علموا الصغاريه هاي الاغاني بدال شاطر شاطر و شخبط شخابيط

**زهرة السوسن** · 2008-11-04, 08:14

علموا الصغاريه بدال شاطر شاطر و شخبط شخابيط هههه

الأغـــــــــاني الشعبية الإماراتية

حمامه نودي نودي .. سلمي على سعودي
سعودي ساير مكه .. بيب ثياب بو العكه
بحطه في صندوقي .. صندوقي ماله مفتاح
والمفتاح عند الحداد .. والحداد يبغي فلوس
والفلوس عند العروس .. والعروس تبغي عيال
والعيال يبغون حليب ... والحليب عند البقر
والبقر يبغون حشيش .. والحشيش فوق اليبل
واليبل يبغي مطر ... والمطر عند الله

خوصه بوصه يا النبوصه كلاج الدود من حندود
ليلى ليلى عطينا سيفج بنلاجي به عبدالله بن سلطان
لادغتنه عقربيه شقربيه دوسة خيل ولا مطيه

عمتي مرت ابويه ... الله يسلط عليها
يوم يتها الهديه .. دستها في الزويه
تتحسبني طلاّبه .. اطلب على البيبان
ما جن ابويه تاجر ..بيصوغ لي الذهبان

طاحت عليه نفه .. قوموا اشترولي دفه
طاح المطر برعوده .. كسر حوي سعوده
طاح المطر بيد الله ... كسر حوي عبدالله
طاح المطر من فوق .. كسر حوي بن طوق

ولد عمي ما بغاني ... تنقى علي واختار
تنقى ام السلاسل .. ام الشغاب الطوال
حلفت انا لزامط .. بالند وبالبياض

يا عليا قومي ركبي ... بيقودبج علوه
المطرح والزوالي .. جدامج ربعوه
نهار ما صبحتي .. المدفع ثوروه
الحلوى في القواطي .. والنخي نثروه

يا فاطمة بنت راشد .. يا شيخة البنات
انتي قصيره وبيضا ... والخشم مكعبات
يا قصة يانثرية ... تنثر على الحياة

يا عليا بنت ابوها ... والخطاب اخطبوها
سبعة ورا البيت .. والثامن عند ابوها
واحد يدق الزعفران ... والثاني يقول يا ليتني خادم ابوها.

يا بنية ما دريتي ... عن خطار لفوج
قالت لفوني غبشة .. على خيول وبوش
مصلين الجمعه ..صقر ولد الشيوخ
يالس على الدجيجه .. يالس ويعد فلوس
يا الطاسه يا المخبوقه .. ما ضمتها الفلوس
يا بنيه موتي غصه ... اذا انا مريت
انا سلبت فوادج ... في السكه واتليت
يالغرفة يا الشرجيه ... بناها بو علي
حق عاشه البدويه .. بنت محمد علي

من اليوع لو متّي .. ما يوزج شتّي
بيوزج تاير .. لو بالحجي جاير
يا بنيتي يالزينه ... صبي لبوج دهينه
جان ما رضى ولد عمج.. صبي واجلعي عينه

يرقد وليدي رقده هنيه
رقدة الغزلان في البريه
يرقد وليدي طيب الله نومه
وعدو وليدى ما هنا بمنام

عيال عمي سبعة .. خلوني باتنقى
نقيت بو طاقية .... بو يوخه ما رضى
زامط عليه بخشمه .. يا خشم اليوحره
خشمي طويل وغاوي ..شفته في المنظره .
حيا الله اللي يباني .... يسلم العشره

يامي يامي ياماية ...راعي البحر ما ابااه
يشل مزمات العومة...وتصل على علباه
ابا وليد عمي من خنيره ورداه...ما هد خطام الصفرا ولا ضيع عصاه

يا يراده طيري طيري والحجي عصفور..
ياويل من له عدة والذيب غيل في الغنم
بي من باطن حشاية..
ولا بي عسر من دين..ما تلحجة اليدين

المزيد من آخر المواضيع من نفس القسم:

**النرجس** · 2008-11-04, 08:17

بارك الله فيج

**خفيفة الروح** · 2008-11-04, 08:20

يا سلام أشكرج ................
الحين بنسخهن وبعطيهم العيال

**AZYA** · 2008-11-04, 08:20

خسارة كنت حافظة وايد من الأغاني الشعبية وأغنيها لعيال أختي بس نسيت بعضهم

**زوجة علي** · 2008-11-04, 08:25

والله إنج أبدعتي أختي الغاليه وذكرتينا باجدادنا واناشيدهم التراثيه الغاويه الله يجزيج كل خير

**um sheikha** · 2008-11-04, 08:26

أنا أول المطبقين لموضوعج .. بخلي شيخه أتغنيلج أياهن عند باب الحجره
هااااااااااااااااااااااا
هب تحتشرين علينا
يزاج الله خير فديتج على هالموضوع الأكثر
من

**قصايد الهاملي** · 2008-11-04, 08:31

^..^ حلوات

انا تقريبا حافظه شوي منهم

منوووو بيسمعني ؟؟؟ ^*^

مشكوره اختي

**زهرة السوسن** · 2008-11-04, 08:51

المشاركة الأصلية كتبت بواسطة النرجس

بارك الله فيج

مشكورة الغالية ع المشاركة

**زهرة السوسن** · 2008-11-04, 08:52

المشاركة الأصلية كتبت بواسطة خفيفة الروح

يا سلام أشكرج ................
الحين بنسخهن وبعطيهم العيال

حفظيهم كل ويك اند اغنية وسكعيها طووول الاسبوع انشرو الثقافة البدووووية طال عماردكم

مشكورة ع الرد الغالية

**زهرة السوسن** · 2008-11-04, 08:55

المشاركة الأصلية كتبت بواسطة AZYA

خسارة كنت حافظة وايد من الأغاني الشعبية وأغنيها لعيال أختي بس نسيت بعضهم

اختى الاغاني عندج احفظي اختى واعيال الفريج عادي كلهن سطرين وجددي الذاكرة

مشكورة ع الرد

**في قلبه** · 2008-11-04, 09:01

يالله ..تسلمين ويــــــــــــــــــزاج الله خير ..انا فديته ولدى من نركب السياره ايشأر على المسجل ماما نودى نودى

**أميرة بوظبي** · 2008-11-04, 09:01

ذكرتيني بيدتي فديييييييييييتها ...

كانت دوم تغنيلنا يوم كنا صغار ...

وكنت احب اسير لها بس عسب اسمع اغانيها ...

كنت ازعل لانه امي مب حافظتنهم عدل ...

سويتلهم برينت ... بغنيلهم لولدي بدل هالخرابيط اللي يسمعونها الحين ...

ربي يعطيج العافية الغالية ...

**شبيهة عمري** · 2008-11-04, 09:02

انا كنت اسمع اغاني الحين الحمدالله بطلت الحمدالله

**زهرة السوسن** · 2008-11-04, 09:08

المشاركة الأصلية كتبت بواسطة زوجة علي

والله إنج أبدعتي أختي الغاليه وذكرتينا باجدادنا واناشيدهم التراثيه الغاويه الله يجزيج كل خير

الله يجزي الجميع الخير والصحة والعافية طال عمرج هاي في الذاكرة وان شاء الله ما تخووووز عنها مشكورة ع المشاركة والرد

**زهرة السوسن** · 2008-11-04, 09:09

المشاركة الأصلية كتبت بواسطة شبيهة عمري

انا كنت اسمع اغاني الحين الحمدالله بطلت الحمدالله

فديتج هاي مثل الانشوده مب اغاني بدل ما اليهال يحفظون الخرابيط الموجودة احسن يحفظون شي من الثراث .... لام حتى كلماتها غير عن الاغاني .... مشكورة ع الرد

الموضوع: علموا الصغاريه هاي الاغاني بدال شاطر شاطر و شخبط شخابيط

أدوات الموضوع

عرض

علموا الصغاريه هاي الاغاني بدال شاطر شاطر و شخبط شخابيط

المزيد من آخر المواضيع من نفس القسم:

حياكم الله

يا مرحبا الساع

يا مرحبا السااااع

يا مرحبا الساع

هلا الغالية

المواضيع المتشابهه

دخيل الله ثم دخيلكن تساعدني أبغي دكتورة شاطر ولادكتور شاطر أرجووووووكن

شخبط شخابيط............

محتاجة لصباغ شاطر ورسام شاطر وعمال جبس شطااااار

منو يعرف استشاري شاطر مع مقاول شاطر في دبي لان ابوي بيبني بيته

¨°o.O (شخبط ... شخابيط ) O.o°¨