متزوجه من 4 شهور وحامل و زوجي يخوني.. =( شسوي

**رحيل الروح** · 2010-10-31, 17:44

السلام عليكم .. اشحالكم بنات..؟
بصراحه ترددت وايد قبل ما اطرح مشكلتي بس قلت بتوكل ع الله يمكن الاقي عندكم الحل..
..

انا متزوجه من 4 شهور .. و الحين حامل ف شهوري الاولى .. و زوجي يحبني و مب مقصر وياي ف شي مول و الحمدلله.. مدلعني وايد و مب مخلي شي ف خاطري .. المعروف عنه انه ريال محترم وخجول وماعنده سوالف بنات و هالخرابيط.. المهم يوم كنا مالجين كنت اعرف ايميله و كنت ساعات ارمسه ع الايميل وجيه و قبل زواجنا بكم شهر سواله ايميل يديد .. بحجة انه ما يبا حد يعرف ايميله من اهله وجيه.. المهم عقب زواجنا ف يوم قالي بيروح مادري وين يخلص كم شغله .. و عقب كم ساعه رد لي البيت قلت له خلصت !! قال لا كنت ف بيت اهلي ارمس ربيعي ع المسن .. اونه بنته الصغيره تبا ترمسني ع الكام ومن هالكلام ورواني صورتها وجيه.. وما كان يباني امسك تلفونه .. طبعا انا انقهرت من هالحركه.. و ليش ما خبرني!! لاني متعوده انه يقولي كل شي !! .. و متعوده انه عادي يخلي تلفونه عندي..المهم عقب رد طلع عشان يخلص شغله... المشكله هي اني عقب كم اسبوع وماكان مكمل ع زواجنا الا شهرين تقريبا .. كان ساير بيت اهله وماخذ لابي .. ويوم رد كان يايب لابي ولاب اخوه .. انا شفت لاب اخوه شفت انه مسوي بحث عن اسم بنيه او شي جيه المهم انا ماركزت وايد ع هالشي وماشفته عدل .. بس مسحت كل شي وصكيت لاب اخوه .. و عقب فتحت لابي شفت المحادثات شفت انه نفس الاسم اللي كان يسويله سيرج.. هو نفس الاسم الي يرمسه.. كان ايميل بنت ..وكان يرمسها وجيه بس كانت المحادثه قصيره ماقدرت افهم شو اللي بينهم بالضبط .. انا حزتها مادري شو صار لي كان بيغمى علي .. لانه كان يقولي شو رايج ازقرج بهالاسم " اللي هو اسم اللي يكلمها" او شو رايج نسمي بنتنا بهالاسم " اسم اللي يكلمها" المهم يوم رد حاولت ما احسسه بشي وسرت ارقد عقب..لاني ابا اعرف بيرد يرمسها او لا.. المهم طاف يوم يومين 3 اربع ماقدرت اتحمل الشك بيذبحني.. وطبعا حالتي النفسيه كانت داااون.. كنت يالسه ودموعي ف عيني يوم شافني قالي شوفيج!! طبعا مارضيت اقوله شي .. الا عقب ماتم يسأل اكثر من مره .. قلت له انت كم ايميل عندك؟ "" ملاحظه: كان يقولي انه مايعرف شي حق الايميل ولا يعرف يسوي ايميل حتى !! """
قال لي : بس الايميل الاولي اللي حذفته وهالايميل اللي احين .. قالي بس جيه هاللي مضايقنج!! قلت له منو هاي فلانه؟ انا شفت المحادثه .. قال مادري ها اخوي كان يستخدم اللاب مالج .. قلت له لو اخوك ما بتزقره البنت باسمك ولا بتسأله عن اللي فيك "" لانه كان حزتها مريض" وكانت تسأله وجيه.. قال والله انا ماعرف اخوي شو مخرف عليها .. وبعدين الواحد ما بيقول اسمه الحقيقي حق البنت اللي يرمسها.. قلت لها الايميل نفس ايميلك ونفس الارقام وفيه حرفك.. قال مادري عنه ولااعرف شو هالايميل ولا اعرفه كيف.. ها اخوي كان يستخدم اللاب.. قلت له انا كنت ارمسك يوم انت ف بيت اهلك وقلت لي انه اخوك ماعندك الا عقب يا عندك اخوك .. وانا شفت وقت المحادثه كان اخوك ماعندك .. قال انا احين بييب لاب اخوي عشان تشوفين ايميلاتي وطلع بعدين رد .. قال موجود اللاب بس ماشي فلاش النت.. ماكان عندنا نت ف البيت.. المهم .. انا طلعت عنه عقب رديت .. كان يتصل حق اخوه .. قاله انت استخدمت لاب الحرمه.. قاله هيه ليش؟ قال بس جيه يللا باي .. كان حاط سبيكر .. عشان اسمع.. بس انا اعرف انه اخوه استخدم اللاب بس ف شي ثاني!!!! ... المهم انا كنت ابا اتأكد اكثر .. كنت يوم اشوف انه ايميله اللي يرمس منه البنت اونلاين اتصل فيه ومايرد عقب اول ما يظهر من الايميل يتصل .. وهالشي تكرر اكثر من مره .. هو يكون ف الدوام يوم يدش.. و يقولي ماشي نت ف الدوام .. واللي قاهرني انه يحلف وايد وايد وايد يحلف.. المهم عقب فتره عرفت باسوورد ايميله القديم اللي كنت ارمسه منه بطريقتي الخاصه.. وبعد عرفت باسوورد ايميله اللي يرمس منه البنت .. وحاط الايميل البديل هو نفسه ايميله القديم .. و انا غيرت الباسوورد وحطيته نفس باسوورد ايميله القديم .. عشان اشوف اذا هو ولا اخوه .. لانه لو اخوه ما بيعرف الباسوورد.. المهم هو حتى عقب ما غيرت الباسوورد عرف الباسوورد و بعده يدخل منه .. " يعني انا متعمده احط نفس الباسوورد عشان اتأكد انه هو لانه الباسوورد اخوه مابيعرفه " >> اتمنى انكم فهمتو هالنقطه ..
و انا شفت الايميل وشفته كله بنات .. وجيه يعني .. و مادري كيف ارد اواجهه .. لان كل ما اقوله شي يتم يحلف و يقول انه اخوه وانا مايعرف شي !! .. كلما اقوله شي يقول اخوي هذا ... مع اني احين متأكده اكثر عن قبل انه هوووو .. بس ماعرف كيف اواجهه وكيف اقوله .. بليز ردو علي بسرعه .. و هيه صح شفت انه مطرش لها رسايل يسأل عنها وجيه ... وهي ترد عليه وتقوله فديتك ومن هالكلام ؟؟؟ بموت غصه ... ومب عارفه شسوي =( بليز ساعدوني

**لهفة مشاعر** · 2010-10-31, 17:56

واجهيه والمسن مفتوح وقوليله منو هالبنات الحين مالك حجه تنكر والله يبعد عنه بنات السوء

**رحيل الروح** · 2010-10-31, 17:58

تراه يقول انه هالايميل مب ايميله يقول انه ايميل اخوه .. يوم اقوله جيه =(

**اخت بوحميد** · 2010-10-31, 17:59

هلا اختى
اول شي
اخذى رقمه لى يرمسه وقولى له ورمسيه انه لى ترمسه ريلج
وثاني شي لاتحرقيين اعصابج وانتى حامل والله بياثر على نونو

واذ قال لج سمي عليه قولي له منوة تكون عسب اسمي عليه فلانه ليكون معزبتي ؟ عقب بيسكت

واخذى الامور بكل برروود