صفحة 1 من 4 123 ... الأخيرةالأخيرة
النتائج 1 إلى 7 من 24

الموضوع: يوميات السنع والزين - Dukan Diet

  1. #1
    تاجرة برونزية

    رقم العضوية: 123534

    تاريخ التسجيل
    05 - 04 - 2009
    مشاركات
    1,720

    حذاء يوميات السنع والزين - Dukan Diet

    مرحبا بنات ....


    أنا قررت أكتب يومياتي مع النظام الصحي لنزول الوزن لسببين: علشان أتشجع وأستمر- وبنفس الوقت تفيدكم تجربتي..


    أنا قررت أتبع ريجيم ربيعتي اللي شفت تجربتها بنفسي ووصلت للوزن اللي تبيه - والدايت هو دايت دوكان الفرنسي - كل حد صار يتبعه الفتره الأخيره ونتايجه واضحه- وبنفس الوقت صحي- وبصراحه النزول في الوزن الملاحظ فيه يشجع الوحده على الإلتزام -

    وهذا هو رابط الدايت
    http://forum.uaewomen.net/showthread.php?t=872509

    بس فيه تعديلات - ليش؟ - لأني أخذت كتاب الدايت اليديد من المكتبه- والدكتور اللي مسوي الدايت ضاف له تعديلات وايد - خلت الدايت وايد أسهل وصحي أكثر -

    في عدة كتب للريجيم- بعضها بس خاص لوصفات الطبخ - أنا خذت الكتاب الملون - أنصحكم فيه وبشده
    The Dukan Diet Life Plan



    اللي ما تبا تشتري الكتاب- مب مشكله- لأن في الرابط مشروح تقريبا كل شي- وأنا راح أوضح أكثر حسب التعديلات الأخيره

    الدايت عباره عن 4 مراحل
    - مرحلة الهجوم (3 أو 5 أو 7 أيام)
    - مرحلة النزول (2 باوند أو كيلو كل أسبوع بخصوص الأوزان القليله - أكثر بالنسبه للأوزان الأكثر)
    - مرحلة الثبات ( 5 أيام لكل باوند خسرتيه أو 10 أيام لكل كيلو)
    - النهاية


    أنا راح أشرح المرحله الأولى والثانيه لأنها مراحل النزول، لكن المراحل الثالثه والرابعه بعد ما تخسرين وزنج خلاص وتصيرين رشيقه تطبقينها علشان ما يرجع وزنج للأبد)

    بس أول شي تعليمات عامه:
    - يفضل حساب الوزن بالباوند لأنه أدق في الخساره عكس الكيلو، حتى الميزان الرقمي ممكن تحولينه للباوند، لكن ممكن أيضا إستخدام الكيلو، الكيلو الواحد = 0.907 باوند
    - الميزان مهم جدا جدا في هذا الدايت, وشرط تورزنين وزنج كل يوم ضروري ومن أساسيات الدايت، ليش؟ ، لأن الوزن راح ينزل يوميا بشكل كبير وهالشي راح يشجعج أكثر, لا تقولين ما بينزل وأخاف أنحبط، أكيد بينزل، لاتبدين الدايت بدون ميزان رقمي
    - قبل لا تبدين لازم تروحين السوبرماركت تاخذين احتياجاتج للدايت ع الأقل اللي تحتاجينها لمدة 3 أيام

    - تقدرين تحسبين الوزن المثالي وكم يوم تحتاجين لكل مرحله حسب الدايت من الموقع الرسمي لدوكان دايت، أو ممكن حساب الوزن المثالي عن طريق انقاص 105 من طولك
    - خذي دفتر وحطي جدول أو بالاكسل سجلي يومياتج، كم خسرتي كل يوم وكم صار وزنج ، لازم تعرفين شو خسرتي كل اسبوع، ويفضل تسجلين وجباتج, أو سجلي في البرامج المجانيه بالايفون اللي تسوي تراك لوزنج


    نبدأ شرح مراحل الدايت :

    مرحلة الهجوم:

    الفايدة: تهيئ الجسم للدايت
    المدة: لو كنتي من الوزن القليل وتحتاجين تنزلين 10 كيلو أو أقل المدة 3 أيام, للوزن المتوسط واللي يبا ينزل أكثر من 10 كيلو يحتاج 5 أيام، للأوزان الثقيله جدا يحتاج 7 أيام لكن بهذه الحاله يجب أخذ مكملات غذائيه بدون سكر لأنج مابتاكلين خضروات لمدة 7 أيام (مكملات مرضى السكر تنفع)
    التفاصيل: في هذي المرحله اللي تقدرين تاكلينه بس بروتين ومشتقات الحليب خالية الدسم، بدون زيوت بدون نشويات بدون سكريات الخ,


    المسموح من البروتين : الدجاج، لحم عجل او بقر ، ماكولات بحرية بكل انواعها مثل الربيان والحبار الخ ، سمك ، البيض، الكبدة و اللسان، البيض. التركي، التونة المحفوظة بالماي الخ
    الممنوع من البروتين: لحم الغنم، السردين، التونة المحفوظة بالزيت
    طريقة الطبخ: طريقة الطبخ تكون بدون زيت أو إضافة كربوهيدرات أو أي شي، لكن التتبيل مسموح بالملح والفلفل والثوم والبقدونس والبهارات والفلفل وصوص الصويا والخردل الكامل الخ
    أمثلة: دجاج مشوي, سمك مشوي, بيض مسلوق، الخ






    المسموح من مشتقات الحليب: روب خالي الدسم, حليب خالي الدسم، لبن خالي الدسم، حليب طويل الأمد خالي الدسم، فورماج فريز خالي الدسم، لبنة خالية الدسم، Cottage Cheese- fat free ،
    الممنوع من مشتقات الحليب: القشطه، الكريمه، الزبدة، الخ
    كل المشتقات يجب أن تكون خالية الدسم تماما (مب قليلة الدسم)


    أطعمه أخرى مسموحة:
    - الكوفي بكل أنواعه مثل الكابتشينو واللاتيه (شرط يكون الحليب خالي الدسم والسكر دايت وبدون صوص شوكليت أو فانيلا مثلا - سواء سويتيه بالبيت أو طلبتيه من كافيه وانتي برى اطلبي منهم سكيمد ميلك وتاكدي شو داخل المشروب)
    - الدايت كولا والمشروبات الغازيه الدايت - بس يفضل ماتكثرين منها
    - الكتشب الخاص بالدايت - بس كميه قليله
    - العلكه الخاليه من السكر





    شي مهم : نخالة الشوفان Oat Bran

    في المرحله الأولى لازم تاكلين ملعقة ونص من نخالة الشوفان يوميا, ممكن تاكلينها لوحدها أو تطبخينها، في عدة طرق لطبخها وراح أراويكم مع يومياتي، النخاله غير عن الشوفان الأبيض أو الشوفان الكامل،
    الشوفان الأبيض: عباره عن شوفان مطحون بدون القشره
    الشوفان الكامل: شوفان مطحون اللب مع القشره
    نخالة الشوفان: القشرة بس

    راح تحصلين النخللة بالجمعيات التعاونيه، ولاتخربطين بينها وبين غيرها، لازم يكون مكتوب عليها Oat Bran ، وخذي ساده بدون عسل أو فواكه مجففه أو نكهات، إذا ماحصلتي كملي الدايت بدونه بس لاتستعملين الأبيض لأنه يمتن، فايدة النخاله أنه تتريقنها الصبح أو أي وقت وداخل المعده تنتفخ وتشبع، ومهمة لأنها الكاربوهيدات الوحيد اللي بتاكلينه وبتعطيج طاقة، ربيعتي بدت بدونها ووزنها نزل لكن في الكتاب مكتوب أن أفضل معاها، وتقدرين تسوين منها كوكيز ولا كب كيك ووايد وصفات،


    الرياضة:
    في هالمرحلة لازم تمشين 20 دقيقة بالهواء الطلق أو السير الكهربائي - ربيعتي ما سوت رياضه أبدا وضعفت - اللي ماله خلق لايسوي- بس أنا أحس أحسن مع الرياضة وخصوصا أنها خفيفة


    الماي: لازم تشربين ماي وايد في الدايت لأن الأكل معتمد على البروتين وعلشان تساعدين الكبد والكليه تصفا لازم تشربين ماي وايد، ولأن الماي يساعد على النزول- اشربي من لتر ونص للترين أقل شي، لو تقدرين أكثر يكون زين (بس مب عاد وايد لول)



    هالمرحله أصعب مرحله لأن بداية الدايت، وماراح تاكلين غير بروتين وحليب، نصيحه كثري من البروتين وقللي من مشتقات الحليب، والكميه غير محدده

    .....


    المرحلة الثانيه والأهم ،

    طبعا خلصتي المرحله الأولي، بتحسين الثانيه دلع شوي، ليش؟ لأن هالمرحله فيها خضار وفيها طبخات وايد حلوه، في اللنك مكتوب تتبعين هالمرحله 5 أيام بروتين وبعدين 5 أيام خضار وبروتين، لكن بالكتاب الدكتور قال يصير تسوينها يوم ويوم (الحمدلله) ، يعني كيف؟
    أول يوم: اللي كنتي تاكلينه قبل (بروتين + مشتقات حليب خالية الدسم) + خضار ، ولازم يكون مناصفه مو تكثرين من شي وتتركين شي، يعني نص بروتين ونص خضروات.
    ثاني يوم: بس بروتين +مشتقات الحليب خالية الدسم
    ثالث يوم: نفس أول يوم
    وهكذا


    أمثلة على الأكل في هالفتره: شوربات الخضار( شوربة متنوعه، شوربة بروكلي، شوربة فطر، شوربة زهرة)، السلطات، التبوله بدون برغل ، الملوخية، أومليت الخضار، روب بالسلطة، روب بالخيار) ، في خضار ممنوعه بتلاقونها في اللنك. البقوليات ممنوعه، الجزر والفجل والشمندر مسموحين بس كميات قليله لأن نسبة السكر فيهم عالية



    لي متى: لحد ما توصلين للوزن اللي تبينه، مب شرط الوزن النهائي, ممكن تحطين هدف أول ويوم توصلين له تنتقلين للمرحله الثالثه الأسهل خصوصا لو الوزن اللي بتنزلينه وايد.

    في هالمرحله تتبعين نفس قبل، بس:

    - نخالة الشوفان تصير ملعقتين
    - تمشين 30 دقيقة بدل 20 دقيقة


    الريجيم جدا سهل مع الوقت، وحتى بالكتاب ذكر أن مع الوقت تفقدين الشهيه وتصيرين تكرهين الزيوت والكاربوهيدرات، وفعلا هذا اللي صار مع ربيعتي.
    بالكتاب: دوكان ذكر أن ممكن تستخدمين ملعقة صغيرة جدا من الزيت يوميا مع السلطه أو للقلي، وهذا الشي كان ممنوع قبل بس الحين سمح فيه لأن في ناس ما يستحملون، عني شخصيا ماراح أحط ولا قطرة.

    ع فكرة، تقدرين تطلبين أو تروحين تاكلين بمطعم أغلب الوقت، يعني تاكلين مشاوي أو ستيك أو شوربة بصل فرنسيه (بس تتاكدين شو داخلها) أو سي فود ، يعني تقدرين تدلعين نفسج ع الآخر، بس تأكدي من مكونات الأكله وأكدي عليهم مايحطون زيت.

    الحلو بالدايت أن فيه أكلات مبتكرينها وايد حلوه. مثلا: الفانيلا بدون السكر مسموحه لكن ماحصلتها بالامارات ، لكن في السوبرماركت يبيعون روب بالفانيلا خالي الدسم، تقدرين تسوين منه Milk Shake Vanilla يعني الروب + فورماج فريز+ حليب خالي الدسم+ سكر دايت، وبعد الروب بالنكهات الثانيه مسموح بشرط يكون خالي الدسم والسكر، وفي المرحلة الثانيه وليس الأولى روب الفواكه خالي الدسم والسكر مسموح لكن بكمية قليلة جدا

    أنا من اليوم بديت بالدايت، وراح أحط يوميات كل يوم باليوم اللي بعده، وراح أكتبلكم عن الوصفات اللي أطبقها، اللي تبا تشارك معاي حياها الله


    بالرد الياي راح أحط الأكلات المسموح فيها كلها في لسته -

  2. #2
    نجمة برونزية

    رقم العضوية: 188323

    تاريخ التسجيل
    15 - 01 - 2011
    الدولة
    الشارقة
    مشاركات
    2,052

    افتراضي رد: يوميات السنع والزين - Dukan Diet

    موضوع متعوب عليه
    الله يجزيك الخير
    وتوصلي للي تبيه بصحة وعافية


    يارب احفظلي أولادي وزوجي



  3. #3
    تاجرة برونزية

    رقم العضوية: 123534

    تاريخ التسجيل
    05 - 04 - 2009
    مشاركات
    1,720

    افتراضي رد: يوميات السنع والزين - Dukan Diet

    المسموح في المرحلة الأولى :
    - البيف (لحم البقر)
    - الفيل (لحم العجل)
    - الدواجن (الدجاج - والتركي اللي هو الديك الرومي - وأي دواجن أخرى) ماعدا البط والاوز
    - السمك
    - Shellfish ، محار ربيان قبقوب حبار الخ من الطعام البحري
    -البيض
    - Minced Steak ، شرايح لحم مفروم سووله سيرج بالقوقل بتعرفون شو أقصد
    - لحم الأرانب
    - كبد الخروف والدجاج والكلية (الكبده ينصح فيها بهالدايت علشان الفيتامينات- لكن لو عندج مشكله بالكوليسترول كلي بكميه قليله هي والبيض)
    - لسان الخروف
    - السمك المدخن (سالمون مثلا)
    - سمك معلب مثل التونا والسلمون
    - الروب
    - فورماج فريز (بتحصلينه بكارفور 0% فات) هي عباره عن جبنه كريميه طازجه
    - كوارك Quark هي نوع من الجبنه الطازجه
    - Cottage Cheese خالية الدسم (كل المنجات لازم تكون خالي من الدسم، انا كتبتها بالانجلش علشان تقدرون تحصلونها بالسوبرماركت)
    - روب خالي الدسم مع نكهات ( النكهات المسموحه: فانيلا، جوز الهند، ليمون الخ) تقدرين تاكلين منهم أي كميه، بس تاكدي مافيها سكر، أغلب اللي بالسوق فيه سكر، بس حصلت بالفانيلا بدون سكر
    - روب خالي الدسم مع الفواكه لكن خالي من السكر، يفضل تجنبهم لكن ممكن أكلهم في المرحله الثانيه وكمية 1 او 2 صغير.
    - الحليب الخالي من الدسم (طازج أو بودر أو طويل الأمد)، وممكن أكله مع القهوه وممكن استخدامه بدل الكريمه في الصوص والشوربات أو كسترد.
    - القهوه
    - الفانيلا بدون سكر كنكهة (أغلب اللي بالسوق مع سكر، بس ممكن تستخدمين العصي وتتطحنينها)
    - الملح
    - زيت الزيتون (ملعقة شاي صغيره أو 3 قطرات للمقلاه) يفضل تجنبه
    - الخل ( بلساميك وشيري)، مكتوب بالكتاب تجنبي الخل الرخيص لأنه فيه كراميل
    - الليمون كتتبيله مب كعصير للشرب
    - المستر بس باعتدال، يفضل المساترد الخالي من الملح علشان السيلولايت
    - مخلل الخيار والبصل بكميات قليلة جدا جدا، وبالمرحله الثانيه ممكن استخدامه لأنه خضار
    - الكاتشب الخالي من السكر ممكن باعتدال
    - التوفو (مب التوفي - التوفو للي مايعرفه هو جبن مصنوع من الصويا ياكله النباتيين)
    - روب يوناني greek yoghurt ، جربته ما عجبني
    - Extra Light Cream Cheese
    - أنواع الجبن الأخرى غير مسموحة
    - بيكنج بودر
    - agar agar مكون يستخدم بالطبخ شكله
    - ريحان
    - هيل (ممكن تسوين لج شاي بالحليب الخالي الدسم مع الهيل)
    - الشاي الاخضر والاسود وبانواعه
    - البقدونس (بكميات التتبيل مب الأكل، بالمرحله الثانيه تقدرين تاكلينه براحتج)
    - الفلفل الحار للتتبيل
    - Chives ماعرف شو اسمه بالعربي بس بالقوقل شوفوا صوره يشبه البصل الأخضر
    - السينامون أو القرفه (مهمه جدا لأني أحلي فيها نخالة الشوفان ومرات الكوفي)
    - القرنفل
    - الكمون
    - كزبرة
    - الثوم
    - الجلاتين (بودرة أو عصي)
    - الزنجبيل
    - الفجل الحار للتتبيل
    - قشر الليمون
    - مكعبات ماجي قليلة الملح (موجودة بالجمعيات)
    - النعناع للتتبيل، ممكن تحطينها مع الروب
    - جوز الطيب (انا استانست قلت بمزمز فيها، بس شكله بكميات للتتبيل بس)
    - بصل
    - ماي زهر البرتقال
    - الفلفل الأسود وبانواعه
    -روز ماري أو اكليل الجبل
    - زعفران (يعني تقدرين تسوين قهوه عربيه بالزعفران مثلا )
    - طحالب بحرية
    - صوص الصويا
    - الينسون
    - نكهات صناعيه خاليه من السكر (ممكن تخلطينها مع الروب مع سكر دايت)
    - محلي سكر خاص بالدايت
    - ترياكي صوص
    - طرخون
    - زعتر (العشبه)
    - الكركم
    - Harissa ، اكله افريقيه عباره عن معجون فلفل نفس الداقوس تقريبا (لكن يقلل منها ويفضل تجنبه)
    - معجون الطماطم الخالي من السكر (يقلل منه ويفضل تجنبه


    الغير مسموح:
    - الزبدة
    - الشوكليت
    - الكريمه
    - الفواكه المجففه
    - المسكرا
    - الزيتون
    - السكر
    - أي شي لم يذكر غير مسموح


    الحين بامكانكم تبدعون بهذي المكونات -
    للمرحله الثانيه، نفس القايمه بالاضافة للخضروات راح أحطها بوقت ثاني

  4. #4
    مشرفة

    رقم العضوية: 129786

    تاريخ التسجيل
    29 - 05 - 2009
    الدولة
    للتواصل 0509796754
    مشاركات
    106,126

    افتراضي رد: يوميات السنع والزين - Dukan Diet

    جزاكي الله ألف خير اختي ...فعلا موضوع متعوب عليه



    للتواصل خواتي انحذفت كل جهات الاتصال لأن غيرت البي بي رجاء ضيفوني من جديد الواتس أب 0509796754
    البلاك بيري 2BBB3B93



  5. #5
    نجمة برونزية

    رقم العضوية: 190224

    تاريخ التسجيل
    12 - 02 - 2011
    مشاركات
    1,646

    افتراضي رد: يوميات السنع والزين - Dukan Diet

    يزاج الله خير


    جـلابيات صـــيفيــــه حلـــــــــوه للبيت بـ 35 درهم
    جيكـــات عصــايــــر فــرديه ومــزدوجـــه من زجــــاج
    للطلـــب حيـــاج ع الخــــــاص



  6. #6
    نجمة براقة

    رقم العضوية: 49

    تاريخ التسجيل
    04 - 10 - 2005
    الدولة
    الامارات
    مشاركات
    953

    افتراضي رد: يوميات السنع والزين - Dukan Diet

    الله يوفقج وتوصلي للمثالي بصحه وعافيه

  7. #7
    مشرفة (التغذية و الصحة ) الصورة الرمزية نانا الحيرانة

    رقم العضوية: 129878

    تاريخ التسجيل
    30 - 05 - 2009
    الدولة
    دبي- 0502099565 - البن كود Pin :2A715196
    مشاركات
    48,040

    افتراضي رد: يوميات السنع والزين - Dukan Diet

    واو روووعه فعلا موضوع مرتب وحلو اتمنى تكملين وتابعين فيه ونحن بنتابعج وبنشجعج
    وبعد بنحاول نجرب
    ننتظر اليوميات بالتفصيل







صفحة 1 من 4 123 ... الأخيرةالأخيرة

المواضيع المتشابهه

  1. مشاركات: 33
    : 2011-10-04, 21:49
  2. يوميات الرجل السنع بالصور.....
    بواسطة لمعة خرز في قسم : الحياة الزوجية
    مشاركات: 30
    : 2010-07-22, 07:55
  3. مشاركات: 305
    : 2009-12-25, 20:44
  4. DIET ^ __^ مسابقة شفافة الشوق ( 6 )^___^ DIET
    بواسطة شفافة الشوق في قسم : علاج السمنة والنحافة
    مشاركات: 94
    : 2008-04-18, 00:02

المفضلات

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  



Loading