رحلة ^الدماني^ الى مومباي - الجزء الأول (فندق ترايدنت بالصور)

[^الدماني^]

رحلة ^الدماني^ الى مومباي - الجزء الأول (فندق ترايدنت بالصور)

تاريخ الرحلة : 15 اغسطس 2009



هذي وحدة من أكثر من 30 مرة زرت فيها مدينة مومباي الهندية ..

مهما أشرق وأغرب ، اتم هالمدينة تذكرني بأحلى أيام طفولتي ومراهقتي ...

كل زاوية وكل ركن فيها يعني لي ذكرى سعيدة وأيام حلوة قضيناها

قبل لا تكبرنا المسؤولية أكبر عن سننا ..
وقبل لا تنتشر هالامراض الحالية ..

كنا منطلقين وفرحانين .. وكل يوم نتواعد في مكان

وتمر الأيام وتخلص الاجازة الصيفية ونودع بمبي (سابقا) بالدموع

ونتريا على أحر من الجمر متى بتخلص السنة الدراسية

عشان نرجع نلتقي السنة اللي بعدها .. في نفس المكان ..
ونفس الصحبة .. ونفس الوناسة ..

سامحوني نسيت عمري وسويت لكم فيلم هندي

يالا نبتدي ...

الجوازات والبوردنغ باس والويز جاهزين



نركب طيارتي المفضلة طيران الامارات 300-777



وما اضيع وقت .. على طول ألعب لعبتي المفضلة Tetris
(أدري الحين يالسين تقولون مااال أول !
وريلي بعد دايما يقول لي : ما تملين من هاللعبة ؟)
طبعا غيران مني لأني دايما أفوز عليه خخخخ



أول شي مرينا على جزيرة نخلة ديرة ...



وارتفعنا فوق السحاب وكان الجو على قولة الكابتن :Very
Pleasant



وأول ما وصلنا بمبي كان موسم الامطار الموسمية وكان الجو مغيم



وهذي كمن لقطة للأجسام المائية اللي مرنا فوقها





واللي يزور مومباي لأول مرة ينصدم لهذا المنظر !!



اللي هو ... المساكن العشوائية القذرة المحيطة بالمطار



وتلاحظون انها ملاصقة للمطار ، ما يفصل بينهم الا جدار !!!



هذي المنطقة هي اللي صورو فيها الفيلم العالمي
Slum dog Millionaire
عشان يجذبون انتباه العالم لأحوالهم السيئة



وللأسف معظمهم من المسلمين ، لاحظو المسجد الأخضر اللي أعلى الصورة !

المزيد من آخر المواضيع من نفس القسم:

• بسافر لكن ،.........
• رحلة ^الدماني^ إلى عالم والت ديزني -...
• سكن فى كولون ارجوكن
• كافيه الكورن فليكس Cereal Killer Cafe في لندن
• رحلة الي إيطاليا
• رحـــلتنــا عــبــر الخــطــوط البـــريــة...
• رحلة ^الدماني^ الساحرة إلى مراكش الحمراء
• رحلتي الى ارض الجمال اوربا من 7 الى 28 /8...
• رحلتي إلـــى ماليزيــــا ( الرقم١ ) شعارها
• رحلة راهيه دوم الى نيويورك أرض الحرية :)

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[^الدماني^]

وصلنا مطار Chatrapati Shivaji International Airport



واللي من زمان ما سار بمبي بيتفاجأ بالتطور المذهل اللي استوى للمطار بعد ان تمت خصخصته ، والحين تديره شركة خاصة



هذا مخرج المطار (ما يذكركم بمطار دبي القديم ؟ خخخخ )


وهذي لقطة للمطار من أعلى الجسر



عادة الطريق الى الفندق يمر بمناطق مزدحمة
لكن بعد ما تم افتتاح الجسر البحري اللي يربط ما بين منطقتي
باندرا و ويرلي (وهم أكثر المناطق ازدحاما)
استوى الطريق أقصر وأسرع

هاي صورة من النت للجسر



وهاي من تصويري (من بعيد)



ومن قريب (ولا سان فرانسيسكو خخخخخخخ)



وهاي صورته فالليل ...



ونوصل فندقنا (Trident ) .. أول واحد من اليسار واللي عداله في النص هو Oberoi



نبذة عن فنادق أوبروي : مؤسس مجموعة فنادق أوبروي هو في الأساس والد السيد P. R. S. Oberoi



كان مجرد محاسب في فندق صغير وبعبقريته قدر يكون امبراطورية فنادق عملاقة سماها بإسمه (Oberoi)

ورفعها لمصاف الفنادق الفاخرة العالمية

والحين اللي يدير مجموعة أوبروي هو الابن وعمره حاليا 79 سنة لكنه في قمة الحيوية والنشاط وهاي صورته :



درس في بريطانيا وسويسرا ومعروف بأناقته واشرافه بنفسه على تفاصيل ديكورات واكسسوارات الفندق.

هذا الانسان عبقري مثل والده ! توصل لفكرة غير مسبوقة قبل عشرات السنين انه يأجر فندقه على العلامات
الفندقية الشهيرة لمدة محددة من الزمن (حوالي عشر سنوات) وبعدين يأجرها على علامة ثانية وهكذا :

أول شي أجر الفندق على Sheraton (وطبعا مع وضع شعارهم على الفندق)
ورجع الفندق لاسمه الحقيقي Oberoi
وبعدها بعشر سنوات أجره على Hilton
وبعدها بعشر سنوات أجره على Trident
ولازال حتى الوقت الحالي

أما الفندق المجاور له محتفظ بإسم The New Oberoi
لكن للأسف اتدمر تماما لما استوت الهجمات على مدينتي الجميلة
والحين يعيدون ترميمه.

المدخل تحت مبنى الفندق



وتلاحظون الحراسة المشددة عليه والحواجز الأمنية من بعد الهجمات
وتفتيش السيارات والتفتيش الشخصي عند كل دخول

[^الدماني^]

مقابل المدخل تلقون بوتيك

Gucci


وTods وباقي الماركات



و البواب يضبط نفسه عشان يفتح الباب حق حضرة جنابي



والتصوير ممنوع في اللوبي لكن خذت لكم هالصورة بالدس

الواجهة الزجاجية المطلة على الشارع



ونصعد الى الـ Executive Floor عشان نشوف جناحنا ..

بطاقات الباب ورسالة الترحيب جاهزة



وهذا الفيو .. مطل على بحر العرب !



و على كورنيش Marine Drive



وعن قرب



ما قصروا ! استقبلونا بالورد ...



والشوكولاته



هذا مدخل الجناح ...



وهذا المطبخ الصغير



والمكتب .. أهم شي مزود بالـ WI FI عشان أعرف أخباركم أول بأول وأنا مسافرة

[^الدماني^]

وطبعا خدمتهم المميزة تشمل تجهيز سجادة صلاة ومصحف وبوصلة لتحديد القبلة للنزلاء المسلمين



طاولة الطعام



الصالة



وزاوية ثانية منها



غرفة النوم


وزاوية ثانية منها



الحمام



الـ
Dressing Room


والحين تعالو بآخذكم في جولة في الفندق



يوجد في الفندق مركز تسوق منقسم الى جزئين :

في ترايدنت : متاجر وايد أغلبها تبيع شالات ، سجاد ، مجوهرات ، صيدلية ، تحف يدوية ، أحذية ، ملابس ،
فرع لأجمل ، محلات عطور عربية ، جلابيات راقية ، مناشف وبياضات وغيرها.



وفي ممر يوصلكم لمركز التسوق اللي في فندق أوبروي المجاور واغلب المحلات تبيع :

ملابس جلدية ، اكسسوارات منزلية ، كوشنز مبتكرة ، مخبز معجنات فرنسية ، مجوهرات ، شنط وأحذية وغيرهم

(بس سوووري ! نسيت أصورلكم المحلات)

والحين بعد هالجولة أكيد يوعانين !

عيل ورايه !

فيه في اللوبي كوفي شوب حلو حق الخفايف

وتنزلون الدري الوسطي بتلقون مطعمين :

مطعم Frangipani الايطالي



وفيه ألذ الأكلات الإيطالية والانتركونتيننتال وهذا الفيو ماله اللي أحب أتصبح به كل يوم



وعندكم خيار ثاني مطعم Indiana Jones وهو عبارة عن تاي ومأكولات شرق آسيوية



هاه ! شبعتو ؟

زين عيل بنكمل ...

[^الدماني^]

أقترح عليكم زيارة الـ SPA ...

في الكتيب بتلقون كل خدماتهم



ومنها استخدام الايروفيدا في المساجات



هذا مدخل الـ
SPA


تقدرون تشترون هالمنتجات



والروائح العطرية



وهذي غرفة الانتظار



اشتريت من عندهم ..

زيت للشعر روعة



ومنتج يجنن مصنوع من الزعفران كأنه anti-bacterial طبيعي لمنطقة الوجه (نقطتين منه بس قبل النوم)



وطبعا البودي لوشن يوفره لج الفندق في حمام الغرفة وتقدرون بعد تشترونه



لكني آخر يوم اكتشفت ان كل منتجات KAMA اللي في السبا تنباع في صيدلية الفندق (يمكن تلقونها بسعر أرخص)

وهنيه سويت مساجي المريح



هاه ! ان شا الله خاز عنكم تعب السفر من بعد هالمساج ؟

عيل يالا بينا ..

نلقى زاوية حلوة من زوايا الفندق



بس سامحوني ما أدري شو استوابي طلعت الصورة معواية خخخخ



وناخذ هالدري يمين عشان نسير لحوض السباحة



لكن عشان السنة استوا عندهم جفاف ، سكرو حوض السباحة فصورت الفيو

[^الدماني^]

وعيبتني طريقة ترتيب هالشجرة ، والمصابيح الحجرية اللي تحتها
تعطي اضاءة حلوة فالليل



صورة لي ولريلي واحنا يالسين نتأمل جمال المدينة



تشوفون هالفندق اللي على اليمين اللى قمته دائرية ؟

صدقوا أو لا تصدقوا هذا المطعم الدوار على فندق The Ambassador
من أكثر من 40 سنة !!

يعني مثل المطعم الدوار مال حياة ريجينسي ، حد سهل ؟!!



ومن الجانب الثاني نشوف فندق أوبروي الجديد اللي اتدمر أثناء الهجمات



ومن الصورة المقربة بتشوفون انهم يالسين يرممونه من أول ويديد



تابعوني في الجزء الثاني

رحلة ^الدماني^ الى مومباي – جولة في أسواق الهند بالصور

[المولعانيه]

يااااااااااا خااطري اسير بمبي..

يسلمو خيتووو ع التقرير..

ومامريتي ع صوب كولابه...؟

[أمـ حـمـد]

يا اختي الي يسير بومباي ومايسير كولابه يضيع نص عمره

الحياه كلها في كولابه


يااااربي شوقتيني خيتو انا يمكن فوق 4 سنين كله في بومبي

[شوكليت توي]

روعة الصور ماقصرتي في التقرير الرائع

وشوقتيني للبمبي

يعطيج اعافية

[ام شواخي]

ما شاءالله الصور روعه شوقتيني اني اسير
وانا في انتظار الجزء الثاني

[سيده الوادى]

مشكوره الغلا تقريرك رائع وانتظر البقيه

[al3yon121]

يااااااي بومبي

والله اشتقت لهاااااا ^ ^

وخصوصا كلابااااااااا .. منطقتنا المفظله

[إمارتيه]

رحله راااائعه .. واكيد كلنا مهما لفينا العالم ..
نرجع لمدينة بومباي الهندية .. ذات الطابع الخاص
والذكريات الجميله التى لاتنسي .. انها وجهه اجدادنا وابائنا الاولي
وتسلمين على هذا التقرير المميز .. وفي انتظار باقى الرحله الررررائعه

[emarati]

ماشاء الله روعة

[الغاليه عفاري]

يبالنا سفره لهناك..
نااايس الصور....يعطيج العافيه