لين وين بوصل انا و الشك اللي فيني مااااعرف

[مشكلتي]

السلام عليكم ورحمة الله وبركاته


خواتي انا معرسه من سنه ونص ولله الحمد حياتي ويا زوجي وايد مرتاحه فيها
وهو اختارني عن قناعه وانا وافقت عن قناعه
عمره هو 36 وانا عمري 29

زوجي بيتوتي ومايحب يطلع ابد
واذا طلع ياخذني وياه دوم
ومستحيل يخلينيي اسير مكان بروحي حتى لو الصالون يوديني ويترياني لين اخلص

مابدخل في تفاصيل زياده بس اللي اباكم تعرفونه انه زوجي جدام عيني عطول


مشكلتي اللي فيني بتذبحني والله

وااااااااااااايد اشك في زوجي
مع انه مافي اساس لهالشك ابد ابد
ما جد شفت منه شي غلط
وتيلفونه كل يووووووم افتشه وما احصل شي فيه ابد
وهو اصلا مب قافل تيلفونه
وماعنده اي حساب في اي موقع او برنامج من برامج التواصل الاجتماعي

تعبت والله ماعرف ليش جي اسوي
دوم اقول لا مابسوي .. ما بفتش .. ما بشك
بس ارجع و اعيدها

يعني تخيلو مرات وهو يلعب بالتيلفون
اجوفه داش عالمسجات و يقرا مسج وفيه قلب وجي
اتم مييييييييييته و متحرقصه و بتخبل و احط توهمات في مخي
وفي اقرب فرصه افتش تيلفونه
والقى ان هالمسج مني انا

والله وابد تعبت ماعرف شو اسوي
ماعرف كيف اتخلص من هالشي اللي فيني


بس مره وحده حصلته شايف في قوقل صور مب زينه
وعقبها بفتره يبتله بطريقه ان ربيعتي اكتشفت ان ريلها يجوف صور و فيديوات خليعه
وعطيته رايي في الموضوع ومن عقبها خلاص ماجفت هالشي في تيلفونه



يعني الحمدلله ريلي وايد زين وياييه
ومب مقصر وياييه في شي
بالرغم من العيوب اللي فيني مايقول شي ابد

والله ساعات افكر اقول لو عرف اني افتش تيلفونه
شو بتكون ردة فعله اكيد بيكرهني


افكر اسير عند دكتور نفسي بس متردده



شورو علييه شو اسوي

المزيد من آخر المواضيع من نفس القسم:

• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت
• ريلي احبه ،، بس ماعرف شو الي حصل
• مشكلتي التعلق الزائد
• رفض ريلي للحمل
• عااااجل مشكلة واجهتني

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[المراقبة العامة]

شوفي لاتخربي بيتك بإيدك وتندمي العمر كله
تعوذي من الشيطان واتركي التفتيش واستودعيه الله
وترى الشيطان عارف نقطة ضعفك ومستغلها وانتي ماشيه بالطريق اللي مسيره لك
دامه طيب معاك وحياتك مستقرة قولي الحمد لله وتطمني
لو ماقدرتي تتخلصي من اللي فيك روحي لدكتورة نفسية كلميها عن مشكلتك قبل لاتكبر
ويصعب حلها

[ام نهييان]

ابتعدي عن فوووووونه قد ماتقدرين لانه اساس المشاكل

بعدين ان درابج تشكين فيه وهو من الاساس مايغلط بيغلط

اذكري ربج دوم واستودعيه و حاولي تكبرين الثقه فيه ومافي مشكله لو زرتي دكتور ان ما فادتج زيارته ما بتضرج

موفقه ياختي

[الموهبة]

صفات ريلج وتعامله اياج يدل انه يحبج لكن من الفضاوه عندج تحاولي تعملي مشاكل الحل هو انج تنجبي عيال ليملى عليج الفراغ الممل
ليكم سنه ونصف الان جاء وقت التفكير للانجاب ليكون الطفل في البيت نور عليكم ومنها يقضي وقت الفراغ عندكم

السبب هو ماعندكم شي في البيت يحوس لفوضى خفيفه ومن كده الملل هو السبب مافيج شي ولا يحتاج للعلاج الفراغ هو السبب

[سماءالأفق]

ألا بذكر الله تطمئن القلوب...كل ماتجيك الفكره اذكري الله حتي يروح عنك الوسواس,وكلما تقربت من الله كلما زاد الاطمئنان وذهبت الوساوس, أصلح الله كل أحوالك وبارك في حياتك وأذهب عنك أي شر

[ريم العسووله]

أختي أنتي ما تحتاجين طبيب نفسي و لا شيء ، كل الي تحتاجينه أنج تحسنين ظنج بالله و بزوجج و تتعوذين من الشيطان الرجيم ، و حطي في بالج بأن في شياطين متخصصة في التفريق بين الزوجين ، شغلهم الشاغل هو التفريق بين الزوجين و هالنوع من الشياطين هي الأقرب و الأحب الى قلب أبليس ، أقري هالحديث :

عن جابر قال: قال رسول الله صلى الله عليه وسلم: (إن إبليس يضع عرشه على الماء ثم يبعث سراياه فأدناهم منه منزلة أعظمهم فتنة يجيء أحدهم فيقول فعلت كذا وكذا فيقول ما صنعت شيئا قال ثم يجيء أحدهم فيقول ما تركته حتى فرقت بينه وبين امرأته قال فيدنيه منه ويقول نعم أنت) قال الأعمش أراه قال: فيلتزمه. رواه مسلم


هالحديث يوضح بأن هناك فعلا نوع من هالشياطين المتخصص بتفريق الازواج و هالشيطان قاعد يلعب بعقلج حاليا و يوسوس لج ، فلا تعطينه أي مجال أبدا

و ابدا لا تبينين لزوجج انج شاكة فيه و لا تخربين بيتج بيدج ، و اذا ما قدرتي تمتنعين عن التنبش ، عالأقل نبشي جدامه مو من وراه ، القصد انج تمسكين فونه جدامه و لكن بدون ما تبينين له انج تنبشين اذا كان قصدج من التنبش انج تحافظين ع زوجج و بيتج و حاولي بكل جهدج انج تطردين هالافكار و الوساوس من راسج ... اشغلي وقتج مع زوجج في شيء يديد ... موفقة ♡

[غلآ نفسي]

حرييييييييييييييم اللي ينكدون ع اعمارهم

الريال زين نشك فيه الريال مب زين نشك فيه

من الفضاوة ومن الهدوء اللي في حياتج تحسين بالشك

نحن الحريم هالاحساس بيذبحنا ان ممكن عنده شي يمكن يسوي شي من وراي دوم نحس بعدم الامان اتجاه الزوج

بس بعد مرور الاياام بتحسين انح ودرتي هالعاده

بس بالفعل اذا درى انج تفتشين فونه ممكن ياخذ موقف ويحط باس وورد وشوي شوي بتخسرينه

ديري بالج

بالتوفيق

[ليلى24]

شكلج تقرين مواضييع الحريم في المنتدى ومتاثرة.. اختي احسني الظن في وتوكلي على الله .. الله ييسر امورج

[dxb_love]

اذا زخج تسوين هالحركات بتكسرين الثقه الي بينكم

والريال اذا انكسرت ثقته بحرمته وخاصة نوع ريلج بيتوتي .. بس تنكسر بيراويج نجوم الظهر

اتعوذي من ابليس وخل عنج هالخرابيط

[Miss PiXy]

الشك يدمر العلاقات اتركي عنج الشك والوسوسه عسب ماتندمين عقب

[حنين روح]

حياتي ...اسمعي نصائح البنات ورجلك يحبج ويخاف الله فيج ....والله يلي كاتبه راح يستوي ....استانسي وَيَا رجلك وانسي موضوع تفتيش بالموبايل .... ولا يستاهل هالمو ضوع تعطيه اهتمام. لان زوجك ماشاء الله عليه شاريكي .

[بسمه دبي]

لا تهدمين بيتج ب ايدج

تقربي منه اكثر واتعوذي من الشيطان والشك اساس الدمار والخراب

الله يصلح بالج

[Ward-uae]

بتكلم معاج بصراحه هل انتي انقرصتي من علاقه سابقة لانه اللي انتي فيه حالة صدمة وفوبيا وهذا الشي يصير رد فعل لتجربة سابقة
الاهم تعوذي من ابليس وتوكلي على الله هو اللي اعلم بالنوايا ويرزق عبده على قد نيته فأحسني الظن بالله حتى يرتاح ضميرج

[~ الح ـشيمه ~]

الله يهديج ويطمن قلبج اختي

بالنسبه للشك انا اشوف انه مرض والتفتيش ف تلفون ريلج تستوي عاده سيئه

تعوذي من بليس وابعدي هالافكار والله يسعدكم

[~شوق~]

كلما اييج احساس الشك تعوذي من ابليس و تذكري مواقف الحلوه لي مرت بينكم... ودوري شغله تنسيج هالشك..كالطبخ كالتنظيف

ربي يحفظكم يارب