رحلة ^الدماني^ الى مومباي - الجزء الثاني (جولة في أسواق مومباي)

[^الدماني^]

اليوم بآخذكم في جولة في أسواق مومباي

أهم المراكز التجارية :

• R-Mall, Mulund (West)
• Phoenix Mall, Lower Parel
• Atria Mall, Worli
• Crossroads mall, Worli
• City Mall, Andheri (West)
• Sunrays Shopping Center, Borivali
• Inorbit Shopping Mall, Malad (West)
• Hypercity Mall, Malad (West)
• Center One, Navi Mumbai
• Infinity Mall, Andheri (West)

ما أبا دلع !

وحد يقولي : ياااي ! شو هذا ؟ ومستحيل أدخل هالسوق !
ومن هالكلام !

لأن الواحد لازم يجرب كل شي في الحياة مب بس الأماكن الراقية !

كل وحدة تلبس شوز رياضي وجينز
واللي بتلبس عباة تكون قصيرة عشان ما تتوسخ

و .......ورايه !

في الطريق اللي بيجيبكم من المطار ، بتمرون فيه على أكشاك صغيرة مثل اللي في الصورة
عبارة عن منجرات صغيرة شكلها ما يشجع أبدا على دخولها ،
لكن لو ألقيتو نظرة
بتتعجبون من دقة العمال اللي يالسين ينحتون في الخشب
ويصنعون أثاث واكسسوارات خشبية
أقل ما يقال عنها انها قطع فنية ،
وكل هالقطع الموجودة يشترونها أصحاب المحلات الراقية
في المراكز التجارية ويبيعونها بأضعاف أضعاف سعرها



نبتدي بمركز راقي ...


Central



عبارة عن Department Store تصميمه حديث



بتلقون فيه ملابس ، لعب أطفال ، اكسسوارات ، ملابس تقليدية ، كوفي شوب ، منطقة صغيرة للعب الأطفال ، الخ



وبعد مركز اسمه Atria فيه محلات تجارية وايد لكن للأسف آخر مرة سرت له كان وايد منهم مسكرين بسبب الأزمة الاقتصادية وبعد ما لقيت فرصة أصوره .

والحين بأوديكم مكان له العجب !!!

اسمه تشور بازار Chor Bazaar



معنى اسمه : سوق الحرامية ! وله قصة : أول ما احتلو الانجليز الهند كان هذا السوق اسمه Shor Bazaar يعني سوق الضجيج ، فحوروه الانجليز بخبث الى اسمه الحالي ولصق فيه من هذاك اليوم

من الحين أقولكم هذا السوق واااايد وسخ وهذي عينة :



لكني بخبرتي الطويلة دورت ولقيت لكم أنظف شارع ممكن الواحد يمشي فيه



وبتقولون الحين شا الله كالفنج تدخلينه ؟

وبأقولكم عشان أصور لكم الغرائب والعجائب ...

هذا السوق فيه تحف نادرة عبارة عن أنتيكات عمرها عشرات اذا ما كان مئات السنين

وعشان جذيه بتلقون فيه دايما أجانب

صورة تذكارية لي ولبعلي العزيز في بداية السوق خخخخخخخ



محل للخردوات متر × متر ونص لكن شوفو شقايل الأشيا مرتبة



تعالو اتفرجو على الاشيا الجديمة ...

ملال من سنة ألف وستمية وحطبة



كراسي أكل الدهر عليها وشرب



تجوري من أيام الغوص



واللي تبا أي عملة من اي دولة تراه ما يردها الا لسانها



وطبعا ما يوزوون عن التماثيل

المزيد من آخر المواضيع من نفس القسم:

• بسافر لكن ،.........
• رحلة ^الدماني^ إلى عالم والت ديزني -...
• سكن فى كولون ارجوكن
• كافيه الكورن فليكس Cereal Killer Cafe في لندن
• رحلة الي إيطاليا
• رحـــلتنــا عــبــر الخــطــوط البـــريــة...
• رحلة ^الدماني^ الساحرة إلى مراكش الحمراء
• رحلتي الى ارض الجمال اوربا من 7 الى 28 /8...
• رحلتي إلـــى ماليزيــــا ( الرقم١ ) شعارها
• رحلة راهيه دوم الى نيويورك أرض الحرية :)

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[^الدماني^]

حتى صاحب المحل تحول الى أحفورة



لكن المفاجأة الحقيقية هي : الدلال المستعملات !! (اسميه لو أدري ! تشان اغتنيت من بيع دلالي الجدام وقت تفنيش اللي في الستور



وهذا المحل يبيع إلههم الفيل أبو زلومة (عمٌال يرقص في الأدغال خخخخ مع الاعتذار لأغنية أبريق الشاي)



شوفو هذا بالله عليكم !
معلق على اليدار "هذا من فضل ربي" ويبيع تماثيل !!!!



قويات الملاحظة يقولون لي : شو الشي المميز في هالصورة ؟



أفاااا! كلكن ساقطات !
الجواب هو : حبل الغسيل المعلق فوق المحل خخخخخخخ
(ابتسم أنت في مومباي !)



من الأشياء العجيبة اللي يجمعونهم : اللوحات المعدنية الدعائية ونصها حليان !!!



وهذا يبيع كل الاشيا اللي تتعلق بالبحر



مثل المراكب والكرة الأرضية والدوربينات والبوصلات والاسطرلاب الخ



وبقايا الليتات اللي كانت في يوم من الأيام ثريات تلعب دور
(لاحظو البُطل المسند ورا خخخخخ تراه بعد للبيع)



يا لبي أناااااااا !



كان خاطري أتهور وأتقرب من هالمحل عشان أصور محتوياته عن قرب
لكن بعلولي رفض وبشدة !!
ولو شفتوه شقايل كان قابضني ! كأني مقدمة على عملية انتحارية

[^الدماني^]

وهذا المحل اللي له شعبية : كل منتجات كوكا كولا على مر السنين والدهور بتلقونها هنيه



وعودة للوحات المعدنية .. حتى اللوحات التحذيرية لاقطينها خخخخخ لاحظو ام جمجمة ! أظني جالعينها من على شركة الكهرباء

[^الدماني^]

من زمان كانو يبيعون نوع من الغليون اسمه تمباك
ونوع ثاني أسمه نسوار في علب معدنية
وتشان ريتو ! في ناس تيمع هالعلب



وهذي أشكال ثانية منها



وهذا خايف على العملات حاطنهم داخل وبعد يبيع بتـٌة أثرية خخخخخ



بقايا عصي ... (أظني اللي بيتسند عليها بيتكرفس) ...



من الأشيا اللي تقريبا انقرضت في الهند
هي اللوحات المرسومة يدويا عن الأفلام الهندية



استبدلوها الحين بالاعلانات المطبوعة وأحالو الكافات الجديمة على المعاش



بتلقونهم ينباعن في كل زاوية



تشان وحدة منكن خاطرها في تجوري تتفضل



تعتقدون هالاشيا المعلقة في شوه تستخدم ؟!!



تحيدون هالعروسة اللي كانت منتشرة في السبعينات ؟
متواجدة وبقوة في هذا السوق ! يمكن هاي الحين عمرها خمسين سنة .



لو استوت لكم فرصة تنبشون في هذا المحل بتلقون أشياء تتحرونها انقرضت لكنها مخشوشة هنيه



وما بتصدقون شو لقيت ؟ الكنز اللي في الرسوم المتحركة "جزيرة الكنز " .. بس ما لقيت تيم وبمبو خخخخ



هذا يبيع أقنعة ... وبرضة اعلانات الأفلام



ولازم كل وحدة منكم بتلقى موديل تلفزيون من حقبة ما من الزمن السحيق بيعيبها

[^الدماني^]

ومريت على مدرسة ولقيتهم حاطين دروجهم برع .. ما يذكرونكم بفترة السبعينات !
طبعا أنا مب من سناينكم خخخخخ



وعشان موسم الأمطار بتلقون معظم الأسواق المفتوحة مغطاية بطربال أزرق



والحين بأوديكم سوق البهارات



ويييييييييييييييييييييييه ! ما خبرتكم !!
حزروا فزروا منوه شفت من المشاهير في سوق البهارات ؟!!!!!
^
^
^
^
^
غلام مال درب الزلق !....خخخخخخ



"أنا أقول غش" !



"هو يقول حرام!"



"هذا لحم كلب!"



وبهذي المناسبة اللي ما تتفوت ، التقط وياه بعلي صورة تذكارية



لا تفوتون البهارات الطازجة اللي ممكن تسوون منها ألذ بزار



وهنيه بتلقون أشيا غريبة مثل هاي النكهات اللي يستخدمونها في العصاير أعتقد وخاصة الفالوده



والناريل اللي ينباع باكباره أو ممكن يبشرون لكم إياه



وطبعا لا مستوى صحي ولا يحزنون ، هذا أونه يرتب التين المجفف



لكني أنا آخذ أشيا معينه مثل هالكازو بقشوره ...لذييييييييييييييييييييييذ



والقرفه بعيدانها

[^الدماني^]

وهذي مكونات البان وطبعا عليها اقبال منقطع النظير



تعددت "الغراش" والبان واحد



واللي بتعاند ويايه وما بتكمل الجولة بأحط لها هالفلفل في الأكل



وصورت لكم هالصليب المعقوف اللي النازية اتخذته شعار لها
لكن حقيقة الأمر ان هالشعار هو أصلا للديانة الهندوسية



والحين تعالو بنخطف على أجمل (هذا فرع كولابا)



حد يبا دهن عود ؟ أنا أفضل السيوفي



والحين اسمعو أسامي العطور ...

أم الإمارات



عين الإمارات



سما دبي



الجسمي



والحين بأعطيكم فكرة عن كولابا ...

ريلي مايحب هالسوق وبتلاحظون الصور طلعت مهزوزة لأنه كان قايدني ويمشيني بسرعة
وأنا طايحة تصوير ولا أبالي خخخخ

السوق عبارة عن صفت محلات في الهواء الطلق وجدام كل محل في أكشاك



حيول



والمزيد من الحيول خخخ (شو أسوي ما خلاني آخذ راحتي!)



شو رايكم في هذا التي شيرت اللي يعبر عن مشاعري ؟

[^الدماني^]

في أشياء في الهند ما تتغير أبدا ..

مثل بياع الطبول من يوم كنا صغار



وبياع النفاخات العوده
(اللي يوم تردين البيت تلقينها قد كف ايديج خخخخخخخخخ)



وبتلاحظون في خلفية هالصورة محل الألعاب الوحيد العدل في السوق
اسمه سوفينيرز



شويه بأمر Sheetal



عمركم شفتو عطر أزرق ؟



طبعا ما خليت شي ما خميته ،
على قولة ريلي دورتي براسهم وخبلتيبهم خخخخخ



والحين بأوديكم كروفورد ماركت



سموه تيمنا بالمفوض البلدي السابق آرثر كروفورد ورغم انهم الحين غيرو الاسم
الى the Mahatma Jyotirao Phule Market,
الا انه بعده معروف بكروفورد ماركت...

وهذي لقطة للسوق من الداخل



اكتمل بناء المبنى عام 1861 واللي يميزه برج الساعة المزينة بالنحت الفيكتوري (لكن مب ظاهرة في الصورة).

هذا السوق يبيعون فيه خضار وأسماك وعلى امتداده السوق الشعبي



ميزته ان كل محل من محلاته متخصص في نوع واحد من البضاعة

محل ألعاب أطفال في الطابق الأول وبلكونته الفترينه !!!



خرايط حق "حق الليلة" ...



جميع أشكال وأنواع المعاليق ...



أصص للنباتات (على فكرة مرت عدالي سيارة شركة تأجر نباتات !!!)



ورود المعابد ...

[^الدماني^]

وهاذي منتشرة في كل زاوية



والغزو الصيني وصل حتى الهند بالأزهار البلاستيكية !!



وهذ اللي ما نطريه خخخخخ



حد يبغي كروكس ؟



ومن المشاهير اللي صادفيتهم في هالسوق مستر بين !
على الستارة طبعا !!!



ولكن الشي الواضح جدا ...التفنن في طريقة العرض !!

على كرسي بلاستيك ...



على الكتف ...



على بونيت السيارة ...



وهي الطريقة المفضلة لأني شفت أكثر من واحد ...



في السقف ...



على الأرض .. بمفرش ...



وبدون مفرش ...



على موتر سيكل ...



أما الطريقة المبتكرة والفائزة هي
^
^
^
^
^
^
على سحاره

يا عيني عالرومانسية ...

[^الدماني^]

وأختم تقريري بصورة لسيارة الايسكريم





تابعوا الجزء الثالث من رحلة ^الدماني^ الى مومباي
دعوة مفتوحة لتذوق اللذائذ "يا ويلكم مني !"

[العين الدامعة]

ما شاء الله ... انا من يطرووون الهند اقووول وع كيف اسير هناك .. كفاية متحملينهم في البلاد...

لكن عقب تقريرج بتشجع اشوف الحضارة والتحفة ..

[العيناويه3]

ما شالله عليج خبريني المره اليايه عشان اروح معاج خخخخ

[سلمون]

تسلمين حبوبه

حسيتها بلاد حلوه

اختي انا سايره بعد العيد تنصحيني فيها ولا لا لانه خاطري اسيرها وشو المناطق الحلوه عندهم

[بدر0البدور]

ما شاء الله تقرير رووووووووووعة

[اميرة باحساسي]

تقرير حلو واللي زايد حلاوته خفة دمك العسل ماشاء الله عليك

[غلاتي أنا]

ما شاء الله عليج
عيني عليج باردة
اسلوووبج جدا شيييييييييييييييييييييق وممتع
الصراااحة تنفعين اتكونين مدرسة
عشنا الجو وياج
خلاص جني سااافرت بمبي والله
لوو سمحتي ابا دهن عود وجلابية وحدة بس