كيف اضعف كيف انزل وزني ما عندي اراده ساعدوني

[fo0olh]

السلام عليكم ورحمة الله وبركاته

شحالكم حبايبي شو امسيتو اليوم
انا امسيت تعبانه
ومتضيقه
وملانه
وكارهه عمري
ولايعه جبدي

لو اكمل ما بخلص


والله ما تعرفون يا بنات كم نفسيتيه تعبانه

والله اني متضيقه وايد من عمري

مليت من نفسي
انا بقولكم شو مشكلتيه وانتو قولولي الحل الله يخليكم انا طولي 173 ووزني 85 مشكلتي في الارداف عندي مترهله وايد حاولت ما خليت لا كريم وحتى المشي ما ينفع ما ادري ليش حتى استحي البس لبس قصير لريلي بس عسب ما يشوف ها المنطقه عندي كيف مب حلوه واحس انه وزني طالع على فوق

احس اني ما اشتهي شي من الاكل لكن اي شي عادي اكله ما اشبع فهمتو قصدي يعني اوعى الصبح اسويلي سندويشتين ونس كفيه وارد انزل تحت احس النهار طويل اشربلي كوبين شاي بالحليب واكل اذا موجود اكل عقب الظهر اتسلى ببطاطس ولا حلاوه وبيبسي بس والله احيس اني اكل كميه كبيره والله حتى يوم العشى لازم من الكفتريا مادري شفيني ما افكر في نفسي اريد اهتم في عمري مادري شو الحل ممكن حد يساعدني والله تعبت حتى ريلي حسيتبه يتضيق من وزني يوم يشوف جذيه اجسام حلوه يقولي شوفي الرشاقه عاد هنيه اتضيق واتحسر والله هو يقولي جذيه عشان يحفزني وانا لا والله اتضيق واكل زياده للعلم اني ارضع بعد ها الفتره عندي ولد فديت روحه الله يخليه اليه انشالله

بس والله حلمي انزل من وزني وايستوي جسمس حلو والبس اللي اباه وما استحي من بطني من ريولي والله تعبت خبروني شو اسوي من هنيه دايما افكر اقول ها الفتره لاني موقفه الحبوب منع الحمل بس ما صار حمل الين الحين اقول خلني امتن مب مشكله لاني مابقدر اسوي رياضه وانا حامل بس الين الحين ما حملت وزني على زياده صاعد كل فتره ازيد

شو اسوي خبروني انتظر ردودكم بفارق الصبر

[غلآهم]

حبيبتي ,,,

تدرين ليش ماعندج إراده ؟؟

لأنج ماتحمسين روحج بروحج .. ولأن نفسيتج تعبانه وانتين كآرهه عمرج وين تبين تضعفين ؟؟

أقووولج ,, خلي البروود ويااج مدامج حآسه بعمرج وتبين تتغيرين ,,

سألي مجرب ولآ تسأل .........<مافيني اتصفق منهم لوووووووول

جد والله كنت من قبل مثلج ,, ماابضعف .. ملآنه زهقانه حيآتي تعيسه مره ,,

بس قلت ليش مااجرب واغير حياتي ,,؟

والله دشيت هالقسم .. وبديت أٌقول خلآص من بآجر ببتسم للحيـآه وبودع السمنه ,,

وسويت ريآضه .. تخفيف الاكل مااقولج دايت دايت .. اكل اللي ابي بس بكميه اقل عن قبل ..

والكـل لآحظ التغير ,,

أول شي أبتسمي ,, لآتنتقدين جسمج انعجبي فيه وحببيه وقولي من باجر كل هذا راح يروح وبكون انسانه ثانيه بشكل ثاني ,,

الماااااااي شربي ع الأقل 8 كاسات في اليوم وبتتعودين لآتقولين ماتشتهين او صعب ,,

الشااي الأخضر 5 أكواب في اليوم ع الأقل ..,

المشي أو ريآضه نص سآعه بدون انقطآع ولو تبين تكثرين بعد زين ,,

وشآركي بالقروباات البنات يحمسون بعضهم بعض .. وانتي جيه بتتحمسين وياهن ,, وهني بتضعفين بعد

جربي لمده شهر وجووفي اذا مانقصتين شي .. وبتقولين غلاهم قآلت..

وحافظي ع صحتج يالغاليه ترا السمنه خطيره ,,

وربي يحفظنا وياج من كل شر

[fo0olh]

مشكوره الغلا على الرد والله عطيتيني امل انشالله يارب يساعدني

[VIP.]

السلام عليكم

اتاثرت بموضوعج اي وحده متينه تكسر خاطري ^^

لاني متينه خخ واعرف كيف نفسيتج



حطي فبالج...هالكلام وردديه في بالج كل يوم

ترى الحرمان من الاكل اسهل بكثر من الحرمان من المكاسب الثانيه بالحياة

اللبس والدلع والانوثه ها كله حرمااااان...وما في اكله مهما كانت حلوه تستاهل تحرمج من حياتج

ما في اكله تستاهل تدمرج وتعيشج انسانه كئيبه ...

ولو بديتي حياه صحيه ...اسبوع باسبوع قولي لعمرج بس اسبوع وخلاصصص اسبوع وبرتاح

ويوم توزنين وتشوفيج عمرج ناقصه ما ظني توقفين الرجيم

ما في احلى من الاحساس يوم توقفين عالميزان وانتي ناقصه ..^^

بتضعفين وبيستوي جسمج روعه وبتردين تاكلين اللي بخاطرج وبتستانين مع ريلج

في احلى عن جيه وتكونين مرتاحه؟؟ خلي ارادتج قويه ^^



انا بديت رجيم من 3 اسابيع كنت شراتج متحطمه

اكل اكلي مشوي وسلطات واسوي رياضه نص ساعه باليوم او ساعه

وكل ويكند راحه اكل اللي خاطري فيه

ونقصت كيلوين و700

حلوه التجربه صح الرقم صغير بس مع الايام بتستوي ال 3.... 10 كيلوات

حلوه احساسج يوم بترقدين يعدي اليوم على خير وخلاص خلص اليوم وحان وقت النوم
تقولين لعمرج مر اليوم بسلام وكلت اكل صحي وبترقدين مرتااااحه

[ساسي ذهب]

السلام عليج حبوبه ....
انا حبيت اشااركج واحمسج لاني دبه من الدبااات وكااااااااانت حياااتي تقريبا شراتج .....اكل فاكل فاكل والله اي وقت اكون فاضيه ومتلله اكل مااااااااا شئ شغل اكل ورقاااد بس عقب عيد الفطر اتحمست ما اعرف شو ياني والله عصبت قلت ليش انا جيه شو ما فيه هالدنيا الا الاكل والرقاد صدقيني وصلت حتى اني ما احب اتحرك والا اسير مكان كله احب اليلسه واذا سرنا نتعشى عالبحر ايلس ما اسير امشي ويا خواتي ..........شو صااار ما ادري شجعت عمري والله محد شجعني وبديت الرجيم...
كان وزني 90 تخيلي وانا قصيره ...ما بقول جم طولي ..بس قصيره والله قلت لازم انزل وخففت اكل كنا اكل عيش ابيض خمس ملاعق وسلطه صحن كبير بس دون طماطم ومااي ما اوصيييج وايد اشربي مااي امم وسمج مشوي او دياي ...العشاااء كلي اشيااء خفيفه ...فبدايه رجيمي كنت اكل ويا اهلي بس شوي ما اثجل واقطعي الكافتيريا انا بخلصج منها تشوفين الهندي كيف عرقاان وخايس اففففففف كيف نامن على ابطونا عندهم ...ووووووووووع انا اخويه دوم كان يقول لي جيه عسب اتحمس احلفلج بالله اني الحين اطلب مره كل اسبوعين او ثلاثه ...طولت عليج ادري بس لازم احمسج ...السمنه مب منها فايده ...ارقصي وااايد لو ما تعرفين ادلعي فجسمج خلي وقتج كله حركه يعني بتحسين انج رشيقه ...

انا بديت من تاريخ 15 10 2008 والحين اسير الجم كل يوم ما عدا الجمعه كان وزني 90 والجين 83 نزول صح عالبطئ لكني مب يااائسه وبقاااوم لين اوصل اتخيلي ان ريلج فوق قمه يبل وتبين اتسيرين له شوفي جدام ولا تشوفين ورااا وانا ويااج اذا تبين رقمي ايميلي للتواصل انا حاضره بس امشي دووووم والله له مفعووووووول عجيب واشفطي معدتج للداخل وبرع جنج تتنفسين والله شوفي النتيجه ...وان شااء الله نضعف ياارب وسوري عالاطاله بس من الحره

[ورد جـوري]

بالعكس الاراده مابتي الا منج اختي

تدرين عقب ما عرست متنت بشكل مب طبيعي
و انا و ريلي من النوع اللي انحب انجرب اكلات يديده فكان صعب علي اسوي شي اسمه رجيم صراحه

بس عقب حسيته بدا يلاحظ انا بصراحه ما سويت لا رجيم و لا غيره

كل اللي سويته اني خففت اكلي خاصه عالعشا
ولا تنسين الجاي الاخضر و الماي بكميات

اما بالنسبه للترهلات انا صراحه اول ما بديت انقص وزن ما اهتميت فالرياضه
فحسيت بترهلات بسيطه
سرت اشتريتلي كريم للترهلات من جنجر حسيته فادني
و الاهم من كل ها رياضه المشي لانها تشد الجسم كله خاصه المناطق اللي تحت
و حاليا ابا اجرب كريم نيفيا للترهلات و السليولايت يمدحونه

السالفه سهله اهم شي تغيرين عاداتج الغذائيه و تعودين عمرج عالمشي نص ساعه فاليوم

انا نقصت 8 كيلو للحين و اعتبره انجاز حق وحده تحب الاكل شراتي لووول
بس يبين علي نقصت اكثر لاني اتريض دوم

و بالتوفيج اختي

[((أم_حمد))]

موفقة الغالية