شو يقدموون أهل المعرس للعروس في حفله الخطوبه ؟!

**missuae3003** · 2009-01-31, 04:06

السلام عليكمـ ..

عرايس ..

ربيعتي سألتني على اساس عندهم حفله خطوبه قريب لواحد من أهلهمـ

فسألتني شو نقدمـ للعروس من هدايا في حفله الخطوبه ..

ركزوو بنات خطوبه مب ملجه ..

يعني لو سوو حفله حق الخطوبه شو يقدمون للعروس ؟

طبعا بتكون عزيمه بسيطه ..

انا اقترحت عليها طقمـ وعطور ودخون ..

وحد قالها طقم وساعه ودبله وعطور ودخون ..

انتو شو تشوفون ...

لازم الساعه والدبله في الخطوبه ؟!

لأني انا في خطوبتي يابولي طقم وساعه ودبل وقطع وشيل وعطور

بس على اساس اننا مابنسوي حفله ملجه

فعسب جي يابو هالسوالف فالخطوبه .. لأننا نادر مانسوي عزايم خطوبه

.
.

أما اهل ربيعتي بيسوون حفله خطوبه بسيطه يعني بين اهل العروس والمعرس بس ..
وعقب بيسون حفله ملجه .. بعد سنه او اكثر لظروفهم الخاصه ..

فشو ياخذون للعروس في الخطوبه ؟

بليز ردوو ربيعتي تتريا الرد

لأنهم بيسوون العزيمه يوم الثلاثاء ...

وماشي وقت للتجهيز ..

المزيد من آخر المواضيع من نفس القسم:

**لحظات عابرة** · 2009-01-31, 04:12

والله كل ناس وحسب ميزانيتهم او حسب المتعارف عليه عندهم
دام انهم بيسون حفلة ملجة..ياخذون هدايا بسيطة
واذا هم من النوع اللي ياخذون طقم للخطبة وطقم للملجة ياخذون شوية عطور ودخون ويا طقم الخطبة ويخلونا الهدايا الباقية للملجة عسب ما يحتارون في الملجة
ما اعرف اكثر

**ساره السويدي** · 2009-01-31, 04:32

كيف حفلة الخطوبه؟
انا اللي اعرفه حفلة الملجه في الخطوبه الحين محد يسوي حفلات
واللي يشلونه للخطوبه صينية حلاوه
وللملجه طقم ودبله وساعه كيف ماتم شي وياخذلها طقم ويمكن مايستوي نصيب؟
اول مره اسمع
ربيعتج من وين؟
عموما الله يوفقهم

**missuae3003** · 2009-01-31, 04:37

المشاركة الأصلية كتبت بواسطة ساره السويدي

كيف حفلة الخطوبه؟

المشاركة الأصلية كتبت بواسطة ساره السويدي

انا اللي اعرفه حفلة الملجه في الخطوبه الحين محد يسوي حفلات

ربيعتج من وين؟
عموما الله يوفقهم

حبيبتي الناس من بوظبي

شوفي هم بيسوون حفله خطوبه بسيطه فالبيت

قولي عزيمه يعني ..

لأن الملجه مطوله يمكن بعد سنه ويمكن اكثر ... لظروف خاصه فيهم ..

عسب جي يبون يسوون حفله وينتشر الخبر وتتأكد خطوبه البنيه ..

مب بس رمسه .. فهمتي علي ..

وطبعا الحفله بتكون حريميه .. يعني ام العروس وبناتها وام المعرس وبناتها وفالبيت ...

لا معرس بيدش و لاشي ..

بس اشهار للناس ان هالبنت صارت مخطوبه لفلان ..

**missuae3003** · 2009-01-31, 04:41

المشاركة الأصلية كتبت بواسطة لحظات عابرة

والله كل ناس وحسب ميزانيتهم او حسب المتعارف عليه عندهم
دام انهم بيسون حفلة ملجة..ياخذون هدايا بسيطة
واذا هم من النوع اللي ياخذون طقم للخطبة وطقم للملجة ياخذون شوية عطور ودخون ويا طقم الخطبة ويخلونا الهدايا الباقية للملجة عسب ما يحتارون في الملجة
ما اعرف اكثر

ترا هذيل مايسوون حفلات خطوبه بالعاده على طول يكون ملجه ..

فمايعرفون شو هو المتعارف عليه فالخطوبه ...

اوكي يعني احينه الطقم والعطور ضروري ...

ابا اعرف الساعه والدبله ضروريه بعد والا .؟؟

**فينيسياا** · 2009-01-31, 05:12

عادي في ناس تسوي خطوبة وملجة وعرس على حسب العادات

بس عادة يقدمون طقم مع دبلة وخاتم وعطور

**ساموراي** · 2009-01-31, 08:44

مشكوووووووووووووورة

***هابت ريح*** · 2009-01-31, 09:18

نحن بعد أخو ريلي خطب و حبينا نسوي حفلة خطوبة صغيرونة لان الملجة مطولة
أول شي ترسنا سيارة مير لبيت أهل العروس
وشلينا عشانا و مقبلاتنا وكل ما يخطر على بالج للعشى ومن حلويات و سرنا صوبهم
وكانت عمتيهـ متفقة مع أم العروس أنهن يعزمن الحريم إللي يقربولنا بس
وسوينا صندوقين هدية للعروس
صندوق عطور و دخون و قطع ثياب كل وحده مع شيلتها
والصندوق الثاني عقد ذهب و دبلة

و كانت مثل العزيمة العادية ما فرق ألا أم المعرس لبست العروس قدام الحريم عقب العشى وبشكل بسيط

**كش ملك** · 2009-01-31, 10:07

جاوبت ع سؤالج فالهذربه....

**حلوه بكيفي** · 2009-02-01, 02:00

المشاركة الأصلية كتبت بواسطة *هابت ريح*

نحن بعد أخو ريلي خطب و حبينا نسوي حفلة خطوبة صغيرونة لان الملجة مطولة
أول شي ترسنا سيارة مير لبيت أهل العروس
وشلينا عشانا و مقبلاتنا وكل ما يخطر على بالج للعشى ومن حلويات و سرنا صوبهم
وكانت عمتيهـ متفقة مع أم العروس أنهن يعزمن الحريم إللي يقربولنا بس
وسوينا صندوقين هدية للعروس
صندوق عطور و دخون و قطع ثياب كل وحده مع شيلتها
والصندوق الثاني عقد ذهب و دبلة

و كانت مثل العزيمة العادية ما فرق ألا أم المعرس لبست العروس قدام الحريم عقب العشى وبشكل بسيط

حتى نحن جي انسوي

**ذبحني غروره** · 2009-02-01, 02:10

والله دام انه اشهاااااااااااار وعشان الكل يعرف لازم الطقم مع الدبله عشان اهل المعرس يلبسووونه حق العروووس عشان السالفه تكوون اكيد ان فلانه لفلان

ومبروووك لهم

**حديث الورد** · 2009-02-01, 03:08

هلا مسوه ^_^

بالنسبالنا نحن الخطبه هي يوم اييبون فيها الزهاب والطقم الرئيسي والدبله والساعه وكل شي لانه ما عندنا ملجه

ويوم تستوي انه الخطبه طويله يعطون البنت جسوتها

يعني يودون طقم صغير ودبله بسيطه وهدايا ويحطون جسوه للبنت (بيزات) عشان تروم تصرف منهن كصرف عادي هب مهر

اممممم مادري جان عرفتي عليه

مؤخرا كانت حفلة خطوبة ختيه ويابو الزهاب كامل لانه ماشي ملجه ^_^

ربيه ايسرلهم

**لابسه تلي** · 2009-02-01, 03:50

لااازم يودون الشبكه يعني طقم وساعه ودبله وصينية حلاوه ها شي اساسي ومعروف الحريم يودون والرياييل تراهم يودون مهرها والملجه معروفه انها عقد وماحيد الشبكه يودونها في الملجه المعروف انهم يودونها يوم يخطبون البنت ويوم بيودون الشبكه لازم ياخذون هدايه للعروس يعني خاتم وعطور وقطع وشنط ماركه وهالسوالف كهدايه لها مب زهاااب لان الزهاب غير ولاينسون السويييت ها اهم شي وطبعا لازم يودون عشاهم وياهم لانها خطوووبة ولدهم هالمتعارف عليه عند الكل

**AD Classic** · 2009-02-02, 03:42

مرحبا الغاليه . .

نحن عدنا مايسوون حفلة خطوبه . .
بس اعرف ناس يقربون لنا يسوونها . .

فيه حفله الخطوبة . .
اهل المعرس بس ييبون صينيه شوكليت راقيه + الدبله

اما في حفلة الملجه . .
ييبون لهم اللي يبونه ع كيفهم . .
ساعه + طقم + عطور دخون + شيل وعبي . . باللي مقدور عليهم . .

بمعنى ثاني و اوضح . .
في حفلة الملجه . . تكون صارت حرمته على سنه الله ورسوله . .
ولازم تلبس العروس من فلوسه . .

فهمتي حبيبتي الفكره كيف؟

يعني اهل المعرس . .
مب ملزومين ييبون شي لأهل العروس في حفلة الخطوبة . .
الا الدبله وصينيه شوكليت راقيه . .
لأنها مجرد حجز واشهار . .

يختلف من عائلة لعائلة . .
والافضل تكون بسيطة . .

والله يوفقهم ان شاء الله . .

الموضوع: شو يقدموون أهل المعرس للعروس في حفله الخطوبه ؟!

أدوات الموضوع

عرض

شو يقدموون أهل المعرس للعروس في حفله الخطوبه ؟!

المزيد من آخر المواضيع من نفس القسم:

المواضيع المتشابهه

تفاصيل مهمه للعروس من يوم الخطوبه ليوم الصباحيه

قصيدة قيلت للعروس جدام المعرس !!