اعطني انتباهكن من فضلكن

[Hamda90]

'' بسم الله الرحمن الرحيم ''

يسعد صباحكن وين ما كنتن خواتي العزيزات في البدايه بعرفكم على نفسي انا عضوه يديده من فتره بسيطه انضميت لها المنتدى كنت ابا افضفض بس ما تجرأت الا اليوم افضفضلكم واباكن تمدلي ايدكن وتعطني من خبرتكن ونصيحتكن، في مواضيع كثيره ما نقدر نصارحبها حد لأنه تكون حساسه شوي او نستحي نتكلم ونطلع عيوبنا عند قرايبنا بس اليووم ودي انفض عمري من كل الهمووم انا عمري 25 سنه عرست بعد ما خلصت جامعه صارلي سنه وتسع شهور من تزوجت . صارتلي المشكله هاي من تزوجت، الحمدالله رب العالمين تزوجت انسان خايف ربه وطيب الله يحفظه، واهله ناس محترمين ونعم بس المشكله عندي اناااا وايد تغيرت شخصيتي من بعد ماعرست استويت منعزله ودوم متضايقه ومكتأبه ماحب اختلط بالناس واحس بثقل يوم ازوور حد او حد ايينا حتى اهل ريلي ما اقعد معاهم الا احيانا ، واهلي في البدايه كنت وايد اسيرلهم اول الشهور بس عقب تموا يلوموني ليش اييهم دووم امي كانت تقولي عيب عليج ما تستحين دوم عند اهلج شو تبين الناس تقول عنا وفضيحه في الريال بحكم بيت ريلي بعيد عن بيت اهلي عقب سمعت كلام الوالده وما صرت اييهم وايد بس انا مب عارفه اتاقلم معاهم شخصيتيه وايد منعدمه استوت وايد اتلعثم في الكلام ما اعرف اتكلم معاهم كنت اجتماعيه وااايد احين لاا ابا اكون اجتماعيه بس يوم اتكلم والا افتح سالفه وااايد انسى حتى السالفه اللي ابا اقولها انساها هالشي خلاني انعزل زياده وغير هذا لين الحين ما حملت لاني اعاني من التكيس من 6 شهوور اتعالج بس حتى العلاج ما اواصل فيه سرعه فقدت الامل وماصار عندي قايليه للحياه قبل كنت مرحه وحبوبه والكل يحب يسولف معايه احين لا احاول ارد شرات قبل واقول خلاص ببدا من باجر وبسوي جيه وبكون واثقه من نفسي ولا بخربط في الكلام ولا بنسى وايي باجر وجنك يابوزيد ماغزيت انحبطت والله ليش وايد انسى ! ليشش ماعرف ماعرف اتكلم شرات قبل؟ لدرجه اني ماخليت اخصائي نفسي في اليويتوب ما تابعته وتميت اقرا عن كتب تطوير الذات بس ماشي فايده ابا استوعب اني عرست واني لازم اطلع وازور الناس واخالط اهل ريلي بس ماشي فايده بنات من منكن من عرست قلة ثقتها فنفسها واثر عليها العرس وتغلبت على هالمشكله ابا اتغير والله اباا اكون مرنه ومرحبانيه واكون واثقه من نفسي عطني خبرتكن


ياريت الكل يشاركني ولا يبخل عليها بالرد 😿

المزيد من آخر المواضيع من نفس القسم:

• قرآن كريم
• هل هو شيء عاديٌّ ..أن نموت !!
• لكم وحشة يا عضوات المنتدي وين ايمكم
• عداوة اهلي لي
• محتاجة حليب الابل ضروري بنت تعبانة
• كيف تتحكم با بيتك عن بعد
• اعطوني نصيحتكم بنات
• وهُم قِطَعٌ في آلة الحياة
• اريد سائقة توصيل من ام القيوين لدبي
• السلام عليكم

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[ام يوسف 82]

صباح الخير
كنت اعني من نفس المشكلة
بس زوجي الحمد لله ساعدني
بالنسبه لاهلي من تاني سنه زواج خصصت بس يوم بالاسبوع اروحلهم ولغايت الان انا سابع سنه بس يوم بالاسبوع لانه امي اللي لفتت نظري وطبعا بيت اهل زوجي كمان بالاسبوع مره ويوم الجمعة صروري عند اهل زوجي من الصبح لغايه المغرب
والحمد لله رب العالمين زوجي ساعدني اني اتخطى الحياء اللي عندي بس بعد انا مش اجتماعيه ولا احب الخلطة
الله يقويكي ويرزقك بالحمل يا رب قريبا ان شاء الله

[M-Alshehhi]

افحصي فيتامين د

[Ward-uae]

انتي كنتي تصورين يومياتج؟
حاولي ترقين نفسج
وكلام الناس اذا عن الحمل وغيره فلا تتحسسين قوليلهم ان شاء الله لما الله بيريد 

[تفاحتي]

والله لو انتي كئيبه
جربي انج تلتزمين بالصلوات وخصوصا الفجر واقري الاذكار
وقبل المغرب اقرا اذكار المسا
والتزمي بالسنن والنوافل بيطير الاكتئاب
والعبي رياضه امشي روحي الجيم روحي الصالون اتعدلي
بتصيرنفسيتج حلوه وسعيده

اما نسيان جيكي ع فيتامين د

والتكيس ادعي الله وحده يشفيج ويرزقج ان شا الله

[sa7el]

ماظن هاي مشكلة اختي ومادري ليش انتي مكبرتنها وتشوفينها مشكلة

شوم اعترفتي ان الغلط منج خلاص عيل ما عليج منا نحن
عليح من رب العالمين

حافظي على صلواتج والقران والأذكار والرقية ،،،، شوي شوي بتتغيرين بإذن الله

[المعآني]

شوفي فيتامين دال
وأهل ريلج اعتبريهم اهلج لاتيلسين بروحج خلج دوم وياهم بتتعودين عليهم لاتستحين من شيء لو ماعندج سالفة بش اسألي عن أخبارهم شمسوين تبون أساعد بشي شو مخططين اليوم
اتعدلي طول الوقت خلج مترتبة وكاشخة هالشي وايد يعدل النفسية
وأهم شي الأذكار ومن اعرض عن ذكري فإن له معيشة ضنكى
أذكار الصباح والمساء وقبل النوم و قبل المغرب والاستغفار والتسبيح والتهليل والصلاة في وقتها

[ميما بيوتي]

شوفي حبيبتي حمدة
اللي تمرين فيه هاذا شي طبيعي اغلب الحريم مرن فيه حتى اذا انكرن يعني
تخيلي الوضع ويايه
انتي تقريبا 24 سنة من حياتج وانته عايشة بجو واحد, بروتين حياة شبه ثابت او ماشي بخط مستقيم, ووياج نفس الناس اللي هم هلج
وكنتي عايشة حياتج بمبدأ لا توري الرياييل عورتج, وشعرة وحده ما تظهر

والحينه انتي في مكان يديد, هلج يمكن لاول مرة فحياتج تنامين بعيد عنهم, ريال شافج بدون شيلة او عباه

هاذي كلها أمور حبيبتي تاخذ وقت حتى تتأقلمين وياها

انتي الحينه شرات الياهل او المراهق اللي يمر بمرحلة البلوغ, يالسة تطلعين من مرحلة اللين مرحلة ثانية يديدة, يبالها وقت اللين تصير حياتج عادية مثل ما كانت حياتج عادية قبل فبيت هلج

ولا تنسين الهرمونات من لحظة الدخلة وهي تتغير

فلا تحاتي

تلعثمج بالرمسة عادية, نسيانج فوق العادي, تغير بشخصيتج بعد عادية

انتي ما تحتاجين لاي شي انتي يالسة تسوينه الحين من فيديوهات او كتب يالسة تقرينهم, انتي تحتايين وقت

بس

وقت

واذا خاطرج تسأليني أي سؤال فانا حاظره, ما يردج الا لسانج

بس أهم شي لا تتضايقين ولا تحاتين مرحلة بتطير وبتعدي
خذيها مني كلمة

[سماءالأفق]

وبالنسبه لتكيسات الرحم اشربي تلبينه مفيييده جدا في معالجةالتكيسات ..

[mouzan7mod]

شوفي كيف علاقتج بربج ..!
حاولي تغيرين من نفسج لآن محد بيغيرج
أهلج إنتي طلعتي عنهم زوريهم بالإسبوع مرة أو مرتين
أهل زوجج تواصلي معاهم عادي
إنتي بإيدج القرار تردين نفس قبل أو لا
و على فكرة إذا تميتي تفكرين بالحمل بتتعقد نفسيتج أكثر
ف تعالجي عادي و لا تفكرين ان العلاج ممكن يسهل الحمل بالعكس توكلي على الله