زوجي ظالم وغير عادل

[كيكة الكرز]

السلام عليكم ورحمة الله وبركاته ،،،
بدخل في الموضوع على طول انا الزوجة الثانية وزوجي عنده 6 اولاد من الزوجه الاولى وانا اكبر بكم سنة من زوجي المهم ان زوجي غير عادل امبينا مايجيني الا يوم دوامه لانه من امارة ثانية وانا موفرة عليه كل شئ حتى السكن والصرف المهم انه مقصر معايه حتى يوم العيد لاياني ولاحتى اتصل فيني يوم كلمت امه قالت لي انه مريض قلتلها انه مب اول مرة يسويها حتى عيد الفطر ما ياني الا بعد خمسة ايام عشان دوامه وانا حطيت في خاطري وااااايد قلت مابين في عينه كم انا احبه وواقفه معاه وما كلفت عليه بأي شئ يعني مرتاح من المصاريف المهم قلت بستوي احسن منه وبتصل وبسأل عنه لأنه مريض اتصلت فيه مرتين وما رد عليه هذا كان بعد ثلاثة ايام من العيد جان اقوم ارسله مسج اقوله لهدرجة انت مريض ما تقدر ترد على اتصالاتي حتى في العيد ماعبرتني جان يتصل بعد شوي واقولكم هب في ويهي وهاوشني قال انا مريض قال لو انتي تمرضين وتوصل حرارتج 41 عقب بتحسين فيني حز في خاطري وايد كلامه صدق انه ماعنده ذوق كيف يتمنى لي المرض وانا ماقصرت معاه ويعرف اني احبه وماهان عليه مااسأل عنه لكنه ما يستاهل حتى رديت وكتبت له مسج ثاني قلتله ياخسارة خوفي واتصالي عليك انت ماتستاهل احد يسأل عنك والحين صار له اكثر من 10 ايام لا اتصل ولاحس فيني لكني مب قادرة اصبر عنه حتى قلت بختبره وبقوله اني مسافرة باجر لكن ماعبرني ولا اتصل والله تعبانه معاه مادري شو الحل وياه انسان ظالم لا عادل كله طايح عند الاولى ومع عيالها وانا ولا يعبرني لاتقولون انتي السبب لأن محد يعرف ظروفي وانا ليش تزوجته والله اني كرهت حياتي معاه قولولي شو الحل اتصل فيه والا ماعبره لأن هومايحس فيني ان شاء الله اغيب عنه سنه ما يتصل ولايسأل عني حتى لو بموت بس انا مااقدر اصبر عنه شو الحل برايكم ارجوكم ماريد تجريح واللي عندها كلام جارح تحفظ لنفسها لأني مب ناقصة هم وغم وادعولي الله يسخر لي زوجي .

[-"فكتورية"-]

ماني عارفه شلون اواسيج و افيدج ياختي . .

كل الي اقدر اقوله ، ربي يسخر لج ريلج ، و يحنن قلبه علييج

:

وان شاء الله عسى هالليله يدق عليج و يكون يمج . . !

[Dubai's pearl]

بصراحه وايد ظالمنج مب زين عليه جي

انتي لازم تقعدين معاه و يصارحج بكل الي في خاطره .. يا يعاملج بالطيب و بالمعروف أو يحدد موقفه اتجاهج بصراحه

اختي انتي ليش متحمله مصارريفج بروحج ؟؟ كلمي اهلج و خليهم يقنعونه انه هو الي ملزوم بمصاريفج ... ساعتها بيحس بقيمتج و بيحس انه وراه مسؤوليه ... يمكن لأنج مريحتنه من الناحيه الماديه ما عادت تفرق معاه .. (( اذا انت اكرمت الكريم ملكته و اذا انت اكرمت اللئيم تمردا))

و يمكن لأنج متحمله كل شي و شارتنه هو ما عاد يحس بقيمتج و يتحراج ميته عليه و بتضحين بكل شي عشان ، عشان جي ضامن انه ما بيخسرج لأنج تبغينه من خاطرج و ما ترومين تستغنين عنه .

الله يسخر لج زوجج حبوبه .... ادعي الله في كل صلاه ما في شي أحسن من الدعاء

[قلبي من ألماس]

لا تفهميني غلط ..

انا ما بقولج ليش تزوجتي ريال متزوج .. لان ها ابدا مو الموضوع ولا المشكلة .. وانتي حرمته على سنة الله ورسوله ..

لكن ليش تقدمين له كل هالتنازلات عشان ياخذج ..؟ مب اي ريال يقدر انه يعدل .. خصوصا انج دلعتيه وخليتيه يمصخها ..

نصيحتي لج .. اذا الريال مب حاشمنج ولا عارف قيمتج بتتعبين معاه اكثر واكثر ... وقفيه عند حده ودخلي اهلج ي الموضوع ..

لا تقولين احبه ما احبه .. ترا الحب ممكن يضيعج .. فكري بعقلج .. واذا هالحياة تناسبج والا لا .. وخليه يعرف يقدرج ويحسب لج حساب .. غير جي .. ما في شي يجبرج تعيشين مع انسان ما يحترمج ولا يحترم وجودج في حياته ..

واكيد اكيد دايما ادعي .. وتصدقي بنية ان الله ييسر اموركم .. ويحنن قلبه عليج ..

وربي يوفقج في حياتج ..

[o0جواهرo0]

لاحول واقوه الا بلله العلى العظيــم ......

الله وحده اعلم بظروووفج الغاليه ومحد يقدر يعاتبج انج خذتيه من البدايه وهو عن 6 ماشااءلله ....

بس ماعرف احس انه ابد مشغوول عنج بحيااته ولا مهتم لدرجه لو تسافرين عادى عنده ..

انا من رااي مدام الله منعم عليــج احس لو اتشوفيــن حيااتج مع انساان ثانى يقدرج ويحسب حساابج يعنى انتى زوجته مب قطعه اثاث لج حقووقج وله حقووقه هذا زواج مب لعب ...


انا هذاا رااي لام احسه زوج ناسي ان عنده زوجته حتى وقفت امه معااه ماريحتنى ابد ..

احسن لج جووفي حيااتج مدام انج صغيره بعده وقبل لاا يطووف بج العمر ....


اتمنى كلاامى مازعلج بس هذاا رااائي ولج يانج تتقبلينه او ترفضيه..

والسموحه والله يساعد الجميع

[bellegirl]

لا حول ولا قوة إلا بالله

حق شو يعددون إذا ما بيعدلــون >_<

ربي يصبرج أختي على مصــابج ويهدي لج ريلــج

بس غاليتي أهم شي ماعمرج تمنين عليه

مهما سويتي لا تسوين له سوي لرب العالمين واحتسابا للأجر

عسب يكون في أعمــالج بركـة

وثاني شي أختي حاولي تشوفينه في يوم هو مرتاح نفسيا ومعنويــا ^^

وحاولي تقعدين معاه قعدة هادية وتشرحين له مشاعرج

ولو اضطر يسوي لكم جدول ( انتي وحرمتـه الأولى )

عسب يعدل امبينكم مافيها شي ^_^

حاولي تكلمينه بالهداوة والسياسة ,, وطولي بالج أختي

ترى مب هين تتزوجين ريال معرس وباني بيته وعنده عيالــه..

فلازم تتحملين أختي وتزيدين الصبر من عندج

ولا تسنين أختي ان اساس العلاقة الزوجية الناجحـة

هي طاعتج لرب العالمين ونوافلج وتقربج منه سبحـانه وتعالى ^_*

وباذن الله ربي القادر على كل شي


بيهدي لج ريلج ويسخره حقكم ثنيناتكم

[دلوعه فزاع]

الله يعينج الغاليه والمفروض يعدل بينكم مهما كان عيل ليش ياخذ الثانيه اذا مب قادر يعدل بينهن