مب اعتراض على ارادة الله بس البنوتة أمنيتي وايد وايد

[مشكلتي]

السلام عليكم
شخباركم ؟
بدخل في موضوعي علطول انا عشت وحيدة في البيت بين اولاد ما كان عندي خوات و كنت كله العب بروحي و اتمنى تكون عندي اخت و اتخيل انها تلعب معاي و جيه و كانت امي مب قريبة مني وايد عصبية و كنت اتجنبها و كانت وايد مشغولة في دوامها و مع اخواني الصغار لانهم ورا بعض و كنت في نفس الوقت انطوائية و خجولة ماعندي صديقات يلعبون معاي و يزوروني كبرت و يوم ما كان عندي أمل يكون عندي اخت تمنيت يكون عندي بنوتة تعوضني و تكبر تكون مثل صديقتي و كنت اموت وايد على شغلات البنوتات و عرست و كان من اسباب سعادتي بزواجي انه بيكون عندي بنوتة و كنت دوم اتخيل بنوتي و احس بسعادة مجرد التخيل و حملت و كنت فرحانة بحمالي وايد بس وايد تعبت من الوحام القوي كنت ارجع للشهر التاسع و كنت اسبوع في البيت و اسبوعين في المستشفى ريلي طفر من الوضع و حتى النيرسات كانوا يقولون لي انتي وحامج صعب لا تحملين مرة ثانية و جيه و ما كانوا يقدرون يوقفون الترجيع بالادوية لان ما تنفع معاي بس يعطون لي مغذيات عن الجفاف و مرات الايام و يوم كشفت عن جنس الجنين قالولي ولد اكيد و واضح ماشي مجال للشك و شفت العضو بالسونار الملون و كان وضعي عادي فرحت انه بيكون عندي بيبي صغير كيوت و اني بكون ام و اول مولود ما يفرق وايد جنسه و ربيت و كان هو كل دنتيتي و روحي و حياتي تعلقت فيه وايد و تميت 3 سنين اخاف من الحمل من الوحام الي شفته و طول هالثلاث سنين امنية البنوتة فخاطري و عقب 3 سنين اشتقت وايد احمل و راجعت الدكتورة الي قالت هرمون الحليب مرتفع و تعالجت عندها شهور لين تحسنت و كنت اقرا عن تحديد الجنين بالطرق الطبيعية بالاكل و اوقات الجماع و هالامور و راجعت عند دكتورة مختصة خبرة و معروفة بالدولة و سألتها قلت لها قريت في النت في اغلب المواقع انه اذا الوحدة تبي ولد تجامع زوجها بيوم التبويض لان الحيوانات المنوية الذكرية تعيش 24 ساعة بس و تموت و تكون اسرع من الانثوية الي اتم في الرحم 3 ايام فلازم اذا تبين بنوتة تجامعين زوجج قبل التبويض ب 3 ايام تكون الذكرية ماتت و الانثوية عايشة و يصير المولود بنوتة سألتها و ضحكت و قالت هاي خرافات اصلا الذكرية و الانثوية كلهم يعيشون 24 ساعة بس و اذا جامعتي ريلج قبل التبويض بيومين و لا 3 ايام ما بتحملين لا بولد و لا في بنت لان ما يصير حمل الا بالتبويض فقلت لها فيه حل اييب بنوتة بعد ارادة الله قالت لي لازم المهبل يكون حمضي و فيه اكلات معينة تخليه حمضي كتبتها لي و كتبت لي الاكلات الي اتجنبها و كشفت عن مهبلي شافته حمضي قالت ممتاز بس استمري على هالحمية شهرين مع غسول حمضي لان المهبل الحمضي يجذب الحيوانات المنوية الانثوية و يموت الذكرية انا استانست حييل يوم عرفت انه مهبلي حمضي و تميت على الحمية اجبر نفسي على الاكلات الي ماحبها و اقاوم موت الاكلات الي احبها و انا اتخيل بنتي جدامي و اتشجع و يوم حملت بعد شهرين استانست موووت تميت ما ارقد يومين من الفرحة و كله اروح السوق اشوف ملابس البنوتات و ربطات الشعر الكيوت و الجواتي و انا ميتة من الفرح كنت بحط كل شي بالعربانة بس اقاوم و مرت الايام و كانت دكتورتي هاي مسافرة و سرت عند دكتورة ثانية تكشف لي عن جنس الجنين كنت في نص الشهر الرابع و كنت طول رمضان ادعي بالبنوتة و اصيح و بأوقات المطر و بين الاذان و الاقامة و كانت كل الاعراض الي فيني تدل على انه فيني بنوتة ويهي تشوه و طلع فيه حبوب و كلهم قالوا هاي اعراض بنوتة لان البنت تاخذ حلا امها و الوحام المختلف و الم المبيض اليسار و يوم كشفت عند دكتورة شاطرة خبرة اخر يوم في رمضان على اساس اجهز امور البنوتة في اجازة العيد وايد متحمسة مب قادرة اصبر يوم واحد و قالت لي المولود ولد و اكيد و راوتني عضوة انصدمت وايد مب اعتراض على ارادة الله لان كل شي من الله حلو بس يعني كانت امنية وايد فخاطري لأسباب من يوم كنت صغيرة للحين ما يجذبني اي طفل ولد ماحب اشله و جيه اما اذا بنوتة اموت عليها ودي امها تخليها عندي و ما تشلها مني بس احب ولدي موت بس ولد ثاني مب وايد و شي ثاني اموت على سوالف البنوتات و خاطري اكشخها و البسها من هالسوالف الحلوة كأنها لعبة باربي وناسة هالشعور و اذا اشتريت حق بنات بنات خالاتي الي عندهم بنوتات عمري ما شفتهم يلبسون بناتهم الاشيا الكيوت الي اشتريها لهم مع انها حلوة من اغلى الماركات و ريلي يتضايق و يقول انا مب ملزوم اخذ لهم دوم و صدق كلامه فقمت استحي و ما اخذ لهم و شي ثالث انا اتمنى تكون صديقتي و تروح معاي الصالون و الاعراس و المناسبات و هالامور لاني دوم ادخل اعراس بيت اهل ريلي بروحي و كلهم مع بناتهم و ولدي كبر دوم عند الرياييل عند ابوه و شي رابع ما اقدر احمل ورا بعض لان جسمي ضعيف وايد ما يتحمل و ريلي يشتغل في قناة تلفزيونيه مختلطه و معروف الحريم الي فيها فلازم دوم اكون متكشخة و مهتمة فجسمي من كل النواحي لان هو عينه زايغة و وايد يدقق على اتفه التفاصيل فجسمي و ما يتحمل المسؤولية ابدا ما ينفع اييب عيال ورا بعض في هالحالة و شي خامس البنوتة وردة البيت و حسها حلو و كفاية تدخل ابوها و امها الجنة اذا ربيناها عدل و تكون حنونة و تربيتها سهلة و دوم جدام عينج فعكس الاولاد تربيتهم صعبة و دوم برع البيت و ما تعرفين منو يشوفون في الشارع و خصوصا اذا الابو مب متعاون معاج بالتربية و لا قدوة لعياله و وايد يدلعهم و يخليهم يسوون الي يبونه و غيره احس الولد من تعرسينه يتغير و ما يكون قريب منج بعكس البنت دوم قلبها على امها و اشوف هالامثلة فخواني يوم امي تترقد في المستشفى هو زياراتهم رسمية مع حريمهم و جيه بعكسي انا الي ارقد عندها و اغير لها و اداريها فكانت تقول يا ريتهم كلهم بنات مع انه اخواني بالعكس يحبونها و يهدونها و بارين بس مب قريبين منها وايد و من عرسوا تغيروا و صاروا رسميين شوي اعرف انه فيه ناس يتمنون ظفر ياهل و انه نعمة و انا راضية فيها الحمدلله و مب اعتراض على الولد لان لو كنت حامل بتؤام ولد و بنت جدا حلو لان البنت موجودة يعني بس امنيتي هالبنوتة قمت اقرا اخطاء السونار في النت و كيف انه الاعضاء مب مكتملة قبل الاسبوع ل 20 و انا سرت لها اخر يوم من الاسبوع ل 15 نص الشهر الرابع و قريت انه اعضاء البنت و الولد اصلا بارزة تكون و هالامور بس مااعرف اني قاصة على عمري الدكتورة قالت لي ولد اكيد و فيه بروز يشبه السلحفاة و قالت لي تقدرين تبدين تجهزين اللون الازرق فأبيكم تساعدوني كيف اشل هالامنية من راسي و انساها كيف ما افكر بالبنوتة الي احلم فيها و اشلها عن بالي لان التفكير يتعبني وايد بدون فايدة ...

المزيد من آخر المواضيع من نفس القسم:

• كرهت حياتي
• مطلقة و اريد اعيش لحالي
• مشكلتي الفراغ
• مضغوطه وفقدت الامل
• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[المراقبة العامة]

الكلمة الطيبة صــــــدقة
ارضي بما كتبه الله لك
ولاتشغلي بالك ووكلي امرك لرب العباد

[ام يوسف 82]

ارضي باللي كتبه رب العالمين
انا كنت اتمنى ولكن الحمد لله رب العالمين رزقني بولدين زي القمر تبارك الرحمن
والله عوضني ببنات اخواتي ما شاء الله كلهم يقولولي ماما وامهاتهم راضيين الحمد لله
كفايه الحمد لله
ارضي باللي كتبه رب العالمين ولا اعتراض ع حكم رب العالمين

[وجدان الفجر]

أختي إذا رضيتي بصدق ويقين بعطاء الله فلن تحسي بهذا الاحساس . الحمدالله ربي عطاج طفل والحين حامل و الحمدالله , غيرج ما تحمل وتتمنى تصير أم ولو لنص طفل !. الحمدالله طفلج معافي لله الحمد والمنة وبإذن الله طفلج القادم صحيح معافى , هذا نعمة عظيمة ما تحس فيها إلا اللي جربت يكون عندها طفل معاق او مريض .
وبقول لج شي نحن نتمنى وندعي ولكن الله سبحانه وتعالى يختار الأفضل لنا .صديقتي كانت تتمنى تحمل بولد وسبحان الله كل ما كانت تحمل بولد كان يصير عندها اجهاض في الشهر الخامس تقريباً ويوم تحمل ببنت الحمل يكتمل الحمدالله وتجيها بنت معافاة و آخر حمل لما سقطت وكانت في مستشفى وسوت كل الفحوصات الجينية , طلع الجنين ولد فعلاً ولكنه عنده تشوه كبير في المخ , وطلع عندها مشكلة جنينية تشوه في كروموزومات الذكورة , يعني لو الله قدر والأولاد عاشوا كانوا كلهم بيكوا معاقين عقلياً ,وهذا بيكون عذاب ليها , فسبحانه رحمته واسعة رحمها هي وزوجها من ذلك .
بعدين شو دراج من الخير لج ؟ ولد ولا بنت ؟ يمكن يكون الولد أبر بأهله وأمه بالذات أكثر من البنت , وفيه تجارب كثيرة تأكد ذلك .
نقطة أخيرة انت بعدج صغيرة لا تستبقي الأحداث وتقرري من الحين انج ما بتحملي مرة ثانية , استمتعي بأموتج مع ولدج وحملج .

[جنان الفجيره]

الله يرزقج البنوته

وانا مستعده اكون ربيعتج

[بنت الشوامخ]

حبيبتي رب العالمين قادر على كل شي
لاتيأسين
ادعي ربج يمكن الحمل الثاني تكون بنوته

اذا مب بنوته اللي في بطنج الحمدلله كله خير و رزق صدقيني خير لانه رب العالمين مايكتب للعبد ومايقدر له الا الخير فقط


استمري بالدعاء دايما ولا تقنطين من رحمة الله
هو الكريم الوهاب

وبنفس الوقت كوني راضيه قنوعه

الحمدلله على كل شي

[mouzan7mod]

ليش مزعله نفسج ؟
الحمدلله على كل حال
بنت او ولد كله بيد رب العالمين