ملف كامل عن تجاربي مع "البشرة الدهنية + حب الشباب"

**Bronzya** · 2008-03-08, 22:54

طبعاً كلكم تعرفون انه حب الشباب ماله علاج 100%
انا الصراحه مب من النوع اللي يميل للعلاجات الكيميائية او الأدوية والحبوب بأنواعها مثل الريكوتين، لأنه مافي شي مضمون 100% وطبعاً يختلف من بنت لبنت حسب نوع البشرة وطبيعة جسمها...

ومع ذلك لازم ما نهمل هالمشكلة ونحاول نقلل منها قدر الامكان،
ألحين انا الحمدلله ويهي اهون بس تطلع حبوب خفيفة قبل الدورة الشهرية

وانا حبيت أفيد اللي تعاني من نفس مشاكلي

أولا: من الخلطات الطبيعية اللي فادتني:

1- قناع الروب ...... مايباله شي غير انج تحطين روب من الثلاجة عويهج مثل الماسك لمدة 20 دقيقة وعقب تشطفينه بماي دافي - أنصح استخدام الاسفنجة لنها تنظف عدل-

2- قناع الجزر + العسل...... تخلطين كمية متساوية من عصير الجزر و العسل وتحطينه عويهج لمدة 20 دقيقة وعقب اغسلية بالماي الدافئ
"هالماسك وايد مفيد للبشرة الدهنية وحب الشباب وانا لاحظت الفرق من اول استخدام"
ملاحظة: غطسي قطنة في هالخليط وامسحي بها ويهج يعني سوي منه كمية بسيطة بس، مثلاً ملعقة عسل وملعقة عصير جزر لنه يسد واذا حبيتي تسوين كمية صبي شوي من الخليط في فنيان وهذا استعملية حق ويهج والباقي اشربيه لنه مفيد وايد بعد.

3- قناع الصندل........ اخلطي كمية من بودرة الصندل مع قطرات من ماء الورد حتى يصبح كالعجين، وزعيه على ويهج بالتساوي مع تجنب منطقة العينين والفم لمدة 20 دقيقة ثم اشطفيه بالماء الدافئ
ملاحظة: بودرة الصندل اشتريها من الصالون واكيد بتلاقينه عند العطار لونه يكون ياي على اصفر

4- زيت اللوز....... كنت ادهن ويهي بزيت اللوز واسويله مساج لمدة 7 دقايق تقريباً وعقب اخليه على ويهي من ربع إلى نص ساعه، زيت اللوز مفيد جداً في تخفيف النمش والكلف والتصبغات وآثار ما بعد حب الشباب
ملاحظة: زيت اللوز اشتريته من عند العطار ومره لقيته قبل في الجمعية بس لا تاخذون مال الطبخ خخخ

ثانياً: الكريمات والصوابين اللي فادتني:

1- منتجات اكسترا ديرم "extraderm"........
تنباع في الجمعيات وكارفور وكل مكان
ما يتحتاي اقول اكثر يوم تشوفون الصابونه اقروا شو مكتوب وراها وبتحسوون بالرضا النفسي قبل وبعد الاستخدام ان شاء الله

2- منتجات نوماركس "no marks".........
تنباع كل مكان وهي غنية عن التعريف
خاصةً الكريم يزيل البقع والنمش والكلف وتلاحظين الفرق في أول اسبوع يفضل استخدامه مرتين يومياً

3- كريم فير اند لفلي "Fair & Lovely"..........
الكريم اللي مكتوب عليه skin Clarity مضاد للشوائب، مرتين يومياً

4- منتجات Maria Galland انا اشتريتها من صيدلية
غسول وتونيك وكريم

*******************************************

ملاحظة: انا اكثر فترة استفدت فيها يوم سويت كورس كامل حق عمري
مثل الفيشيال في الصالون تقريباً نفس الخطوات بس اسويها بروحي في البيت مرتين اسبوعياً ،، اول شي انظف ويهي عقب اسوي تقشير وعقب مساج بزيت اللوز وعقب ماسكات .... إلخ،، كل الخرابيط اللي في ويهي خازت في اقل من شهر وكلهم لاحظوا الفرق انه بشرتي استوت صافية.

جربت وايد اشياء من باريس غاليري بس خساير عالفاضي في المكياج وفي المستحضرات الثانيه مافادني شي
وجربت خلطات وكريمات واااااااااااااااايده بس كتبت اللي فادني اكثر شي من بينهم

أتمنى اني أفدتكم وأي استفسار انا حاضرة

المزيد من آخر المواضيع من نفس القسم:

**بنت سلطان** · 2008-03-08, 23:16

يختي اناااا قمت اعااني يوم ورى يوووم من حبوووب شبااااب الكل لالالاحظ علي يقووولي شو بلا ويهج قااام يتشوه وحتى اسمر يوم بعد يوم بسبت الحبوووب وانا مشكلتي بعد اتعبث في الحبوووب عشااان يخوووز مب رااايمه بالعكس يتم اااثراااره من الحبوووب والله عادددي لو اطرش لج صوره ويهي بتنصدمييين يااااريت اساااعديني

**محد شرااتي** · 2008-03-08, 23:50

يعطيج العافيه....
بنت سلطان سيري عند دكتورة جلديه....

**عذبه22** · 2008-03-08, 23:55

تسلمين الغاليه على عرض تجربتج وان شاء لله نستفيد

انا بين فتره وفتره تظهر لي حبوب على خفيف
بس في فتره بدت تطلع لي حبوب وايد حتى يبهتي اللي ماعمري اطلعت لي فيها قبل بدت تطلع لي
بديت استخدم هالقناع : روب + نشا + ليمون >> فضيع وربي ما استغني عنه
وفي نفس الوقت وقفت اكل الشوكولا والخرابيط اللي تزيد الحبوب واهتميت في تنظيفها وتحسنت بشرتي وايد عن قبل
الحمد الله

**وحده من بنات دبي** · 2008-03-09, 00:12

السلام عليكم
اختيBronzya اشكرج على موضوعج

وابغي اسألج بودرة الصندل من اي صالون تشترينها؟

وبعد منتجاتMaria Galland من اي صيدلية؟ لاني ادور هالمنتجات من فترة

واسمحيلي على الاسئلة

**Bronzya** · 2008-03-09, 15:49

السلام عليكم
اولاً مشكورات عالردووووود كلكن
ثانياً بنت سلطان الله يعطيج العافية انا مع محد شراتي انصحج تسألين الدكتور ويفضل عيادة خاصة لنه المستشفيات احس ما يعطونا حقنا،
انا زمان سألت اخصائية وقالتلي يبالج تنظيف بشرة وعقب تقشير ومادري شووووووو وانا كنت صغيره يعني حرام عليها تقولي اسوي تقشير بالكرستال وانا كنت 18 سنه! وعقب الخسااااااير عرفت انه انا ماينفع معايه الا اهتمام وعناية بالبشرة لنه الحبوب بتظهر في ويهي يعني بتظهر قبل كل دورة شهرية،،، تعلمت اني ما العب فيهم وأشرب ماي واااااايد..... واسوي الكورس اللي ذكرته فوق

وحب الشباب 3 انواع او مراحل
الاول اللي يكون خفيف وسطحي في الويه
الثاني اللي يكون وايد
الثالث اللي يكون مغطي الويه وكله مخترب وهذا علاجه اطول واصعب
فأنا انصحكم اللي تحس عمرها تعاني من هالمشكلة على طول تروح تتعالج لنه كل ما زادت فترة انتظارها زادت صعوبة العلاج وطولت مدته

الأخت وحدة من بنات دبي: بودرة الصندل اشتريتها زمان من صالون في سوق الحمرية المركزي واعتقد ينباع في كذا صالون
و منتجات ماريا جالند بعد اشتريتها زماان من الصيدلية اللي في مركز حمر عين واعتقد تنباع في الصيدليات الكبيرة بعد

والله يعطيكم العافية

**النفس الخجولة** · 2008-03-09, 16:04

الاخت عذبه 22 ممكن كميات القناع يلي تسوينه

**عزاوي** · 2008-03-09, 17:47

بنات من خبرتي احسن شي طبيب الجلد سيرن عند دكتور جلديه وهو بيساعدكن بحل المشكله انا خسرت فلوس على الفاضي ومحد فادني غيره
انا صارلي اتعالج من 3 شهور عند الدكتور بتوام والحمدلله الي يشوفني ما يصدق كيف كان ويهي وكيف صار

**بنت سلطان** · 2008-03-09, 20:39

تسلم الغلا على النصيحه هاااي الحبوووب بعد زاد علي وقت الدوره
بحييينه ان شاااء الله يوم يخلص عني بحااااااول انه اسوي لي برنااامج حق ويهي
تسلمن واااايد على نصيحه

**Um 3baiD** · 2008-05-27, 22:57

عزاوي .. انا ماخليت دختوره ماسرتلها ..
عندج سعاد لطفي عطتنيه حبوب و خلاف يوم خلصت لعلاج ردن لي لحبوب وديه ثانيه ..
و اميره الأميري .. بغت تعطيني نفس الحبوب بس اتعذرت منها ..
مع العلم انه لحبوب لي فويهي مب شديده ..
ماشي اخير من الماسكات الطبيعيه ..
و الراحه النفسيه اتأثر بعد ..
و تقليل من الدهون و الكاكو ..
بس مايضر ان سرتي ..

ختيه برونزيه ..
يعطيج ربيه عافيه عالطرح المميز
و بونيه سامعه عن لعسل انه ايخوز الكلف و النمش ..
لا خلا و لا عدم ياربيه ..

**فارسة دبي** · 2008-06-01, 19:43

انا سرت.. عند الدكتورة... وقالت لي..اهم شي..النظافة و العناية بالبشرة باستخدام الاقنعة الطبيعية..
بس اهم شي النظافة ... اقصد تغسلين ويهج عدل وبعدين تمررين بماي ورد ومن بعدها الاقنعة اللي ذكرتها اختي برونزية

بس قبل لا تسوين اي قناع نظفي البشرة علشان تتهيأ للخطوة المقبلة...

ومشكوووووووورة يا برونزية..

***دهن العود*** · 2009-03-16, 14:00

اختي برونزية موضوعج يجنننننن بس لو سمحتي ممكن تراوينا خطوات الفيشال اللي تسوينه فالبيت
بلييييييز من زمان بخاطري اتعلم

**أنت عمري1** · 2009-03-17, 06:33

يعطيج العافيه

**Um 3baiD** · 2009-03-17, 10:28

يستاهل الرفــــــع

**نور حياتي** · 2009-03-17, 11:59

يعطيج العافية

الموضوع: ملف كامل عن تجاربي مع "البشرة الدهنية + حب الشباب"

أدوات الموضوع

عرض

ملف كامل عن تجاربي مع "البشرة الدهنية + حب الشباب"

المزيد من آخر المواضيع من نفس القسم:

المواضيع المتشابهه

"""""" من تجاربي تعطير الشعر""""""""

""""""""" دعائكم يا بنات جزاكم الله خير """""""""""""""

حب الشباب ... وحل لمشااكل البشرة الدهنية