تقرير زيارتي لفندق ( الكوف روتانا ) .

**أم كنه** · 2009-07-26, 03:43

قررنا نروح راس الخيمه ليوم واحد لانه كان عدنا شغل ..فحجز ريلي فندق الكوف ..لانه ربعه ماقصروا ويلسوا يمدحونه له ..وخاصه انه يديد ..المهم انا متعوده دايما اخذ فكره عن اي فندق بروحه ..بس هالفندق اعتمدت على ذوق ربع بو الشباب ..قلت كله يوم ..مدامه يديد اكيد بيكون فخم وحلو ..وماكان عندي وقت ايلس ادور عن معلومات عنه فالنت او اشوف الصور ..

كان الحجز عن طريق النت ..فالليل اتصلوا بريلي يخبرونه انه لازم انخلي سيارتنا عند الرسبشن وبتي سياره تشلنا ..قال اوكي ..يوم خبرني ..قلت لالالالا..على هالحر وين فينا نيلس نركب من سياره لسياره ..قلنا كله يوم بيعدي ..

تحركان من بوظبي على الساعه 12 ظ..وصلنا للفندق على الساعه 2 وشي ..طبعا وقت الحر ..

هذا المدخل للفندق ..

بركن ريلي السياره صوب الرسبشن ..ونزل وانا وبنتي اترينا فالسياره فجاه اشوف واحد يفتح علينا باب السياره طلع العامل اللي يحرك السيارات ..عاد هو بكل دفاشه ووقاحه يفتح وانا متعوده اسكر الباب علينا من ينزل بو الشباب بس هالمره مانتبهت ..فقال سوري

بعدها نزلنا اقراضنا وركبنا سياره ثانيه مكشوفه ..قلنا فهالجو الحار !!!

اكيد لازم نتشمس شوي ..

السواق كان يعرفنا على المكان ويأشر بايده على المطاعم ..وقال اذا تبغون شي اتصلوا فيني بمر اشلكم ..قلنا اوكي

طلعت غرفتنا فالطابق الاخير ..مثل نظام عماره صغيره وفيها مجموعه شقق بس بدون ليفت ( اصانصير)

الغرف فهالمكان تبدا وتنتهي بهالارقام

السواق المصري

الممر اللي يودي للغرف

يتبع

المزيد من آخر المواضيع من نفس القسم:

**أم كنه** · 2009-07-26, 03:45

المفاجأه اللي ماتوقعناها الغرفه كانت وايد صغيره ..لدرجه ماكان في مكان نحط سرير بنتي ..فخلينا سريرها وين ريل سريرنا ..ونحنا كنا حاجزين ديلوكس الغرفه الاكبر من الصغيره ..فاستغربنا سعرها 900 من النت والاقل عن هالغرفه 800 ..فقلنا عيل كيف شكل الغرفه الاصغر اكيد محد يقدر يمشي فيها من صغرها ..

المكيف كان يضرب على الليت فيتحرك ويطلع صوت طول ماكنا رقود فحسيته كان مزعج

شكله المطر فالشتاء كان يقطر على السرير واضح من السقف

باب الغرفه كان مسكته وايد واطيه لدرجه بنتي كانت تقدر تفتح الباب وكان الغفل خربان من فوق وكنت احط الشنطه علشان تحس بثقل ..وحتى باب الحمام تفتحه وتحدر تخرب ..

التيلفزيون من النوع اللي يتحرك بس ماعجبني انه الوايرات واضحه وشكله ملفت ..حسيت جني فالبيت ..الفندق يقدري يسوي ترتيب حق هالوايرات

الحين بني حق الحمام ..نصه صبغ بلون بيج وازرق ..ونصه كاشي ..زين شكله ..

الشور العجيب

ماحبيته لانه يوم نسبح الماي كله برع ماكان مسكر كله بس نصه

يتبع

**أم كنه** · 2009-07-26, 03:45

المناظر الطبيعيه من البلكونه

لاحظوا الروم سيرفس ..العمال يوم ينظفون اغراضهم برع وداشين وطالعين فعز الحر ..

فهالجو ماقدرنا نطلع نتغدا ..فطلبنا ..لين ماوصل اكلنا للغرفه ..الله لايراويكم او يشممكم الموظف ..عرقان ويصب عرق ..صراحه مايلامون من الحر ..شغلهم جي ..

رغم انهم عطونا تمديد لليوم الثاني للساعه 4 بس نحنا مارمنا نتحمل وروحنا من الصبح

لين ماوصلت السياره كانت اصغر عن اللي ركبناها امس ومكشوفه وياسلام على اللي بيسوق فينا معرق من الخاطر ..لين وصلنا الرسبشن صورت كم صوره على السريع وقلت وداعا الى الابد

وركبنا سيارتنا وفنص الدرب ذكرنا انه جيك اوت ماسوينا

معنه كنا ميلسين فالرسبشن ..بس من القهر يمكن والحر كنا نتريا اصلا سيارتنا ..واتصلنا فيهم وخلصنا وياهم الحجز بالتيلفون

الاستقبال

قال بو الشباب توبه اخر مره اسكن فيه لو ابلاش يعطوني مابتم ..قلت هذا اللي يسمع اذواق الشباب ..هم ساكنين فراك واكيد يدشون الفندق حق الكوفي بس ..وعلشان جي صار المديح بالفندق وهم مايدرون شو داخل الغرف..

خاصه انه الارضيه كانت كاشي وبارده ..دايما ايب وياي دلاقات حقي بس صدق ثلجت مارتحت وتمينا بنعلتنا ..او متغطين بالكفرات ..لانه الفنادق غرفها دايما بارده ..يوم تكون الارضيه سجاد افضل من الكاشي .. وبنتي خفت عليها من بروده الارض ففرشتلها كفر على الارض علشان تلعب ..

السلبيات اللي حصلتها

انتقالنا من سياره لسياره ..حسينا فكرته لو حلوه بس مايناسب حر بلادنا حتى لو كان شتاء الغرفه مب مريحه

الارضيه كاشي

الغرفه صغيره وايد

مسكه الباب واطيه للي عنده يهال ماينفع

العمال دايما معرقين يوم نطلبهم

ماي الشور كله برع

وسلامتكم

**كيوت ومن** · 2009-07-26, 03:53

ووووويه صدق قهر ><
زين انكم ماطولتو فيه .. تسلمين اختي شكلي ماافكر اروحه حتى

**أم كنه** · 2009-07-26, 04:00

المشاركة الأصلية كتبت بواسطة كيوت ومن

ووووويه صدق قهر ><
زين انكم ماطولتو فيه .. تسلمين اختي شكلي ماافكر اروحه حتى

نصيحه لاتفكرين تروحين

عندج القلعه الحمرا والهلتون افضل بوايد

* أم أحمد · 2009-07-26, 04:10

عيل مرت اخو ريلي راحت وعيبها المكان

**أم كنه** · 2009-07-26, 04:16

المشاركة الأصلية كتبت بواسطة * أم أحمد

عيل مرت اخو ريلي راحت وعيبها المكان

الناس اذواق اختي

لو حرمه اخو ريلي سالتني يمكن اقولها زين

**الوااافيه** · 2009-07-26, 04:19

روعه حلو في الشتاااء والبحر ... بس الغرف يلوعن بالجبد الصرااحه خص لو عندج اكثر من يااهل ,,,

**أم حارب** · 2009-07-26, 04:36

والله لو سألتينا ابرك بس يلا الدنيا تجارب

انا الصراحه جربت الهيلتون اليديد روعه والغرفه أحلى بعد وسعرها احسن عن الكوف ومع ريوق

اهل ريلي سكنوا بالكوف نفس اليوم وإنقهروا يوم شافوا غرفتنا وسعرنا احلى والغرفه أكبر وراقيه

سعر الغرفه 399 مع الريوق من موقع بوكينج

وتعليقاتج على الفندق نفس كلام أهل ريلي

**أم كنه** · 2009-07-26, 05:18

المشاركة الأصلية كتبت بواسطة الوااافيه

روعه حلو في الشتاااء والبحر ... بس الغرف يلوعن بالجبد الصرااحه خص لو عندج اكثر من يااهل ,,,

اكيد فالشتاء بيكون حلو ..بس الغرف ماتساعد ..واللي عنده يهال ابدا ماتنفع لهم هالغرفه لانها صغيره وايد وين بيحطونهم اصلا ..

**أم كنه** · 2009-07-26, 05:20

المشاركة الأصلية كتبت بواسطة عاشقة ولدي

من تقريرج ماشوف فيه أي شي ايجابي لووووووووول
هذا الحلو ان كل وحده يوم تروح مكان تحط تقرير عشان الكل يستفيد ..
يالله ان شالله بتعوضين هاليوم في سيره ثانيه وربي يسعدكم ويهنيكم ان شالله ويحفظ بنوتج ^_^

صدقتي ولاشي جذبني الا منظر البحر .. ترد الروح شوي ..بس اقدر اروح اي مكان وايلس على شاطي البحر واطالعه هههههه بدال ماشوفه من بلكونه الفندق

المره اليايه بجرب القلعه الحمرا ..بس لازم ادور واطالعه عدل

والله يسعدج الغاليه ويهنيج وين ماكنتي

**أم كنه** · 2009-07-26, 05:25

المشاركة الأصلية كتبت بواسطة أم حارب

والله لو سألتينا ابرك بس يلا الدنيا تجارب

انا الصراحه جربت الهيلتون اليديد روعه والغرفه أحلى بعد وسعرها احسن عن الكوف ومع ريوق

اهل ريلي سكنوا بالكوف نفس اليوم وإنقهروا يوم شافوا غرفتنا وسعرنا احلى والغرفه أكبر وراقيه

سعر الغرفه 399 مع الريوق من موقع بوكينج

وتعليقاتج على الفندق نفس كلام أهل ريلي

الواحد لازم يتعلم من تجاربه

بس الغاليه ماكان في فرصه او وقت اسال حد ..كانت رحله سريعه ونحنا في مهمه

وخيرها فغيرها

وسعر الهلتون عجيب تصدقين

اكيد عروض الصيف

ودايما فالنت الحجز ارخص بوايد

**أم مهاية** · 2009-07-26, 08:07

انا ابصراحة بس مريت من برع وماعيبني احسبه مب لين اهناك والحين انتي حطيتي صور احس بعد مب لين اهناك ولا بعد من غير الفطور وانا هذا اهم شي عندي ههههههههه

انا ابصراحة سرت منتجع هيلتون روتانا الغرف رووووووووووووووووووووووووعة والخدمة اروع وبرع الاحواض ابطريقة ماجفتها في فندق معني خبرة بالفنادق بس كان شيء عجيب ويا الفطور واسعاره حلوة انصحكم اتسيروله وانا بحاول جريب انزل تقرير عن رحلتي إن شاء الله

**سيده طموحه** · 2009-07-26, 08:24

المشاركة الأصلية كتبت بواسطة أم كنه

الناس اذواق اختي

لو حرمه اخو ريلي سالتني يمكن اقولها زين

هههههههههههه عيبني ردج ^_^

**سيده طموحه** · 2009-07-26, 08:25

يسلموو عالصور

الموضوع: تقرير زيارتي لفندق ( الكوف روتانا ) .

أدوات الموضوع

عرض

تقرير زيارتي لفندق ( الكوف روتانا ) .

المزيد من آخر المواضيع من نفس القسم:

المواضيع المتشابهه

تقرير زيارتي لفندق الميدان ...تجربة لا تنسى !!!

تقرير المميز ...زيارتي لفندق جميــــــرا أبـــراج الامـــارات

زيارتي لفندق الــكوف روتانا في راس الخيمه

رحلتي لفندق الكوف روتانا