كيف أعلم ولدي على هالموضوع !!

**زكية الذكية** · 2007-01-22, 06:55

انا تعبت !!!!

ولدي عمره 3 سنين .. و صارلي أكثر من 6 شهور أريد أعلم ولدي على الحمام (وانتوا بكرامه) لكن مافي فايده ...
تعبت حتى ملابسه صارت تخلص ماتكفيه ..

جربت وايد طرق وكله النتايج تكون فتره قصيره ويرد على طبعه الجديم ...

شو أسوي وياه ؟؟؟ هل الوضع طبيعي ان يتم هالفتره مش متعلم ؟؟

المشكله ان ما شالله البيت فيه وايد يهال من سنه .. و24 لعب .. ولما يلعب او يطالع تلفزيون ما يحب يسير الحمام وعادي يسويها مكانه ولا يخبرني !!

ارد البسه حفاظه ؟ تعبت !!

**L@dy M@ke_Up** · 2007-01-22, 07:36

الغالية المفروض تعلمنيه من عمره 2 وشوي
حاولي انج تعصبين عليه شوي وتتعاملين معاه بحزم ويوم تحسين اكل او شرب بعد نص ساعة او ساعة امسكيه من يده وخذيه الحمام وايلسي معاه لين يخلص هناك ولو طول معاج الموضوع او تعبج وصارخ وعصب تحملي
سهر وتشوفينه بروح يسير الحمام وربي يحفظه لج الغالية

**زكية الذكية** · 2007-01-22, 07:56

صدقيني جربت ......... لكن بعد مافي فايده !!

**أم عزه** · 2007-01-22, 10:45

أول شي ماشي عمر محدد لتعليم الطفل على استخدام الحمام.. و مب كل اليهال عندهم القدره على التحكم بالمثانه ،،لان سبحان الله قدراتهم تتفاوت.. فإذا كان الطفل مب قادر يسير الحمام لازم ما نضربه أو نصارخ عليه.. لازم نفهمه.. وما نقدر نفهمه إلا إذا نزلنا لمستوى تفكيره..

كيف تقدرين تعرفين إذا طفلج جاهز للذهاب للحمام؟؟؟ أول شي لازم يكون قادر على التعبير عن حاجاته.. مثل النوم والجوع والعطش .. مب لازم بكلمات واضحه المهم انه يعبر بطريقه من الطرق..

إذا بديتي التدريب على الحمام لا تلبسين الطفل بامبرز خلال النهار لأنج إذا لبستيه بتخربطينه 100%.. وحاولي تلبسينه بس يوم يرقد الفليل وبس.. لازم يكون لابس شي سهل الخلع،، تاخذينله النونيه (القيصريه) وتحطينها في الحمام.. أول شي تاخذينه كل ربع ساعه .. عقب كل نص ساعه.. وبعدين كل ساعه على حسب قدرته.. فهو بيبتدي يتحكم في مثانته.. المشكله اللي ممكن تواجهينها هي.. نمبر تو.. وانتي بكرامه لان هاي الشي يباغتهم وما يعرفون انه نفس الشي.. حافظي على برود أعصابج واشرحيله مره واثنين وثلاثه.. وإن شاء الله بيتعود..

ممكن تستخدمين وياه طريقة المكافأة.. أول شي تختارين شخصية يحبها ولدج.. على سبيل المثال بارني،، سبايدر مان،، تلي تابيز.. وبعدين تحاولين تشترين ستيكرات لهاي الشخصية وإن ما حصلتي حاولي تطبعين من الانترنت بعض الصور الصغيره.. وبعدين سوييله جدول وعلقيه في مكان ممكن يوصله بسهوله.. كل ما يسير الحمام قوليله يالله عشان لنته سرت الحمام وما وصخت عمرك بنسير نحط ستيكر وإذا كملته كله باشتريلك هديه... لا تقولون فلسفه فاضيه الحمدلله أنا جربت هالطريقه وترى والله الصغارية أذكى عنا بوايد.. ولازم ما نتستهين بذكاؤهم أو نقول لا ما يفهمون .. والموضوع ما بينجح إلا بتفرغ كبيرللطفل وطولة بال..

وعموما كل اليهال ينشغلون باللعب وينسون يسيرون الحمام.. لازم تذكرينه إذا شفتيه طول.. وإذا ظهرتو من البيت لازم تودينه الحمام قبل ما تظهرون.. أرجع وأقول لا تلبسينه البامبرز حتى لو ظهرتو.. وإذا قابضين الخط شلي حمامه الصغير وياكم..

بس مرات بسم الله على عيالكم جميعا حد من اليهال يكون عنده التهاب في المسالك البوليه يخليه ما يقدر يتحكم في انقباضات المثانه وممكن هاشي يخليه يسوي على عمره وانتو بكرامه لازم فيي هالحاله نرجع لذوي الاختصاص وهم الدكاتره طبعا..

طولت عليكم.. بس حبيت أساعد وأتمنى إني ساهمت ولو شويه .. أنا قاريه هالطريقه من كتاب انجليزي .. وسبحان الله طبقتها ونفعت وياي.. والله يعينج ويعينا جميعا على تربية عيالنا..

تحياتي،، أم عزه

**um_mayed** · 2007-01-23, 09:05

إذا كنتي ربة بيت وما تشتغلي الموضوع اسهل انا كنت ما أشتغل يعني الوقت كله مقضتنه ويا عيالي المهم ولدي الكبير اللي عمره الحين سنتين و10 شهور يوم صار عمره سنه بديت اخفف عليه البامبرز يعني البسه وبعد 3 ساعات اشيله وخليه ساعة أو ساعتين ما يلبسه المهم يوم صار عمره سنة ونص وبفترة صيف خصوصا بديت بجدية اعلمه على الحملم صح إنه صغير بعده بديت اعلمه كيف يقعد بالحمام ويبتله الله يكرم من محل الاطفال مقعد خاص فيه فديته وعلمته بعد إنه اقول متى يبا يروح الحمام شوي شوي وبصر هذي اهم نقطة إنج تصبرين وما تصرخين عليه بعد شهر اتعود اسير بروحه الحمام وساعات يسويها على نفسه بعدها بشهر صرت ما البسه البامبرز إلا يوم يرقد وإلا انروح مكان بعدها باسبوعين صرت اوديه بيت اهلي من غير بامبرز المهم يوم صار عمره سنة و10 شهور استوى يروح بروحة الحمام وما يسويها إلا اذا خبرني واستويت اوديه اي مكان من غير حفاظ وحتى بالليل ما صرت ألبسه يوم صار عمره سنه بس ما اعطيه وايد سوايل بلليل وخليه يروح الحمام قبل ما ينام بهطريقة بتريحي عمرج ولدج وبس أصغر صدقني اليهال على ما يتعود مب مهم عمره ..

**saasmo** · 2007-01-23, 09:14

فديتج انا عانيت من هالشي لحد ما وصل عمره خمس سنوات ولازم تخلين في بالج انه مو كل الاطفال نفس الشي كلن له قدراته

اول شي اتحملي اتفشليه عند حد او تصرخين عليه او تضربيه اتبعي وياه اسلوب السياسه

وفي طريقه حلوه سويها معاه يبي ورقه وخلي فيها اسمه واسم حد من خوانه الي قريبين من سنه

وسوي جدول خلي لهم في غرفة النوم بعيد عنه عشان ما يلعب فيها

ويمعيهم وقوليلهم الي بيروح الحمام وبيتغسل ويغسل ايده قبل لا يطلع يخليله صح وخليها لمدة يومين فقط والي كله صح بتشتريله الشي الفلاني يكون شي هو وااااايد يحبه وعطيه اذا ياب صح مثل اخوانه

وريحي اسبوع وردي سوي الحركه لمدة اسبوع لحد ما يتعود والله يهديه لج يا رب