مفنش من الجيش وحاط حرته فينا

[مشكلتي]

انا تعبت يا ناس ورب الكعبه معرسه وتحتى 7 وحامل في الشهر 6 مشكلتي وهي ابو العيال مفنش من الجيش من سنه ونص تقريبا وسبب الفنش احتاج مؤخر خداماته لتسديد ديونه لانه ما يحب البنك يخاف من الحرام على قوله الوضع صعب ما عندنا بيزات نصرف رمضان على الابواب وأحاول فيه يراجع في طلبات الوظائف الي مقدم فيهن يقول لا بتريا اخاف ازعج المسؤلين وهو دخل للبرزه رمضان الي طاااف طالب ارجاعه لعمله وهو الجيش لين الحين ما ياه رد والحل شو ازعجنا دووم يتشكى من وضعه وانتي السبب وانتي السبب واتحمل من اول ويديد ديون من الناس افكر بعد انتهاء المدارس اروح بيت أهلى تعبت الصراحه من طلباتي بناتي عندي 5 ودوم زعلانات ويتشكن احس انه موب طبيعي احس ان فيه شي والله انى أفكر بالموت من كثر المشاكل معاه ما يتفاهم وحاط حرته فينا شو ذنبا بالله انصحوني شو اسوي وشو الحل معاه حملنا حمل فوق طاقتنا حتى عيالي يحاتون وضع ابوهم

المزيد من آخر المواضيع من نفس القسم:

• كرهت حياتي
• مطلقة و اريد اعيش لحالي
• مشكلتي الفراغ
• مضغوطه وفقدت الامل
• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[المراقبة العامة]

تمت الموافقة
الكلمة الطيبة صــدقة

[khaleejiya]

اختي الريال مضغوط ومتضايق عشانكم ولانه قلق عليكم وعلى مستقبلكم انتي دورج ك زوجه تحبينه وتقدرينه وتقدرين ظروفه الصعبه وتصبرين لا تزيدين همه بكثرة طلباتج وطلبات عيالج

[ماما قصايد]

صح فديتج لاتضغطي عليه يكفي الي فيه ..
المفروض منج تسانديه بكلمة الزينة الطيبة والبنات غيري لهن جو اشغليهن ..
خذي السي في وانتي ردي طرشيها في وايد عيال حلال يطرشون الشواغر يوميا
عندج معزم بالرحيل
والقرار لك
ووظايف ابوظبي
وظايف الاماراتيين
كله بتحصليه بتويتر
حتى موقع وظايف ابوظبي متروووووووووووس وظايف الواحد يقدم ويتوكل على الله ..
واقترحي عليه انتي بعد تساعديه وتشتغلي .او حتى تجارة من البيت ترى احيانا ماتكلف مجرد افكار تخليج تاجرة او حتى مندوبة وانتي في بيتج ..والشغل مب عيب دامه حلال.
كوني معاه سند ولا تكوني انتي هم فوق همه..
وياختي قللي الشكوى لاتشتكين ولا تتذمرين كل حين حقه ولا حق الناس الحمدلله النعمة وايد والرزق وايد يبيله بس صبر ودعاء وقيام اخر الليل والناس نيام وتنحل مشاكلج كلها باذن الله ..

[mouzan7mod]

خليه يقدم مرة ثانية بالجيش دامه مفنش بدون مشاكل أو سوء خلق
خليه يقدم على الدواير الحكومية و القطاع الخاص ولا تضغطين عليه بالمطالب و الله يعينكم و يفرجها عنكم

[سماءالأفق]

فرج الله كربك وقضي ديونكم وأسعدكم دنيا وآخره,
لا إله إلا انت سبحانك إني كنت من الظالمينكرريها في الليل حبيبتي جعل الله لكم من كل هم فرجا ومن كل ضيق مخرجا ,ورزقكم من حيث لا تحتسبوا.

[Yazi.90]

صح فديتج لاتضغطي عليه يكفي الي فيه ..
المفروض منج تسانديه بكلمة الزينة الطيبة والبنات غيري لهن جو اشغليهن ..
خذي السي في وانتي ردي طرشيها في وايد عيال حلال يطرشون الشواغر يوميا
عندج معزم بالرحيل
والقرار لك
ووظايف ابوظبي
وظايف الاماراتيين
كله بتحصليه بتويتر
حتى موقع وظايف ابوظبي متروووووووووووس وظايف الواحد يقدم ويتوكل على الله ..
واقترحي عليه انتي بعد تساعديه وتشتغلي .او حتى تجارة من البيت ترى احيانا ماتكلف مجرد افكار تخليج تاجرة او حتى مندوبة وانتي في بيتج ..والشغل مب عيب دامه حلال.
كوني معاه سند ولا تكوني انتي هم فوق همه..
وياختي قللي الشكوى لاتشتكين ولا تتذمرين كل حين حقه ولا حق الناس الحمدلله النعمة وايد والرزق وايد يبيله بس صبر ودعاء وقيام اخر الليل والناس نيام وتنحل مشاكلج كلها باذن الله ..

[غلآ نفسي]

اللي عليج اتسوينه ما تطلبين منه شي

لا تقوليله هات وييب وعطني هالفتره حتى لو محتاجه سكتي

وعيالج المفروض تقولين لهم ان بابا مضغوط لا تزعجونه ولا تتشكون جدامه

سايريهم والمفروض ما يعرفون عن وضع ابوهم اذا هم صغار مب بالغين يعني

ومب لازم اذا رمضان يعني السفره مليانه وحاله

عادي اي شي يطلع منه اكلوه .. اكيد الريال يعرف ان بيته يبون لقمة

والريال مضغوط خليه في حاله ابد لا تقولين له شي

دوم خلي ع لسانج ان شاء الله تتحسن امورنا .. ان شاء الله تتوظف .. عطيه امل

وخليه يقدم فالجيش او مكان ثاني واصبرو

صلي اخر الليل وادعي ربج خلال شهر بتشوفين العجايب

صدقيني اصبري بييج الفرج ان شاء الله

هالياهل اللي في بطنج بييب لكم رزق

احسني الظن بالله

ولا تضغطين ع ريلج

بالتوفيق

[ماحد شراتي]

ربي يفرج همج الغاليه

نصيحه الريال يريد كلمه طيبه قوليله ان شاءالله بتتحسن امورنا واعرف انج مضغوطه من العيال وغير انج حامل لكن ما باليد حيلة عصبيتج وحنتج ماراح تقدم ولا تاخر .. وانتي حاولي تفهمين البنات اذا كانن كبار انكم تمرون بظروف وهيه فتره وبتعدي

[عيووووون]

الله يفك كربتكم
لا اطفشين ريلج من البيت ولا تتخلين عنه بالعكس هالظروف الريال يكتشف حرمته والعكس

تعرفي ان هو مسؤوليته اكبر من مسؤوليتج والضغط اللي فيه مب من فراغ لا تزيدين عليه بالحنه والريال شكله عزيز
ومن يعلم شكله يدور على وظيفه بدون ما تدرين
على بالج عو مرتاح من وضعه !!!
ما يفكر فعياله ولا البيبي اللي ياي فالطريق
علمي بناتج ان في ظرف تمرون فيه ويهفف شوي
مب لازم تضغطوا مصاريف ع الريال ادري البنات لهن طلبات ويا كثرهن بس متى بتعوديهن وتربيهن انه مب كل شي يبنه بيحصلنه او انهن يراعن ظروف الغير عشان لا تنزرع فيهن الانانيه
غرسي في بناتج مبادي فهالظروف يتعلم فيهااا
كيف تفكرين برمضان من اللحين وتاحتينه يا الله اختي الله اكرم من عباده
تقدري تسوين اي شي تزورين ارحامج كل يوم عند حد
ادري حامل وضغط ومب رايمه تفكرين وتاخذي المسائل بحساسيه وزعل
بس فكري بعقل شوي لا تجمدي كل شي وتقولي ما نقدر ولا نقدر وزادن الديون لا ترومي وتقدري انتي بتشلي ريلج وبتساعديه خذي دين مبلغ لفتح مشروع وبدي مشروع تجاره ورجعي الدين شوفي التاجرات شو اكثر شي يمشي سوقه او عرضي من يبا مندوبه لمشترياته وخذي عموله بسيطه لسد قوت يومج
في اشياء بتطلع انتي اروحج لو فكرتي شو بتسوي بتستغربي كيف ين في بالج

لا تعطي للتذمر وقت ويعدي يومج بنوح وشكاوي وضيقه ونغص لااا خلج حكميه وتصرفي صح وثبتي لريج انا معاك فالسراء والضراء

اتمنى يتغير تفكيرج ويكون ايجابي

[bdbridedress]

الله يفرج همكم

[f.angell21]

هلا الغاليه

فديتج حبيت اقولج انه خليه يقدم في دورة اغرار شهر 9 تقريبا وان شاء الله خير وخليه يقدم ف اكثر عن مكان وأنتي حاولي بعد تقدميله من النت عَل وعسى ماتدرين وان شاء الله خير وحاولي تونسينه وتنسيه وخلي العيال يونسونه عشان ينسى مافي ريال ما بيضايج من هالحال فديتج ما شاء الله مصاريف البيت والحرمه والعيال ومدارس ورمضان والعيد كيف ماتبونه يضايج ويحاتي ..

الله يفرج همه ويبعد عنكم الضيج ..
الله يرزقكم يارب ..

[ريم العسووله]

اختي هو في الرخاء ما قصر عليكم و تسلف عشانكم... و اللحين في وقت الشدة تتشكون منه بدال ما توقفون معاه !!؟

خففوا طلباتكم ... علمي عيالج مب كل شيء يبونه يوصل لهم ... الدنيا تتغير و الحال يتغير ... لازم الواحد يعود نفسه و يأقلمها على التغيير ...

هالفترة حاولوا تخففون من طلباتكم و خذوا الاساسيات الي تحتاجونها و مب شرط تاخذين نفس الاغراض الي تاخذينهم كل رمضان ... اللحين وضعكم تغير لازم تراعين ريلج شوي لين ما الله يفرجها ...

المشكلة ان في ناس ما تتنازل للاسف و لا يتحملون الظروف المادية و يبون الشيء يوصل لهم مهما كانت الظروف بدون مراعاة الغير ...!!

اختي الديون مب شيء بسيط ... و واضح ريلج انه انسان ما يحب يحط في ذمته شيء ... لازم تشجعينه على هالتصرف ... لان في بعض الناس ياخذون ديون و ياخذون ديون بدون لا يهتمون و اهم شيء عندهم انهم يعيشون و ذمتهم وسيعة !! ...
الواحد ما يضمن حياته ... و الدين يبقى في رقبة الانسان لي يوم الحساب ... لا تظنين المسألة سهلة ... في مثل يقول الدين هم و لو درهم ...

و دايما تذكري ان زوجج عمره ما قصر عليكم قبل لا يفنش ... و كله الي سواه و الي قاعد يسويه عشانج و عشان عيالج ... حطي نفسج مكانه ... لا وظيفة و فوق هذا ديون و بيت و عيال و متطلبات !! كم الواحد يتحمل


و اللحين انتي و زوجج تحت اختبار من رب العالمين ... اوقفي مع زوجج و سانديه لين ما رب العالمين يفرجها عليكم ... بدال ما تحاتين رمضان و اغراض رمضان و اغراض العيد ... حاتي ريلج و الديون الي تتراكم عليه عشانكم و صحته و اعصابه ... و خذي رمضان فرصة للعبادة و الدعاء ان ربكم يفرج كربتكم قريب و تنحل كل اموركم ...

و تذكري دوام الحال من المحال و ربنا قال في القران ان مع العسر يسرى ..

[بسمة فجر]

الله يفرج همكم عاجلا غير آجل
مثل ما قالو البنات اصبري ووقفي مع ريلج في ضيجته
و ان شاء الله فترة و تعدي
و حاولي معاه بالاسلوب الطيب انه يراجع و يقدم على وظيفة يديدة و إن شاء الله بيحصل
بس لازم يتحرك و يجتهد في طلبه و يراجع الدوائر
بالتوفيق

[حياتي توأمي]

الله يفرج همهكم ويرزقكم من واسع فضله وكرمه