.//. مشكلة ولدي الرضيع و الامساك الفضيع .//.

**buss-girl** · 2010-04-01, 01:03

السلام عليكم ورحمة الله وبركاته

بنات ولدي الحين فاخر الشهر الثالث

وتقريبا من دش الشهر الثالث بدت وياه مشكلة الامساك

اول مرة تم 6 ايام بدون ما يسوي شي .. بتقولون لي ليش صبرتي عليه هالكثر؟؟ فيه دكتور الله يسامحه قالي عادي البيبي ااذا ما سوى كاكا 5 ايام

وسرت للدكتور حجازي وعطاني تحميلة جلسرين و عطاني مسهل البطن دوفالاك

من عطيته التحميله مشاه بطنه و رديت اعطيه الملين دوفالاك بس مول ما فااده

ولين يومكم هذا يتم 3 ولا 4 ايام ما يسوي شي فاضطر اعطيه تحميلة عسب يطلع الي فبطنة

فديته اسمع يون و يتعصر ..

جربت وياه كللللللللللل الطرق... عطيته ينسون و غيره ما نفع .. مسحت بطنه وتحت سره بزيت الزيتون ما نفع .. يبت عود مال الاذن و حطيت فيه زيت زيتون ودخلته شوي ما نفع .. سويت له عجوة فماي و شخلته ما نفع ..

حتى سرت لدكتور ثاني عطاني ملين ثاني بعد ما نفع وحسيته وايد هالدواء على بيبي فوقفته

انا ماباه يتعود انه ما يطلع شي فبطنه الا بالتحميلة

بتقولون يمكن ما يكفيه الحليب .. انا منتظمة وايد فسالفة الرضاعه والحمدلله ما يصيح من اليوع الا نادرا؟؟

حد استوت له نفس مشكلة ولدي؟؟ وكيف عالجتوها

على فكرة انا ارضع ولدي طبيعي ما اعطيه صناعي ابدن

المزيد من آخر المواضيع من نفس القسم:

**حصه دبي** · 2010-04-01, 02:32

نوع الحليب ممكن يسوي أمساك خصوصا أذا كان فيه الحديد مضاعف غيري الحليب عطيه نان الذهبي و عطيه الشاي الخاص بالرضع بالينسون و كثري الماي الخالي و أذا كنتي ترضعينه من صدرج بس ما أعتقد لاتكلين البقوليات و خليه على بطنه ربع ساعه بس انتي تراقبينه يعني مب في الليل

**الحلووووه** · 2010-04-01, 02:43

المشكله فيج انتي اذا عندج امساك اجنبي كل شي يسوي امساك وشربي الماااااااي دايمن ننسى شرب الماء ويا فوااايد الماي الي لاتحصى..
وشوفي الحليب الي تعطينه يمكن هو المسبب الامساك..

**الحلووووه** · 2010-04-01, 02:47

انا ولدي عمره حمس شهوووور ويسوس بعد 3ايام او 4 ولابعد يطلع شوي بعد طول انتظااار
انا ابد مستحدمت التحاميل كله غلى بطنه واعرضه للشمس واحطله زيت الزيتووون..

**lavander** · 2010-04-01, 03:27

عندي نفس المشكله .. بس أنا أرضع طبيعي

**فراشه_وردية** · 2010-04-01, 07:01

UP UP UP

**luluq8** · 2010-04-01, 11:24

انا ما عندي الا شغله ذكرتيها تمر ويا ماي

بس اعتقد من الي انتي تاكلينه اذا ترضعين طبيعي شربي ماي وايد وايد و سوائل بصوره عامه

واذا ما ترضعين الا شوي يعني فيج حليب جربي ترضعينه زياده حليب الام يمشي البطن...

و همن وديه حق دكتور ثاني احتمال يكون افهم..

**::ملاك::** · 2010-04-01, 12:01

الغالية شوفي هذا طبيعي،،
بنتي كانت كل 4 أو 5 أيام يمشيها بطنها،، ووالله انها كانت تصيح صياح كله من المغص
وكل أوديها المستشفى يقولون هذا طبيعي وعطوني ملين بس وقت الحاجة استعمله

بس الغالية من البيبي يكمل 5 شهور إن شاءالله بيبدأ يخف
ماعندج غير الصبر...

**دلاعة** · 2010-04-01, 12:07

بوووووووس نصيحه كثري ماي 4 غرشات اشربي واكثرر وعصاير فرش وعادي ورابعض يدررر حليبج يسهل عليه

**راعية واجب** · 2010-04-01, 14:44

عطيه شاي اطفال بالشمااااااااااااااااااااااااااااار وصفلي اياه الدكتور لبنتي

وعطيه 15 مل عصير برتقال فريش مع فنجان ماي وكسرة سكرة نبات
يلين البطن

الحمدلله بنتي ارتاحت من سويت ها الاشياء

*** متوآضعه *** · 2010-04-01, 17:13

فتــره وبتعدي ان شاء الله

وخاصه لو ترضعين طبيعي ..

في احيانا عادي الولد ما يسويها اربع ايام واكثر

بس دامه يون ويتالم يعني صج فيه امساك

امسحي بطنه بزيت الزيتون كذا مره فاليوم وكبيه على بطنه ..

انا ولدي عنده تحاميل وادويه بصراحه ما استخدمت التحاميل الا مرتين .. والادويه ودرتهآ لاني قريت فالوصفه فيها كحول

واعتمدت اعتماد كلي على الزيت زيتون .. والماي وسكر نبات

**مالي مثيـــل** · 2010-04-01, 18:13

كثري من السوائل . .

انا بنتي جيه . . و طبيعي . . بتني ما يمشيها الا في الاسبوع مره . . سالت و قالولي كل طفل يختلف من الثاني . . و بعد فتره الحمدلله انتظم اللحين . .

**بهلولة** · 2010-04-01, 19:36

اعتقد هاي فترة طبيعية ويمر فيها اي طفل
انا صار وياي اللي صار وياج
وكنت كل كم يوم اعطيه جلسرين
بس عقب شفت انه ما يحتاج وقام يعتمد على عمره
حبيبتي هاي فترة وبتمر
وانتي عليج بالعسل وعصير البرتقال والسنوت والنعناع
لانها تساعد بطن الطفل وتريحه

**buss-girl** · 2010-04-02, 00:21

مشكوووووووووورات بنات عالردود

الحمدلله من كلامكم فهمت انه هالشي عادي

لانه فيه حد يوم اقوله يحسسوني انها مصيبة كيف .. وليش؟؟

المهم انا بجرب اشربه عصير برتقال مخفف

وبتريا عليه لين يدش الخامي على قولتكم بيعتدل الوضع

وبعدين اشرب سوائل بس مب وايد

و اذا عليه حتى انا ما يمشيني بطني دوم ..

**روح وليد** · 2010-04-02, 00:56

اكيد الغلا انتي عندج امساك الانج اتقولين ماترضيعينه صناعي بس الغلا مابيتعود ع التحاميل لاتحاتين وبهذا العمر كل اليهال جي اناولدي فديته مايمشيه بطنه نفس ولد وكله كنت اعطيه تحاميل والحين فديته عادي ..كل ما كبر بيكون احسن لاتحاتين والغلا صدق كلام الدكتور الي قالج لومامشاه 5 ايام نفس الكلام الي قالولي اياه كل الدكاتره؟؟

الموضوع: .//. مشكلة ولدي الرضيع و الامساك الفضيع .//.

أدوات الموضوع

عرض

.//. مشكلة ولدي الرضيع و الامساك الفضيع .//.

المزيد من آخر المواضيع من نفس القسم:

المواضيع المتشابهه

مشكلة ولدي الرضيع

وبعدين مع مشكلة الامساك ،، ساعدوني

معاناة ولدي ويا الامساك }~ :(

نصايح لحل مشكلة الامساك عند الحامل

ولدي يعاني من الامساك