زوجي مايشاركني خصوصياته

[مشكلتي]

السلام عليكم ، كيفكم انا اختكم من السعوديه
واحب اراء اخواتي الاماراتيات وعندي فضفضه ابي اقولكم عليها
انا مملكه وزواجي اخر السنه ان شاء الله
زوجي قاعد يبني بيت من قبل لايخطبني وكذاً، اللي قاهرني ان زوجي مهما سولفنا وتكلمنامستحيل يجيب طاري البيت بس يقول العمال كسرو ظهري الحديد كسر ظهري وكذاً يعني ودي يقولي ي زوجتي كيف ابني البيت وكيف تبينه ودي استشارني. باشياء بخصوص البيت واقوله كيف البيت تنسيقه قال مفاجاءه بيعجبك بس لاتقروشيني كل شهر15 الف ريال احط فيه . مافهمت ذي صراحه اش قصده
طيب ابي اعرف هوليه مايستشيرني
هوقالي العفش عليك انتِ بس مجلسي ومقلطي وبيت الشعر انا بضبطها
طيب ودي تستشيريني بالشي ذا كلهه
ماادري هل الرجال هم كذاً،او لا
زوجي مرره مايحب بس قلي مساحات الغرف وعددها وكذا انا افهموني
ودي مثلا يقولي اش رايك وين نحط غرفة الحريم وين نحط المجلس وين غرفة النوم يعني مثلا اش رايك بذا وكذاً
عشان لوسمح الله شفت شي ماعجبني بكره اقوله
مع انه مريحني وكذاً بس المفروض يستشيرني
فكرت البارح اقوله انت ماتستاهلني ولاشي
مشورتكمم بالله
انا عشرينيه وزوجي ثلاثيني
شكراً.

المزيد من آخر المواضيع من نفس القسم:

• كرهت حياتي
• مطلقة و اريد اعيش لحالي
• مشكلتي الفراغ
• مضغوطه وفقدت الامل
• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[Upscale touches]

خليه على راحته يوم تزوجوا وتكونوا في بيت واحد راح يخبرك كل شي والرجال عادتهم ما يحبوا يتكلموا بالتفاصيل شرات الحريم

يريد يفاجئك بالشكل النهائي ويفرحك توكلي على الله واشغلي نفسك بأشياء ثانية وكل شي بوقته حلوا

[~ الح ـشيمه ~]

اختي الريال خبرج الامور المهمه الي هي عدد الغرف وبعض الاشياء الاساسيه

مب لازم يقول كل التفاااااصيل، اولا الرياييل مايحبون يتكلمون وايد بالتفاصيل وثانيا خليه على راحته

وبعدين ماباقي على عرسكم شي.. شاغل باله اموور وااايد العرس وشهر العسل والبيت وغيره وغيره

انتي لاتشغلين بالج .. لاحقه ع التفاصيل وبتبدين رايج وبتتفاهمون ان شاءالله

الموضوع بسيط ومايستحق انج تفكرين وتحاتين .. وهو ماغلط في اي شي .. بالعكس انا اشوف انه عطاج فكره عن البيت بطريقه جيده

فكري انج لازم ماتشغلين بالج في هالموضوع الحين .. اهتمي بنفسج وركزي ع العرس

الله يسعدكم يارب

[غلآ نفسي]

الحين هاي خصوصياته الله يهديج ؟

البيت شي عام وعادي كل من يشوفه ويعطي وياخذ راي

خصوصياته يعني شي خاص فيه هو وبينج وبينه

وهالشي اللي متعبه عمرج عليه باجر يوم تكونين في بيته ما يحط شي فالبيت الا وياخذ رايج

جذي هم الرياييل

لا تنكدين ع عمرج خليج عاديه معاه ويوم تسكنين في بيتج ذيج الساعه عطي رايج

بالتوفيق

[المعآني]

أغلبهم جيه حتى لو خذا رايج عادي تحصلينه يسوي عكسه ههههههههه
عموما انتي تقولين هو يبني فاكيد أمور التقسيم ومرحلتها خلصت وما ينفع التعديل عقب مأ بنى وخلص


و حاليا يبني مافي شي يستشيرج فيه لأنه المخطط أنحط ويالس يتنفذ

و هو عززج وكرمج وقالج التفاصيل وخبرج الاثاث عليج


ليش الحين الدلع وتبين تخربين حياتج وبعدج ما بديتي فيها
ارقي عمرج من الحسد والعين وادعي لج وزوجج الله يقويه ويتمم البيت ع خير

[ميميه88]

تمت الموافقه

[~شوق~]

بالعكس ريحك من التفكير... دامه ثلاثيني عمره فاهم وقادر يضبط الامور .. ودام قالج الاثاث من ذوقج يعتبر انه يشاركج ومهتم لذوقج امام اساسيات البيت معروفه تقريبا تشابه تقسيمات البيوت المعروفه.. لا تعوري راسج لهذي الامر بسيطه حمدلله دام ع طول بتسكني في بيت بروحك الاستقلاليه اول زواج افضل.

ربي يجمعكم على خير ويسعدكم .. دنيا واخره..
سبحان الله وبحمده سبحان الله العظيم

[حرم الحميري]

كل الرياييل جي عشان جي نحن الحريم نعور راسهم عشان يسولنا اعتبار ثانيا هو قالج الباقي لج وانا المجلس والمقلط ومادرس شوه يعني شغل الرياييل عليه والبيت عليج ما جذب والبيت ما جهز اذا جهزز انتي ع طول قولي بروح اجوف عشان اخطط ترتيب الاثاث وقوليله من الحين لاتعترض ع ذوقي انت لك مجالس الرياييل وانا لي البيت والامور طيبه ويوم بيوقلو البيت كسر ظهري قولي الله يعوضك ان شاء الله وهالبيت لعيالنا ولازم نتحمل هني بتلقينه يفكر لمستقبل عياله فيشد حيله وكل ما يطري تعبه من البيت والبنيان قولي ماعليه كله عشان عيالك ان شاء الله ما يحتاجون شي والله يسرلج امورج

[mouzan7mod]

مايصير يستشيرك في البنيان ، لآن لما يقولك الحديد و البلاط و و و معناتها ان خلاص المخطط ما يمكن يتراجع فيه و إذا تراجع ف راح يكسر البنيان الحالي و يخسر نفسه ، ليش مستعيلة ؟ خليه يخلص بيت العمر و ان شاء الله راح تفرحون فيه

[احلى بعفويتي]

البيت بيته موب بيتج صح موب انتي الي دافعه فيه وغير انه مخطط البيت بالمداخل والحمامات من قبل لا يملج عليج
خليها عليه ولا تسالني ويوم حزت السكن بتشوفين كل شي وخلاص بيت ملك شو تبين بعد ..
في ناس يالسه بحجره وحمام ونص بيت في عز الحشره وعلى بداية الممر ولا يقولون شي والله يعوض صبرج خير

[فدا تراب زايد]

انا اشوف ان اغلب المشاكل الي تنطرح مشاكل من ولاشي !!
اتيبون المشاكل حق عماركم

[Ward-uae]

الله يهديج لو شاري البيت جاهز شو بتقولين ؟؟ بيعه!!
هذا بيت مب اثاث يتغير
من يوقع على المخطط صعب التغيير
وانتي شو تبين بعوار الراس وصدعه البنيان خلج بتجهيزات عرسج واستانسي بالعزوبية ��
وراج مسؤولية تنظيف البيت وترتيبه ��

[ريم العسووله]

أنتي شلون بتعيشين معاه باجر اذا انتي من البداية جذي طبعج مب قادرة تتحملين شيء بسيط ؟؟؟!!!

على الصغيرة و الكبيرة راح تقولين له أنت ما تستاهلني ؟؟!!

عشان ما استشارج في البيت تبين تقولين له انت ما تستاهلني و تفتحين لنفسج باب المشاكل؟؟!!

ما أجوف أي خصوصية في هالموضوع أبدا و الريال قالج خليها مفاجأة و في نفس الوقت قال لج عن الغرف و البيت و قال لج الاثاث عليج فليش تكبرين الموضوع ؟؟؟!!!
لا تصيرين معقدة و تتدخلين في كل صغيرة و كبيرة ... يعني لو انتي تبين غرفتج يمين البيت و غرفة العيال يسار البيت و هو بنى العكس راح تطلبين الطلاق ؟؟!!

... بسكم حنة و رنة يا نسوان تخربون حياتكم مع ازواجكم على اسباب مالها داعي الله يهداكم ...