توأم خديج

[دلوعة ربعها]

السلام عليكم خواتي اتمنى منكم المساعده واي حد عنده خبره يساعدني انا ربيت من شهر طفلين خدج والحمدالله وما اعرف كيف اتعامل معهم وماعندي حد يساعدني والخدامه ماتعرف شيء وانا خلاص تعبت من السهر هاذا وبس اسبوع طالعين من المستشفى وفي واحد منهم دوم يزوع من انفه ومايعرف يتنفس وانا اموت رعب ما اعرف شو اسويله وكل الليل يالسه اطالعهم اخاف حد يزوع ويختنق لا سمح الله ونفسي اعرف شو الحل معهم لان جسمي تعبان من العمليه وبغيت اسم دكتور للخدج بابوظبي عسب اراجع عنده واطمن عليهم واذا حد يعرف شركه بيبي ستر او ممرضه يخبرني وبعد اذا حصلت كيف انظم وقتي مع البيبي ستر وكيف اعرف انهم شبعو من الحليب وابغي اساعدهم بحليب صناعي بس ما اعرف كم رضعه باليوم لان الرضاعه الطبيعيه صعبه لان كل واحد يبغى يرضع بنفس الوقت يكونون جوعانين وانا ما اعرفلهم فديتكم خواتي الي تعرف اي معلومه ماتبخل علي انا بحيره وبمووت تعب خصوصا اذا تعرفون دكتور

المزيد من آخر المواضيع من نفس القسم:

• اجمل اسماء مواليد جديدة بحرف الراء ومعانيها
• افضل الطرق البسيطة التي تساعد على تنويم...
• متى يسمع الطفل وطرق التعامل معه خلال هذه...
• اهم فوائد الحفاضات القماش وانواعها
• هل يمكن ان ينتقل فيروس كورونا خلال الرضاعة...
• افضل طرق علاج نزلات البرد عند الاطفال
• وصفة التوت والشوفان والكوسة للاطفال الرضع...
• وصفة التفاح المهروس والذرة وقرع الجوز...
• وصفة الجزر والذرة واليقطين للاطفال الرضع حصري
• افضل طرق التعامل مع المولود الجديد

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[ناروتا]

الله المستعان اختي
احس يلزمك نيرس لفتره حتى تستعيدي صحتك ويكبروا البيبيهات شوي
لو حابه نيرس توي اشوف اعلان في الانستجرام تنازل عن نيرس عندها خبرة خدج في مستشفى الكورنيش , لو مهتمه راسليني بخبرك تفاصيل

[ام عنوده]

باربي ياليت اعرف لج حل بس انشاءالله البنات مابيقصرون انشاءالله اهم شي تتوكلين على الله وانشاءالله امورج كله تكون في السليم يارب

[غلايوووه]

لو ماعندي خبره
بس ماحبيت اطلع بدون تعليق

حبيبتي اختي
اي دكتور اطفال بيعرف للخدج
و عمومتاً مدام طلعتي من المستشفى يعني والحمدالله صحتهم زينه
الرضاعه لازم كل بيبي يرضع طبيعي لمده ٢٠دقيقه
انتي اخذي شفاطه حليب واشفطي
الافضل حليب الام الاول لاتحرمينهم منه

ولازم كل ساعتين يرضعون لو طبيعي
والصناعي كل ٣ ساعات
عدد الرضعات ماتحسبين كثرتها احسبي عالوقت كل ٣ ساعات مرضعه
رتبي وقت رضعاتهم عشان ماتتبهدلين دام توج والده سهل تعودينهم عالرضعات الي بوقتها



عشان الترجيع
اول شي دسعي البيبي بعد الحليب لو مادسع خليه ع جتفج لين يدسع
ولما بترقدينه خليه ع جنب مب ع ظهره عشان اذا رجع ينزل عالفراش مو يختنق

و كنت بكتب شي ونسيت .....
اممممم
هي و عطيهم مغلي الينسون ممتاز للغازات كميه بسيطه عطيهم الظهر مثلاً

و قبل النوم فليل بدلي لبسهم و البامبرز ورضعيهم وبينامون
البشكاره خليها معاج تتعلم منج لان اذا انتي الام ماتعرفين اكيد هي ماتعرف بعد
واذا حصلتي نيرس الحمدالله

الله يهون عليج يارب ويهدي عيالج

[Cobon]

الله يوفقج و يعينج ع تربيتهم

مفروض حد يكون معاج مثل امج او اختج لو ما عندج حد
لان تربية الاثنين محتاجة نفس طويل
نزلي اعلان انج محتاجة ممرضة تيلس معاج ف البيت و تأكدي من شهادتها و مكان عملها
او جوفي المستشفيات الخاصة ممكن يوفرون ها الخدمة

[الوردة الجورية]

وعليكم السلام

الله يهوّن وييسر عليج تربيتهم ويلهمج رشدج في رعايتهم

وقت كانوا في المستشفى عطوهم صناعي او طبيعي؟

ممكن ترضعينهم اثنينهم في نفس الوقت او تكتفين بس بالشفط والتقسيم والتخزين في الثلاجة
اذا تشوفين اريح


شوفي هذا الرابط ان شاء الله تستفيدين منه

http://forum.uaewomen.net/showthread.php?t=954341

[Ward-uae]

التوم بهذا العمر اسهل لكن من يبدو يحبو هنيه بتتعبي
رضعي واحد طبيعي والثاني عطيه صناعي وبعدين بدلي اللي عطيتيه طبيعي عطيه صناعي وجيه
لكن انتبهي الياهل من يبدي يشرب صناعي يشبع ويطول في رقاده
علب الحليب بتحصليه في الصيدليات اشكال والوان اسألي الصيدلي عن احسن نوع وجربي اذا اتحسسوا او صار فيهم امساك غيريه
النوم ميلي السرير من فوق ارفعيه ونوميهم على جنب وقلبيهم مره يمين ومره يسار ولما تكوني مصحصحه حطيلهم مخده اللي فيها حفره حتى يعتدل راسهم وما يصير طويل وعن يرجعوا فانتي بتكوني منتبهه عليهم
دوا انفاكول قبل الرضاعه بتحصليه في الصيدليه
شاي الاطفال بتحصليه بعد في الصيدليه من الولاده يعطون الياهل يريح بطنه اذا كان عندهم امساك
القماط يريح اليهال ويطولون في رقادهم
بعد الحليب رفعيه لكتفج والثاني حطيه على مخده نيميه على بطنه راسه شوي ميليه يقدر يتنفس حتى يدسع
للمساعده طلبي اكل من حرمه تسوي ريوق وغدا وعشا وتتفقي على مبلغ شهري
انتي اهتمي باكلج وادويه الفيتامينات والخياطه
ريلج من يكون عندج خليه يساعدج يشل واحد وتسبحون اليهال مع بعض تتساعدون هالايام احلى ذكرى
تشمسيهم الصبح نص ساعه هذا الشي سبحان الله له فوايد يبدون يمشون بسرعه واسنانهم تظهر بسرعه
ما عليه فتره وبتعدي من يبدون يحبو بتراكضي وراهم لكن رقادهم بيترتب
دكتور اطفال في اي مستشفى بتحصليه اهم شي يكون خبره

[ام ميثاني..]

للرفع

[ليتل ليدي]

عيادة الخدج في مستشفى المفرق

[ميمي ^^]

وحدة من بناتي كانت تزوع من خشمها اول الايام اتوقع ها لانهم كانو فالحضانة وكان يدخلون الحليب من خشمهم عسب جي اتوقع ،، بس بعدها بفترة توقف هالشي