذا لين ما ترتاحين على جدول معين

بالتوفيج ان شاء الله



* يوم الاحد 9/1/2011 شاركت في موضوع الاخت خضب الحنا بعنوان تجربتي مع زيت الزيتون الاسباني (الوزير)

انا بعد احب زيت الزيتون و كنت استعمله بين فترة و فترة

بس الحين ان شا ءالله ناوية استمر عليه

كل يوم في الليل امسح شعري بشوية زيت زيتون .. و احط عشفايفي بعد و ريولي من تحت عن تتشقق و امسح ايدي بعد ^_^ (أحسن عن اي مرطب ثاني)

تسلمين اختي و الله يصلح حال شعورنا ان شاء الله



* اليوم إلي عقبه كتبت في تجمع الاهتمام بالشعر:

بغيت اخبركم إني بسوي خلطة حنا هالاسبوع ان شاء الله

حنا + عصير ليمونه + شاهي حار + شوي زيت زيتون و خروع

بخلطها العصر ان شاء الله و بخليها تخمر عشان يطلع اللون و الفوايد

و بحطها على شعري و الفروة الساعة 11 فليل ان شاء الله

و بغسلها بالشامبو الساعة 3 او 4 قبل الفير ..ما ادري .. عحسب متى بنش ان شاء الله

و عقب ما ينشف شعري نص نص بدهنه كااااامل بزيت زيتون

و بس

حد تبا تسويها وياي؟؟؟

شان ترد علي Blo0owi:

شوفي الجاي فوريه لين يحمر وبرديه ....
ممكن تحطين نسكفيه للون البني
وزعفران وكركم للون الاشقر
ولما تغسلين شعرج خلي راسج نازل ووجهي الرشاش عراسج
لين يروح الحنا كله من راسج بعدين غسليه بالبلسم ( مش بالشامبو )
ممكن تزيتينه اذا حابه
تكرار الغسيل يروح اللون


واذا كررتي الحنا خليه مره فالاسبوع

شان اقوللها:

هلا بلوي

عن خلطة الحنا.. الله يسلمج انا الشاهي احطه و هو حار على الحنا.. هو مب حار حار.. يعني ماي السخان.. ما ادري ليش احطه و هو حار.. بس جذا متعوده

اللون ما يهمني وايد كثر الفايده.. جربت قبل ماي الزعفران و جربت الكركم و جربت النسكافيه

و عن طريقة الغسول .. هيه هاي الطريقة الصح و هاي طريقتي .. خاصة إني اغسل شعري بماي ابرد من يوم أغسل جسمي.. فبهالطريقة ما بسبح جسمي بماي بارد ^_^

و اغسله بالشامبو مرة وحدة.. ما عندي بلسم.. و حب دايما ازيت شعري بعد الحنا

و انا اعتمدت اني احني شعري مرة كل شهر



* يوم الثلاثاء 11/1/2011 شاركت في موضوع الاخت فراوله حمرا بعنوان منو بتبدا معايه مع زيت C.B.C

انا بعد ابي.. بس ما حصلت هالزيت فكارفور

من وين خذتيه؟؟ و ممكن نلاقيه في سفير او اي محل و لا لازم محل عطارة؟؟؟؟

و بكم؟؟ و اشكثر حجمه؟؟ يعني كم ملي؟؟؟

و السموحة عالاسئلة ^_^

شان ترد علي:

حبوبه في اي جمعية تعاونيه او السفير او اللولو اي مكان في قسم الزيوت


والله ما عرف بكم بس ما يتعدا 20 درهم على ما اعتقد حجمة كبر قوطي السميد الاحمر



* اليوم إلي عقبه كتبت مذكراتي في التجمع:

اليوم العصر سويت خلطة حنا

حنا + عصير ليمونه + ملعقه صغيرة زيت زيتون + ملعقة صغيرة زيت خروع + كوب شاهي أحمر و أخضر حار

خلطتهم زيييييين .. و بحطهم على شعري عقب شوي.. و قبل الفير بغسله بالشامبو ان شاء الله و عقب بزيت شعري بزيت الزيتون



* يوم الاثنين 17/1/2011 كتبت آخر مشاركتي و آخر مشاركة للحين في تجمع الاهتمام بالشعر:

(و هذا إلي خلاني أفتح لي موضوع خاص فيني)

حبيت اخبركم عن نتايج خلطة الحنا إلي سويتها

ينفش الشعر بطريقة حلوة.. و يخليه كل شعرة بروحها

عطاني ملمس مخملي و ناااااااعم للشعر .. و لون في الشمس رووووعة

اليوم في الليل بدهن فروة راسي بزيت الخروع.. و باقي الشعر بزيت الزيتون

و بغسله باجر ان شاء الله

تدرون شو.. من بعد الاجازة حسيت شعري طول حبتين.. الحمدلله و الشكر.. مع إني مب واايد مهتمة بالطول كثر الصحة و الكثافة

و لا يزال البحث جاريا عن زيت جوز الهند C.B.C ^_^

[sh27]

و بجذا اكون خلصت من مشاركاتي في مواضيع الشعر

و ببدا بمذكرات شعري الفعليه أول بأول ان شاء الله قد ما اقدر

و ترى باب الاستفسار أو المشاركة مفتووووح من البداية

في أمان الله

[sh27]

* يوم الثلاثاء 18/1/2011:
اليوم ليلة 14 هجري... قصيت انش من شعري كتجديد لأطراف الشعر



* يوم الاربعاء 26/1/2011:
اليوم سويت خلطة حنا

حنا + ماي حلبة (من أمس نقعت الحلبة في ماي حار و خليتها في الدبه مع حبوب الحلبة .. و اليوم ريحة الحلبة و لونها مبينين في الماي)

خلطتها و خليتها 3 ساعات تخمر و عقب حطيتها عشعري كامل مع التركيز عالفروة

غسلتها بالشامبو الفير .. و بعد ما نشف شعري حسيته واااايد يلمع .. ما شاء الله وايد عيبتني هالخلطة

و بعد زاد عندي ماي حلبة فاستخدمته يمكن 4 مرات خلال اسبوع.. افرك الفروة زيييين بماي الحلبة و اخليه لين ما ينشف و عقب اتسبح عادي بالشامبو





بصراحة خواتي هالايام ألاحظ شيئين:

1- شعري طولان بشكل ملحوظ .. يعني ألحين واصل لين صدري من جدام االحمدلله

2- بدا شعر يديد يظهر في اماكن متفرقه من فروة راسي .. ما ادري عاد من الحلبة او من زيت الزيتون او من زيت الخروع ؟؟؟ .. عالعموم انا بستمر عليهم ان شاء الله

و ان شاء الله خير

[sh27]

* اليوم السبت 12/2/2011:

شاركت في موضوع الاخت ღღღبولياناღღღ بعنوان نقااااااش: بخصوص زيت دابر أملا
و هاي كانت مشاركتي:

دابر املا استخدمته لمدة 3 سنوات .. بصراحة حسيته يرطب و يغذي الشعر صدق .. و حتى برشوت

بس الحين تركته ... امممممم بس جذا .. مب عشان فيه عيب او سوالي شي مب زين

و هاي تجربتي ويا دابر املا "بو ريحه" ... بس انا كانت الريحة عادية عندي مب مثل ما وصفوه البنات انه يطفر و يعور الراس و جذا .. الناس اذواق ^_^

[ام كايد111]

رفع لعيونج